Marɨkusɨ 4

Nɨgham nə Nanɨ mbɨ́ʼ a Ŋwɔn Ngwarɨ Mɨdzɨ ə

(Mat 13:1-9; Alu 8:4-8)

1Yeso a bə́ mbiʼnɨ ndiʼə a ngə́rɨ́ Sagɨrə Galili ə. Ɨnɔ ɨbɛn wa ɨ gháʼnɨ́ ntsá mbó ɨ kárɨ́sɨ́ ayi a nye ndóm wa a tsínɨ́ nɨ nkuŋə a mu abáŋ a nkyi, ɨ shiʼtɨ tsi ɨwu a mu sagɨrə wa; ɨnɔ ɨbɛn wa ɨtsum ɨ tɛm a ngə́rɨ́ sagɨrə wa. 2A tíʼ ndiʼ awa nɨ ɨnu tsɨ ghaʼtɨnɨ a mu mɨgham mə nanɨ ə. A mu ndiʼ ɨzhi məzen, a sóŋ a mbó bo ngə́:

3“Zuʼnə le! Ndyiʼ mɨshwom wu tse a ghɛ́n a mbi mɨdzɨ ə. 4Mbáʼ a kɨ́nə́ ngwarə lá, mbum tsə tse vwókɨ́ abɔʼ ndómnji, bɨsɨ́ŋ yen sɛʼtɨ nkfurə. 5Mbum tsə mɔʼɔ vwókɨ́ atú aláŋsə́ ngɔʼ mbáʼ ɨshe sé ɨwu gháʼtə. Tsɨ byí ntóm, mbáʼ ɨshe sé ɨwu shwitɨ lá. 6A nkfu za nɨnyom a tánɨ́ ntsɛgɨ, a tɔ́n a mɛrə mbáʼ mɨngaŋ ɨma sé bé lá. Mɨ tíʼ ndzómnkə́. 7Tsə mɔʼɔ mbum vwókɨ́ a tɨtərɨ kyɛrə-kyɛrə, kyɛrə-kyɛrə wa a kwi njiʼ nchwi za mbyigɨ a ɨshe, ɨ keʼ bə̂. 8Mbum tsə mɔʼɔ vwókɨ́ atú ɨshe nɨkomə; ntom, nkwi, nkɨ mban nga nchwi ɛ. Nchwi za fɨ́gɨ́ nchwi nkfu mɨghúm mɨntárə́, mɨghúm mi ntugə, táʼ nkɨ ntsa adzaŋ za bɨ wárɨ́nə́.”

9Yeso a lwɨ́gɨ́nɨ́ ɨ soŋ ngə́, “Ŋwɔn wa a tsinɨ nɨ ɨtoŋnɨ a ndzúʼə á zuʼə!”

Anu za Mɨgham mə Nanɨ Men a mɨ Diʼnə

(Mat 13:10-17; Alu 8:9-10)

10Yeso a ghɨnə ntsí zɨzɨ, ɨbɛn ba bɨ tsínɨ́ nkárɨ́sɨ́ ayi abɔʼnɨ ba nɨghúm ntsɔb bá bitɨ ayi ngə́ mɨgham mə nanɨ ma diʼ lá ngə́ ke le? 11A tíʼ sóŋ a mbó bo ngə́, “Bɨ ghanə ɨnu nkubə tsə nɨfɔ nɨ Ŋwi a mbó bɨŋ ə, lá a mbó bɨ abyɛn, bɨ sǒŋ anu atsum a mbó bo lá a mu mɨgham mə nanɨ; 12taŋ,

‹Bo chi len ɨ kwiʼ len,

lá ɨ keʼ ze;

ɨ kɨ zhwiʼtɨ ɨ kwiʼ zhwiʼtɨ,

lá ɨ keʼ zuʼ nkɨ njiɛ.

Mbɨ́ʼ ngə́ bo bé ghɨ mə lá, muŋ bo mɨ bəŋ mɨntəm ɨ tiʼ tsi a bagɨ Ŋwi,

á wɛrə tiʼ ndɨgɨnɨ mɨbvu ɨma ghe.›”

Yeso a Fɨʼtɨ adzaŋ za Nɨgham nə Nanɨ mbɨ́ʼ a Ŋwɔn Ngwarɨ Mɨdzɨ a nɨ Diʼnə

(Mat 13:18-23; Alu 8:11-15)

