Marɨkusɨ 2

Yeso a Tsuʼ a Chɛbɨŋ ə

(Mat 9:1-8; Alu 5:17-26)

1Njwi tsɨ tsɛrə bənə ntsa, Yeso bə ntiʼ mbən a Kabɛrɨnaum ə. Bɨ láʼnɨ́ ngə́ wɛrə a tsí a njwuʼ ə. 2Ɨnɔ ɨbɛn yén ngótɨ́ adiʼ wa, adiʼ a ntɛm bə mɔʼɔ a keʼ bə mbe, kə́ tsɛʼ a ntsundá ə. Yeso kə́ sóŋə́ anu a Ŋwi a mbó bo ghe. 3Ɨbɛn bi nɨkwa byɛ́ʼ a chɛbɨŋ ngyen nɨ wɛrə wəmbo ə. 4Mbáʼ bo chínɨ́ keʼ ghɛn ɨ fátɨ́ ayi mbɨ́ʼ ɨnɔ ɨbɛn wa lá, bo ŋáʼtɨ́ azə̌ atú a ndá, tsɛʼ a kɨʼ wa Yeso a tɛ́mnɨ́, ɨ shiʼsɨ a ŋwɔn wa atú abaʼ azhi ntɛgɨ wə ɨshi ɛ. 5Yeso a zɛ́n abeməntəm aza ntiʼ soŋ a mbó chɛbɨŋ wa ngə́, “Mɔn ɨghan wu mbáŋnɨ́ bɨ lɨgɨnɨnə mɨbvu ɨmo ə.”

6Bɨdiʼ bɨ Nyɔngɔŋ bə tse ba bɨ shíʼtɨ́nɨ́ ntsí ɨwu kə́ nzhwuʼnə a tɨtərɨ bo nɨbo ngə́, 7“Ŋwɔn wen a ghamə adzaŋ wen mbɨ́ʼ ake le? A zɔmə a Ŋwi ə! Ɨwa chi lɨgɨnɨ mɨbvu ntsatɨ a Ŋwi le?”

8Yeso a byí njí a mu azhwi azhi anu za bo kɨ́nə́ nkwaʼtə a mu mɨntəm ɨma ntiʼ mbitɨ awa ngə́, “Nɨ kwaʼtɨ ɨnu tso mətsen lá ngə́ ke le? 9A yaŋnɨ zɨŋə anu ə, a sóŋə́ a mbó chɛbɨŋ wen ngə́, ‹Bɨ lɨgɨnɨnə mɨbvu ɨmo,› kə a sóŋə́ ngə́, ‹Lo atɨ́ mbyɛʼ abaʼ azo a ntɛ́mə́ ngěn› le? 10Ma mɨ diʼ ngə́ Mɔn Ŋwɔn a tsi nɨ mɨtən a mbyi wen a ndɨgɨnɨ mɨbvu ə.” Ma lan, Yeso a tíʼ sóŋ a mbó chɛbɨŋ wa ngə́, 11“Ma soŋ a mbó gho, lo atɨ́, mbye abaʼ azo nkwɛn agho.”

12A ló atɨ́ mbye abaʼ azhi, ntiʼə ntɛ́mə́ ngěn ayi a ɨshi ɨbɛn ba bɨtsum ə. Məziŋ anu a kɨ́ʼnɨ́ awa bɨtsum, bo tiʼə mbóntə́ a Ŋwi ɨ sóŋə́ ngə́, “Bɨgɨ láʼnə́ mbvúrɨ́ adzaŋ anu tso məzen tɨ ze!”

Yeso a Tɔŋ a Levi ə

(Mat 9:9-13; Alu 5:27-32)

13Yeso a kwíʼ fú ngɛ́n a ngə́rɨ́ sagɨrə Galili ə. Ɨnɔ ɨbɛn yén ngótɨ́, Yeso a tiʼə ndiʼə awa ghe. 14Adzaŋ za wɛrə a kɨ́nə́ ngěn lá, ndzɛn a nkwárɨ́ ashɛbɨ, Levi mɔn Afasɨ a shiʼtɨ ntsi a mu ndá afaʼ ngaŋ nkwárɨ́ ashɛbɨ zɨə. A sóŋ wəmbo ngə́, “Zɔŋ aghə.” Levi a ló atɨ́ ndzɔŋ ayi ɛ.

15Mbáʼ Yeso a kɨ́nə́ ndzɨ́ə a ndá Levi, bɨnkwárɨ́ ashɛbɨ abɔʼnɨ ngaŋ ngɨ mɨbvu a ɨnɔ kə́ ndzɨ́ə bo bɨ Yeso abɔʼnɨ bɨyɛʼ ɨbyi ɛ; mbɨ́ʼ ngə́ ɨbɛn ba bɨ zɔ́ŋnɨ́ ayi gháʼ ngɛn nɨ mbyi ɛ. 16Mbáʼ bɨdiʼ bɨ Nyɔngɔŋ ba bɨ bénɨ́ bə Farisao zɛ́nɨ́ wɛrə a dzɨnə bo bɨ ngaŋ ngɨ mɨbvu abɔʼnɨ bɨnkwárɨ́ ashɛbɨ lá, ntiʼ mbitɨ bɨyɛʼ ɨbyi ngə́, “A dzɨə bo bɨ ngaŋ ngɨ mɨbvu abɔʼnɨ bɨnkwárɨ́ ashɛbɨ lá ngə́ ke le?”

