Luk 20

Vé wòŋe méŋ fo Jesus li sáʼ

(Matio 21.23‑27; Maak 11.27‑33)

1Wìy lòo dzə e kishiíy kímóʼ kí, Jesus wáa yeʼéy wíri é lav cù, a fìʼtì sáʼka Nyùy wo juŋ. Vitú ve atàá cù wùn à wír ve vé‑eè duŋrì nsər Nyùyi, à vé wòŋe nèn wìy, 2a dzər sho jii, «Vinyo ve wò‑oò mùmèn é lav fèn vìy, wò‑oò mum ji wò la? Fò la wò dzə́ə?» 3Jesus bìnèr jii, «M taʼ, e dzər sa kém kee kinyo, é vèn biner.» 4Wù nèn dzə̀r jii, «Kinyo ke Joon‑eè fiʼtì, wáy wíri é ndzəv, kí‑iì lò fo Nyùy moo fo wìr a?» 5Á nèn kèʼ, a kìŋnìn jii, «A vèsən bìnèr ji kí‑iì lò fo Nyùy, é wù nèn dzə̀r ji sà‑aà yiì ka lèn fo vèsən biìmé kinyo ke Joon á? 6A vèsən bìnèr ji kí‑iì lò a dzə̀ fo wìr, é wíri yúyrí vèsən e tíyí, bìʼ fo á biíme adzə̀m ji Joon‑eè dzə̀ rú á *ŋgaà ntum Nyùy.» 7Á nèn lò, e bìnèr jii, «Bó vèr yoʼ kìíy fo Joon‑eè sə́ vitaáví.» 8Jesus nèn sùúy aáwune jii, «Bo bó yòʼ dzə̀ sá m sùúy fo m sə́ vitaáví, e bó a yiì vinyo vee shooy.»

Ŋgàn ye yì din mo vé wòŋe wíy yuyrí Jesus

(Matio 21.33‑46; Maak 12.1‑12)

9Jesus nèn kèʼ, a yòv ŋgàn yìmòʼ e wír vìyi jii, «Wìr‑iì mvə̀ʼ súm vitiír vé *vayin, e tìr súm woo shooy e wír ámóʼó, e dù ghán e kitum kímóʼ kí, a wù‑uù yíi shiíy fo ntàmda. 10Ghán se á yii káv vifá si wìy ghèén, wù túm ŋgaà lìm və wùmòʼ fo wír vìyi ji á fó á rə́ə yee mbìv vifa. Wír vee shooyi nèn dù, e dzə̀v ŋgaà lìm və̀y dzə́vin, e jùm wó wó. 11Wù kfən tùm wùmòʼ, á dù, e dzə̀v, e shòór, e jùm, wù kfə́n kisáŋ. 12Wù túm wo wù‑uù meen ji wír ataár, á dù, e bùʼ, e lèmér, e fə̀ə́r fo sum, e màʼ fo ndzə. 13Ŋgaà sùm nèn rə̀m jii, ‹Kinyo ke dzə̀ m yiì lèn ki dzə̀ ka? M yíi tum lèn a dzə̀ wán wom, a m kòŋ wun feyì. A tàm áwune dù, e ghvə̀m woo shooy.› 14Wan və̀y dù, e lòo meé fo, wír vìyi yén, e sə̀mnìn jii, ‹Və̀sə dzə̀ njìlaʼ ŋgaà sùm. Vèsən yúyrí, e yòv súm.› 15Wù nəə́ é sum, á nèn bàm, e fəə̀ shó fo kày, e yùyrí.»

Jesus fèr bèy, e dzə̀r jii, «Vèn yén kén ji dzə̀ ŋgaà sùm yèe le e wír vee shooyi? 16Bo wù kù yíi wìy, e laàr wír vee shooy, e fo súm e wír ve səné.» Wír vìyi yú, e nèn a shaʼnín jii, «Nyùy ku tèér kee shooy.» 17#Nsùyrì Nyùy 118.22. Jesus túy sí aáwuné wùn, e dzə̀r jii, «Bo kinyo ke vé‑eè saŋen é Ŋwàʼ Nyùy ki dzə̀ ji ka lèn? Vé‑eè sàŋ jii:

« ‹Tíy ye vé kimbome leeyin ntéŋé sì yíwun ye yí loòn ne, e tòm kór lav.