13Yeso a tíʼ mbítɨ́ awa ngə́, “Njingə nɨ se zuʼ nkɨ nji anu za nɨgham nə nanɨ nen nɨ soŋnɨ le? Nɨ ghɨ tíʼ tsa lá ɨ nə́ ɨ zuʼ kɨ zhi mɨgham mə nanɨ mɨtsum le? 14Ngwarɨ mɨdzɨ wa a warɨ lá nkən Ŋwi ə. 15Ɨbɛn bə mɔʼɔ be lá tso mbum nchwi tsa tsɨ vwókɨ́nɨ́ abɔʼ ndómnji lá. Tsɛʼ mbáʼ bo zuʼnɨ, Satan a byi ntiʼ ngyen, ndɔgɨ nɨgham na bɨ warɨnɨ a mu ntəm bo lá ndo nɨ nɛrə ghe. 16Ɨbɛn bə mɔʼɔ be lá mbum nchwi tsa bɨ warɨnɨ atú aláŋsə́ ngɔʼ ə. Tsɛʼ mbáʼ bo zuʼnɨ nɨgham na, mbyi nkwárɨ́ a nɛrə nɨ nɨdorɨ ə; 17lá nɨgham na keʼ nɨ mɨngaŋ a ntəm bo tsi, bo chwa ntiʼtɨ a nye məkum a nkfu; ngɨ́ʼ ghɨ́ ntíʼ ngyen kə bɨ dɨgɨ awa mbɨ́ʼ nɨgham na, bo byi nkɨ nyɛʼ anu za. 18Bə mɔʼɔ lá tsa tsɨ vwókɨ́nɨ́ a tɨtərɨ kyɛrə-kyɛrə; bo lá ɨbɛn ba bɨ zuʼnɨ nkən wa, 19lá ɨnu atuəshe bo bɨ akɔŋnɨ aza a nye afuʼ, abɔʼnɨ ntɛgɨ ntɔŋ a nye ɨbə́ŋ ɨdzúm tsa bo lɔnə, ɨ kon njiʼ nkən wa, nkən wa keʼ mɨntam konə. 20Lá mbum tsa bɨ warɨnɨ atú ɨshe zɨ shiʼnɨ lá, tsɨ nɨ ɨbɛn ba bɨ zuʼnɨ nkən wa, mbem a wɛrə, nkonɨ mɨntam, ɨ fɨgɨ nchwi nkfu mɨghúm mɨntárə́, mɨghúm mi ntugə, táʼ nkɨ ntsa adzaŋ za bɨ bínə́.”

Bɨ Chwuʼ Nkaʼ lá bɨ Tɛgɨ Atú Atɛkɨ a Nkaʼ ə

(Alu 8:16-18)

21Yeso a ghɛ́n nɨ mbyi mbitɨ a mbó bo ngə́, “Ŋwɔn tsɛrə a chi kon a ndá nɨ nkaʼ ɨ tɛgɨ a shwúrɨ́ akəbɨ kə ɨ tsagɨ ɨ tɛgɨ a ntɨnkon nkeʼ be atú atɛkɨ a nkaʼ tɛgɨ le? 22Mbɨ́ʼ ngə́ azúm atsum za bɨ lwɛʼnɨ bɨ ghɨ fu nɨ zɛrə asaŋəsaŋ; azúm atsum za bɨ bɔmtɨnɨ, bɨ ghɨ shwirə. 23Ŋwɔn tsum wa a tsinɨ nɨ ɨtoŋnɨ, á zuʼə.”

24A kwíʼ sóŋ a mbó bo ngə́, “A nɨ tɛgɨ atú a nye ɨnu tsa nɨ zúʼnə́ ghe; ɨfɨʼ za o ghanɨ abyɛn, a nɨ za bɨ ghɨ gha ɨ wa, ɨ bə kɨ bvurɨ kwiʼtə. 25Mbɨ́ʼ ngə́ a mbó ŋwɔn wa a tsinɨ nɨ zɛrə bɨ ghɨ kwiʼtɨ; a mbó ŋwɔn wa ka a tsi ayi nɨ azúm, tsɛʼ za a tsinɨ nɨ zɛrə lá, bɨ ghɨ kwárə́.”

Nɨgham nə Nanɨ mbɨ́ʼ Mbum Azúm za ɨ Kwínə́ ghe

26Yeso a ghɛ́n nɨ mbyi a sóŋə́ ngə́, “Nɨfɔ nɨ Ŋwi be lá tsɛʼ tso ngə́ ŋwɔn a bi mɨdzɨ a ɨshwom, 27ɨ nɔŋ ngvwúkə́ nɨ ɨtfúʼ bo nəzhwɨgɨnɨ, mɨdzɨ ma tom nkwi, a keʼ zhi adzaŋ za a tsanə. 28A nɨ tsɛʼ ɨshe za ɨ ghɨnə mɨdzɨ tomnə, nkwi, nkonɨ mɨntam; a ntsambyi akɔʼtɨ, mbán, nchwi ntiʼ ndon a nye atsuʼ ə. 29Nchwi za ghɨ́ ntən, mboŋ ɨshwom a tiʼ nchwan nɨ ɨŋwi ɨzhi, mbɨ́ʼ ngə́ nkfu mbɛʼ nchwi ɨ kuʼə.”

