Kèʼlo 25

Kpú Abraham

(1 Wòŋ 1.32‑33)

1Abraham‑eè kòóy wiíy wùmòʼ, a yírí dzə̀ ji Ketura. 2Wùn wun dzəə́ Simran wùn à Jokshan, à Medan, à Midian, à Ishbak, à Shuaa. 3Jokshan nén a dzə tàr à Sheba wùn Dedan. Vitúm ve ví‑iì ràmèn fo Dedan vi dzə̀ jii, wír veé Ashur wùn à veé Letushim, à veé Le‑Ummim. 4Wón Midiane wáa dzə jii, Efa wùn à Efer, à Hanok, à Abida, à Elda. Wír vìn adzə̀me dzə̀ rám Ketura.

5Abraham nèn màʼtì kifá kfə́ kidzə̀m e Aysi. 6Fo ké wón vikìy ve wù‑uù lèmèn lémené, wù‑uù fò áwune afómo é ghan se wù‑uù dzəə̀n e tin, e shàʼàr, e tsə̀nsí e mbìv wòŋ yee fo shùy yii tó ji wun kiír á fo Aysi ghaŋ.

7Abraham shiíy kiyá nshòv sitàn e msaàmbà e wiì (175), 8e kpù, e dù tàtí atàr və́. Wù‑uù dzə̀n ben, e kòŋrí, e yiì vinyo, e bóo kpu. 9Wón və́ vee Aysi wùn Ishmaeli nèn dzəə̀mè wun e mbvə̀ʼ yeé Mak‑Pela ye yì‑iì dzəə̀n é sum wúmóʼó é ghaa Mamre. Súm woo shooyi‑iì tòmbìy a dzə wó Efron woo wan Tsohar, wo yì‑iì dzəə̀n rám Hit, 10é bo Abraham yún fo wón Hit vìne. Kù dzə̀ fo vé‑eè dzəə̀mèn Abraham wùn wiiy və Sara. 11Abraham kpú, Nyùy kú a səə̀vì wán və Aysi, wù wáa dzə e Beer Lahay Roy#25.11: Beer Lahay Roy: Nsàv dzə̀ jii, «Dàn ŋgaà wo wù dzəə̀n e tin, wo wù yén mo.» (Leéy: 16.14)..

Rám Ishmael

(1 Wòŋ 1.28‑31)

12Rám Ishmael woo wan Abraham wo wù‑uù dzəən wùn Hagari rə̀ne. Hagar və̀n‑eè dzə̀ kwǎn Sara wo wú‑uù wìyìn fó Ejiv. 13Yír sé wón Ishmael mo vé‑eè dzəə áwune sí síne. Wan mbìy‑iì dzə̀ Nebayiot, bám sə́ sí wáa dzə Kedar wùn à Adbeel, à Mibsam, 14à Mishma, à Duma, à Massa, 15à Hadad, à Tema, à Jetur, à Nafish, e bóo lì Kedema. 16Wón Ishmael vìne nen fèr rám nshòv sibaà e ghvə̀m, a yír sin si dzə̀ sé ram sév réŋréŋ mo áwune dzə́ aáwuné virə̀ʼ.

17Ishmael‑iì shìíy kiyá nshòv saàmbà e mtaár e wiì (137), e kpù, e dù tàtí atàr və́. 18Rám rəə́‑əə̀ dzə̀ʼə̀m, e kèʼ fo Havila, e dù, e mèé e Shur, e ghaa Ejiv, e dzəə̀ Assiriya, a bó áwune yòʼ‑oò táti wùn aàfə́r vév ámóʼó vee rám Abraham.

