Lim Aŋgàa Ntum 2

Kiyoy ke Ranén kí wíy

1Kishiíy ké kiŋkàʼ kímóʼ kí nèn wìy ghèén, aá yoŋ ji *Pentikor. A wír Jesuse kì bàʼtí kirə́ʼ kimòʼón adzə̀m. 2Áwune sàsìn, e yù, a kifá ki yór fó yuv moo kinsəm. Kí wìy, e nə̀ə́, e rùn é lav ye áwune‑eè dzəə̀n shó. 3Áwune lòo leéy, e yèn kifá, a kí shwínin viliímé ve və̀y, a ví sáʼti, du, tiim e wìr mòʼón mòʼón kitu. 4Kiyoy ke Ranén kí ku nèn wìy, e rùn aáwuné meliv, e yiì, áwune kèʼ, a suŋnín lám sé vitum jeéy jeéy.

5Wáa dzə e ghan see shooy, a wír veé Juda ve vé‑eè ghvə́m Nyùyi kì lòkìr vitúm vidzə̀m, e wìy, e bàʼtí e Jerusalem foo fèy. 6Á yú mo kifá kìy ki yor bèy, á nèn wìy, e bàʼtí e wír Jesus vìyí ghaŋ nyanyày. Á yú, aá fiʼtì kinyo, a wìr mòʼón mòʼón yú aáwuné làm sé vitum jeéy jeéy, kí tárír áwune. 7Á wáa ker gháʼ, a ghaynín jii, «Wír ve á súŋnin vìne yòʼ dzə̀ wír veé Galeli à? 8Kí ghàn é le, bo áwune wáa suúy vinyo, é vèsən wáa yu e vèsə́n làm sí jeéy jeéy? 9Vèsən ámóʼó lò fo Patia, ámóʼó fó Media wùn à fó Elam. Aámóʼó ló fó Mesopotamia wùn à fó Juda, à fó Kapadosia, ámóʼó fó Pontur wùn à fó Asia. 10Ámóʼó ló fó Firigia, wùn à fó Pamfilia. Ámóʼó ló fó Ejiv wùn à fó ntèʼ seé Serina se sí dzəə̀n é wòŋ Libiya. Ámóʼó fó Rom, a dzə̀ wír veé Juda wùn à ve á bìnkìn bínkin ji wír veé Juda. 11Ámóʼó ló fó Kiret wùn à fó Arabia, a vèsən áwune adzə̀m yú e vèsə́n làm sí jeéy jeéy mo wír vìne fiʼtì viŋgaʼnìn ve vinyò ve Nyùy yii.» 12Á wáa ker gháʼ bèy, kí kfə́n a tarír áwune, á wáa ghaynín jii, «Kee ben ki dzə̀ ka?» 13Aámóʼó nèn shéʼ kév sheʼén jii, «Koò meluʼ wír veé Galeli vìn.»

Kisúŋnìn ke Pita

14Pita wùn à kibér ke aŋgàa ntum Jesus vee nshòv mòʼón e ghvə̀me nèn nànèn. Wù wáa suúy e màŋgòŋ və̀y jii, «Ven vee wír veé Juda wùn à veé Jerusaleme adzə̀m, vèn yuúrí, é m suúy mo kí dzəə̀n. 15Mo dzə̀ə́ lèn shúy bvə̀ʼə̀ kijàvndzə, bó wír vìne yóʼ ne nò kifá, mo vèn kwaʼtì. 16Kinyo ke kí kooy lèn kìn ki dzə̀ ke Joel woo ŋgaà ntum Nyùy‑iì suuyin fó ŋgùʼ jii:

17 # Joel 2.28‑32 (Grik). « ‹Nyùy suuy jii, wíy lòo dzə e ghan sé bàm sí,

é m fó Kiyoy kém e wìr dzə̀m,

é wón vén vee vilum wùn à vee vikìyí wáa yu vinyo fo mò, a tiisí,

é wón vén vee wónlě nsùme wáa yen vinyo e njà vinjeenjèm,

é ŋgày sén sé wìr si wáa yen vinyo e njèm.

