Thodŏpho 1

Spirito Tcahtĭ Adèaḿăkhai

1Ŏ Theò̆philo:

Hlĕ Cè aŭsu tèb́è abu jò d́ò̆sa htŏ thĭ gajă Jezŭ mègè kî thôithò̆igè dè tòcò awîakè̆ hlĕ akăhtî nu, 2kî htô̆do muni dini htè Cè b́è phî̆htagè d́ŏ Mò̄kho tòcò nu, d́ŏ Spirito Tcahtĭ abu Ci ilagè bōhmubicè htè Zô rôhtagè Dèhmèla tòcò nu. 3Za kha dèthĭ kî htaboge hwă alekă, Cò pòhtahtî lōwa òè̆pla kî d́ò̆sagè lōwa Kib́ĭcè Ahtĭage awîakè̆ d́ŏ ani lwīscĭ athè̆ lwīscĭ adābu, kî d́è̆lî̄hta Cò ò thôḿô̆we tèpwè nu. 4Kîd́ò̆ b́ĕ Cò òjīplo lōwa akhî nu, Zu htulahmèlagè lōwa tòcò, “Hèbābò̄ ḿè Jerŭsalèm u ḿè, òsô̆wô̄i B́ĭcè Pa adèŏlăphlala akī i thĭ, htè thĭ thîhè̆b́è d́ŏ Jò lòmò bu tòcò nu. 5Zowănnī ŭsab́ăi thĭ kî htĭ, ḿî thĭ nu, tò òjî̄ ni òjî̄ thè̆ ńò, thĭ kè̄ b́è ŭsab́ăikò̆ kî Spirito Tcahtĭ,” Cò d́ò lōwa tòcò do.

B́ĭcè Jezŭ Gehta d́ŏ Mò̄kho

6Mègōnu bija ale ladēplo lōwa tòcò d́ògè Cè, “Ŏ B́ĭcè, khŏnujo Ni gī ige Israè̆lpho zi htĭ ze ge ā?”

7Ḿî Cò d́ògè lōwa tòcò, “D́ŏ Apa aphlŭathere abu, Ze bela akhîagla cadè̄ nu, thĭ thîhè̆ akhwè tò ò ńò. 8Barasă b́ĕ Spirito Tcahtĭ gā lahtî thĭ tapla nu, thĭ gī nib́è tèpwè aphlŭathere kî thĭ gā khab́èkò̆ ji nikhĭ thè̆thî d́ŏ Jerŭsalèm u kî Judĕage thèd́è̆ge kî Samarĭa, htô̆do Lākho kŭdu nu,” Cò d́ò lōwa tòcò do. 9B́ĕ Cò d́ò hwă gōnu Cè b́è zāhtagè d́ŏ lōwa tòcò amūkă ahlò̆mò̄ kî dè̄tob́o lagāb́igè Cè.

10Kîd́ò̆ b́ĕ cè tòcò tca dîgrînî thebĕ d́ŏ Mò̄kholè̄ nu, tcabò̄, bija akô̆athò scid́ŏ ab́ôthădisci gībwè sò̆hto ò za za wa, kî cò d́ò lōwa tòcò, 11“Ŏ bija Galilĕapho tòcò, thĭ tcahta ma d́ŏ Mò̄kholè̄ nu nè? Jezŭ htè ab́èzāhta thĭwī thĭ d́ŏ Mò̄kho dèbwè jo gā lakò̆ tapla be mè acab́ô̆ Ze gehtagè jo nu,” Cò d́ò lōwa tòcò do.

Mattĭā B́èrôhta

12Mèhwă cè tòcò ò d́ŏ Òlĭvo Khòlò̆kho kî gegè d́ŏ Jerŭsalèm u htè aòjîhlè lōwa mai klăḿè̆ nu. 13B́ĕ zo donīge hwă u bu nu, za htagè d́ŏ hi agò̄hta dòdò htè aò ḿî Petru, Zowănnī, Zăkomo, Andrĕa, Philĭpo kî Tomăzo, Bartolomĕo kî Mattĕo, Zăkomo Alphĕu apho, kî Simŏnè Zelò̆ta kî Jŭdas Zăkomo apho nu. 14Cè tòcò ladējīplo lōwa dèjwè dèjwè kî thub́uthèb́è̆gè d́ŏ thotha dèmè̆ lò abu, ploplo kî amihmu tòcò, Marĭa, Jezŭ amo nu kî Cè thè̆buthè̆we tòcò nu.

15Tò òjī ni òjî̄ thè̆ ńò, bija ab́udè tòcò ladēplohlè lōwa, bija abwè ò dègèjè gīscĭ. Petru wè̄sò̆hto kî d́ò, 16“Thè̆buthè̆we tòcò, Cè Tcahtĭ kè̄ b́è pĕhtazòhtab́è acab́ô̆ Spirito Tcahtĭ jî̄b́ègè d́ŏ Dăvid alòmò bu ab́èkja Jŭdas, aleihŭgè bija agò̄ phò Jezŭ tòcò klè nu. 17Cè ḿî anib́èkô wa kă agè̄ mè B́ĭcè adèphîdèmè dèbwè nu.”

( 18Hô̆ htè zè mèni d́ŏ dèmè akî̆kkè abu nu, zî bwî hwă lākho taklaẃa d́ō, za lakhu sòlako kî thĭgè b́ĕ abu nu. Zu phŭ bohtè̆phagè kî ze bwē zu phŭ htèlwè̄ lahlòlōgè nu. 19Jerŭsalèm ubupho lŏcăcè thîhè̆kô htô̆ bija htă lākho anu ami “Hakè̆ldama,” ahtabohtab́ă ḿî “Dèthwi Alākho.”)

20“Ahwelagè d́ŏ Psălmo acè abu nu,

‘Zi hi Za phă gî̄ ḿî d́ò̆è dèthutucu ale,

kî bija kò tò ò d́ò̆è d́ŏnu dèbwè̆ ńò.’

Ahwela kô we;

‘Kî Zè dèphîdèmè nu,

bija alewe gî̄ phî d́ò̆è.’

21-22“Mègōnu, wè b́èrôhta bija htè agā khaplob́è wa thè̆thî d́ŏ Jezŭ adèhtaboge anikhĭ nu. Cè kè̄ b́è ḿî bija htè b́ĕ B́ĭcè Jezŭ hèhtahèla we wo kho wè klè̆, gohta hlĕ Zowănnī ŭsab́ăhtî̆ amuni htô̆ dola Ze gehta Mò̄kho nu, d́ŏ bija tòcò jo aklè̆ aòkô wa kă dèbwè lò,” cò d́ògè do.

23Mèhwă za bahtagè ami gībwè, Zŏzè htè bija jo ami Barsăbas, htè ami ḿîkô Jŭstus nu kî Mattĭa. 24Cè tòcò thèb́è̆hta kî d́ò, “Ŏ B́ĭcè htè athîhè̆ bija lŏcăcè atha, d́è̆lî̄htabò̄ ajo gībwè aklè̆, Nò rôhtagè 25agè̄ mè Nè dèmè d́ŏ bōhmubicè tòcò aklè̆ Jŭdas htè ahèbā kî legè d́ŏ alleaklè dèbwè ablô nu,” cò d́ògè tòcò do. 26Cè tòcò b́o Mè̆ kî aladēgè Mattĭa alò, kî cè b́è lè̄plogè bōhmubicè scidèbwè aklè̆ nu.

Currently Selected:

Thodŏpho 1: GRNT21

Highlight

Copy