Á dzəə́ Jakov wùn Esav

19Rám Aysi woo wan Abrahame rə̀ne. Abraham‑eè dzə̀ə́ Aysi, 20Aysi meé kiyá mkweè, e nèn kòóy wiíy və woo Rebeka. Rebeka‑aà dzə̀ wan Betuel wo dzəə̀n wír woó Aram e wòŋ woo Paddan‑Aram. Wù kfə̀n‑eè dzə̀ jemèr Laban. 21Rebeka‑aà ndzə̀y fóo boŋ bvəm, Aysi nèn bùnrì, e lòn Nyùy Tàr, wù yú bunrì rə́, e yiì, Rebeka tiím bvəm. 22Kí nèn lò kòóy ji wón ve vé‑eè dzəə̀n e wun bvə̀me wáa tsəynín. Wù lò, e sùúy jii, «Ke kí kooy mo ben ki dzə̀ ka?» Wù nèn lò, e dù, e beè Nyùy Tàr ji wun tar á kinyo kee shooy.

23 Nyùy Tàr suúy shó jii:

«Wóné dzə̀ e wò bvə̀m abaà,

aà wíy dzəə́, aá fer vitúm vibaà.

Wo mòʼón wíy tav, e shaà wùmòʼ.

Woo ŋgàywìr wíy a yu fo wo terí.»

24Ghán sé dzəə́ si gheén, a wóné dzə̀ rú e wun bvə̀m abaà. 25Wo mbìy fəə́, a wù baŋè, a wún vəə́ dzə̀ wuy wuy moo ndzə̀y sé wùy si bey. Á nèn fò yír rə́ ji Esav#25.25: Esav: E Lǎm Hibru, yír rə́ne koó fo kisuŋnìn moo jí yee «wuy wuy» bèy.. 26Fo bàm, fər Esav nèn a fəə, a wù bám nsən kiwuù Esav, áwune fó rə́ yee yír ji Jakov#25.26: Jakov: E Lǎm Hibru, yír rə́ne koó fo kisuŋnìn moo jí yee «nsàn kiwuù» bey.. A Aysi‑iì dzə̀ kiyá mntuùfú é ghan se Rebeka‑aà dzəən wón vin.

Esav fiíné ghay və́ viŋgày vé wìr

27Wón víyi kúykír, Esav wáa dzə wir jwim wo tavín, a wù ghán kfə́ a dzə̀ é kwaʼ. Jakov wáa dzə kfə́ wír woo nyaáŋ, a wù rə́si kfə́ a dzə̀ é laʼ. 28Aysi‑iì koŋ Esav bìʼ nyám se wù‑uù koó, wiy sho, a wù kfə́rí. Yii bèy, a Rebeka koŋ kfə́ a dzə̀ Jakov.

29Lòo dzə e kishiíy kímóʼ kí, Jakov wáa naá viyíkìr ve nshèv ví, a Esav wíy fó kwaʼ, a jìŋ kóm vitó və́ kómén. 30Esav suúy e Jakov jii, «Ku fò mo viyíkìr ve nshèv ve baar viy vi, é m yí. Jìŋ kóm vitó vém kómén.» Á kinyo ke kí‑iì yiìn, é bo á kfə́n a yòŋ Esav ji Edom#25.30: Edom: E Lǎm Hibru, yír rə́ne koó fo kisuŋnìn moo jí yee «baar.».

31Jakov suúy shó jii, «A dzə̀ à kù fiìnè viŋgày vé ve wìr e mò ŋkuŋén.»

32Esav bìnèr jii, «A jìŋ yùyrí mo, bo viŋgày vém vé wìr vi sə̀ mo é gha?»

33Jakov suúy shó jii, «Ku lìʼ kilìʼ kí wòsò ŋkuŋén.»

Esav nèn lìʼ kilìʼ wùn Jakov, e fiìnè viŋgày və́ vé wìr sho bèy. 34Jakov nèn fò kibán wùn à nshèví e Esav, wù yí, e kfə̀n nò kifá, e nèn ŋàʼáy, a dù du rə́. Á mo Esav‑iì ŋwayin ghay və́ viŋgày vé wìr.

Currently Selected:

Kèʼlo 25: LNB

Highlight

Copy