Kèʼlo 24

Aysi koóy wiíy

1Yì‑iì dzə̀ é ghan sin, a Abraham dzə́n ne, e kòŋrí koŋrín, a Nyùy Tàr səə́ví ne vinyo vidzə̀m ve wù‑uù yii. 2Wù nèn lò, e sùúy e wìr və lìm woo ŋgàywìr wo wù‑uù kiìn kinyo kee wùn laʼ kidzə̀m jii, «Wáy kiwó ké ki e mǒ sar kibìy.#24.2: wáy kiwó ké ki é sar kibìy: Kin ki dzə̀ dzə́ə ye wír vee shooyi‑iì yii kilìʼ ke tavín kí shó. 3M taʼ ji à kan á yír Nyùy Tàr wo wù bomen yúv wùn à nsay ji bó à yòʼ yíi tàʼ a wiiy wan wom a dzə̀ fo wón veé Kanan ve vèr áwune dzə́ fèné mvəm. 4À kù kér a fóo dù e věr wòŋ, e tàʼ wiiy wan wom Aysi a dzə̀ fo wír vémé mvəm.»

5Wìr və lìm və̀y nèn dzə̀r jii, «A wiíy dù, e làa yòʼ a kòŋ ji wun wiy vèr wun fèn, kí wàa dzə ji ka? Bo dzə̀ m lì wan wò, e kfə̀n shó e bàm é wòŋ fo wò‑oò loòn a?»

6Abraham bìnèr jii, «Lá à yòʼ mùm, e lì wán wom, e kfə̀n shó e věr wòŋ. 7Nyùy Tàr wo dzəə̀n Nyùy woó yuv‑iì sùŋnín e mò, e kàʼ mo e kilìʼ kí ji wun wíy fo a nsay rə̀n e rám yémé. Dzə̀ wun wo wù‑uù fəərin mo fo tàr wór laʼ wùn à fo věr wòŋ fo vé‑eè dzəən mo. Wù yíi tsənsí nshìylav rə, é yì wáa dànèr wò, áà fiʼ dù, e kòóy wiiy wan wom fo věr wòŋ. 8A wiíy lò a dzə, á bó wù yòʼ koŋ a wìy vèn wun, bo bó yòʼ dzə̀ kilìʼ kin ki koò wò. Kí dzə̀ cáʼcáʼ ji lá à yòʼ lì wán wom, e kfə̀n shó fo.» 9Wìr lìm Abraham və̀y nèn wày kiwó kfə́ e tàr wov lìm sar kibìy, e yiì kilìʼ wùn wun bìʼ kinyo kee shooy.

10Wìr lìm və̀y nèn lì nyám se tàr wov e ghvə̀m, a dzə̀ se á yoŋ ji *kamer, sí bèʼèy vifá ve juŋ ve tàr wov‑iì foon vidzə̀m, e nèn lò, a dù e nsay Mesopotamia ji wun du a e mvə̀mlaʼ fo Nahor‑iì dzə́. 11Wù lòo meé fo, e yiì, nyám si neèm e ghaa ndzəv ye tuŋéné ye vé‑eè shaa, e bó a nəə́ e ŋkàlaʼ. Yì‑iì sì e ŋkuùr, e ghan se vikìy‑iì fəə́, a tu mendzə́v. 12Wù wáa bùnrì, a suúy jii, «Éè Nyùy Tàr, Nyùy Abraham woo tàr wor lìm, ku yiì, é kinyo ke m wìyìn fen ki yii wún lán. Ku yiì bèy, e fíʼ dìn koŋ ye à kér fo Abraham woo tàr wor lìm. 13M tíy lèn e ghaa ndzəv ye tuŋéné fo wónlě ŋgòn veé ŋkàlaʼ fène wiy, tú mendzə́v. 14M yíi suúy e wùmòʼ woo wánlè ŋgòn jii, ‹Ku sə̀ʼə́r mbìʼ wó mendzə̀ví, e fò mo mendzə́v, é m nó.› A wù lòo dzə, e sùúy jii, ‹Nó, é m wiy e memoʼ mè, e fò áàkamer vée,› kù a dzə wùwun wo à shoʼon ne ji wiíy ŋgaà lìm wò woo Aysi. Á bèy, bo m kìíy ne ji à dìn ne a rú koŋ ye à kér fo tàr wor lìm.»

