Joon 8

Wiíy wo vé‑eè koon é kwaʼ viŋkar

1Jesus yiì fəə̀ fó lav cù fèy, e kòʼ é gwan wo á yoŋ ji wo Vicì vé Oliv. 2Ndzə bvəə́shí, e jàv, wù kfən dù e lav cù. Wíri báʼtí e wùn ghaŋ adzə̀m, wù nèn dzə̀ʼə̀m fo nsay, a yeʼéy áwune. 3Wír ve á yii duŋrì nsər Nyùy wùn à wír veé mbìv *Farasi ámóʼó nèn wìy e wiíy, aá koó é kwaʼ viŋkar. Á tiír wiíy və̀y fo ntìntìn, 4e sùúy e Jesus jii, «Ŋgaà Yèʼey, vèr kù koò wiíy və̀n e kileèmè, a dzə̀ wùn lùmèn wùmòʼ. 5A Mooser‑iì lo fò vèsən nsər ji á yúyrí á wiíy woo ben e tíyí. À yèn ké ji ka?» 6Áwune kù‑uù yutì a dzə̀ shúu və́ ji á fiʼ kòóy kinyo kée lor wun sho. Jesus ku gvə̀ʼə́r a dzə̀ kitú kfə́, a saŋ kifá fo nsay e wàn kiwo. 7Á ku nèn a tiy fo, a soòsì. Wù yiì lò, e nàn kitú, e bìnèr jii, «Vèn li ri, a yuyrí e tíyí, é ku yòʼ tòmbìy tsə̀m wír wo bó wù yòʼ‑oò yiì ne yiì kinyo ke bi kí.» 8Wù nèn kfə̀n gvə̀ʼə́r kitú kfə́, a saŋ kifá fo nsay. 9Mo á yuun kee shooy, e nèn kèʼ, a làykìr amòʼón amòʼón, e kèʼ fo ŋgày sé wìr si, nèn sìíy jòʼsì Jesus wùn wiíy və̀y, a wù kù tíy fo. 10Jesus nàn kitú, e dzə̀r shó jii, «Yaà, vé ve nsaʼ vìyi bèé? Wìr wùmòʼ yoʼ sùúy ji à kù kér fó kpu à?» 11Wù bìnèr jii, «Taàtá, wìr yoʼ sùúy.» Jesus nèn sùúy jii, «A bó yòʼ dzə̀ sá, m sùúy. Ku yòʼ a dù. À du, lá à yòʼ dzə́ə a bùʼtì vinyo.»]#8.11: Kùʼùn aŋwàʼ vee fó ŋgùʼú yòʼ kér kinyo kee 7.53–8.11.

Jesus dzə̀ rán ye yí kaʼày wír veé ndzə

12Jesus nèn kfə̀n a suŋnín e wíri, a suúy jii, «Dzə̀ mo rán ye yí kaʼày wír veé ndzə. A wìr ghán e mǒ bàm, la wù yòʼ dzə́ə a ghan fo mesənér. Wù sí ghán, yén rán, a yí kaʼày wun, a wù du, e nəə́ e dzə̀ʼə̀m yee là may.» 13Wír veé mbìv Farasii nèn a suúy sho jii, «Mo kù naarì wò kitú ké, bo bó kinyè kí yòʼ dzə̀ é kinyò ke à suuyì.» 14Jesus bìnèr jii, «A fə̀m naarì mo kitú kém, bo kinyo ke m suuy ki dzə̀ rú. M kì fo m loòn, a m kì fo m du, a bó vèn yòʼ kì. 15Vèn sáyri kinyo ke wìr a dzə̀ mo vifií vén ví dzəə̀n. A bó yòʼ fə̀m dzə̀ m wàa sayrí kinyo ke wìr. 16A m kì lò ji m wáa sayrí, m kù yèn rú mo kí dzəə̀n, bìʼ fo bó m yòʼ sáyri a dzə̀ fo mǒ vifii, kù dzə̀ vèr Tàr wor wo wù tumen mo. 17#Remrí 19.15. Vé‑eè sàŋ e věn Ŋwàʼ Nsər jii, a wíri tíy vinjen abaà, suuy kinyo kimòʼón, bo dzə̀ á kinyo ke ru kí. 18Mo m naarì kitú kém, dzə̀ réŋréŋ mo Tàr wor wo wù tumen mo naarì sa mo m dzəə̀n.» 19Á ku nèn sàyín jii, «Tàr won wo à yoŋ və̀n dzə̀ feé?» Jesus bìnèr jii, «Vèn yòʼ kì mo m dzəə̀n, a bó vèn yòʼ kì sá Tàr wor. A vèn kì kì mo m dzəə̀n, vèn nèn kìíy sa Tàr wor.»

20Jesus wáa suúy vinyo vìn e ghan se wù‑uù yéʼey wíri é lav cù, aáwune kaárí a dzə̀ é shùu buu fo á yii fó mbàm se Nyùy. A bó yòʼ‑oò dzə̀ wír, wù ghàr wun, bìʼ fo ghán se Nyùy‑iì sìysìn sí yòʼ‑oò ló ne ghèén.

