Marɨkusɨ 3

Yeso a Tsuʼ a Ŋwɔn wa a Tsínɨ́ nɨ Akfo Abó ə

(Mat 12:9-14; Alu 6:6-11)

1Yeso a bə́ mbən ngɛn a mu ndáŋwi bə Yuda ghe. Ŋwɔn tse a tsí ɨwu nɨ akfo abó ə. 2Bə Farisao tíʼə ndyiŋə ayi, a ndzé ngə́ a mɨ tsuʼ ayi a Njwi Alaʼ Ŋwi, taŋ á bo tiʼ ntsi nɨ abárɨ́ ɨ kaŋ ayi ɛ. 3A tíʼ sóŋ a mbó ŋwɔn akfo abó wa ngə́, “Yen ɨghə”. 4Ntiʼ mbəŋ mbitɨ awa ngə́, “A nɨ Nyɔngɔŋ a Njwi Alaʼ Ŋwi a ngɨ ɨbɔŋ kə a ngɨ ɨbvu, a fɨ́gɨ́ ŋwɔn a mu ngɨ́ʼ kə a njwítə́ le?”

Lá bo náʼ ayi ɛ. 5A lə́ŋtɨ́ awa nkárɨ́sɨ́, nɨ mɨlwi, ndzəŋnɨ adzaŋ za mɨntəm ɨma tə́nɨ́nɨ́ tso ngɔʼ, ntiʼ soŋ a mbó ŋwɔn wa ngə́, “Shiŋ abó azo ə.” A shíŋ a zɛrə, abó azhi a shwetɨ wədiʼ ə. 6Bə Farisao fú abyɛn mbyi ntiʼ nchwá ngǒtə́ mbɨ́ʼ a Yeso bo bɨ ɨbɛn ba bɨ kɨ́nə́ ndzɔŋə Ɛrɔd ndǒ ndóm wa bɨ mɨ zhwitɨ ayi ɛ.

Ɨnɔ Ɨbɛn a Ngə́rɨ́ Sagɨrə ghe

7Yeso bo bɨ bɨyɛʼ ɨbyi tíʼ ndo ngɛn awa a ngə́rɨ́ Sagɨrə Galili, ɨnɔ ɨbɛn ɨ zɔŋ ayi ɛ. Bo ló a mbuʼ Galili, mbuʼ Yudiya 8ntáʼmbagə wu wi Yerosalɛm bo mbuʼ Idumeya, nkɨ ndo a nye ɨdiʼ tsa tsɨ ghɛ́nɨ́ ntsa fəŋ a Yorɨdan abɔʼnɨ kárɨ́kɨ́ Taya bo Saidɔn ə. Ɨnɔ ɨbɛn wa yén wəmbo lá mbɨ́ʼ ngə́ bo zúʼnɨ́ ɨnu ɨtsum tsa a kɨ́nə́ ngɨə ghe. 9Ɨnɔ ɨbɛn wa ɨ gháʼ be tɨ́sə́n a nye ndóm wa wɛrə a tíʼnɨ́ sóŋ a mbó bɨyɛʼ ɨbyi ngə́ á bo kyaŋtɨ abáŋ a nkyi a mbó zɨ mbɨ́ʼ ɨnɔ ɨbɛn wa ɨ tinɨ ngyen fágɨ́tɨ́ ɨ nyəŋtɨ ayi ɛ. 10Mbɨ́ʼ ngə́ a tsúʼnə a bə ghaʼnɨ, ŋwɔn tsum wa a tsínɨ́ nɨ nɨghɔ a tíʼə nyɔ́nə́ a mɔmtɨ wɛrə ghe. 11Nkfu tsum za ɨzhwi tsɨ tɔmnɨnɨ tsa tsɨ tsínɨ́ a mu ɨnye ɨbɛn zɛ́nɨ́ ayi, bo vwókɨ́ wə ɨshi, ntɔ́nkɨ́ ngə́, “O lá Mɔn Ŋwi ə!”

12A tíʼ nkwantɨ awa ngə́ njimbɨʼ bo lo soŋ a mbó ŋwɔn tsɛrə a ŋwɔn wa zɨə nɨ wɛrə ghe.

Yeso a Tsɔʼ Ntóm Yeso tsa Nɨghúm ntsɔb bá ghe

(Mat 10:1-4; Alu 6:12-16)

13Yeso a tíʼ nkɔ́ʼ ngɛ́n atú mbám ndzarɨ, ntɔŋ ɨbɛn ba zɨə kɨ́nə́ ndǒ; bɨ tiʼ ngyen wəmbo ə. 14A tíʼ ntsɔ́ʼ awa nɨghúm ntsɔb bá, ba a chwínɨ́ ngə́ ntóm Yeso, ngə́ á bɨ ghɔŋ bo bo, taŋ á wɛrə a ghɨ ntyígɨ́ awa á bo núm nkárɨ́ soŋ anu a Ŋwi, 15ɨ kɨ gha mɨtən mɨ fɨ́gɨ́ bɨdzɨŋ a mbó bo ghe.

