Matyo 24

Yeso a Gham mbɨ́ʼ adzaŋ za bɨ Ghɨnɨ Tsənkɨ Ndáŋwi zɨ Ngwi ə

(Mar 13:1-2; Alu 21:5-6)

1Yeso a ló a Ndáŋwi zɨ Ngwi ntiʼə ngěn ayi mbáʼ bɨyɛʼ ɨbyi yénɨ́ wəmbo a ntwiʼtə wəmbo adzaŋ za bɨ kórɨ́nɨ́ Ndáŋwi zɨ Ngwi ə. 2Lá wɛrə a chwɨ́gɨ́ a mbó bo ngə́, “Nɨ wiʼtə ndzě a tsenə ɨtsum ə, kə nde? Ma sóŋə́ awən tsɛʼ a nkənu ngə́ nkfu ghɨ yen za mbáʼ tsɛʼ táʼ ngɔʼ wɛnə wu tsɛrə, adiʼ wɛnə, a ghɨ keʼ atú zɨ mɔʼɔ bə nɔŋ, tɨkə bɨ tɔʼ ndzagɨ a ɨshe.”

Ngɨ́ʼ nɨ Ndɨgə tsa tsɨ Ghɨnɨ Yiŋə

(Mar 13:3-13; Alu 21:7-19)

3Mbáʼ Yeso a shíʼtɨ́nɨ́ ntsi atú Mbám Olif za lá, bɨyɛʼ ɨbyi tíʼ ngyen wəmbo ndzum ndzum, mbitɨ ayi ngə́, “Soŋ awɨgɨ ə, a ghɨ be mə lan lá a nyom ake, alɨgɨ a kɨ mbe ake a ndiʼə ngə́ o yiŋə, nkɨ mbe ndwitɨ mbyi le?”

4Yeso a chwɨ́gɨ́ awa ngə́, “Nɨ lə ɨtú ɨtsɨŋ ə, á ŋwɔn tse a keʼ awən tamtə. 5Mbɨ́ʼ ngə́ bə ghaʼnɨ ghɨ yen nɨ ɨkum ɨghan ɨ soŋə ngə́, ‹Ma nɨ Wa Bɨ Zɔ́ʼnɨ́ wa,› ɨ kɨ tiʼ tsagɨ ɨbɛn bə ghaʼnɨ a mɨ́tfúŋ ə. 6Nɨ ghɨ ndzúʼ mbɨ́ʼ mɨntso abɔʼnɨ fɨnkərɨ fɨ ntso; nɨ zɛn ngə́ njimbɨʼ mətsen tsɨ chiʼtɨ awən; mbɨ́ʼ ngə́ mətsiŋ mɨ zagɨ fuə, lá á bvurɨ tɨ diʼ ngə́ a nɨ ndwitɨ mbyi ɛ. 7Ɨlaʼ ghɨ tókɨ́nə́ a tsə mɔʼɔ, á nɨfɔ njíntə́ a nə mɔʼɔ, á mɨchwinɨ a tsi a nye ɨdiʼ tsɨ ghaʼnɨ, á ɨshe nɛ́mə́ nɨ ɨdiʼ nɨ ɨdiʼə. 8Ɨnu tsiŋ ɨtsum ghɨ bé tso mbiʼnɨ ndzaŋə a mbó mabvu wa a chiʼnə.

9Bɨ ghɨ tiʼ gha awən a mbó ɨbɛn ba bɨ mɨ ghɨ á nɨ ze ngɨ́ʼ, ɨ tiʼ zhwitɨ awən; ɨlaʼ ɨtsum mɨ tiʼ ban awən mbɨ́ʼ ɨkum ɨghə. 10A nyom məwa, á bə ghaʼnɨ nyɛʼ abeməntəm aza, nkɨ ntáŋ a mɨnaŋ atú ŋwɔn nɨ ŋwɔn, ɨ tiʼ kɨ ban a ŋwɔn nɨ ŋwɔn ə. 11Ntóm Ŋwi ɨchwenu mɨ tiʼ fu a ɨshe, ɨ tintɨ ɨnɔ ɨbɛn ɨ tsagɨ a mɨ́tfúŋ ə. 12Abɨgəntəm a ghɨ dzagɨ ɨdiʼ a nye ndóm wa akɔŋnɨ a ɨbɛn bə ghaʼnɨ a mɨ bɔrɨkə. 13Lá ŋwɔn tsum wa a ghɨnɨ kórɨ́ ntəm ɨyi ɨ ghɛn kuʼ a ndwitə, bɨ ghɨ loŋ ayi ɛ. 14Nkən wu Shiʼnɨ wen mbɨ́ʼ nɨfɔ nɨ fɔməbvurə, bɨ ghɨ tiʼ soŋ a wɛrə a mbó mbyi tsum, á ɨ be tso atɛmə-ndzě a mbó ɨlaʼ ɨtsum; a nyom məwa, ndwitə mɨ byi tiʼ yiŋə.”