18A tíy ye á suuy rə̀ne dzə̀ jii, wìr bayrìn sho, wù gbù, e kìvkír kivkín. Yí gbu e wìr kitu, ŋgaàŋ foòsì fóosin.› »

Á wooy Jesus, dzə́ti kinyo ke mbàm se bàràʼ

(Matio 22.15‑22; Maak 12.13‑17)

19Jesus yòv ŋgàn rə̀y, wír ve vé‑eè duŋrì nsər Nyùy wùn à vitú ve atàá cùu kiíy ji wù yòv a dzə̀ á bìʼ áwune, e nèn a tàʼ ji á koó é ghan see shó, e bóo fàn wíri, e màʼtì. 20Á ku nèn a tàʼ kintóʼ kímóʼ kí. Á túm aŋgàa ŋkiy ámóʼó ji á du, a wovrí a ji bó á yòʼ kér kinyo, Jesus lóo suŋnín, aá fíʼ koo kinyo fo shuù wo, e way wun e vé nsərí kiwo, aá tsə́nsí fo ŋgaà saʼ woó Rom.

21Wír vìyi nèn dù, e yòŋ Jesus jii, «Ŋgaà Yèʼey, vèr kì ji vinyo ve à fiʼtì, kfə̀n yéʼey vi dzə̀ rú, a bó à yòʼ sháv wír. À yéʼey rú a dzə̀ kinyo ke Nyùy taʼ ji wíri wáa yiì. 22Vèr nén a tàʼ, e kiíy jii, nsər yèsən sa biìmé ji dzə̀ vèsən wàa màʼ mbàm, a shwi Fon woó *Rom sho moo ŋgáŋ á?» 23Jesus kiíy ji á wooy wun a woóyín, e sùúy jii, 24«Vèn wiy e sí mbàm yee *danari.» Á wìy sho, wù dzə́r jii, «Kitú ke kí dzəə̀n shó ki dzə̀ ké la? Yírí dzə̀ yé la?» Áwune bìnèr jii, «Dzə̀ ké Fòn woó Rom, a yírí dzə̀ sá rə́.» 25Wù nèn sùúy jii, «Kifá ke dzə̀ vèn kù fò e Fòn woó Rom, vèn wáa fo sho, a fo ké Nyùy e Nyùy.» 26Áwune yú, kí gháʼ, á nèn gòʼ kisə́sə, e làa yòʼ dzə́ə koóy kinyo ke dzə̀ á gòv wun sho fo vinyò ve wù‑uù fiʼtì.

Á wooy Jesus, dzə́ti fəə́ yee fó kpu

(Matio 22.23‑33; Maak 12.18‑27)

27Wír ve vé‑eè dzəə̀n é mbìv *Sadusi ámóʼó nèn dù wìy ji á dzə́r kinyo e Jesus. A dzə̀ mbìv wìr ve á yii yéʼey kév ji wíri yòʼ wíy fəə a fo kpu. Á wìy, e yòŋ Jesus jii, 28#Remrí 20.5. «Ŋgaà Yèʼey, Mooser‑iì sàŋ e vèsə́n nsər jii, a wìr kér wiíy, e kpù, a bó wùn wun yoʼ dzə̀ə́ wán, bo fər wìr woo shooy kù kér fó lèm wiíy və̀y, a dzəə́ wón shó, e fíʼ lèm kitsə́ʼ ké ŋkfə fər və. 29Kí nén a dzə jii, yì‑iì dzə̀ é ghan símóʼ sí, wíri wáa dzə saàmbà, kitàr kimòʼón, wo mbìy wáa ker wiíy, e kpù là wán. 30Wo wù batin siíy, e lèm wiíy və̀y, e kpù sá là wán. 31Kí ku nèn kòóy bèy, wìr woo saàmbà və̀y mày. Áwune lèm wiíy və̀y adzə̀m, e kpùkír là wán. 32Fo bàm, wiíy və̀y kpú sá. 33Mo wìr woo saàmbà və̀n‑eè lèmèn ne wiíy və̀y, bo wíri wíy fəə fo kpu, é wáa dzə wo la lèn?»

