Mattĕo 7
7
Dèsèkô̆ni Dècirraphame
(Lŭka 6.37,38,41,42)
1“Cirra ḿè, cab́ô̆htè thĭ kè tè b́è cirra ńò nu. 2Manè̄ kòd́òdo dō, acab́ô̆ thĭ cirra cadè̄ nu thĭ kèb́è cirrakò̆ gōnu, kîd́ò̆ acab́ô̆ thĭ gô thĭ htè̆ dè adĕ nu, thĭ kô gôcahtè̆cab́èkò̆. 3Na tcahtî ma dèkônô aò nè thè̆buwe agādŭ bu kî no do gomohtani ma zegle aòkèka na gādŭbu tòb́ò̆ ńò nè̄? 4‘Ibò̄ jè khwèhtakè̆ dèkônô aò na gādŭbu,’ ńò d́ò za ma nè thè̆buwe do nè̄? Tcabò̄, zegle òthè̆ na gādŭbu nî̄! 5Nè, awî tòpòkho, khwèhtaphlòkè̆ ŭsu zegle aò na gādŭbu; kîd́ò̆ b́ĕnu na gā tcahtî hlĭphru d́ō nè gè̄ khwèhtakè̆ zakò̆ dèkônô aò nè thè̆buwe agādŭ bu nu.
6“Dè atcahtĭ nu i ḿè htwi tòcò ḿè; kîd́ò̆ hwĕladē ḿè lo mòrra htò ahlò̆mò̄ ḿè; mè tèb́è ńò agî̄ jîhta khè̆hta hwă akho, akā b́adebe ane kî ake e lahlèlab́a thĭ d́òbĕ.
Dèthèb́è̆ Akhoaă
(Lŭka 11.9-13)
7“Dabò̄, kî dè kī ikò̆ thĭ; wāhlèbò̄, kî thĭ gā pahtîkò̆; tòklòbò̄, kî dè kā b́ăhtanikò̆ thĭ. 8Manè̄, bija adadè gŏ abwè nib́è tèpwè; kî awāhlè dèbwè gā pahtî tèpwè; kî atòklò dèbwè nu, dè kā b́ăhtanikò̆ cè. 9D́ŏ thĭ klè̆ nu, apho da a toko d́ō, akī iwè̄ cè lo òbò̄ dèbwèbwè ā? 10Ḿî̆dîḿî ńò za gā da a dāpho d́ō, akī iwè̄ cè wu òbò̄ dèbwèbwè ā? 11Mègōnu thĭ nu, thĭ ḿî nòthò̆ akî̆kkèpho hnò̆nu, thĭ thîhè̆ tepwè aki ib́è aphoali dè aè tòcò nu d́ō, thĭ Pa aò d́ŏ Mò̄kho dèbwè kī i d́okhlŏkò̆ bija ada Cè tòcò dè è pwĕdimi b́ĕ!
Dèhmèla Aglobu
12“Mègōnu, dè arră htè thĭ thaèni bija gè mèni thĭ nu, mènibò̄ bija bija. Manè̄, ajo ḿî dèhmèla kî prò̆fèt tòcò adèthôdèthò̆ aglobu lò.
Khòd́ĕda Aîhnè̆pho
(Lŭka 13.24)
13“Lenībò̄ khòd́ĕda aîhnè̆pho abu. Manè̄ kò̄ d́òdo dō, khòd́ĕda akhò̆ kî klè adoakhò̆ ḿî adonī d́ŏ dèkè̆dèô aklè̆ nu, kî bija alenī abu òèòò d́o. 14Khòd́ĕda adonī dèò aklè̆ dubu ḿî aîhnè̆pho kî aba, kîd́ò̆ alenīkô ḿî ò tîkîpho lò.