15Wù lòo màysì bunrì rə́, Rebeka bvə́y wùn à mbǐʼ mendzə̀ví é mbèʼ. Wù‑uù dzə̀ wan Betuel wo Nahor‑iì dzəən wùn wiiy və Milka, a Nahor‑iì dzə̀ fə́r Abraham. 16Rebeka‑aà dzə̀ wánlè ŋgòn, a wù bóŋ é ŋàŋ, a bó wù yóʼ ne kìíy lumèn. Wù sə́y é ndzəv ye tuŋéné, e tù mendzə́v e wùn mbìʼ, mè rún, wù nèn a kfən e bàm. 17Wìr lìm və̀y jùmrì, e kòóy, e sùúy sho jii, «Kii wò, ku fò mo mendzə́v fo wò mbìʼ é m nó.»

18Wù sə́ʼə́r mbǐʼ mendzə̀v fo wun mbèʼ, e ghàr é kiwo, e sùúy sho jii, «Ŋgàywìr, kò ri, e nò.» 19Wù nó, e màysì, wánlè ŋgòn və̀y suúy jii, «M lo, e tu mendzə́v memoʼ mè, e fo sa, áàkamer vée nó, e yù.» 20Wù suúy bey, e kù nèn kàrír mendzə́v fo wùn mbìʼ e nyám sí kikoŋ ke mendzə̀v. Wù kfən lèʼ, e dù tù memoʼ mè, e kù a tu bèy, e meé mo nyám sidzə̀m si‑iì noon, e yù. 21Wìr lìm və̀y kú a leéy kinyo ke wánlè ŋgòn və̀y yii kisə́sə, e fíʼ yen ji Nyùy sà yiì ne, ghán rəə́ bóŋ, moo ŋgáŋ á?

22Akameri màysì mendzə́v me noón mè, wìr lìm və̀y fəə́r ndzə̀ŋgwáŋ woó yuy wùn à mfuy si sibaà, a vifá vìn vidzə̀m vi meé é vifa, aá fér e kisha ke mbàm ke baar kí, 23e nèn dzə̀r shó jii, «À dzə̀ wan la? Kii wò, ku sùúy e mò. Kirə́ʼ kí dzə̀ e tàr wón laʼ fo a dzə̀ vèr shìíy á?»

24Wù bìnèr jii, «M dzə̀ wan Betuel wo Milka‑aà dzəən wùn Nahor.» 25Wù kfən sùúy jii, «Vèr kér kirə́ʼ ke a dzə̀ nyám si neèm shó wùn à yí nyàme e kuʼùn e věr laʼ, a kirə́ʼ ke a dzə̀ vèn shìíy shó ki dzə̀.»

26Wìr və̀y gvə́ʼə́r kitú, a ghvəm Nyùy Tàr, 27a suúy jii, «Búríi wáa dzə fo Nyùy Tàr, Nyùy Abraham woo tàr wor. Wù yoʼ kìm koŋ ye wù‑uù koŋ Abraham sho, a wù kfə̀n tíy e wun ŋkàʼmé. Wun woo Nyùy Tàr dànèr ne mo, e dù sho tìítiy e tàr wor lìm kfəə.» 28Wánlè ŋgòn və̀y léʼ, e dù e yè wóv lav, e bì kfə́ə yév vinyo vìy vidzə̀m.

29-30Rebeka‑aà kér lúmér rə, a yírí dzə̀ ji Laban. Mo Laban yenen ndzə̀ŋgwáŋ e jèmèr rə́ yuy wùn à mfuy si e wùn koy, e kfə̀n yù kinyo ke Rebeka‑aà suuyin ji wìr lìm və̀y kì sùúy, wù nèn nyèŋ, e dù yèn wír və̀y e ndzəv ye tuŋéné, a wù tíy fo wùn aàkameri. 31Wù yòŋ wun jii, «Ŋgaà mbùʼmé Nyùy Tàr, à tíy, yii ka fen? Á wìy, m bàʼtí ne kirə́ʼ ké ke kishiíy wùn à kímóʼ kí fo nyám sé si.»