Azúm a Tɨbɔŋ za a Tsənkɨnə ghe

(Mar 13:14-23; Alu 21:20-24)

15“Nɨ ghɨ ndzɛn ‹Azúm a Tɨbɔŋ za a Tsənkɨnə nkə́ ngyiŋə nɨ adɨrətú› za ntom Ŋwi za ɨ bénɨ́ Dania ɨ ghámnɨ́ mbɨ́ʼ a zɛrə a tɛm adiʼ zə fɛmnɨ (á ŋwɔn wa a tɔ́ŋnə́ a zhi a məziŋ ə), 16á ɨbɛn ba bɨ tsinɨ a Yudiya kɨə ngɛn nɨ ɨtú mbám ndyɛmtɨ ɨwu ə. 17Ŋwɔn wa a tsinɨ atú a ndá á keʼ bə shiʼ ngə́ zɨə ghɛn lɔgɨ azúm za a tsinɨ a ndá zɨə. 18Ŋwɔn wa a tsinɨ afɔn á keʼ bə nkwɛn ngɛn a ndɔgɨ mɨmam ɨmyi ɛ. 19A ghɨ bɨ́gɨ́ be tɨ́sə́n a nye njwi mətsa a mbó bɨmabvu bə nɨbum abɔʼnɨ bɨmabvu bə bɔrɨ ə! 20Tsaʼtɨnə a Ŋwi ngə́ á nkfu za nɨ kɨənə ɨ ghɛn lyɛmtɨ keʼ tsi a nkfu ɨfɛgɨ wu tən bo mbəŋ za kə a Njwi Alaʼ Ŋwi ə. 21Mbɨ́ʼ ngə́ a nkfu məwa ngɨ́ʼ ghɨ gháʼ ɨ tsa mbó, ɨ tsa za bɨ bvúrɨ́nə tɨ zɛn ɨ lɔgɨnɨ a mbiʼnɨ mbyi ɨ yen gha ɨ sɨŋə ghe. Azúm zə tsɛrə tso məzen a láʼ keʼ bə nkwiʼ nchyɛ. 22Lá Ŋwi a kwɛnə shwɛʼtɨ ndvuŋ njwi mətsa ə. Wɛrə a tú mə lá fom ghɨ muŋ bɨ ghɨ keʼ a ŋwɔn mɨsɔŋ a ntsu tse loŋə. Lá, mbɨ́ʼ atú a ɨbɛn ɨbyi ba wɛrə a tsɔʼnə, Ŋwi a mɨ shwɛʼtɨ njwi mətsa.

23A nkfu məwa, be ŋwɔn tse a soŋ a mbó gho ngə́, ‹Ze azo, Wa Bɨ Zɔ́ʼnɨ́ wa a wɛnə!› kə ngə́, ‹A yirɨ!› nɨ keʼ mɨntəm ɨmən wə ɨnye nɨŋə. 24Mbɨ́ʼ ngə́ bɨ Wa Bɨ Zɔ́ʼnɨ́ bɨ ɨchwenu abɔʼnɨ ntóm Ŋwi ɨchwenu ghɨ fú a ɨshe, ɨ ghɨnɨ ɨnu tsɨ yerɨnɨ-yerɨnɨ abɔʼnɨ ɨnu tsɨ tsanɨnɨ taŋ ɨ tintɨ ɨnɔ ɨbɛn ɨ tsagɨ a mɨ́tfúŋ, mbáʼ be a chi fu, ɨ kɨ tsagɨ ɨbɛn ba Ŋwi a tsɔʼnɨ awa ghe. 25Zuʼnə! Ma kwɛnə soŋ awən bɔŋ á nkfu ɨzhi yiŋə.

