Luk 19

Jesus wùn Sakiyor

1Jesus nèn dù, e nə̀ə́ e mvə̀mlaʼ Jeriko fèy, a tosín. 2A wìr wùmòʼ dzə̀ fó, aá yoŋ ji Sakiyor, a dzə̀ kitú ke wìr ve vé‑eè báʼti mbàm se bàràʼ. Wù‑uù kér sa mbàm e ŋàŋ. 3Wù yú ji Jesus waà shaa, e nèn dù ji wun yén a ji sà dzə̀ wír woó le á, e làa yòʼ koóy fó yen, bìʼ fo wù dzəə̀n wír wo tsəm, a màŋgòŋ dzə̀ e gháʼán. 4Wù nèn nyèŋ fó mbìy, e dù, e kòʼ é kici ké *sikamor ji Jesus lóo shaà, é wun fiʼ yèn. 5Jesus dù, e mèé e sar kici fey, e lèéy yúv, e yòŋ jii, «Sakiyor, sə́ʼə́y cér, m yíi shiíy e wò lav lán.» 6Wù ku nèn sòn fó kici fey, e səə̀sí Jesus e kishéʼrì ki. 7Wíri yén mo Jesus du wùn Sakiyor, e nèn kèʼ, a ghvə̀vrì jii, wìr və̀n sí du, e shiíy a wùn wìr wo bi.

8Wùn áwune dù, e lòo dzə, Sakiyor yiì lò, e nànèn, e yòŋ Jesus jii, «Tàr, ku yuùrí, m yíi toʼnín vifá vém é ntìntìn, e jàv mbìv yìmòʼ e vé ŋgeʼe. A m kfə̀n yíi leéy, yén, a mò‑oò ló ne bòʼ wír, é m siir kifá kee shooy e ŋgaàŋ akàŋ akweè.» 9Jesus yú bey, e sùúy jii, «Wír veé lav fène lùŋ ne lán, bìʼ fo wìr və̀n dzəə̀n sá wán woo Abraham ram, 10a ŋgaà wo yírí dzəə̀n *Wanwìr wìy fó tàʼ wír ve vé‑eè làykìn ne, e lùŋèr.»

Ŋgàn yee kùm wónlè ve tàr wov‑iì lèmèn mbàm sho

(Matio 25.14‑30)

11Wíri wáa yuurí vinyo ve Jesus suuy vìn, wù nèn kfə̀n yòv ŋgàn yìmòʼ aáwune, bìʼ fo wù‑uù sí méʼ ŋkàlaʼ Jerusalem, a wíri kwaʼtì ji a tàm bo sáʼ Nyùyi kù sí lo, e kèʼ e nsay. 12Wù wáa fèr jii, «Yì‑iì dzə̀ é ghan símóʼ sí, wàn ntoʼ wùmòʼ lò fo áwuné wòŋ, a dù e wòŋ wúmóʼó kwaʼda ji á fó vifon sho, é bo wù kfə́n, a saʼ woŋ və́. 13Wù lòo lò, e jàŋrì wónlè və́ e ghvə̀m. Á wìykìr, wù jàv mbàm aáwune kibam kimòʼón kimòʼón, e sùúy jii, ‹Vèn siiyì, vèn wàa kavnín wáy shó, fo m wiyì.›

14«Wù nèn lò, a wír vee wùn wòŋe‑eè ban wun e ŋàŋ, á nèn sìíy, e tsə̀nsí aŋgàa ntum fo bàm jii, bó á yòʼ koŋ a ji wìr və̀n wáa saʼ áwune. 15Wù ku dù, á fó sáʼ sho. Wù wìy kfə̀n, e jàŋrì wónlè və́ ve wù‑uù jàvìn mbàm sìy sho ji wun yén á séʼ wo vé‑eè siiyin, e kàvnín wáy, e kòóy. 16Ŋgaà mbìy wìy, e sùúy jii, ‹Tàr, mò‑oò sìíy, e kòóy séʼ fo kibàm ke mbàm fèy kibam sa e ghvə̀m.› 17Wù shéʼrí jii, ‹Beerì feyì, à dzə̀ wánlè wo juŋ. Mo à siiyin, a leéy fo shishàr fèn kijuŋ, m yíi fo wò ntèʼ e ghvə̀m, áà wáa saʼ.› 18Wo wù‑uù batin wìy, e sùúy jii, ‹Tàr, mò‑oò sìíy, e kòóy séʼ fo kibàm ke mbàm fèy sa vibam vitàn.› 19Wù suúy e woo shooy jii, ‹M yíi fo wò ntèʼ sitàn, áà wáa saʼ.›

20«Wùmòʼ woo wánlè nèn wìy, e sùúy kfə́ jii, ‹Tàr, kibam ké ke mbàm ki kìne mo mò‑oò kurin é kinsàr ke ndzə̀y, e lèm. 21Mò‑oò lèm lémen, bìʼ fo liì wò tavin é ŋàŋ, a m fan wò. À lo, à kòóy kifá kisáŋ, a bó à yoʼ kàtìr. À káv vifá fo wò sum, a bó à yòʼ kì ghán sé way.› 22Tàr wov nèn sùúy sho jii, ‹À dzə̀ wánlè wo bi. Kinyo ke kí fəən fo wò shuù ki kù dzə̀ ke m yíi lì, e saʼ wò sho. Wò‑oò kì ji liì wom tàv é ŋàŋ, a m yí vifá kisáŋ, káv ve kavín ví, a bó m yòʼ kì ghán sé way. 23Wò‑oò kìíy bey, yiì ka fo à lem mbàm sém é kitàv ké mbàm, m wíy kfə́n, é m sə́ wùn à visókì vi?›

