Luk 14

Jesus kfən fèr wír e *kishiíy ké bam

1Wìy lòo dzə e kishiíy ké bam kímóʼ kí, Jesus dù, a yikír e wìr wùmǒʼ lav. A wìr woo shooy dzə̀ wír wo kuʼùn é mbìv *Farasi. Jesus wáa dzə fo, wíri kú a kiy kinyo ke wù yíi a yiì e kishiíy ké bam. 2A wìr wùmòʼ kì tíy e Jesus si, a wù joyì, shwín sə́ wùn à kóy si kóʼkír. 3Jesus dzə́r e wír veé mbìv Farasi wùn aàŋgàa dùŋrì ve vé‑eè dzəə̀n fóo jii, «Nsər yèsən biímé ji dzə̀ á fèr wír e *kishiíy ké bam a?» 4La á yòʼ bìnèr kinyo gheéy. Jesus nèn lì wír və̀y, e fèr. Wù bónén, wù suúy, wù wáa dù. 5Wù dzə́r e wír vìyi jii, «Aá tùŋ kisə̀m, wan wìr fo vèn wiy é kishiíy ké bam, e gbù sho, kìn gbù nàʼ və, la ŋgaàŋ yòʼ tò fó, e fə̀ə́r à?» 6Kí gháʼ áwune, á kfən gòʼ kisə́sə.

Nyùy yén a dzə̀ wír wo wù li kitú kfə́ shishàr

7Jesus lòo leéy, e yèn mo wíri wiy, sháv antaʼ shávín, e bó a dzə̀ʼə̀m sho, wù nèn a yòv lám aáwune jii, 8«Wìr wíy du kiŋkàʼ ke vijin, wù dzə̀ʼə̀m é ntaʼ a dzə̀ woo fó tèr. Lá wù yòʼ a tàʼ ntaʼ wùmòʼ ji woo jeéy. A wù dzə̀ʼə̀m, tam kí kòóy ji vé‑eè bì sá wír wùmòʼ, a wù kùʼ, e shaà wò, 9bo woo shooy yíi wiy, é ŋgaà kinyò wo wù kì biin vèn wun wiy, e sùúy e wò jii, ‹Lò, e fò ntaʼ və̀y e wìr wo kuʼùn.› Kí kooy bèy, áà nèn dù, e bèsín a dzə̀ fó tsən, a dzə fo, a woomé. 10À wíy du kiŋkàʼ ke kinyò, à dzə̀ʼə̀m a dzə̀ é ntaʼ woo fó tèr. Wìr wo wù kì biin wò yií wiy, yén wò fo, é wù nèn lì jii, ‹Ŋkar yèm, ku lò fo fèn, e dù, e dzə̀ʼə̀m e kirə̀ʼ ke juŋ ki.› Wù yii bèy, bo wù kòʼór ne viŋgày vé e wìr dzə̀m si. 11Kù dzə̀ mo Nyùy wíy a sèn wír wo wù yén kitú kfə́ kikuʼùn, a koʼór wo wù yén kitú kfə́ shishàr.»

Á wáa kàʼ kinyo a dzə̀ fo vé ŋgeʼe

12Jesus nèn kfə̀n sùúy sa e ŋgaà lav wo wù‑uù biin wun və̀y jii, «À wíy lóo jàŋ wíri é vifa ve yi, lá à yòʼ jàŋ a dzə̀ ŋkar sé, kìn afə́r vé wùn à kfə́ə yée. Lá à yòʼ bì sá aŋgàa mbàm vee wò ntèʼ, bìʼ fo dzə̀ wír vee shooyi wìy bì sá wò kév kee kinyo, e siìr kiwó ké. 13À wíy kaʼ kinyo, à bì a dzə̀ aŋgàa kitàn, e kfə̀n bì andzə́m, wùn aàŋkivkìri, aàmfìri. 14À yii bèy, áà nèn a ker kishéʼrì, bìʼ fo bó yòʼ dzə̀ wír vee béne siìr kifá e wò, é wìy laàmé Nyùy wò e ghan se wír vəə́ wíy fəə fo kpu.»

Ŋgàn yee kùm kiŋkàʼ ke Nyùy

(Matio 22.1‑10)

15Mo Jesus suuyin kinyo kìn, wìr wo wùn áwune kì yíkir wùmòʼ nèn bìnsí jii, «Bòŋ ké wìr wo wù wíy a yi kiŋkàʼ ke Nyùy e wòŋ woó yuv.» 16Jesus nèn a fèr sho jii, «Yì‑iì dzə̀ é ghan símóʼ sí, wìr wùmòʼ wáa ker kiŋkàʼ ke kuʼùn kí, e bì wíri anín. 17Ghán sí gheén, wù túm wán və lìm ji wù ghán, e sùúy e wír ve wù‑uù biiné jii, ‹Vèn wiy, vifá vidzə̀m vi sì vibáʼtín.› 18Wù nèn dù, yén wír, ŋgaàŋ kù kòóy kinyo kée suúy. Wù yén wo mbìy, wù bìnèr jii, ‹M sìíy, e yùn súm wúmóʼó, a m kér fó dù, e leéy. Kii wò, lá vèn yòʼ a saʼ mo.› 19Wù kfən yèn wùmòʼ, wù bìnèr jii, ‹M sìíy, e yùn anàʼ vém lìm e ghvə̀m, a m sí du, e mùm. Kii wò, lá vèn yòʼ a saʼ mo.› 20Wù yén wùmòʼ, wù bìnèr kfə́ jii, ‹M sìíy, e kòóy wiíy, a bó yòʼ dzə̀ m wàa ker ghán sée wìy.›