32Wìr lìm və̀y nèn wìy, e nə̀ə́ e lav, Laban dù, e sə̀ʼə́r vifá fo akamerí ndzə̀m, e fò yí nyàm ji á fó á e nyám si. Wù kfən tàʼ mendzə́v ji ŋgaà lìm və̀y wùn à wír vəə́ su á wuú shó. 33Á tiír vifá ve yi, wìr lìm və̀y suúy jii, «Bó yòʼ dzə̀ m yì kifá, a bó m tiísí ntum yem.»

Laban nèn sùúy sho jii, «Tiísí ri.»

34Wù nèn kèʼ jii, «M dzə̀ wir lìm Abraham. 35Nyùy Tàr səə̀vì ne tàr wor lìm feyì, wù wáa dzə ŋgaà kav. Nyùy Tàr fò ne wun ŋgoo se njiì wùn à sé nàʼ si, visha ve mbàm, ke fəvír kí wùn à ke baar kí, vé lìm vee vilum wùn à vee vikìyí, akamer wùn à vimbèʼbìy ví. 36Sara woo wiiy tàr wor lìm yòʼ‑oò lo tàv dzə̀ə́. Wù‑uù dzə̀n, e bóo dzəə́ wán lumèn. Tàr wor lìm nen fò kifá kfə́ kidzə̀m e wan woo shooy. 37Tàr wor lìm‑eè sùúy, m lìʼ ji bó m yòʼ wíy tàʼ wiiy wan və á fo mvə̀m wónlě ŋgòn veé Kanan fo wun dzə́. 38Bòŋ, é m kfə́n á e bàm e tàr wóv laʼ wùn áàtàr wóv kfəə, e tàʼ a wiíy wan və fó fo. 39M dzə́r e tàr wor lìm jii, a m sà dù, e yèn wiíy, wù tén fo vèr wun wáa wìy, m yèe le á? 40Wù bìnèr jii, Nyùy Tàr wo wun ghvə́mé waà yíi tsənsí a nshìylav rə, é yì yii, é ghán yémé wàá boŋ, é m koóy wiiy wàn fo áwuné laʼ, kù aáwuné kfəə. 41Kishiíy ke m mee aáwuné laʼ, bo m bòy a ne fo mǒ kilìʼ. Aá fə̀m tèn fóo fo wiíy, bo m kù bòy a ne.

42«M wíy, e mèé e ndzəv lán, e bùnrì jii, ‹Éè Nyùy Tàr, Nyùy woo wo tàr wor lìm Abraham, ku yiì, é ghán ye m wìyìn fen rə̀ne boŋ. 43Lèn, mo m tíy e shùu ndzəv ye tuŋéné, ku yiì ji wánlè ŋgòn wo wù yíi wìy ji wun tú mendzə́v, m yoŋ sho ji wù fó á mo mendzə́v fo wun mbìʼ, é m nó, 44wù binèr jii, «Kò, e nò», fó bèy, kfə́n fó sa e nyám sém sí, kù a dzə wùwun wo shoʼon wò woo Nyùy Tàr ji wáa dzə wiiy wàn tàr wor lìm.›

45«Kù mo m dzəə́ bunrì bèy e mǒ shiliv, Rebeka nèn bvə̀y wùn à mbǐʼ mendzə̀ví e wun mbèʼ. Wù sə́y é ndzəv, e tù mendzə́v, m suúy shó jii, ‹Kii wò, ku fò mo mendzə́v, é m nó.› 46Wù ku nèn sə̀ʼə́r mendzə́v fo wun mbèʼ, e sùúy jii, ‹Nó ri, é m kfən fò sá memoʼ mè, é nyám sé si nó.› Á bèy, m nen nò, wù kfən fò sá, nyám si nó. 47M nen dzə̀r e wun ji wù sà dzə̀ wan la á? Wù bìnèr ji wun dzə̀ á wan Betuel woo wan Nahor, wo Milka‑aà dzəən wùn wun. M nèn wày ndzə̀ŋgwáŋ é yuy wo, e kfə̀n wày mfuy si é koy wo, 48e nèn gvə́ʼə́r kitú kém, a ghvəm Nyùy Tàr, a sùyrì wun, wun wo dzəə̀n Nyùy Abraham woo tàr wor lìm. Wù dànèr ne mo é dzəə yee tìítiy, m táʼ wiiy wàn Abraham fo áwuné mvə̀m kfəə. 49Kee lèn ki, a vèn yèn ji vèn‑éè yii kinyo ke ru kí e tàr wor lìm, kìn bó vèn yòʼ‑óò yii, á nèn gwàrìr mo, é m kiíy fo m binè.»