16Ba nɨghúm ntsɔb bá ba wɛrə a tsɔ́ʼnɨ́ lá bɨ benə: Samɔn wa wɛrə a chwínɨ́ ngə́ Bita; 17Jemsɨ bo mɨma ɨyi wu mbáŋnɨ́ Yoane ba bɨ bénɨ́ ɨbɔ bɨ Zebɛdi ba wɛrə a chwínɨ́ ngə́ Boanajɛsɨ ndiʼ ngə́, “Ɨbɔ bɨ mbəŋ ə”; 18Andɨrɨya, Firɨbɔ, Batəloma, Matyo, Tɔmashi, Jemsɨ mɔn Afasɨ, Tadyo, Samɔn Nkɔŋəlaʼ, 19abɔʼnɨ Yudasɨ Iskario wa a ghɨ́nɨ́ fen ayi ɛ. Wɛrə a tíʼ nkwɛ́n ngɛ́n ayi a ntsundá ə.

Bɨ Soŋ ngə́ Yeso nɨ Bɛlzɛbu ə

(Mat 12:22-32; Alu 11:14-23; 12:10)

20Ɨnɔ ɨbɛn kwíʼ ngótɨ́ ngyen, adzaŋ za Yeso bo bɨ bɨyɛʼ ɨbyi sé byi ntsi nɨ abárɨ́ a ndzɨə ghe. 21Ngwəgɨ Yeso ghɨnə ndzúʼ, ɨ fú ngɛn ɨ ghɛn ko ayi ɨ kwɛn nɨ zɨ, mbɨ́ʼ ngə́ ɨbɛn kə́ sóŋə́ ngə́, “A banɨ ə!”

22Bɨdiʼ bɨ Nyɔngɔŋ ba bɨ lónɨ́ a Yerosalɛm ɨ shiʼ ngyen, bɨ sóŋ ngə́, “Bɛlzɛbu a kon wə ɨnye! A nɨ ɨfɔ bɨdzɨŋ wen wa a ghánə́ mɨtən wəmbo a fɨ́gɨ́ bɨdzɨŋ ə.”

23A tíʼ ntɔ́ŋ awa ɨ ná mɨgham a mbó bo ngə́, “Be Satan a fɨgɨ a Satan lá ɨ nə́ le? 24Be a be ngə́ alaʼ a yɛbtɨ atuəmbəm azhi a nye bɨbagɨ ba bɨ tǒkɨ́nɨ́ ɨtumbəm ɨtsa, alaʼ məza a mɨ kumnə. 25Nkɨ mbə mbe ngə́ be njwuʼ yɛbtɨ atuəmbəm azhi a nye bɨbagɨ ba bɨ tǒkɨ́nɨ́ ɨtumbəm ɨtsa, njwuʼ məza mɨ keʼ tɛmə. 26Be Satan a lo atɨ́ nkwənkɨ nɨ atuəmbəm azhi ntiʼ ngyɛbtɨ ayi, a chi keʼ tɛmə, ntiʼə ngěn lá a ndwitə ghe.

27Lá ka ŋwɔn tse a chi kon ayi a ndá ntɨŋ ŋwɔn ɨ fúʼ ɨdzúm ɨchi, tɨkə a byigɨ mbyi nkorɨ a ntɨŋ ŋwɔn wa; a nyom məwa a chi tiʼ fúʼ ndá wɛrə ghe.

28Tsɛʼ a nkənu, ma soŋ a mbó bɨŋ ə, bɨ ghɨ lɨgɨnɨ mɨbvu mɨ ŋwɔn mɨsɔŋ a ntsu mɨtsum abɔʼnɨ nɨgham nɨ tɨbɔŋ mbɨ́ʼ a Ŋwi na bɨ fɨgɨnɨ ngam; 29lá ŋwɔn tsum wa mbáʼ a ghamnɨ nɨgham nə tɨbɔŋ mbɨ́ʼ a Azhwi zə Fɛmnɨ, bɨ chi láʼ keʼ ɨbvu ɨyi lɨgɨnɨ mbɨ́ʼ ngə́ a vwo anu a ngɨ ɨbvu nɨnkoŋ ə.” 30(Yeso a sóŋ a məzen lá mbɨ́ʼ ngə́ ɨbɛn be tse kə́ sóŋə́ ngə́, “A tsi nɨ azhwi zə tɔmnɨnɨ ə.”)

Nɨmi bɨ Yeso abɔʼnɨ Ɨbɔmbɨma ɨbyi ɛ

(Mat 12:46-50; Alu 8:19-21)

31Nɨmi bɨ Yeso bo bɨ ɨbɔmbɨma ɨbyi bə mbáŋnɨ́ tíʼ ngyen; ntɨ tɛm a ntsundá, ntsagɨ nkən ntɔŋ ayi ɛ. 32Ɨnɔ wa ɨ shíʼtɨ́nɨ́ ntsí nkárɨ́sɨ́ ayi sóŋ wəmbo ngə́, “Nɨmo ɨgho bo bɨ ɨbɔmbɨma ɨbo tɛm abyɛn ndǒ agho ə.”

33Yeso a tíʼ nchwɨ́gɨ́ ngə́, “Nɨmi ɨghan bo bɨ ɨbɔmbɨma ɨbə nɨ bɨwa le?” 34A lenə ndzɛn ɨbɛn ba bɨ tsínɨ́ nkárɨ́sɨ́ ayi lá, ɨ soŋ ngə́, “Nɨmi ɨghan bo bɨ ɨbɔmbɨma ɨbə benə! 35Ŋwɔn tsum wa a ghɨnə anu za Ŋwi a lɔnə, a nɨ mɨma ɨghan wu mbáŋnɨ́, wu mangye abɔʼnɨ nɨmi ɨghə.”

Currently Selected:

Marɨkusɨ 3: MNT

Highlight

Copy