Jesus dín ji wun wìy fo yuv

21Wù yiì lò, e kfə̀n a suúy jii, «M sí du, a vèn wíy siíy, a tàʼ mo, e kpu vèn à njò yen. A bó yòʼ dzə̀ vèn wìy fo m du.» 22Vé wòŋe nèn a ghaynín jii, «Wù yíi yuyrí kitú kfə́ yuyrín a, e bó a suúy ji bó yòʼ dzə̀ vèsən wìy fo wù du?» 23Wù nèn sùúy aáwune jii, «Vèn lò fo ndzə fèn, m ló kém a dzə̀ fó yuv. Vèn nén a dzə wír veé ndzə fèn, a bó m yòʼ dzə̀ wír woó ndzə fèn. 24Mo m kì suuyin ne e vèn ji vèn wíy kpukír vèn à njò yen, a vèn dzə̀ là fó biimé jii, ‹Dzə̀ mo wo dzəə̀n mo›,#8.24: Dzə̀ mo wo dzəə̀n mo: Dzə̀ meŋkfə́m me Nyùy‑iì yòŋèn e wun kitu. (Leéy: Fəə 3.14). bo vèn kù wíy kpu vèn à njò yen.»

25Á nèn dzə̀r shó jii, «Dzə̀ wò la woo shoon?» Jesus bìnèr jii, «M dzə̀ ŋgaàŋ wo mò‑oò sí suuy e vèn, e kèʼ fo kèʼ. 26A kì dzə̀ m wàa suúy vinyo vinín, a sayrí vinyo vén. Yii bèy, a m fiʼtì kém kinyo e wír veé ndzə fène a dzə̀ ke mò‑oò yuun fo ŋgaà wo wù‑uù tumen mo, a vinyo və́ ví kù yii dzə́ ve ru ví.» 27Wù suúy bey, la á yòʼ kìíy ji wù yoŋ ŋgaàŋ a dzə̀ á Nyùy woo Tàr wov. 28Jesus nèn kfə̀n sùúy aáwune jii, «Vèn wíy koʼór ŋgaà wo yírí dzəə̀n *Wanwìr və̀n e kici, é vèn nèn kìíy jii, ‹Dzə̀ mo wo dzəə̀n mo›, e kfə̀n kiíy ji bó m yòʼ yii vinyo a dzə̀ á fo mǒ vitaaví. M suuy vinyo a dzə̀ ve Tàr wor‑iì dìnèn e mò. 29Vèn wáa kiíy ji Tàr wor wo wù tumen mo kù dzə̀ vèr wun, a bó wù yoʼ màʼtì, m wáa dzə vèr mòʼón, bìʼ fo m kù yii yii vinyo a dzə̀ ve ví boŋ wun.» 30Mo Jesus fer vinyo vìn bèy, wír aníne nèn a way shilív e wun wùn.

Jesus naarì vikwàn vé vinyò ve bi ví

31Jesus nèn a suŋnín lèn a dzə̀ e wír ve vé‑eè sí wáy shilív e wùn wó vìyi, a suúy jii, «A vèn lò, a tiy a dzə̀ e mǒ kinyò, bo vèn dzə̀ rú wír vém, 32é vèn nèn wìy kìíy kinyo ke dzəə̀n ke ru kí, é kí yii, é vèn boy fó vikwàn.» 33Á nèn njàʼàm jii, «Vèr dzə̀ rám Abraham, a bó vèr yòʼ‑oò yiì rèŋ vikwàn fo wìr gheéy. À wáa suúy ké ji vèr wíy bòy fo vikwàn a dzə̀ viné ví?»

34Jesus bìnèr jii, «Vèn wáa kiíy rúrú jii, wìr wo wù yii vinyo ve bi ví dzə̀ kwǎn vinyò ve bi ví. 35A bó kwàné yòʼ yii dzə́ ji wír woó laʼ ŋkuuŋkùŋ, kù yii dzə́ wír wo dzəə̀n wán woó laʼ. 36Kí nén a dzə jii, a tìn Wán wo dzəə̀n ji wo Nyùy ven fó vikwàn, bo vèn bòy ne ŋkuuŋkùŋ. 37M kì sá ji vèn dzə̀ rám Abraham. Yii bèy, a vèn kù taʼ ji á yúyrí mo, bìʼ fo kinyo kém kí yòʼ nəə e věn meliv. 38M fiʼtì vinyo a dzə̀ ve mò‑oò yenen e Tàr wór laʼ, a vèn yii kén vinyo a dzə̀ ve vén vee atàrí‑iì dànèn ven shó.»

