Marɨkusɨ 1

Adzaŋ za Yoane Ngaŋ Nga Nkyi a Kɨ́nə́ Soŋə Anu a Ŋwi ə

(Mat 3:1-12; Alu 3:1-18; Yoa 1:19-28)

1Nə nɨ Nkən wu Shiʼnɨ mbɨ́ʼ a Yeso Kristo Mɔn Ŋwi ə. 2Ɨ bíʼnɨ́ lá adzaŋ za mbáʼ ntom Ŋwi Asaya ɨ ŋwáʼnɨ́nɨ́ ngə́:

“Ŋwi a sóŋ ngə́, ‹Ze, ma mɨ tsagɨ ntom ɨzan a mbyi gho

á ɨ kyaŋtɨ ndómnji a mbó gho ghe.›

3Ŋwɔn tse a tɔ́nkə́ a mu mɨkɨghonɨ ngə́;

‹kyaŋtɨ ndómnji a mbó Maʼmbyí ɛ;

kyaŋtɨ abɔʼ azhi á tɛ́mnə́!›”

4Ma lan, Yoane Ngaŋ Nga Nkyi a yén a mu mɨkɨghonɨ wa ngǎ nkyi nkə́ sóŋə́ anu a Ŋwi ngə́, “Bəŋnə mɨntəm ɨmən a nye mɨbvu ɨmən, nkwarɨ nkyi taŋ á Ŋwi a lɨgɨnɨ mɨbvu ɨmɨŋ ə.” 5Ɨbɛn bə ghaʼnɨ fú a mbuʼ Yudiya abɔʼnɨ ntáʼmbagə wu wi Yerosalɛm ngɛn a mbó Yoane a ndzúʼ anu za a kɨ́nə́ sóŋə́ ghe. Bo tíʼ ntwiʼtɨ mɨbvu ɨma ntiʼ nkɨ nkwarɨ nkyi a mu Mɨzam Yorɨdan ə. 6Yoane a wə́gɨ́ ɨtsɛʼ tsa bɨ ghɨ́nɨ́ nɨ ɨnyɔŋ aŋaŋuʼə, nkɨ nkorɨ ɨkɔbɨ ngobɨnyam atɨŋnɨ zɨə. Mɨdzɨ ɨmyi bé ngwemnɨ abɔʼnɨ ɨnwu ɨfúʼ afɔn ə. 7Wɛrə a chwítɨ́ a mbó ɨbɛn ba ngə́, “Ŋwɔn wa a mɨ zɔŋ a ndzum me, a tsi nɨ mɨtən ntsatɨ aghə. Ka ma kwɛ mbyi nkuʼnɨ aghan a kfúʼnɨ́ ɨ kyɛgɨ ngobɨ ɨchi ɛ. 8Ma ghǎ nkyi a mbó bən nɨ nkyi ngəŋ, lá wɛrə a mɨ gha nkyi a mbó bən nɨ Azhwi zə Fɛmnɨ ə.”

Yeso a Kwarɨ Nkyi, bɨ kɨ Nkwaʼnɨ ayi ɛ

(Mat 3:13–4:11; Alu 3:21-22; 4:1-13)

9A nye njwi mətsa, Yeso a ló a Nazarɛ a mu mbuʼ Galili ngɛn Yoane a gha nkyi wəmbo a mu Mɨzam Yorɨdan ə. 10Tsɛʼ mbáʼ Yeso a fúnɨ́ a mu nkyi wa lá, a zé fɔməbvurə ŋaʼnɨ, azhwi a Ŋwi a shiʼ ntɛm wu atú tso bvugɨrə-fɨkon ə. 11Nji zɨ tsɛrə ɨ fú a fɔməbvurə ɨ soŋ ngə́, “O nɨ mɔn ɨghan wu mbáŋnɨ́ wa ma kɔŋnɨ tsɛʼ nkə; ma dórɨ́kə́ nɨ gho ghe.” 12Azhwi a Ŋwi za a byí ntíntɨ́ ayi ngɛn nɨ zɨ a mu mɨkɨghonɨ ə. 13Wɛrə a tsí ɨwu a nye njwi mɨghúm mi nɨkwa ghe. A nye njwi mɨghúm mi nɨkwa mətsen, Satan a kə́ nkwaʼnə a wɛrə ghe. Ɨnyam mɨtsɛgɨ tsí ɨwu, lá bɨtsen bɨ ndá bɨ Ŋwi kwatɨnə ayi ɛ.

