Joon 7

Jesus wùn aàfə́r vəə́

1Kee shooy ki shaà, Jesus kú a ghan a dzə̀ é Galeli foo fèy, e làa yòʼ a dù e mbìv Juda, bìʼ fo atǎr wòŋ veé Judàa‑aà sí wooy ji á yúyrí á wun. 2Ghán sí nèn wìy ghèén, a dzə̀ se wír veé Judàa yii kér *kiŋkàʼ ke á yoŋ ji ké tàv sé ghan, 3afə́r Jesuse nèn sùúy sho jii, «Bo à kì yíi dù e mbìv Juda, áàŋgaà vé ŋgoo fíʼ yèn vinyo ve à rə́si yii. 4Wìr wo wù taʼ ji lim rəə́ fəə́sín yòʼ yii woóne sho woónén. Mo à dzə́ ji à yii viŋgaʼnìn ve vinyò, kí bòŋ ji à fəə́sín shó, é wíri yén.» 5A vé‑eè suuy bèy, bìʼ fo áwune vee afə́r vəə́ yòʼ fə̀m‑eè wáy sa shilív e wun wùn. 6Jesus bìnèr jii, «Ghán se dzə̀ m fəə̀sín sí yóʼ ne ghèén, a ghán sidzə̀m si kù dzə̀ sigheénén fo vèn. 7Bó yòʼ dzə̀ wíri wàa bàn ven. A dzə̀ á wàa bàn a dzə̀ mo, bìʼ fo m tóʼti vinyo vév ve bi ví. 8Kú a dù ven fó kiŋkàʼ foo fèy, m yòʼ du. Sém see ghán sí yóʼ ne ghèén.» 9Wù suúy bey, e nèn gòʼ e Galeli.

Jesus dú kiŋkàʼ e Jerusalem

10Mo afə́r vəə́ duùn fó kiŋkàʼ fèy, wù wìy sìíy, a jùmrì sa, e lòo dù, e nyàʼtí nyaʼtín. 11Atǎr wòŋ veé Judàa nèn dù, a dzə̀rnìn wun fo kiŋkàʼ fèy ji wù sà fèn bèé á? 12Wìr dzə̀m ku rə̀sí, a ghay a dzə̀ kinyo kfə́. Aámóʼó bínsi ji wù dzə̀ á wír wo juŋ. Aámóʼó sháʼnin shàʼnín ji wù taʼ, e boʼtí a wíri. 13A bó yòʼ‑oò dzə̀ wìr wàa binsí kinyo ke Jesus e ŋgèŋgèr, bìʼ fo vé‑eè fan vé wòŋe.

14Vishiíy vé kiŋkàʼ vi jàv e ntìntìn, Jesus nèn nə̀ə́ e *lav cù, a yeʼéy wíri. 15Vé wòŋe yuúrí, a ker gháʼ jii, «Wìr və̀n sà yèʼéy vin vee vinyo fo feé, a bó á yòʼ kì wír wo wù yeʼeyin wun a?» 16Jesus lò, e sùúy jii, «Kinyo ke m yéʼey kìn ki yòʼ lò fo mò, dzə̀ ké ŋgaà wo wù tumen mo. 17A wìr wày ji wun wáa yiì a dzə̀ kinyo ke Nyùy taʼà, ŋgaàŋ nèn wìy kìíy rú ji kinyo ke m yéʼey kìn ki sà lò fo Nyùy, mo kí lò a dzə̀ fo mò á. 18Wìr wo wù yii kinyo ji yii wun, ŋgaàŋ taʼ a dzə̀ ji wíri wáa burí wun. Wìr wo wù kù yii taʼ kfə́ ji á wáa burí a dzə̀ wír wo wù tumen wun, nén a suúy a dzə̀ vinyo ve ru ví, a bó yòʼ dzə̀ wù lòʼ kinyo. 19Mooser yòʼ‑oò lo fò nsər e vèn a? Wìr fo vèn wo wù lem nsər yee shooy dzə̀ la? Vèn kfə́n a tàʼ ji á yúyrí mo fó gha?»