17Yeso a zuʼnə lá, ɨ soŋ a mbó bo ngə́, “Ka a be ayi ŋwɔn wa mbáʼ a tsinɨ ɨ shiʼnɨ mbáʼ a lɔnə a ŋwɔn ngaŋ ə, a lǒ ŋwɔn nɨghɔ ə. Ka ma yen aghan atuəshe lá a mbó ɨbɛn bə chinɨnɨ ə; ma yen be a mbó ngaŋ ngɨ mɨbvu ə.”

Abítɨ Mbɨ́ʼ Nchigɨ Nji tsə Ntsaʼtɨ Ŋwi ə

(Mat 9:14-17; Alu 5:33-39)

18A bé a nkfu tse bɨyɛʼ bɨ Yoane Ngaŋ Nga Nkyi abɔʼnɨ bə Farisao chigɨnɨ nji tsə ntsaʼtɨ Ŋwi ə. Ɨbɛn bə tse yén a mbó Yeso mbitɨ ayi ngə́, “Bɨyɛʼ bɨ Yoane abɔʼnɨ bɨyɛʼ bɨ bə Farisao chigɨ nji tsə ntsaʼtɨ Ŋwi lá ɨbo keʼ ma lan a ngɨə lá ngə́ ke le?”

19Yeso a chwɨ́gɨ́ awa ngə́, “Bɨghən bɨ nɨzɔ́ʼ chi chigɨnɨ nji mbáʼ ndóm mɨngən a bvurɨnɨ bo bo lá ɨ nə́ le? Bo chi keʼ tsi mə lá, mbáʼ a bvurɨnɨ bo bo ghe. 20Njwi ghɨ yen mbáʼ bɨ ghɨnɨ kwárɨ́ a ndóm mɨngən a mbó bo, á bo tiʼ nchigɨ nji tsə ntsaʼtɨ Ŋwi a njwi məwa.

21Ka ŋwɔn tse a ndɔ́gə́ ayi abagɨ atsɛʼ zə fi ntátə́ atsɛʼ zə lvuŋ ɨwu ə; be a ghɨ ma lan muŋ abagɨ atsɛʼ zə fi za mɨ yɛnɨ ɨ lo ayi nɨ ɨbagɨ ɨtsɛʼ tsə lvuŋ tsa tsə mɔʼɔ, á ngvo atsɛʼ wa bə faŋ ntsa adzaŋ za ɨ kwɛnɨ nchyɛ. 22A nkwiʼtə, ka ŋwɔn tsɛrə a ndɔ́gə́ ayi mɨluʼ mə fi ɨ nɨ́ŋə́ a mu ngobɨ#2:22 A nye mbɔm bə Yuda, bo kə́ nɨ́ŋə́ mɨluʼ lá a mu aban za bɨ nyɛ́tɨ́nɨ́ nɨ ngobɨnyam ə. Be o lɔgɨ mɨluʼ mə fi ɨ nɨŋ a mu alvuŋ a ngobɨ, mɨluʼ ma bebɨ ngobɨ za. mɨluʼ zɨ ndvuŋ ə. Be a ghɨ mə lá, mɨluʼ ma mɨ bebɨ ngobɨ za, ɨ tiʼ tsənkɨ aban za, á bɨ sám mɨluʼ ma abɔʼnɨ ngobɨ za. Bɨ baŋnə nɨ̌ŋ mɨluʼ mə fi lá a mu ngobɨ mɨluʼ tsɨ fi ə.”

Abítɨ Mbɨ́ʼ Njwi Alaʼ Ŋwi ə

(Mat 12:1-8; Alu 6:1-5)

23A Njwi Alaʼ Ŋwi zɨ tse, Yeso a kə́ ntsǎ a mu mɨshwom mɨ mɨsaŋ bo bɨ bɨyɛʼ ɨbyi ɛ. Mbáʼ bɨyɛʼ ba kɨ́nə́ ntɛ́mə́ ngěn bo bɨ Yeso lá, bɨyɛʼ ba kə́ fagɨ nchwi ɛ. 24Bə Farisao bítɨ́ a Yeso ngə́, “Ze azo, bo ghɨə anu za ka Nyɔngɔŋ a bem ayi a Njwi Alaʼ Ŋwi lá ngə́ ke le?”

25Yeso a chwɨ́gɨ́ ngə́, “Njingə nɨ bvurɨ tɨ tɔŋ anu za Devidɨ a ghɨ́nɨ́ a nkfu za nji gháʼnɨ́ ayi bo bɨ ɨbɛn ɨbyi le? 26A nkfu wa Abiata a bénɨ́ Ntumshe wu ngwi lá, Devidɨ a kón ngɛn a mu ndáŋwi, ndɔgɨ abán za bɨ lɛnɨ, nkfurə, mbáʼ a tsínɨ́ tsɛʼ bɨntumshe a nkfúrɨ́ abán məza. A kɨ́ ngá abán məza zə mɔʼɔ a mbó ɨbɛn ɨbyi ɛ.” 27Yeso a tíʼ ndwɨgɨnɨ soŋ ngə́, “Bɨ ghɨ́ Njwi Alaʼ Ŋwi a nkwátɨ́ ŋwɔn mɨsɔŋ a ntsu ə, bɨ sé ghɨ a ŋwɔn mɨsɔŋ a ntsu lá a nkwátɨ́ Njwi Alaʼ Ŋwi ə. 28Ma lan, Mɔn Ŋwɔn a kɨ mbe Maʼmbyí Njwi Alaʼ Ŋwi ə.”

Currently Selected:

Marɨkusɨ 2: MNT

Highlight

Copy