Yeso a Tɔŋ Bɨtsa bɨ Mbyi bɨ Bɨyɛʼ ɨbyi ɛ

(Mat 4:12-22; Alu 4:14-15; 5:1-11)

14Mbáʼ bɨ fə́nɨ́ a Yoane atsáŋ lá, Yeso a ghɛ́n ntíʼə sǒŋ Nkən wu Shiʼnɨ wa ɨ lónɨ́ a mbó Ŋwi a Galili 15ngə́, “Nyom a kuʼə, Nɨfɔ nɨ Ŋwi tiʼ tsɛʼ abó ə! Bəŋnə mɨntəm ɨmən a nye mɨbvu ɨmən, ntiʼ nɨŋ mɨntəm ɨmən a nye Nkən wu Shiʼnɨ ə!” 16Mbáʼ Yeso a kɨ́nə́ númə́ nkárə́ a ngə́rɨ́ Sagɨrə Galili lá, ndzɛn ngaŋ achwiʼ tsi bá, Samɔn bo mɨma ɨyi wu mbáŋnɨ́ Andɨrɨya, bo konɨ ɨshwú nɨ nɨghoŋ ə. 17Yeso a sóŋ a mbó bo ngə́, “Nɨ yen ndzɔŋ aghə, ma mɨ ghɨ awən a nye ngaŋ ngɨə á ɨbɛn ngyíŋə́ a mbó me ghe.” 18Bo byí nyɛʼtɨ mɨghoŋ ɨma, ndo ndzɔŋ a Yeso ghe. 19A bɔnɨnə ngɛntɨ aghagɨ a satɨ, wɛrə a zɛn ɨbɔmbɨma bə mbáŋnɨ́ bə mɔʼɔ bi bɨbá, Jemsɨ bo mɨma ɨyi wu mbáŋnɨ́ Yoane ba bɨ bénɨ́ ɨbɔ bɨ Zebɛdi ə. Bo tsí a mu abáŋ a nkyi aza nkyaŋtɨ mɨghoŋ ɨma ghe. 20Tsɛʼ tɨ tsənkɨ nkfu, wɛrə a tɔ́ŋ awa; bɛrə nyɛʼtɨ a ta ɨwa Zebɛdi bo bɨ ngaŋ afaʼ ɨtsa a mu abáŋ a nkyi za ndzɔŋ ayi ɛ.

Yeso a Tsuʼ a Ŋwɔn tse wa a Tsínɨ́ nɨ Azhwi zə Tɔmnɨnɨ ə

(Alu 4:31-37)

21Yeso bo bɨ bɨyɛʼ ɨbyi ghɛ́n a ntáʼmbagə Kabɛrɨnaum ə. A benə a Njwi Alaʼ Ŋwi za ɨ zɔ́ŋtɨ́nɨ́, Yeso a ghɛn a ndáŋwi bə Yuda, mbiʼnɨ a ndǐʼ anu a Ŋwi ɨwu ə. 22Ndómnji wa Yeso a díʼnɨ́ ɨ kɨ́ʼnɨ́ awa be tɨ́sə́n, mbɨ́ʼ ngə́ a sé diʼ tso bɨdiʼ bɨ Nyɔngɔŋ, a kə́ ndiʼə awa nɨ mɨtən ə.

23Tsɛʼ a nyom məwa ŋwɔn tsɛrə mbáʼ a tsínɨ́ nɨ azhwi zə tɔmnɨnɨ a mu ndáŋwi bə Yuda za a tɔ́nkɨ́ ngə́; 24“Yeso ŋwɔn bə Nazarɛ, o lǒ ngɨə ɨ nə́ nɨ bɨgɨ ə? O yen lá a njwítɨ́ bɨgɨ le? Ma zhi agho ə. O nɨ ntom Ŋwi zɨ fɛmnɨ ə!”

25Yeso a sóŋ a mbó azhwi za ngə́, “Laŋə, fu ɨ nyɛʼtɨ ayi ɛ!”

26Azhwi zə tɔmnɨnɨ za a chíʼ a ŋwɔn wa, ntiʼ ntɔnkɨ ɨ fu nyɛʼtɨ ayi ɛ. 27A kɨ́ʼnɨ́ ɨbɛn be tɨ́sə́n, bo tiʼə mbítə́ bo nɨbo ngə́, “A nɨ ake a ziŋ ə? Mbɔm ndǐʼ anu a Ŋwi zɨ fi le? Ŋwɔn wen a tsi nɨ mɨtən a ngá ntɨgə a mbó ɨzhwi tsɨ tɔmnɨnɨ, tsɨ kə ndzúʼnə́ ayi ɛ!”

28Nkən mbɨ́ʼ a Yeso byí ntiʼ ngwáŋnɨ́ ndzagɨnɨ ɨdiʼ ɨtsum a mu mbuʼ Galili ə.

Yeso a Tsuʼ Ɨbɛn bə Ghaʼnə

(Mat 8:14-17; Alu 4:38-41)

29Yeso bo bɨ bɨyɛʼ ɨbyi, nkwiʼtɨ a Jemsɨ abɔʼnɨ Yoane tíʼ fú a mu ndáŋwi bə Yuda za ngɛn a mu ndá Samɔn bo Andɨrɨya ghe. 30Nyɔŋ Samɔn a nɔ́ŋ a ɨkon ɨfɛgɨ tsi wə ɨnye. Tsɛʼ mbáʼ Yeso a yénɨ́ lá, bɨ byí sóŋ wəmbo ə. 31Wɛrə a ghɛ́n nchwa abó azhi a lo atɨ́ ə. Ɨfɛgɨ wa byí nyɛʼtɨ ayi, a lo atɨ́ ntiʼə fáʼə a mbó bo ghe.

