Kèʼlo 35

Jakov kfə́n é bàm é Betel, Nyùy səə́ví wun fo

1Nyùy nèn sùúy e Jakov jii, «Lò fó fèn, e kòʼ é Betel, a dzə fo. Ku bòm kíy cùu fó, *kíy cù mo woo Nyùy, mo wo mò‑oò dìnèn kitú kém e wò e ghan se wò‑oò léʼ fər wò Esav.»

2Jakov nèn sùúy e kfə́ə rəə́ wùn à wír ve wùn áwune‑eè dzəə̀né jii, «Vèn tsəʼ mebvə̀m me anyùy vitume fo věn ghaŋ, mebvə̀m me vèn kérí. Vèn bvəti vishí vén, e màʼ ndzə̀y se ranén sí. 3Vèsən ku kòʼ é Betel, é m du, e bòm kíy cù fo, kíy cù Nyùy wo wù‑uù səən mo, a m yén ŋgeʼ. Wù kù‑uù dzə̀ vèr wun kirə́ʼ kidzə̀m ke mò‑oò du sho.» 4Á yú bey, e nèn bàʼtí mebvə̀m mev, à shív se vé‑eè sə́ŋri e vitùʼùr sí, e fò e Jakov, wù dzəə̀mè e sar kici ké *terebint ke kí‑iì dzəə̀n é ŋguùŋè Shekem foo fèy.

5Áwune lòo dù, Nyùy yiì, fáne nəə́ e wír ve vé‑eè dzə́ e ŋkà se laʼ see fo vé‑eè shaa vìyí meliv, la á yòʼ dzəə shèm aáwuné bàm. 6Vishiíy ví lòo liysín, Jakov wùn à wír və́ adzə̀me nèn mèé e Lus fo á yoŋ lèn ji Betel, a kù dzə̀ é wòŋ Kanan foo fèy. 7Mo wù meen fó, e nèn bòm kíy cù, e fò yír kirə̀ʼ ké cù kìy ji Nyùy woó Betel, bìʼ fo dzəə̀n fo Nyùy‑iì dìnèn kitú kfə́ e wun, e ghan se wù‑uù léʼ fə́r və Esav. 8Debora wo wù‑uù lìyìn Rebeka woo yìy à Jakov nèn lò kpù, á dzəə̀mè e ghaa kici kee *oak ke kí‑iì dzəə̀n é mbìv tsə̀n Betel. Á nèn shù yír kici kee shooy ji Kicí ké Mensiy.

9Nyùy nèn kfə̀n dìn kitú kfə́ e Jakov, a sì ji akàŋ abaà mo wù‑uù kfənen fó Paddan‑Aram. Nyùy səə̀vì wun, 10e sùúy sho jii, «Yír yée dzə̀ Jakov, a bó á yòʼ dzəə́ yiì a yòŋ wò bèy. E kèʼ fo lèn, á sí yiì a yòŋ wò ji Isray.» Á ku nèn a yòŋ wun bèy. 11Wù kfən sùúy sho jii, «M dzə̀ Nyùy woo Ŋgaà Vitaàví Vidzə̀m. Á dzəə́ wóné, aá wáa dzə nyanyày. Vitúm vinín wùn aàfone wíy ràm fo wò. 12Woŋ wo mò‑oò foon e Abraham wùn Aysìi sì wó lèn, wùn à wó ram yé ye yí wíy a wìy fo bàmé.» 13Nyùy súŋnín bey, e nèn màʼtì wun. 14Jakov siíy, e tùúy tíy é kirə̀ʼ kee fo Nyùy‑iì suŋnin e wun kìy, e sə̀r meluʼ sho, e yòʼ e meŋgvə́r mè, 15e nèn shù yír kirə̀ʼ kiy ji Betel#35.15: Betel: Nsàv yìr rən dzə̀ ji «lav Nyùy.».

Racel dzəə́ Benjamin, e nèn kpù

16Jakov wùn à kfə́ə rəə́ lò fo Betel, a dù. Lòo dù, aá dzə̀ə́ ntàmda fo ntèʼ yee Efrat, ghán sí nèn ghèén se Racel‑iì yíi dzəə́, wù wáa lum, a lum ntéŋ. 17Nyár wané távkír, máŋkooy wáa rəə̀r wun, a suúy jii, «Kúr tímé, à kfə̀n lo, e dzəə́ wán lumèn.» 18Mo wù dzəən, ghàʼkpu nèn lò, a kiv wun, wù jeétí, e shù yír wan ji Ben‑Oni#35.18: Ben‑Oni: Nsàv yìr rən dzə̀ ji «wán wom mendzə̀n.» Jakov woo taà wàn shù kfə́ ji Benjamin#35.18: Benjamin: Nsàv yìr rən dzə̀ ji «wan koy wóm yìyí.».

19Racel kpú, á dzəə̀mè e ghaa dzəə yeé Efrat fo á yoŋ lèn ji Betlehem. 20Jakov tuúy tíy e Racel kitu ke sày, a yí dzə̀ə́ fo, e shem lán. 21Wù tuúy bey, e tòsín, a dù, e tùy kibàn kfə́ é ghaa kitaàtì keé Eder.

Wón Jakov wo dzəə̀n sá ji Isray

(1 Wòŋ 2.1‑2)

22Isray wáa dzə e ŋgvən fèy, Ruben lì Bilha wo tàr wov‑iì lemè, wùn wun shiíy, kí nèn tò e tàr wov Isray kitùʼùr.

Jakov‑iì kér wón vee vilum nshòv sibaà e ghvə̀m. 23Vé Leàa‑aà dzə̀ jii, Ruben woo wan Jakov mbìy, bám sə́ sí nén a dzə jii, Simeon wùn à Levi, à Juda, à Issakar, e lì Sebulon. 24Vé Racel vee vilume‑eè dzə̀ jii, Joosev wùn Benjamin. 25Vé Bilha woo kwǎn Raceli‑iì dzə̀ Dan wùn Navtali. 26Vé Silpa wo yì‑iì dzəə̀n kwǎn Leàa‑aà dzə̀ jii, Gad wùn Asher. Víne dzə̀ wón Jakov ve wù‑uù dzəən é Paddan‑Aram.

Kpú Aysi

27Jakov nèn kfə̀n é bàm fo tàr wov Aysi wùn é Mamre, e ŋguùŋè Kiriat‑Arba ye á yoŋ sa ji Hebron, a dzə̀ fo Abraham‑eè dzə̀ʼə̀mèn sá, é bo Aysi siíy, a dzə fo. 28Aysi‑iì dzə̀ʼə̀m kiyá kishóv mwaamé é wiì (180). 29Wù‑uù kpú, a sì ŋgàywìr feyì, a wù yén ne vishiíy vinín. Esav wùn Jakov vee wón və́ vee abàá nèn dzəə̀mè wun.

Currently Selected:

Kèʼlo 35: LNB

Highlight

Copy