18A wíy lòo dzə e kishiíy foo fèy,

é m kfən fò sá Kiyoy kém áàŋgaà vém lìme adzə̀m,

kìn dzə̀ woo lumèn, kìn dzə̀ woo wiíy,

aá wáa yu sa vinyo fo mò, a tiisí.

19M wíy yiì vinyo ve ghaʼtín ví é mbàʼ,

e kfə̀n dìn visəəm ve beemén ví é nsay.

Mensə́ wùn à və́yí, à kindzə́ʼ ke ghaʼtín kí wíy a dzə.

20A shùy wíy ndzəmén, lóo sən sənén, ŋwee lóo bàŋ moo mensə́,

é bo kishiíy ké Tàr ke ghaʼán kí gheén.

21A wír ve á wíy a lon fo wun woo Tàr adzə̀me wíy lùŋ.› »

22Pita nèn kfə̀n yòŋ jii, «Ven vee wír veé Isray, vèn kfən yuùrí. Jesus woó Naasarer dzə̀ wír, a Nyùy‑iì lo dìn e vèn kiránén ji tùm á wun mo wù‑uù fó vitaáví shó, a wù yii viŋgaʼnìn ve vinyò ve ví din vitaáví vé Nyùy, a wíri leey, kér gháʼ. Vèn kì bey, bìʼ fo vinyo vee shooy vi‑iì kooy a dzə̀ e věn mvəm. 23Jesus və̀n dzə̀ wo vèn‑eè yuyrin e fó ye vèn‑eè foon e wír ve bií, á tá é kici. A kù‑uù sìysì Nyùy fo ŋgùʼ, kí wáa koóy, a wù kiíy ne. 24Wù nèn fə̀ə́r Jesus fo kpu, wù bòy fo sày, bìʼ fo bó yòʼ‑oò dzə̀ kpúu ghàtí wun, a ker fo moo wir sháŋ. 25#Nsùyrì Nyùy 16.8‑11 (Grik). A Fòn Davir‑iì lo yòŋ kinyo ke Jesus və̀n jii:

« ‹Mò‑oò yèn Nyùy Tàr, a wù dzə́ vèr wun ghán sidzə̀m.

Wù dzə́ e mǒ koy yìyí, fo kifá ki səʼ mo.

26Bìʼ bey, m nén a ker kishéʼrì e mǒ shiliv, a leŋ shéʼ.

Fə̀m mo m dzəə̀n wír fo wìr, m kù leey a dzə̀ fó mbìy,

27bìʼ fo wò woo Nyùy yòʼ wíy màʼtì kiyoy kém áàŋkfəə́ wòŋ,

a bó à yòʼ wíy màʼtì é ŋgaà wò lìm wo juŋ foy é sày.

28À dìn ne mo dzə́ə ye dzə̀ m shaà shó, e bóo lùŋ,

a m wíy a dzə e wò si, a ker kishéʼrì ke kuʼùn kí.› »

29Pita nèn kfə̀n yòŋ jii, «Afə̀r vem, a dzə̀ m wàa suúy e vèn là méŋnín jii, tàr à ràm yesən woo Davir və̀n‑eè lo kpù, á dzəə̀mè, a say rəə́ dzə̀ə́ fèn, e shem lèn. 30Wù‑uù dzə̀ *ŋgaà ntum Nyùy, a wù‑uù kìíy ne ŋkàʼmé wo Nyùy‑iì kàʼàn wun sho, e kfə̀n lìʼ ji wun wíy fo kàvàʼ və e wan woo wùn ram. 31Wù nèn tàv yèn kinyo ke Nyùy‑iì wíy yiì, a fèr ji *Mfə̀ə́r wo Nyùy‑iì kàʼàn və̀n wíy fəə fo kpu. A dzə̀ kíwun ke wù‑uù suuyin jii, ‹wù yòʼ‑oò lo gòʼ aàŋkfəə́ wòŋ, a bó jàv rə wùn yòʼ‑oò lo fòy.› 32Ŋgaàŋ dzə̀ Jesus, a Nyùy‑iì lo fə̀ə́r wun fo kpu, ver vee aŋgàa ŋgoo vəə́ yén wír adzə̀m. 33Nyùy nèn kfə̀n kòʼór wun, e dzə̀ʼə̀r e wùn koy yìyí, e fò Kiyoy ke Ranén kí shó mo wù‑uù kàʼàn. A vinyo ve vèn yén lèn, kfə̀n yú vìn vi dzə̀ Kiyoy kee shooy mo Jesus foon sá e wír vəə́. 34#Nsùyrì Nyùy 110.1. Davir dzə̀ kfə́, a bó wù yòʼ‑oò lo kòʼ é yuv. Yii bèy, a wù‑uù lo sùúy kee kùm Mfə̀ə́r jii:

