Matyo 23

Yeso a Kwantɨ Ɨbɛn mbɨ́ʼ Bɨdiʼ bɨ Nyɔngɔŋ abɔʼnɨ bə Farisao ghe

(Mar 12:38-39; Alu 11:43, 46; 20:45-46)

1Yeso a tíʼ sóŋ a mbó ