Mattĕo 6

Dèigetcage

1“Sòibò̄ thĭ ne cab́ô̆htè thĭ gè̄ dè mè dè htè ab́èilani thĭ tòcò bija ahlò̆mò̄ d́ŏ bija gā tcahtî thĭ è̆ anikhĭ nu ḿè; thĭ gè̄ mè ma gōnu d́ō, thĭ gī di nib́è tèpwè thĭ sô thĭ hlè̆ d́ŏ Pa aò Mò̄kho nu ńò.

2“Mègōnu d́ō b́ĕ ni igetcage bija nu, u ḿè khaja bija hlò̆mò̄ acab́ô̆ bija awî tòpòkho mè d́ŏ sinagŏgā kî klèdisci abu, cab́ô̆htè bija ko d́ŏ ka j́a cè nu ḿè; jò d́ò thĭ adî̄ahma, zi nib́è htŏ zô sô zè hlè̆. 3Kîd́ò̆ b́ĕ ni igetcage bija nu, nu cukhò adèhtwè mè danè̄ nu, i ḿè nu cukhò adîcî thîhè̆kô ḿè. 4Cab́ô̆htè nè dèigetcage kòòhuòzòbò̄ nu, kîd́ò̆ na Pa htè atcahtî dèhudèzò aklè̆ dèbwè kī igekò̆ nò sô nè hlè̆ nu.

Dèdathèb́è̆

(Lŭka 11.2-4)

5“Kîd́ò̆ b́ĕ thĭ thèb́è̆hta nu, mè ḿè acab́ô̆ bija awî tòpòkho, htè ab́èlò̄ sò̆hto thèb́è̆ d́ŏ sinagŏgā kî klèdisci abu, cab́ô̆htè bija gā tcahti cè tòcò nu ḿè; jò d́ò thĭ adî̄ahma, zi nib́è htŏ zô sô zè hlè̆. 6Ḿî nè nu, b́ĕ nè thèb́è̆hta nu, genī ni hid́obu, kîd́ò̆ glè̄b́i hwă na khaglè̄, thèb́è̆hta huzòbò̄ na Pa, kidò̆ na Pa htè atcahtî dèhudèzò aklè̆ dèbwè, ki igekò̆ nò sô nè hlè̆.

7“Kîd́ò̆ b́ĕ thĭ thèb́è̆hta akhî nu, jî̄b́è òèòò ḿè acab́ô̆ bwèthŭkupho tòcò nu ḿè; manè̄ kòd́òdo dō, zo gomo zi jî̄b́è òè khaĺè dè gò̄ sòkhĕńekò̆ ze lē nu. 8Mègōnu d́ō, mèbò̄ ḿè acab́ô̆ cè tòcò nu ḿè. Manè̄ kòd́òdo dō, thĭ dèsè̆ da hnî̆ńò, thĭ Pa thîhè̆ htŏ dè aloba thĭ nikhĭ ḿî danè̄ nu. 9Mègōnu d́ō, thĭ nu, thèb́è̆htabò̄ gōjo; Ŏ wa Pa, aò d́ŏ Mò̄kho nu, Ni mi kèb́è d́ò̆bò̄è atcahtĭ tîkî. 10Ni htĭ Ne ge gō do d́ò̆bò̄è tîkî. Acab́ô̆ dèmè ane htĕ Na tha d́ŏ Mò̄kho nu, dè gè̄ mè dò̆bò̄è ane d́ŏ Lākho akho jo tîkî. 11Khŏno dini khòwè ilabò̄ wa dèa toko tîkî. 12Kîdò̆ b́ăplèbò̄ wè dèkèḿè, acab́ô̆ wa b́ăplè bija amèkèḿè wa tòcò akhò̆ nu tîkî. 13Kîd́ò̆ leihŭ ḿè wa d́ŏ dèhnakă aklè̆ ḿè. Ḿî mèhlô̆htabò̄ wa d́ŏ dèkî̆kkè aklè̆ nu tîkî.

14“Manè̄, b́ĕ thĭ b́ăplè bija tòcò adèkèḿè nu, thĭ Pa aò d́ŏ Mò̄kho dèbwè ḿî ḿî ka b́ăplèkò̆ thĭ dèkèḿè tòcò nu. 15Barasă thĭ ta b́ăplè ma bija adèkèḿè ńò d́ō, thĭ Pa ḿî ḿî gā ta b́ăplè tèpwè thĭ dèkèḿè ńò ńò.

Dèthèhlô̆ Ab́èkja Dèd́u Dèadèò̆

16“Kîd́ò̆ b́ĕ nu d́u dèadèò̆ nu, tcalathôj́ô mè acab́ô̆ bija atòpòkho tòcò mè nu ḿè; manè̄ kò̄ d́òdo dō, zè mè thĭwi zu mūkă bu cab́ô̆htè bija gā tcahtî cu d́u dèadèò̆ nu. Jò d́ò̆sa thĕbwe thĭ, zi nib́è htŏ zô sô zè hlè̆. 17Ḿî nè nu, b́ĕ nu d́u dèadèò̆ nu, thôphrô no ko dèhnŭẃi kî ŭbla nu mūkă; 18cab́ô̆htè bija gā da tcahtî nu d́u dèadèò̆ ńò, ḿî na Pa aò dèhudèzò dèbwè gā tcahtî thîhè̆bò̄ lò nu, kîd́ò̆ na Pa atcahtî dèhudèzò klè̆ dèbwè ki igekò̆ nò sô nè hlè̆.