20Wíri bìnèr jii, «À dzə̀ ben, a nyùy wùmòʼ jívir vifií vé. Wìr wo wù taʼ ji wun yúyrí wò dzə̀ la?» 21Jesus bìnèr jii, «Mò‑oò yiì kinyo kimòʼón e kishiíy ké bám, vèn wáa ker gháʼ. 22Yii bèy, mo Mooser‑iì foon nsər e vèn ji kishiíy kí gheenè, á nàŋsín wán woo lumèn, kí lòo gheén a dzə̀ ké bam, vèn kù nàŋsín sa. A bó yòʼ‑oò kèʼ Mooser mbèʼ se saŋén sí, kí‑iì lò a dzə̀ fo atǎr ram yéné. 23Mo vèn yii kee shooy ji fo vèn shóʼór nsər Mooser, kfən yiì ka, bo vèn wáa yu nyár vèsən, a mò‑oò fèr wír férin é kishiíy ke bam? 24Lá vèn yòʼ a sayrí kinyo ke wìr ndzə ndzə. Vèn kiíy mo kí dzəə̀n, e bó a sayrí.»

Wíri gháynin kinyo ke *Mfə̀ə́r

25Jesus wáa suŋnín bèy, wír veé Jerusalem foo fèy ámóʼó wáa ghaynín jii, «Wìr wo á taʼ ji á yuyrí və̀ne lèn, 26a wù súŋnin e wírí si tèéter, la wìr yòʼ a ghay a kinyo. A tàm ghan símóʼ sí, bo vé wòŋe sí yén ji dzə̀ rú Mfə̀ə́r wo Nyùy‑iì kàʼàn. 27A bó yòʼ dzə̀ wàa dzə wun, bìʼ fo vèr kiìn fo wìr və̀n loòn. Mfə̀ə́r wíy bvəy kfə́, é la wìr yòʼ kìíy fo wù loòn.» 28A Jesus kù dzəə́ yéʼey wíri é lav cù fèy, wù nèn lò, e shùsín kitávín jii, «A dzə̀ vèn kìíy mo, e kìíy fo m loòn. Yii bèy, a bó m yòʼ dzə̀ fen fo mǒ kitu. Yì‑iì tùm wír wùmòʼ mo, a ŋgaàŋ dzə̀ ŋgaà suuyrú, a bó vèn yòʼ kì wun. 29Kù kì mo ŋgaàŋ, bìʼ fo m loòn fo ŋgaàŋ wùn, a tùm ŋgaàŋ mo.» 30Á yú kee shooy, e nèn a tàʼ ji á koó Jesus, a bó yòʼ‑oò dzə̀ á kùm, bìʼ fo ghán se Nyùy‑iì sìysìn sí yòʼ‑oò ló ne ghèén. 31Yii bèy, a wír ámóʼó kù yòʼ wáy shilív e Jesus wùn anín, suuy ji Mfə̀ə́r sà wíy wìy, é wù yii vinyo ve ví din vitaáví vé Nyùy, e shaà ve wìr və̀n yii a.

Vé wòŋe túm ji á koó Jesus

32Wír veé mbìv *Farasii yú mo wíri kfəynìn kinyo kee kùm Jesus kìn, e nèn dù, e sìysì wùn à vitú ve atàá cùu, á túm vé rərí ji á du, e koò á Jesus. 33Jesus nèn a suúy e wíri jii, «M dzəə́ yìi ndzə̀ytì vèsən fen shishàr, e nèn a kfən fo ŋgaà wo wù‑uù tumen mó wùn, 34a vèn wíy siíy, a tàʼ mo, e làa yòʼ dzə́ə yen, a bó yòʼ dzə̀ vèn wìy fo m du.» 35Vé wòŋe nèn a kfə̀ynìn jii, «Jwè və̀n suuy ji wun du fèé, fo bó yòʼ dzə̀ vèsən yèn wun? A tàm bo wù taʼ, a ghan fo wír veé Juda ve á dzəə̀n é vitum vímóʼ ví, a yeʼéy wír vee fó. 36Kí búŋ fó bèy, bo yiì ka, bo wù wáa suúy ji vèsən wíy siíy, a tàʼ wun, e làa yòʼ yen, a bó yòʼ dzə̀ vèsən wìy fo wun du?»

