Malakay 3
3
1 Nyùy Tàr woo Taà Mànjòŋ wáa bìnèr kfə́ jii, «Vèn yuúrí, e yù, m wíy tsənsí ŋgaà wom ntum fo mǒ mbìy, é wù wiy, e nàŋsín dzə́ə. Á bèy, é Taà Saʼ wo vèn shiyì nèn sàsìn, e bvə̀y e wun lav cù. Rúrú, ŋgaà ntum wo wù fiʼtì *mensaŋ mem, a vèn tiir vifií shó, sí wiyì.
2«Wù wíy wìy e kishiíy kee shó, é boy la? Wù wíy sàsìn, e bvəy, é goʼ a tiy la e wun shwin? Wù wíy a dzə moo və́y wo á ton kisha sho, é bo á sheŋri, a dzə moo shuv wo wú fəʼ kijuŋ. 3Wù wíy wìy, e shèŋrì rám Levi mo taà kilàm shèŋrì kisha ke fəvír kí e və́yí. Rúrú, wù wíy a shèŋrì áwune mo á shèŋrì *kisha ke mbàm ke baar wùn à ke fəvír kí, e dù meé mo áwune wíy yiì cu yee réŋé e mò woo Nyùy Tàr. 4Á bèy, é m nèn bìnsí cú wìr veé Juda wùn à yé wìr veé Jerusaleme, réŋréŋ mo mò‑oò bínsi fo mbìy, e kèʼ fo yàŋgùʼ.
5«M wíy wìy e věn mvəm, e tiír ven é kibàʼ ke nsaʼ. M yòʼ wíy a mèʼmèʼ, e bó a toʼ kinyè ké wìr ve á yòʼ ghvə́m mo. M toʼ ké aŋgàa ŋgàŋ, e toʼ ké wìr ve á li vikǐy wíri, à ké wìr ve á bóʼti kimboʼtì e làv nsaʼa, à ve á tén fó a làʼ vé lìm vév, à ké ve á táy vikǐy ŋkfə wùn à wón tsə̀ə́, e toʼ ké wìr ve á tén fó tinén kinyo ke viŋgwìy e nsànloŋe. Suuy mo woo Nyùy Tàr woo Taà Mànjòŋ.
Nsùʼ wo á fó e Nyùy
6«M dzə̀ Nyùy Tàr, a bó m yòʼ kúvsinè, á nsàv ye m yoʼ laàr ven vee rám Jakov. 7Vèn kù‑uù sí ŋwáy sáʼ yém, e kèʼ fo atàr véné ghan, tén fó a yunín nsər sém. Vèn kfə́n é bàm e mǒ wùn, é m binkir, e lèéy ven. Suuy mo woo Nyùy Tàr woo Taà Mànjòŋ. Yii bèy, vèn ló kén, a dzər jii, ‹Vèr yíi ghan e le, e bóo kfən fo wò wùn?› 8Binèr yémé dzə̀ jii, ‹A dzə̀ kí kòóy ji wìr msòŋ shwiv Nyùy Tàr á?› Rúrú, vèn shwiv mo. Vèn shwiv bèy, kfə̀n dzə́r jii, ‹Vèr shwiv wò e dzəə rəné?› Vèn shwiv mo e nsùʼ woo kintóʼ kee kimòʼón fo vee ghvə̀m vi, shwiv mo é cù se vèn yii. 9M shòv ne ven, bìʼ shwiv ye vèn shwiv mo. Kitúm kén kidzə̀m ki lì ne lòn.
10«Vèn wiy e nsùʼ wo a kì dzə̀ vèn wìy shó e dzə̀m, e lèm e mǒ kitàv. Nsùʼ woo ji á jav kifá ke á keŋen kirə́ʼ e ghvə̀m, e fò kee kimòʼón e Nyùy.#3.10: Leéy: Cu 27.30; Remrí 12.6. Vèn wiy shó, é viyíkìr vi fíʼ a dzə e mǒ lav. Mo woo Nyùy Tàr woo Taà Mànjòŋ suuy jii, ‹Vèn ku mùm mo, e wìy e nsùʼ və̀n, e yèn mo m lo, e mvə̀ʼ shúu yuv, e cuùrì kisəəvì, é kí kuʼ, é vèn búŋ vitáv vé a lèm sho. 11M wíy yiì, é la vibáy vi yòʼ a kòr vifá ve vèn wayin, e yiì, é vitiír vén vé *vayin vi kfə́n a koóm kijuŋ.› Suuy mo woo Nyùy Tàr woo Taà Mànjòŋ. 12Á bèy, é vitúm vidzə̀m vi wáa yòŋ ven ji kitúm ke Nyùy səə̀vìn, bìʼ fo nsay yen wíy a dzə kirə́ʼ ke a dzə̀ wìr kù a kòŋ ji wun wáa dzə fo.» Á mo Nyùy Tàr woo Taà Mànjòŋ suuyin.
Nyùy káʼ ji wun yíi dìn shammèndzə̀n
13 Nyùy Tàr suuy jii, «Vèn yòŋ ne vinyo ve ghaʼtín ví e mǒ bàm. Yii bèy, kfə̀n dzə́r jii, ‹Vinyo ve vèr yòŋèn e wò bàm ví dzə̀ viné ví?› 14Vèn yoŋ jii, ‹Séʼ dzə̀ ka é ghvəm yé a ghvəm Nyùy? A vèr lò, a yiì vinyo ve wù suuyì, bo séʼ dzə̀ ka? Aá lò, a ghan e wun woo Nyùy Tàr woo Taà Mànjòŋ si, a joóm, kí sə̀ a dzə̀ é gha? 15Vèr kù sí yén kér ji bòŋ ké vé kiŋàʼa, a kéŋ wìr ve á méŋ Nyùyi kù kúy kuyín. Jòkìnyàʼ, á tínsin Nyùy, la kinyo ki yòʼ sə̀ʼ áwune.› »
16Á bèy, wír ve á yúnin Nyùy Tàr, ghvə́m yír rəə́ nén a kfə̀ynìn kùm vinyo vìn. Á lòo kfə̀ynìn, Nyùy Tàr fó vituʼùr, a yuurí, e kù nèn yiì, á sáŋ ŋwàʼ wo á wíy a kuumé áwune shó, áwune ve á ghvə́m wun, li yír rə́ é shií. 17Nyùy Tàr woo Taà Mànjòŋ nen sùúy jii, «Áwune wíy a dzə wír vém. Wíy lòo dzə e kishiíy ke m kwaŋrì vinyo, áwune wíy a dzə wír vém ntayi. M wíy sham áwune réŋréŋ mo wàn lóo yunín kitàr, kí wàa sham wun. 18Á bèy, é vèn nèn kfə̀n yèn jeéyjeéy fó kinyò ke wìr ve á yúnin mo, à fó kinyò ke wìr ve á méŋ moó, a kiíy jeéyjeey wìr wo wù ghvə́m Nyùy, à wo wù yòʼ ghvə́mé.»
Currently Selected:
Malakay 3: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