39Á nèn bìnèr jii, «Tàr wor kù dzə̀ Abraham.» Jesus suúy aáwune jii, «A vèn kì dzə̀ rú rám Abraham, bo vèn kù yii vinyo, a dzə̀ ve wù‑uù yii. 40M fiʼtì kinyo e vèn a dzə̀ ké ru kí, a m yù a dzə̀ fo Nyùy, a vèn kù taʼ ji á yúyrí mo yúyrín, a bó yòʼ dzə̀ mo Abraham‑eè yii. 41Vèn yii kinyo a dzə̀ ké wóon woo tàr.» Áwune nèn sàyín jii, «Vèr yòʼ dzə̀ atáfójiy, vèr kì tàr wor e mòʼón, a dzə̀ Nyùy.» 42Jesus bìnèr jii, «A Nyùy kì dzə̀ rú Tàr won, bo vèn ku lò a kòŋ mo, bìʼ fo m dzəə̀n fen, a m lò a dzə̀ fo Nyùy. A bó m yòʼ‑oò wìy fo mǒ kitu. Yì‑iì tùm Nyùy mo. 43Vèn kì kinyo ke kí yii, bo vèn wáa meŋ vinyo ve m suuyì a? Dzə̀ bìʼ fo vèn yú, wáŋ waŋén. 44Tàr won dzə̀ Satan, a vèn nèn wáy vifií a dzə̀ é vinyò ve koŋ wóon woo tàr. Wù kù‑uù sì rim kèʼ fo ŋgùʼ, ban kinyo ke ru kí bánen, bìʼ fo wù yòʼ kér kinyo ke ru kí e wùn shiliv gheéy shishàr, e bó a dor. Wù lóo boʼtí kinyo, bo kù dzə̀ nóliì və, bìʼ fo wù dzəə̀n kfə́ ji ŋgaà kimboʼtì, a yì‑iì kèʼ wun kimboʼtì kidzə̀m. 45Vèn nén a ten kinyo kém, bìʼ fo m suuy a dzə̀ kinyo ke ru kí. 46A bó yòʼ dzə̀ wìr fo vèn dìn kinyo ke mò‑oò yiìn ne jày. Mo m suuy a dzə̀ kinyo ke dzəə̀n ke ru kí, yiì ka, bo vèn tén fó biimé? 47Wìr wo tàr wov dzəə̀n rú Nyùy yii yuúri kinyo ke Nyùy suuyì. Vèn yòʼ dzə̀ wón Nyùy gheéy. Á kinyo ke kí yiìn, bo vèn wáa ten fó a yuurí.»

Jesus dín ji wun dzə̀ sá ji Nyùy

48Wír vìyi nèn lò, a kuùrì kuùrìn jii, «Vèr ku lò sùúy rú ji à dzə̀ á rim woó *Samaria, *nyùy wùmòʼ jívir wò.» 49Wù bìnèr jii, «Bó m yòʼ yii shém ŋgoo anyùy. Kinyo ke m yii ki dzə̀ ji yír Tàr worí wáa dù. Vèn shoor mo shoórín. 50M yii bèy, a bó m yòʼ leey ji wíri wáa burí a dzə̀ mo. Kù gwarìr Nyùy kee shooy, a kù wíy bìnèr wun fo fo.

51«Vèn wáa kiíy rúrú jii, a wìr yú kinyo kém, yii mo kí dzəə̀n, la ŋgaàŋ yòʼ dzəə wìy kpù.» 52Wír vìyi nèn kfə̀n sùúy jii, «Vèr kìíy ne rú lèn ji à shèm ŋgoo anyùy. Abraham woo tàr à ram yér‑iì lo kpù, *aŋgàa ntum Nyùy adzə̀me kpúkír sá. Aà suuy ké fèn ji a wìr yú kinyo ké, lemè, la wù yòʼ dzəə wìy kpù. 53À shaà tàr wor Abraham wo wù‑uù kpuun, e kfə̀n shaà sa aŋgàa ntum Nyùy ve á kù‑uù kpúkirì à? À kwaʼtì ji à dzə̀ la?» 54Jesus bìnèr jii, «A m lò, a suúy kitú kém, bo dzə̀ kinyo kisáŋ. Kù din Tàr wor mo m dzəə̀n. A kù dzə̀ wun woo shó wo vèn yoŋ ji Nyùy won. 55Yii bèy, a bó vèn yòʼ kì wun gheéy. Kù kì mo. A m lò, a shaʼnín ji bó m yòʼ kì, bo m dzə̀ ŋgaà kimboʼtì sa moo ven. M kì wun feyì, a m yú kinyo kfə́, lemè. 56Abraham woo tàr à ràm yén‑eè ló a njèʼ feyì ji wun ku yèn ghán se m wiyì. A wù‑uù lo yèn, a sheʼrí.» 57Wír vìyi nèn shùsín jii, «À wáa dzə ben, a bó à yóʼ ne fə̀m mèé kiyá mtàn, a taŋrí ji wò‑oò yèn Abraham e gha?» 58Jesus bìnèr jii, «Vèn wáa kiíy rúrú jii, bo á wáa dzəə́ Abraham, a m sì.»#8.58: a m sì: Kinyo kìn ki tàrnín wùn à meŋkfə́m me Nyùy‑iì yòŋèn e wun woo Nyùy kitu mè. Leéy: Fəə 3.14. 59Áwune yú kee shooy, e nèn tàyrí tíy ji á yúyri wun sho. Yii bèy, Jesus bìn, e lày, e fəə̀ fó maàndzə lav cù fèy.

Currently Selected:

Joon 8: LNB

Highlight

Copy