Malakay 2
2
1 Nyùy Tàr woo Taà Mànjòŋ kú a suúy jii, «Á bèy lèn, atàá cù, vèn yuúrí kinyo ke m shivìr ven shó ki. 2A vèn dzə̀ là fó yu jí yem, e lì e shií, a ghvəm mo mo yír yémé dzəə̀n, bo m yíi màʼ lòn e věn kitu, e shov kisəəvì ke vèn kérí. Mo vèn yòʼ kér shií ji á ghvə́m mo, bo, e ké ru kí, m kù shòv ne ven. 3Vèn yuúrí, ké lèn ki, m lo, e màʼ ŋgeʼ e rám yéné kitu. M yíi sam jáŋ nyàm se vèn wiy, yii cu sho e věn si. Sámé, aá tátí vèn à jáŋ yee shooyi, e kùúy, e dù màʼày. 4Á bèy, é vèn nèn kìíy ji shivìr a mo ven, e shìvìr, ji m yii, é *mensaŋ me mò‑oò gwàrìn vèr à rám Levi mè kú a tiy fo. Suuy mo woo Nyùy Tàr woo Taà Mànjòŋ.
5«Mensaŋ me mò‑oò gwàrìn vèr áwune mè‑eè dzə̀ ji áwune fíʼ a ker dzəʼə̀m ye dáa wùn à nyaáŋ, a kù dzə̀ kíwun ke mò‑oò yiìn. Mensaŋ mem mè kù‑uù dzə̀ ji á wáa ghvəm mo, a vé‑eè ló a ghvəm rú mo, a fàn yír yém. 6Ntir se sí‑iì fəə́ fo áwuné shuù si‑iì dzə̀ sé ru sí, a kinyo kee kintéŋ ki yòʼ‑oò fəə́ fo áwuné shuù. Vé‑eè yúnin mo, ghán e mǒ mbòv ji nyaáŋ nyaáŋ, shilív shimòʼón. Á bèy, á ku nèn a bìnèr wír anín fo áwuné ajay.
7«Rúrú, dzə̀ kilíŋ ke taà cù ji wù yii, é wíri kiíy kinyo ke Nyùy ke kí kù yii dzə́ tìítiy, a wìy, a yen wun, e fíʼ a yu ntir fo wun shuù, bìʼ fo wù dzəə̀n ŋgaà ntum Nyùy Tàr woo Taà Mànjòŋ.#2.7: Leéy mbìv Ji se Naarìn sí: Ŋgaà ntum Nyùy. 8Yii bèy, ven vee atàá cù, vèn yòʼ dzəə́ ghán e mǒ mbòv. Yéʼéy yéné yiì ne, wír aníne jáy dzə́ə. Vèn bìvír ne mensaŋ me mò‑oò gwàrìn vèr à rám Levìi. Suuy mo woo Nyùy Tàr woo Taà Mànjòŋ. 9Bìʼ bey, m yiì ne, wír veé Isray adzə̀me wáa ŋway ven, a leéy ven ntéŋ. M yiì bèy, bìʼ fo vèn yòʼ yúnin mo, lóo yeʼéy wíri ntir sém, á wàa leéy sí wìr.»
Wír veé Judàa tén fó a yunín Nyùy Tàr
10Vèsən dzə́ bèn, a bó tàr wòsən yòʼ dzə̀ e mòʼón a dzə̀ Nyùy à? Bó yòʼ‑oò bòm wun woo Nyùy vèsən a? Yiì ka, la vèsən yòʼ a suúy suuyrú e wír ámóʼó? Kòóy ka, é bo vèsən tén fó a ghvəm *mensaŋ me wù‑uù gwàrìn wùn aàtàr vesəné? 11Ven vee wír veé Judàa bìn ne ndzə̀m e Nyùy Tàr, e bùʼ rə́mrə́m kinyò e Jerusalem, e kù bùʼ bèy nsay Isray e dzə̀m. Á bìvír ne kirə́ʼ ké cù ke Nyùy Tàr kòŋèn é ŋàŋ. Áwune sí táti vijín wùn à vikìy ve á ghvə́m anyùy kisaŋe. 12M tóŋ feyì ji Nyùy Tàr ku fə̀ə́r kfə́ə wìr vee ben fəə́rín fo wír və́ vee rám Jakoví mvəm. Wù ku fə̀ə́r feyì adzə̀m, é la wìr yòʼ bèr, fə̀m mo áwune wiy e cúu ji á cu Nyùy Tàr woo Taà Mànjòŋ sho.
13Kímóʼ kee kinyo ki nen kfə̀n a dzə jii, vèn wiy e cúu, sə́ʼər mensíy. Vèn diy, sheŋ kitú, bìʼ fo bó Nyùy Tàr yòʼ dzəə́ səə́si cu yén, cu, ye vèn wiy ji á cu wun sho. 14Vèn dzə́r ji Nyùy Tàr sà tén fóo səəsí cu yén bìʼ ka á? Wù tén bìʼ vinjen ve mensàŋ ve wù‑uù tiimen, vèn gwàr vèn à vikìy vén vinsùme. Fə̀m mo vèn‑eè tiimen e Nyùy si, a yi kilìʼ jii, vèn kù wíy a suúy a dzə̀ suuyrú aáwune, áwune vee vikìy vén vinsùm, vèn yàʼáy ne kilìʼ kee shooy. 15Bó Nyùy yòʼ‑oò bòm vèn à vikìy vén víne, vèn áwune wáa dzə wún e mòʼón, a dzə kiyoy kimòʼón ji wír və́ a? Wù‑uù bòm ven bey, a nsàv rə‑əə̀ dzə̀ ji ka? Nsàv‑iì dzə̀ ji vèn fíʼ a dzəə́ wón ve á wáa yu Nyùy. Bìʼ bey, wìr kim kitú kfə́, fó jay dzə́ə, e yaʼáy mensaŋ me wù‑uù gwàrìn wùn wiiy və vinsùm. 16Nyùy Tàr woo Nyùy wìr veé Isray suuy jii, «M bàn kinyo kee ji wìr kì jùm wíiy və. M yú ji wìr kì nyàvrì shó e dzəə fóo fèy, kí tèn mo féyì. Bìʼ bey, wìr wáa yen fó yaʼáy kilìʼ ke wù‑uù yiìn wùn yeè lav və ji kù sì wùn wun.»
Kishiíy ké nsaʼ Nyùy ki sì fó mentsə̀m
17Vèn kòr ne shilív shé Nyùy Tàr e kisúŋnìn kén kí. Yii bèy, vèn nen kfə̀n lò, a dzər jii, «Kee shooy ki kòóy e ghàn ka?» Vèn dzə́r bèy, a jay won dzə̀ kisúŋnìn kén kee jii, ŋgaà yiì vinyò ve bi ví dzə̀ wo wù dzəə̀n kiránén e Nyùy Tǎr si, a wun woo Nyùy Tàr shéʼri wír vee bey. Vèn kfən lò fo fo, a màʼ lám jii, wun woo Nyùy wo wù tínen vinyo e nsànloŋ bèé lèn?
Currently Selected:
Malakay 2: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