Thoamu kî Athè
(Lŭka 6.43,44)
15“Sòibò̄ thĭ ne kî prò̆fèt aplè kò̄ òhta htè alehtî thĭ, akô̆athò thŏphe, barasă d́ŏ atha bu ḿî htwimi khajab́ô aăwūăthèphlè dè tòcò nu. 16Thĭ gī thîhè̆ikò̆ cè tòcò kî zò phò̆ zè thè. Bija d́ebò̄ thobiscithè d́ŏ dèscu amulò nu ā? Ḿî̆dîḿî ńò thod́ohtĭthè d́ŏ dèscu amulò nu ā? 17Cab́ô̆ gōnu akhò̆, tho awî gô̆ ab́ò̆ thèhtai thothè awî, kîd́ò̆ tho adî wî ńò thèhtai thothè adî wî ńò. 18Tho awî dè thèhtai za tè thè adî wî ńò ńò, kîd́ò̆ tho adî wî ńò dè thèhtai za thothè awî ńò ńò. 19Tho gô̆ amu, htè adè thèhtai dèthè awî ńò nu kè̄ b́è gô̄kè̆, kî kè̄ b́è hwĕnīkò̆ hmî aklè̆. 20Dèmè ane gōnu d́ō, thĭ kî thîhè̆b́èkò̆ cè tòcò kî zò phò̆ cè thè.
Jî Dî Thîhè̆ Thĭ Ńò
(Lŭka 13.25-27)
21“Bija ajo Jè B́ĭcè, B́ĭcè tòcò nu, tè b́è ze gē lenīb́è Mò̄kho Ahtĭage bu gô̆ abwè ńò; agē lenīb́è Mò̄kho Ahtĭage ḿî bija htè amè Ja Pa aò Mò̄kho dèbwè adèthaèni tòcò nu lò. 22D́ŏ muni dini nu, bija òè̆bwè kò d́òkò̆ Jè, ‘B́ĭcè, B́ĭcè! Wò tò d́òdòlògè dè Ni mi abu ńò ā? Kî wa da hna hèhtagè dèscidèhnè Ni mi abu ńò ā? Kî wa dè mègè dèbòdèba pwĕdimi Ni mi abu ńò ā?’ 23Kîd́ò̆ b́ĕnu Jò d́òphlò̆htakò̆ cè tòcò; ‘Jî dî thîhè̆gè thĭ taplă ńò; sè dòbò Jè, thĭ htè amè dèkî̆kkèmèhlò̆ tòcò nu,’ Jò kò d́òkò̆ cè do.
Dèd́ò̆htô Akŭdu
(Lŭka 6.47-49)
24“Mègōnu d́ō, bija asòkhĕńe Jè dèjî̄b́è ajo tòcò kî amèkô akă gŏ abwè nu zi gī ḿîkò̆ acab́ô̆ bija ablî̄abla htè aprahtagè ahi sò akho dèbwè nu. 25Kîd́ò̆ hwè zula, htĭ dotòklò̆ kî Gīlli dobō nòthò̆, hi anu dawa de gephlò b́è ńò; manè̄ kòd́òdo dō, akhahtî d́ò̆lăhmegè sò akho.
26“Kîd́ò̆ bija asòkhĕńe Jè dèjî̄b́è ajo tòcò barasă adèmèkô akă ńò gŏ abwè nu, zi gī ḿîkò̆ acab́ô̆ bija agudu htè aprahtagè ahi lothĭḿikho dèbwè nu. 27Hwè zula, htĭd́otòklò̆, gīlli dobōb́è d́ō agephlò tèpwè, kî akè̆aôsôgè.”
28Kîd́ò̆ b́ĕ Jezŭ adèjî̄b́è ajo tòcò gudu hwă nu, bija aboahò htèdômô̄dahmă nigè Zè dèthôdèthò̆ ale. 29Manè̄ kòd́òdo dō, Cò d́òŭd́ò̆sagè lōwa tòcò acab́ô̆ aphlŭathere ò dèbwè nu, tè b́è acab́ô̆ Skrĭbāpho tòcò nu ńò.
Currently Selected:
Mattĕo 7: GRNT21
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Geba Roman New Testament © Bible Society of Myanmar, 2021.