21«Wàn lìm və̀y nèn kfə̀n, e bìnèr e tàr wov. Ŋgaà kiŋkàʼ və̀y yú, kilòŋ kfə́ kí shwiíy. Wù nèn kfə̀n tùm wán və̀y jii, ‹Fəə́ cér, e dù e mvə̀mlaʼ, e ghàn mentàrnín medzə̀m, e kfə̀n ghàn medzə́ə medzə̀m, e bàʼtí aŋgàa kitàn wùn aàndzə́mé, aàmfìri, aàŋkivkìri, e wìy sho.› 22Wù dù, e wìy, e yòŋ jii, ‹Tàr, m yiì ne mo à kì suuyin, a bó lav yoʼ rùn.› 23Tàr wov suúy shó jii, ‹Fəə́ lèn, e dù, e ghàn vishwáŋ vidzə̀m, e kfə̀n ghàn medzə́ə meé kwaʼ medzə̀m, e ghàr wíri, aá wiy, é lav yem rún. 24Kú a kiíy ji bó yòʼ dzə̀ wír fo ve mò‑oò biin fó mbìy vìyi yiì lùʼ kifá kém ké yi e wùn shuù.› »

Mo dzə̀ wìr bàʼtí, e bóo nəə́ e Jesus ŋgoo

(Matio 10.37‑38)

25Jesus kfən lòo dù ghán rə́, màŋgòŋ shém fó bàm nyanyày. Wù yiì lò, e bìnkìr, e sùúy aáwune jii, 26«Bó yòʼ dzə̀ wìr wìy nə̀ə́ e mǒ ŋgoo, a bó wù yòʼ koŋ mo, e shaà tàr wov wùn yè wov, kfə̀n koŋ mo, e shaà wiíy və wùn à wóné, aàfə́r vəə́. A wù kfə̀n kér fó a kòŋ sa mo, e shaà mo wù koŋ kitú kfə́. 27A bó yòʼ dzə̀ sá wìr wàa dzə ŋgaà ŋgoo wom, a bó wù biímé kpú, e lì moo kintam, a ghan sho e mǒ bàm.

28«A wìr fo vèn lò ji wun wíy bom lav ye kuʼùn, la wù yòʼ tòmbìy dzə̀ʼə̀m, e kàʼày mbàm se wù yíi jivír, e bóo kiíy ji wun sà kù yòʼ kér mbàm se dzə̀ sí bóm lav yee shooy, e màysì à? 29A wù dzə̀ là fó yiì bèy, tam wù wìy wày a dzə̀ kinsə̀ŋ, lav ghàʼ. Kí kooy bèy, é wír ve á shaa, yén kinsə̀ŋ kee shooyi wáa sheʼ wun jii, 30‹Wìr və̀n kèʼ kibaʼrì, kí gháʼ.›

31«Kìn jii, a tàm fòn wùmòʼ fəə̀ ji wùn wùmòʼ maʼ rə́r. Wù lòo fəə, e yèn a woo shooy wiy, kér wír nsə̀kì mbaà, a wù kì kér kfə́ wír nsə̀kì e ghvə̀m cáʼcáʼ, wù yèe le? La wùn à wír vəə́ yòʼ tòmbìy dzə̀ʼə̀m, e lèéy ji sà kù yòʼ dzə̀ wùn à wír vee shooyi tàm a? 32Wù yén, a kí gháʼ ne, é wù nèn tùm wír ámóʼó, aá du, e yèn fon woo shooy, a wù dzə̀ə́ kwaʼda, a lon ji wù ku sùúy kifá ke á shwí wun sho, é wù maʼti wun nyaáŋ. 33Kù dzə̀ sá mo vèn kér fó baʼtí réŋréŋ, a bó yòʼ dzə̀ wìr wàa dzə ŋgaà wom ŋgoo, a bó wù máʼtí vifá və́ vidzə̀m.

34«Shiŋgwáŋ shi dzə̀ kifá ke juŋ ki. Yii bèy, a shí lò, e səə̀rí, á kfə̀n yèe shó, bo shí nyom? 35Bo shí lày ne kisáŋ, a bó yòʼ fə̀m dzə̀ á wày é sum, a bó yòʼ dzə̀ sá, á tàtí wùn à viŋgà ve á wáy e sum ví. A dzə̀ á kù màʼày màʼàyìn. Vituʼùr ví dzə̀ vibaà. Kímóʼ kí tén fó yu, kímóʼ kí yù.»

Currently Selected:

Luk 14: LNB

Highlight

Copy