26Ma lan, be bɨ soŋ a mbó bən ngə́, ‹Zɛnə, a yirɨ a mu mɨkɨghonɨ ə,› nɨ keʼ awən abyɛn tsa; kə bɨ soŋ ngə́, ‹Zɛnə, a tsi a mu kwasɨ ndá zɨ ɨmu ə,› nɨ keʼ mɨntəm ɨmən ɨwu nɨŋə. 27Mbɨ́ʼ ngə́, tsɛʼ tso mbáʼ azhwibtɨ a mbəŋ a zhwibtɨnə ndǒ a sáʼnyom ngěn nkuʼə a ntsonyom lá, nə nɨ adzaŋ za njwi za Mɔn Ŋwɔn a lo yen, ɨ lonɨ be.

28Adiʼ atsum za akfú a ŋwɔn a nɔŋnɨ ɨwu, a nɨ adiʼ a mbomnkɨ ɨzám ə.”

Adzaŋ za Mɔn Ŋwɔn a lo bə Yiŋə

(Mar 13:24-27; Alu 21:25-28)

29“Tsɛʼ mbáʼ njwi mətsa, tsɨ ngɨ́ʼ za ɨ tsanɨ mbó mɨ byi ghangə tsɨ miə, bɨ mɨ vuʼnɨ ntsu nɨnyom, á saŋ a keʼ nkɨ mbyi ntá ɨ tánɨ́, á mɨndzɔŋ kwerɨkɨ a fɔməbvurə, á ɨdzúm ɨtsum tsa tsɨ tsinɨ nɨ adaʼ a fɔməbvurə chiʼnɨ ə. 30A nyom məwa á alɨgɨ a Mɔn Ŋwɔn a tom ɨ fu a fɔməbvurə ghe. Ɨtsé tsɨ wi ɨtsum tsa tsɨ tsinɨ atuəshe, tsɨ mɨ to a kɨzɔb, adzaŋ za bo mɨ zɛn a Mɔn Ŋwɔn á ngyíŋə́ a mu mbaʼ fɔməbvurə nɨ mɨtən abɔʼnɨ nɨfáŋ nə wi ə. 31Ntaŋ ghɨ tɔ́ŋ nɨ nji zɨ ngwi, á wɛrə tiʼ ntsagɨ bɨtsen bɨ ndá bɨ Ŋwi ɨbyi a nye bɨbagɨ bɨ mbyi ben bi nɨkwa, á bo ghotɨ ɨbɛn ɨbyi ba wɛrə a tsɔʼnə ɨ lɔgɨnɨ a nye táʼ bagɨ atuəshe ɨ ghɛn kuʼ a nye wu mɔʼɔ ghe.”

Anu za bɨ Chinɨ Yɛʼ a nye Atɨ a Figɨ ə

(Mar 13:28-31; Alu 21:29-33)

32“A nɨ yɛʼ anu a nye atɨ a figɨ ə. Tsɛʼ mbáʼ mbó ɨmyi ghɨ nzhwurɨ nɨ nkyi, ɨzəŋ chwuʼ ntúgə́ ɨwu, nɨ byíɛ njíɛ ngə́ nkfu ɨdiʼ tsɨ lomnɨ ɨ tiʼ abó ə. 33Ndəŋndəŋ, be nɨ ghɨ ndzɛ́n ɨnu tsiŋ ɨtsum, muŋ nɨ mɨ zhi ngə́ wɛrə a fatɨnə, ntiʼ tsɛʼ a nkom ntsu nká ə. 34Tsɛʼ a nkənu, ma sóŋə́ awɨŋ ə, nɨwə nə sɨŋə wɛnə mɨ keʼ lwitɨ tɨkə ɨnu tsiŋ ɨtsum fuə. 35Fɔməbvurə abɔʼnɨ atuəshe ghɨ lwitə, lá nɨgham ɨnə láʼ keʼ chiʼnə.”

Ka Ŋwɔn tsɛrə azhi ayi Njwi zɨ wu Kə a Nyom wu wu ə

(Mar 13:32-37; Alu 17:26-30, 34-36)