Dèlīdobwîthè̆ d́ŏ Mò̄kho

(Lŭka 12.33,34)

19“Lè̄dîhtî̆ge ḿè thĭ nikhĭ dèlīdobwîthè̆ d́ŏ Lākho, htè d́ŏ htalaî kî phè̆pu alō za, kî dŏ bija a ahumèkè̆dè b́aphlò̆ lenī za abu ale jo nu ḿè. 20Ḿî lè̄dîhtî̆gebò̄ thĭ nikhĭ dèlīdobwîthè̆ d́ŏ Mò̄kho, htè d́ŏ htaĺaî ḿîwî, phè̆pu ḿîwî, ta alō za ńò, kî d́ŏ bija ahumèkè̆dè ta b́aphlò̆ lenī za abu ńò alle nu. 21Manè̄ kòd́òdo dō, b́ĕ nè dèlīdobwîthè̆ ò alle nu, na tha ò kôkô.

Neb́î̆cè Adèhlî̆

(Lŭka 11.34-36)

22“Na gādŭ ḿî ne neb́î̆cè adèhlî̆, na gādŭ gî̄ hlî̆ ma d́ō, nî neb́î̆cè thèd́è̆bwè gî̄ hlî̆kò̆. 23Ḿî na gādŭ kò zòbra ma d́ō, nî neb́î̆cè thèd́è̆bwè kò òkò̆ dèkhiklè̆. Nè dèhlî̆ aò nu bu gi khi ma d́ō, nè dèkhi nu agī zî̄kò̆ pwedè̄ lò!

Kib́ĭcè Ahtĭage

(Lŭka 16.13; 12.22-31)

24“Bija da khazô za ab́icè gībwè ńò. Manè̄ kò̄ d́òdo dō, zè gè̄ htèkè̆htèô dèbwè kî b́èlò̄ alewe dèbwè, ḿî̆dîḿî ńò, zè gè̄ mèkôkò̆ dèbwè akă, kî htèkè̆kò̆ alewe dèbwè. Thĭ da khazô za Kib́ĭcè kî mammon taplakhă lò ńò.

25“Mègōnu d́ō, jò d́ò̆sa thĭ, thĭ dèò anikhĭ b́èhjŏb́èma ḿè thĭ ka a b́è ò̆b́è danè̄ nu ḿè, kîd́ò̆ thĭ neb́î̆cè anikhĭ, thĭ gô̄ kô̆ gò̄ thò b́è danè̄ nu ḿè ḿè. Gè dèò do dokhlŏlĭ mè dèadèò̆ ńò ā? Kîd́ò̆ ge neb́î̆cè nu do dokhlŏlĭ kî dèkô̆dèthò ńò ā? 26Tcabò̄, htŏphojōli d́ŏ gīlliklè̆ nu, ada bā b́ukhwĭ ńò, atè kèb́u ńò ńò, atò tònīge phăbu ńò ńò; barasă thĭ Pa aò d́ŏ Mò̄kho dèbwè b́oa tèpwè cè. Thĭ lī thĭ bwî to dokhlŏlĭbò̄ cè tòcò azî̄azô̄ ńò ā? 27D́ŏ thî klè̆ nu, akŏhtakjala kî amè htô̆hta za ane deble òbò̄ dèbwèbwè ā?

28“Kîd́ò̆ thĭ dèkô̆dèthò anikhĭ, thĭ b́èhjŏ manè̄? Tcab́ò̄, lĭliphò̆ d́ŏ pra bu nu kèhta cadè̄? Adè mèdè ńò, ade hlehlu ńò ńò. 29Barasă jò d́ò̆sa thĭ, Sòlòmòn hnò̆nu, d́ŏ zò dò ze the aklè̆, zô dô kô̆ dò thò kèhta acab́ô̆ phò̆ ajo tòcò aklè̆ dòphò̆ ńò. 30Kîd́ò̆ pra bu ami, htè aò khŏdini kî mòbĕ ab́èhwĕnī hmî abòbu nu, Kib́ĭcè gō d́okô̆d́othò cè pwĕ gōnu d́ō, ŏ thĭ, adèb́u scipho tòcò, d́olĭ kî anu, zo to d́okô̆d́othò mèthĭ ńò ā?

31“Mègōnu d́ō, b́èhjŏ kî d́ò ḿè ‘Wa ka ab́è danè̄? Wò kò ò̆b́è danè̄?’ ‘Wô gô̄ kô̆ gò̄ thòkò̆ danè̄?’ nu ḿè. 32Manè̄, alô wāhlè dè ajo lŏcăcè ḿî bwèthŭkupho lò. Dè ajo tòcò b́è ò thĭ nikhĭ nu, thĭ Pa aò Mò̄kho dèbwè thîhè̆ tèpwè. 33Mègōnu d́ō, wāhlè ŭsubò̄ Kib́ĭcè Ahtĭage kî Zè dèdî̄dèhma, kî thĭ gī nib́èkôkò̆ dè ajo lŏcăcè. 34Mègōnu d́ō, b́èhjŏ i ḿè mòbĕ anikhĭ ḿè, ḿî mòbĕ gè̄ b́èhjŏ i d́ò̆è anikhĭ. Khŏdini anikhĭ, khŏdini adèbadèsè̆ sô̆isèi htŏ tèpwè.

Currently Selected:

Mattĕo 6: GRNT21

Highlight

Copy

Want to have your highlights saved across all your devices? Sign up or sign in

Learn More About Geba Roman New Testament

Mattĕo 6

Popular Bible Verses from
Mattĕo 6

Bible:

Karen, Geba

Version: Geba Roman New Testament - GRNT21

Mattĕo 6

Mattĕo 6

Popular Bible Verses from Mattĕo 6

Bible:

Karen, Geba

Version: Geba Roman New Testament - GRNT21

Mattĕo 6

Popular Bible Verses from
Mattĕo 6