Nɨgham nə Nanɨ Mbɨ́ʼ Ndzaŋ Ɨsa ghe

(Mat 13:31-32; Alu 13:18-19)

30Yeso a bítɨ́ ngə́, “Be bɨgɨnə fɨʼnɨ nɨfɔ nɨ Ŋwi lá a nye ake kə ɨ ná a nɨŋə nɨgham mbɨ́ʼ a nɛrə le? 31Nɨ be lá tso ndzaŋ ɨsa, mbáʼ be bɨ bi, ɨ nɨ táʼ a tɨtərɨ ndzaŋ tsa tsɨ lánɨ́ nkɨ́gɨ́; 32lá bɨ ghɨ́ mbi, ɨ kwi ndzám, ɨ sə mbó adzaŋ za bɨsɨ́ŋ tíʼnə́ ngyíŋə́ nkórɨ́ nkə ɨtsa ɨwu ə.”

33Wɛrə a lɔ́gɨ́ ɨbə́ŋ mɨgham mə nanɨ men mə ghaʼnɨ ɨ soŋ anu a Ŋwi ɨwu a mbó bo, ɨ kɔʼ kuʼ a nye ɨfɨʼ za bo chínɨ́ zuʼ ɨ kɨ zhyɛ. 34A sé gham a mbó bo tɨ ná nɨgham ə, lá a ghɨ ntsí a ndzum bo bɨ bɨyɛʼ ɨbyi, a fɨʼtɨ anu atsum a mbó bo ghe.

Yeso a Bɔrɨsɨ a Kɨfɛrə Wu Ntɨŋ ə

(Mat 8:23-27; Alu 8:22-25)

35Nkwɛfɔ ghɨnə ngyén, a njwi məwa, wɛrə a soŋ a mbó bɨyɛʼ ɨbyi ngə́, “Bɨgɨnə daŋ a sagɨrə wen ntom ngɛn a ndzɨŋə wu mɔʼɔ ghe.” 36Bo tíʼ nyɛʼtɨ ɨnɔ wa a ndzum nkon a mu abáŋ a nkyi za Yeso a fómnɨ́ ntsi wə mu, bo tiʼ ndɔgɨ ayi bo bo ghen. Ɨbáŋ nkyi tsɨ mɔʼɔ tsí bo bo ghe. 37Kɨfɛrə wu ntən a bíʼnɨ́ ɨ kum tsa, nkyiɛ yiŋənɛmə tiʼə ngyíŋə́ ntúmə́ abáŋ a nkyi za nkúŋə́ wə mu, adzaŋ za a kɨ́nə́ ntíʼə ndúŋə́ ghe. 38Lá wɛrə a tsí ayi a ndzum, a mu abáŋ a nkyi za, ndzɛʼtɨ atú azhi a nye lɨʼtɨ atú ndyě ghe. Bo tíʼ ndzɛm ayi mbitɨ ngə́, “Ndiʼ aŋwaʼnɨ, njingə ka a be ayi anu zə tse a mbó gho mbáʼ be bɨgɨ kfokɨ le?”

39A ló atɨ́ ngámtɨ́ a kɨfɛrə wa, ntiʼ sóŋ a mbó nkyiɛ yiŋənɛmə wa ngə́, “Nyaʼ nchyɛ!” Kɨfɛrə wa tíʼ nkyɛ́ntɨ́, ɨdiʼ tiʼ mbɔnɨ ngə́ tum ə. 40A tíʼ sóŋ a mbó bɨyɛʼ ɨbyi ngə́, “Nɨ bɔ́gə́ lá ake le? Nɨ bvurɨ nɨ abeməntəm tɨ tsi le?”

41Bo tíʼ ntsí nɨ abɔgɨtɨ ntiʼə mbítə́ awa bo nɨbo ngə́, “A lanɨ mbe ɨwa a wɛnə mbáʼ ɨ ghɛn kuʼ a nye kɨfɛrə bo sagɨrə wu ngwi zúʼnɨ́nə́ ayi lá le?”

Currently Selected:

Marɨkusɨ 4: MNT

Highlight

Copy