32A ghɨnə mbé a nkwɛfɔ mbáʼ nɨnyom a tsonə, ɨbɛn yen nɨ ngaŋ mɨghɔ ɨtsum abɔʼnɨ ba bɨdzɨŋ tsínɨ́ a ɨnye bo bɨtsum, wɛrə a tsuʼ awa ghe. 33Ɨbɛn bɨtsum a mu ntáʼmbagə wu wi wa tíʼ ngótɨ́ a ntsundá wa. 34Yeso a tsúʼ a nɨghaʼ ɨbɛn wa a tsínɨ́ nɨ ɨbə́ŋ mɨghɔ tsɨ ghaʼnə. Wɛrə a kɨ́ fɨ́gɨ́ bɨdzɨŋ a ɨnye ɨbɛn, lá nkeʼ bem ngə́ á bɨ gham mbɨ́ʼ ngə́ bɨ zhí ayi ɛ.

Yeso a Soŋ Anu a Ŋwi a Galili ə

(Alu 4:42-44)

35A ɨshiʼ njwi, abaŋ zə sa bɔŋ á ɨdiʼ fugɨ, Yeso a ló atɨ́, ɨ fu a mu ndá wa ngɛn adiʼ zə tsɛrə zɨzɨ, ntsaʼtɨ a Ŋwi ɨwu ə. 36Samɔn bo bɨson ɨbyi tíʼ ngɛn a ndo Yeso ghe. 37Mbáʼ bɨ zɛ́nɨ́ ayi lá, ɨ soŋ ngə́, “Ŋwɔn tsum a lǒ agho ə.”

38Yeso a chwɨ́gɨ́ ngə́, “Bɨgɨnə mɨ zagɨ ghɛn a mu ɨtóm tsa tsɨ tsinɨ a kárɨ́kɨ́ ɨghə. Ma tsi nɨ ɨ kɨ soŋ anu a Ŋwi ɨwu, mbɨ́ʼ ngə́ lá nɨ anu za ma yénɨ́ ɨwu ə.”

39Ma lan, a tíʼə númə́ nkárə́ a mu Galili tsum ɨ sóŋə́ anu a Ŋwi a mu ndáŋwi bə Yuda, nkə́ nkɨ̌ŋ bɨdzɨŋ a nye ɨbɛn ə.

Yeso a Tsuʼ a Ŋwɔn Atəchwen ə

(Mat 8:1-4; Alu 5:12-16)

40Ŋwɔn tse wa a kɨ́nə́ ngǒ nɨ atəchwen a yén wəmbo, nkwem mɨkwiʼtɨ ɨmyi a tɨshe, mbuʼtɨ mbó wəmbo ɨ soŋ ngə́, “Be o kɔŋ o chi ghɨ á ma fɛmə.” 41Ntəm Yeso dzə́ŋnɨ́ be tɨ́sə́n, wɛrə a tsagɨ abó azhi ɨ mɔmtɨ a ŋwɔn wa ɨwu ɨ soŋ ngə́, “Ma kɔŋə, fɛmə!” 42Nɨghɔ na byí nkɨ́ nyɛ́ʼtɨ́ ayi, wɛrə a shwetə. 43Yeso a tíʼ sóŋ ngə́ á bən ngɛn ayi ɛ, lá nkwantɨ ayi be tɨ́sə́n ngə́, 44“Zɛn ngə́ o so anu za a funɨ lá a mbó ŋwɔn tse fɨʼtə. Ghɛn a mbó ntumshe ndiʼ a atuəmbəm azo wəmbo, ntiʼ nkɨ nga mɨtsuʼnɨ mɨ atú ndzɔ̌ŋ adzaŋ za Nyɔngɔŋ Mǒse a tɨ́gɨ́nɨ́, a ndiʼə ngə́ o fɛmnə ghe.”

45Lá a ghɛ́n ɨ númə́ ndáʼə anu za a fúnɨ́ nɨ ɨdiʼ ɨtsum ə. Ma lan, Yeso a kɨ chi keʼ bə nkon a mu ntáʼmbagə tse asaŋəsaŋ ə. Wɛrə a báŋnɨ́ ntsí a nye ɨdiʼ tsa ɨbɛn sé ɨwu ghaʼtɨ, lá ɨbɛn kə́ mbvúrə́ ngyíŋə́ wəmbo tsɛʼ yenɨ nɨdiʼ nɨdiʼ ə.

Currently Selected:

Marɨkusɨ 1: MNT

Highlight

Copy