« ‹Nyùy Tàr‑iì sùúy e Tàr wor jii,

«Dzə̀ʼə̀m e mǒ koy yìyí,

35a shìy ghán se m wíy neèr aŋgaà vé vibàn ji kibur, áà tiír wuú yé sho.»›

36«Wír veé Isray adzə̀me ku nèn a kiíy kijuŋ jii, Jesus wo vèn‑eè taan é kintam və̀y dzə̀ á wùwun wo Nyùy lèmèn ne ji Mfə̀ə́r wo wù‑uù kàʼàn, e kfə̀n lèm ji Tàr à vifa vidzə̀m.»

37Wír vìyi yú kinyo kìn, shilív shév shí seèm. Á dzə́r e Pita wùn aàŋgàa ntum Jesuse adzə̀m jii, «Afə̀r ver, a dzə̀ vèr yèe le lèn?» 38Pita bìnèr jii, «Wìr mòʼón mòʼón biner shiliv sə́, aá wáy ven é ndzəv e Jesus Kristu yir, é Nyùy laysin vinyo vén ve bi ví, e kfə̀n fò ven fómo və wo dzəə̀n Kiyoy ke Ranén kí. 39Nyùy‑iì lo kàʼ vèn à wón véné é kinyò fèn, e kfə̀n kàʼ sa vitúm ve ví yòʼ sí kiiy wun vidzə̀m. Ŋkàʼmé woo shoon dzə̀ fo wíri adzə̀m ve Nyùy Tàr woo Nyùy wòsən jaŋ ji á wiy, e yèn wun.»

40Pita nèn kfə̀n a suúy vinyo vímóʼ ví vinín, a tir áwune jii, «Vèn ku sə̀ vitú vén fó ŋgeʼ ye Nyùy wíy màʼ e ŋgwàʼ ye bi rə̀n kitu.» 41Wíri yú kisúŋnìn ke Pita kìn, ámóʼó biímé anín, á wáy áwune é ndzəv. Wáa dzə e kishiíy fóo fèy, wíri tátí ŋgoo wìr Jesus ansə̀kì ataár. 42Á ku nèn a yu kinyo kimòʼón a dzə̀ ke aŋgàa ntum Jesuse yéʼeyì, wùn áwune wáa ghanén, a yinín kikóŋ, a bùnrì amòʼón.

Dzəʼə̀m wìr Jesus

43Aŋgàa ntum Jesuse nèn a yiì vinyo ve ghaʼtín ví, ví wáa dìn vitaáví vé Nyùy, wíri wáa yen, a ker gháʼ. 44Wír Jesus adzə̀me ku nèn a ghanén amòʼón, a ker kifá kév kimòʼón. 45Áwune lo, á wàa fiìnè kéŋ yév, a jàv mbàm e wìr dzə̀m mo kíghàʼ wìr dzəə̀n. 46Á kfə́n a lò, a tarnín sa e *lav cù yeé Jerusalem foo fèy vishiíy vidzə̀m, a bùnrì, e kfə̀n a yikír e melav, a fonín e kishéʼrì ki, 47a burí Nyùy ghán sidzə̀m. Wìr dzə̀m wáa yen kinyo ke áwune yii, a kòŋ liì wov. Nyùy ku nèn a lùŋèr wíri vishiíy vidzə̀m, a dzə̀sì kintatì ke wìr Jesus sho.

Currently Selected:

Lim Aŋgàa Ntum 2: LNB

Highlight

Copy