34Jesus bìnèr jii, «E ndzə yee lèn, vilum kooy vikìy, a vikìy kooy alúm. 35Yii bèy, wír ve á gheenen fo Nyùyi wíy fəə fo kpu, nəə e ndzə ye yì wiyì, é la vilum yòʼ a ker vikìy, é la vikìy yòʼ a ker alúm. 36Áwune wíy a dzə réŋréŋ moo nshèelav se Nyùy, a bó yòʼ dzə̀ á kfə̀n a kpukír. Mo Nyùy fəərin áwune fó kpu, á sì wón və́ ŋkuuŋkùŋ. 37#Fəə 3.6,15. A Mooser‑iì lo dìn sa ji wíri wíy fəə a fo kpu. Wù‑uù sàŋ mo wù‑uù yenen kicí, a kí shwí, e yòŋ Nyùy Tàr é kirə̀ʼ ké ŋwàʼ foo fèy ji Nyùy Abraham wùn à wo Aysi, à wo Jakov. 38Mo wù‑uù yoŋ bèy, bo dzə̀ ji aŋkfə vìne kù dzə̀ atin. Nyùy yòʼ yii dzə́ Nyùy aŋkfə, dzə̀ Nyùy wìr ve tíne. Vèn wáa kiíy ji wír adzə̀me kù dzə̀ atin fo Nyùy.»

39Jesus bìnèr bèy, wír ve vé‑eè duŋrì nsər Nyùy ámóʼó nèn bìnsí jii, «Ŋgaà Yèʼey, à bìnèr kijuŋ feyì.» 40Kí nèn tìím bèy, la wìr yòʼ dzəə mùm fó dzər kinyo sho gheéy.

Jesus taásín aŋgàa yeʼéy

(Matio 22.41–23.36; Maak 12.35‑40)

41Jesus nèn lò, e dzə̀r kfə́ aáwune jii, «Á yii suuy ji *Mfə̀ə́r wo Nyùy‑iì kàʼàn wíy a dzə wán woo Fòn Davir ram. A dzə̀ kee shooy ki wàa dzə e le? 42#Nsùyrì Nyùy 110.1. Vèn kì sá kinyo ke Fòn Davir‑iì suuyin é Ŋwàʼ Nsùyrì Nyùy Nyùy jii:

« ‹Nyùy Tàr‑iì sùúy e Tàr wor jii,

«Dzə̀ʼə̀m e mǒ koy yìyí,

43e meé e ghan se m wíy neèr aŋgaà vé vibàn e wò si,

áà tiír wúu yé sho ji kibur.»›

44Mo Fòn Davir yoŋ Mfə̀ə́r woo shooy ji Tàr wov, a dzə̀ Mfə̀ə́r kfə̀n a dzə wán və é le?»

45Jesus nèn lò, a suŋnín a dzə̀ e wón və́ lìme, a wír adzə̀me yuúri. A wù suuy jii, 46«Vèn wáa baàmè wír ve á duŋrì nsər Nyùy vìn. Áwune lo, á wàa kòŋ ji á wáa màʼ vikúm vé aŋgàa yeʼéy, a kar e virə̀ʼ vé way ji wíri fíʼ a shàʼtì áwune, a bèsìn. Aáwune kfə̀n koŋ sa virə́ʼ vee fó kùy e ŋgày se bùnrì. Á du fo kiŋkàʼ, á kù a tàʼ a dzə̀ shúu kiy. 47Ku kfə̀n a dzə áwune vin ve á lo, á wàa kùvrì vikǐy ŋkfə, a faàsì lav sév, a ghan, a rèr bunrì ji á fíʼ a laàrì sí wíri shó. Aá yii bèy, káv a dzə̀ lòn, e wìy nəə́ e ŋgeʼ ye biibí.»

Currently Selected:

Luk 20: LNB

Highlight

Copy