24«Wù nèn sùúy e wír ve vé‑eè tíy fo ghaŋe jii, ‹Vèn sə́ kibam ke mbàm kee shooy ki fó fo, e fò e wánlè wo wù kér kibam e ghvə̀m.› 25Á sháʼnín jii, ‹Tàr, wù kì sí kér kibam e ghvə̀m.› 26Wù suúy jii, ‹Vèn wáa kiíy jii, wìr wo wù kér séʼ e kitu ke kifa, á yíi dzə̀sì. Wír wo wù buŋen, aá maysi shishàr wo wù kérí, e gèr gérín. 27Á bèy lèn, fo aŋgaà vém vibàn ve vé‑eè tén fo m wáa saʼ áwune, vèn wiy shó lèn, e yùyrí e mǒ si.› »

Wíri səə́sí Jesus e Jerusalem ji Fon

(Matio 21.1‑11; Maak 11.1‑11; Joon 12.12‑19)

28Jesus suúy vinyo vìn bèy, e nèn tòsín, a dù e Jerusalem fo wù‑uù du. 29Wù dù, e lòo meʼ ntèʼ see Befage wùn Betani, a sí dzə̀ é ghaa gwan wo á yoŋ ji Gwan Vicì vé Oliv, e nèn tùm wón və́ lìm ámóʼó fó mbìy abaà, 30e sùúy jii, «Vèn du é ntèʼ yee fó mbìy rə̀sə. Vèn lóo nəə́, é vèn yén wan kimbèʼbìy, a wù tsə́ŋ fo, a bó wìr yòʼ‑oo yií ne kòʼ é kitu wo, é vèn bvəti, e wìy sho. 31A wìr dù, a dzər ji vèn sà bvətì, e yiì ka shó a, vèn bìnèr jii, ‹Tàr won kér a shií shó.› »

32Wón lìm vìyi nèn dù, e yèn vinyo vidzə̀m réŋréŋ mo wù suuyin. 33Á lòo bvə̀tì wan kimbèʼbìy və̀y, aŋgàa kimbèʼbìyí dzə́r jii, «Vèn bvətì ji ka?» 34Á bìnèr jii, «Tàr wor kér shií shó.» 35Á nèn lì, e dù, e mèé sho fo Jesus wùn, e sàŋrì vikúm vév é kitu wo, e dzə̀ʼə̀r Jesus sho. 36Wù lòo dù, wíri wáa sàŋrì vikúm vév fo wù shaa.

37Wù dù, e bìʼtí ji wun sí sə́y Gwan Vicì vé Oliv və̀y, aŋgaà və́ ŋgoo ve vé‑eè nyornìn fo bàm adzə̀me nèn sàsìn, a ndzəʼ, a burí Nyùy kitávín bìʼ viŋgaʼnìn ve vinyò ve vé‑eè rə́si yéné. 38#Nsùyrì Nyùy 118.26. Aá kwá jii, «Nyùy Tàr ku səə̀vì Fon wo wù wiy e wùn yir və̀n. Nyùy woó yuv dzə̀ Ŋgaà Nyaáŋ. Á wáa burí Nyùy woó ntoò yùv.» 39A wír veé mbìv *Farasi ámóʼó kì shèm sá e màŋgòŋ və̀y mvəm, á nèn lò, e sàyín fo wírí mvəm jii, «Ŋgaà Yèʼey, ku shèm aŋgaà vé ŋgoo vìne.» 40Jesus bìnèr jii, «M suuy e vèn jii, aá fə̀m yàr, bo dzə̀ tíyí kù a ndzəʼ.»

Jesus diy bìʼ Jerusalem

41Jesus lòo meé e ghaa Jerusalem, e lèéy, mendzən mè rə́r wun, wù wáa dìy, 42a taŋ jii, «Wír veé Jerusalem, e kishiíy ké lán ki, bo vèn ku lò kìíy kinyo ke dzə̀ kí fò ven nyaáŋ. Yii bèy, bó yòʼ dzə̀ vèn dzəə kìíy lèn. 43Ghán sí wíy gheén, áàŋgaà vén vibàné wiy, e bòm kay, e gìm láʼ yén, e tàr, e sə̀tí ven. 44Á wíy nəə́, e bvəʼə́y vèn à wón véné adzə̀m, e kfə̀n kèr láʼ, é la tíy yímóʼó yòʼ gòʼ e yímóʼó kitu. A kí wíy koóy bèy, bìʼ fo vèn‑eè meŋen Nyùy e ghan se wù‑uù wìyìn ji wun luŋèr ven.»

Jesus júm vé wayí fó lav cù

(Matio 21.12‑17; Maak 11.15‑19; Joon 2.13‑22)

45Jesus lò fo fo, e dù, e nə̀ə́ e lav cù, a jùm wír ve vé‑eè kávnin wáy fó fo. 46#Aysaya 56.7. Wù wáa jùm, a suúy aáwune jii, «Vé‑eè sàŋ é Ŋwàʼ Nyùy ji Nyùy suuy jii, ‹Á wíy a yòŋ lav yem ji lav bùnrì.› Vèn nen bìnèr kén ji mbvə̀ʼ ashòŋ.»

47Jesus ku nèn a yeʼéy wíri é lav cù fèy vishiíy vidzə̀m. Vitú ve atàá cù wùn à wír ve vé‑eè duŋrì nsər Nyùy, à vé wòŋe wáa woóy ji á yúyrí á wun. 48Yii bèy, e làa yòʼ a ker dzə́ə, bìʼ fo wìr dzə̀m kù‑uù rə́si a dzə̀ e Jesus ghaŋ, yuúri vinyo və́, e làa yòʼ a tàʼ ji kinyo kimòʼón ki túm á fo nsay.

Currently Selected:

Luk 19: LNB

Highlight

Copy