50Laban wùn Betuel bìnèr jii, «Kinyo kìn ki lò a dzə̀ fo Nyùy Tàr, a bó yòʼ dzə̀ vèr wàa ker kinyo kée suúy. 51Rebeka və̀ne, a wù tíy e wò si. Lì ri, a dù sho, é wù du a dzə wiiy wan tàr won lìm mo Nyùy Tàr kì suuyin ne.» 52Mo wìr lìm Abraham və̀y yuun kinyo ke áwune suuyin, wù nèn tsə̀m ndzəə́, e làʼ kitú e nsay, a ghvəm Nyùy Tàr. 53Wù nèn lò, e fə̀ə́r vifá ve á fèrìn e kisha ke mbàm ke baar kí wùn à ke fəvír kí, à ndzə̀y seé kilùm si, e fò e Rebeka. Wù kfən fò sá vifá veé kilùm e fər Rebeka wùn yè wov.

54Á súŋnín bey, e màysì, wìr lìm Abraham wùn à wír ve wùn áwune‑eè dzəə̀né yíkír, e nònín, e nèn shìíy fo. Ndzə bvəə́shí, e ràn, wù suúy jii, «Vèn maʼti mo lèn, é m wáa kfən e bàm fo tàr wor lìm.»

55Fər Rebeka wùn yè wov nèn bìnèr jii, «Màʼtì, é jìn dzəʼəm vèr áwune moo vishiíy e ghvə̀m bèy, e bó a wìy.»

56Wù nèn sùúy aáwune jii, «Mo Nyùy Tàr kì yiìn ne, ghán rə̀ne bóŋ, lá vèn yòʼ yiì, é m ndzəy. Vèn maʼti, é m wáa kfən e bàm, e dù yèn tàr wor lìm.»

57Áwune nèn sùúy jii, «Vèr‑íì jaŋ wán, e yù fo wun shuù.»

58Á nèn jàŋ Rebeka, e dzə̀r shó jii, «À koŋ ji vèn wìr və̀n wáa dù lèn à?»

Wù nèn biìmé ji «Eè, vèr wun‑éè wáa dù.»

59Á bèy, á nèn biìmé ji jèmèr yev Rebeka du á wùn à wìr lìm Abraham və̀y, à wír ve wùn áwune‑eè dzəə̀né, e kfə̀n fò liy Rebeka, wù wáa dù sa e wun bàm. 60Á nèn a shàʼtì Rebeka, a suúy sho jii:

«Éè jèmèr yer, Nyùy ku bùʼ wò,

áà dzəə́ wón ansə̀kì, ansə̀kì,

é wù kfən yiì,

é rám yée wìy sò aŋgàa vibàn vév.»

61Rebeka wùn à wónlě lìm vəə́ nèn kòʼ akamer ji wùn à wìr lìm Abraham wáa dù. Á nèn lò, a dù.

62Wáa dzə e ghan sin, a Aysi ló ne fo Beer‑Lahay‑Roy, e wìy, a dzə e Negev. 63Lòo dzə e ŋkuùr wùmòʼ, wù fəə́, a kaarí e kwaʼ, a rə̀m vinyo. Wù lòo nàn sí, e yèn aàkameri wiyì. 64Rebeka lòo nàn sa sí, e yèn Aysi, e sə̀ʼə́y fo wun kamer, 65e nèn dzə̀r e wìr lìm Abraham jii, «Dzə̀ la və̀sə e kwaʼ, wo wù wiy ji vèsən áwune tárnín?»

Wù bìnèr jii, «Dzə̀ tàr wor lìm.» Rebeka nèn lì ndzə̀y se á yii taar e kitu, e sùm sí rə́ shó.

66Wìr lìm nèn fèr e Aysi vinyo ve wù‑uù yiìn vidzə̀m. 67Aysi nèn lì Rebeka, e nə̀ə́ sho e kibàn ji wù sì á wíiy və, a kòŋ wun. Shilív sə́ shí nèn a rə̀sìn fo yè wóv kpu.

Currently Selected:

Kèʼlo 24: LNB

Highlight

Copy