36“Ka ŋwɔn tsɛrə a zhi ayi njwi zɨ wu kə a nyom wu wu ə, tsɛʼ bɨtsen bɨ ndá bɨ fɔməbvurə ka bɨ kɨ nji awa, kə́ be Mɔn ɨyi wu mbáŋnɨ́, a nɨ tsɛʼ Tarɨ zɨmboŋ wa a zhinə. 37Tsɛʼ tso mbáʼ a tsínɨ́ a nye njwi Nua lá, nə nɨ adzaŋ za a lonɨ bé a nye njwi za Mɔn Ŋwɔn a lonɨ yiŋə. 38Tsɛʼ tso mbáʼ a tsínɨ́ a nye njwi mətsa bɔŋ á nkyi wa yen ndzɔʼsɨ ɨdiʼ lá, ɨbɛn kə́ ndzɨ́ə nkə́ nǒ, mbáŋnɨ́ bo bɨ bəngye zɔ́ʼkɨnə ɨ kɔʼ kuʼ njwi za Nua a kónɨ́ a mu abáŋ a nkyi za, 39bo sé zhí anu zə tse za a kɨ́nə́ fúə ɨ kɔʼ kuʼ njwi za nkyi wa yénɨ́ ndzɔ́ʼsɨ́ ɨdiʼ nkwəŋ awa bɨtsum ngɛn nɨ bo lá, nə nɨ adzaŋ za a ghɨnɨ bé a nye nkfu za Mɔn Ŋwɔn a lonɨ yiŋə. 40A nkfu məwa, mbáŋnɨ́ tsi bá ghɨ faʼnə a mu ɨshwom; á bɨ yen ndɔgɨ a táʼ, ɨ nyɛʼtɨ a wu mɔʼɔ ghe. 41Bəngye bi bɨbá ghɨ tsí atú ngɔʼ abán ɨ ghɔʼnə abán; á bɨ yen ndɔgɨ a táʼ, ɨ nyɛʼtɨ a wu mɔʼɔ ghe.

42A nɨ lə ɨtú ɨtsən, nkyérə́, mbɨ́ʼ ngə́ ka nɨ zhi awən njwi za Maʼmbyí a ghɨnɨ yiŋə. 43Lá, á nɨ zhi a ziŋ ə, mboŋnjwuʼ a bé zhí nkfu za ndzɛrə a yenə, muŋ a tsi tsɛʼ a nɨkyerə taŋ ɨ kɨ́ŋ á bɨ keʼ ndá ɨzhi bɛʼə. 44Ndəŋndəŋ nɨ tsi nɨ ɨ kɨ kyaŋtɨ ɨnye ɨtsən; mbɨ́ʼ ngə́ Mɔn Ŋwɔn a mɨ yen a nye nyom wa ka nɨ kwɛ ntsíŋə́ awən ayi ɛ.”

Ngaŋ Afaʼ za ɨ Faʼnə nɨ Táʼ Ntəm kə za ɨ se nɨ Táʼ Ntəm a Faʼə ghe

(Alu 12:41-48)

45“A tiʼ mbe ɨwa wa a nɨ ŋwɔn afaʼ wa a faʼnə nɨ táʼ ntəm nkɨ mbe wu zóŋ le? A nɨ zɨ wa tafaʼ ɨyi a lɛnɨ ngə́ a ndə́ŋtɨ́ ngaŋ afaʼ ɨchi tsə mɔʼɔ, taŋ ɨ ghanə mɨdzɨ ɨma a nye nkfu za ɨ kuʼnɨnə. 46Ɨfɔgə tsi a mbó ŋwɔn afaʼ wa tafaʼ ɨyi a mɨ yen kwatɨ á ngɨə mə lə. 47Tsɛʼ a nkənu, ma soŋə awɨŋ ə, a mɨ tiʼ lɛn ayi á tiʼə ndə́ŋtɨ́ ɨdzúm ɨchi ɨtsum ə. 48Lá be ŋwɔn afaʼ wa a be wu abɨgəntəm, a wiʼtɨ a mu ntəm zɨ ngə́, ‹Tafaʼ ɨghan a mɨ tɨʼ a nkwé ghe,› 49a biʼnɨ a shwóm ngaŋ afaʼ tsə mɔʼɔ tsa bo bo faʼnə, ɨ kə́ dzɨ́nə ɨ kə́ nónə bo bɨ ɨbarɨ mɨluʼ ə. 50Lá tafaʼ ŋwɔn afaʼ wa mɨ tiʼ kwɛn a nye njwi za ka ŋwɔn afaʼ wa a kwɛ ntsíŋə́ ayi a wɛrə, ɨ kɨ be nyom wa ka a zhi ayi ɛ. 51Tafaʼ ɨyi a mɨ tiʼ nɨŋ ngɨ́ʼ zɨ ngwi wə ɨnye, ɨ ghɨ á anu za a zɛ́nɨ́ ngaŋ ngɨ ɨtsi á zɛn ayi ɛ. Adiʼ məwa a mɨ tiʼə búgɨnə ɨ kə́ kfúrɨnə mɨsɔŋ ɨmyi ɛ.”

Currently Selected:

Matyo 24: MNT

Highlight

Copy