Jesus káʼ wír və́ e Kiyoy ke Nyùy ki

37Wìy lòo dzə e kishiíy ke vé‑eè sí maar kiŋkàʼ kìy, a dzə̀ kishiíy ke kuʼùn kí fó kiŋkàʼ foo fèy, Jesus nànèn e wírí ntìntìn, e jàŋ kitávín jii, «A kilòŋ kí yúm wír, wù wìy, e yèn mo, e rəə̀r kilòŋ kfə́. 38#Sekariya 14.8; Esiker 47.1. A ké wìr wo wù wáy shilív e mǒ wùn kí wíy a dzə mo vé‑eè yòŋèn é Ŋwàʼ Nyùy ji ‹Ntòŋ sé ndzəv sí wíy a fəə fo ŋgaàŋ shiliv, a fo mendzə́v me mè fó dzəʼə̀m yee là may.› » 39Jesus wáa suúy kin, a wù yoŋ a dzə̀ Kiyoy ke Nyùy ke wír ve á wáy shilív e wùn wùné wíy a ker. Wáa dzə e ghan see shooy, a bó Nyùy yóʼ ne tùm Kiyoy kee shooy, bìʼ fo wù yòʼ‑oò ló ne kòʼór Jesus, wù nəə́ e wùn vikùʼùy.

Wíri bvəə́ri fo Jesus kitu

40Wíri yú kinyo ke Jesus jàŋèn kin, ámóʼó wáa suúy jii, və̀n dzə̀ rú Ŋgaà Ntum Nyùy wo á shiyì. 41Aámóʼó suuy jii, sì á *Mfə̀ə́r wo Nyùy‑iì kàʼàn və̀y. Ámóʼó nèn a kìnèn kìnmèn jii, Mfə̀ə́r sà‑aà wíy lòo wìy, é wù fəə́ a dzə̀ fó Galeli a? 42Á sà yòʼ‑oò sàŋ é Ŋwàʼ Nyùy ji Mfə̀ə́r wíy fəə a dzə̀ fo Fòn Davir ram, a wù wíy lò a dzə̀ fó Betlehem fo láʼ à Daviri‑iì dzəə̀n á? 43Wíri bìʼ bèy, e nèn bvəə̀rí fo Jesus kitu. 44Ámóʼó wáa tàʼ ji á bám wun, yii bèy, e làa yòʼ kùm gheéy.

Vé wòŋe méŋ Jesus

45Vé rər ve vé‑eè wìyìn ji á koó Jesus vìyi kfə́n fo vitú ve atàá cù wùn à wír veé mbìv Farasi vìyi. Á nèn dù, a saʼ jii, «Vèn wìy là Jesus və̀y ji ka?» 46Á bìnèr jii, «Bó wìr yòʼ‑oò yiì ne sùŋnín moo wír woo shooy.» 47Vé Farasi vìyi nèn dzə̀r jii, «Wù dù ne sa, a laàrì sí yén a? 48Vèn yén ne, a wìr fo vé wòŋe kìn woó mbìv *Farasi wùmòʼ tíy e wùn kinyò a? 49Ké màŋgòŋ və̀sə ki dzə̀ ji bó á yòʼ kì á Ŋwàʼ Nyùy, a lǒn Nyùyi shòv ne áwune.» 50Nikudemon wo wù‑uù duùn é kishiíy kímóʼ kí, e ghàn Jesus wáa dzə fo, a dzə̀ wír fo vé wòŋ vìyi. Wù nèn lò, e dzə̀r jii, 51«Nsər yèsən biímé ji dzə̀ á yiì kinyo e wìr, a bó á yoʼ dzə̀ʼə̀r ŋgaàŋ fo si, e yù mo kí dzəə̀n á?» 52Á nèn dzə̀r shó jii, «À dzə̀ sá e ŋgoo wìr woó Galeli fèy à? Ku tàr Ŋwàʼ Nyùyi kijuŋ, áà yén ji bó yòʼ dzə̀ *ŋgaà ntum Nyùy wùmòʼ wìy fəə̀ fó Galeli foo fèn.» [53Á nèn tàʼrí, e dùkìr aáwuné melaʼ.

Currently Selected:

Joon 7: LNB

Highlight

Copy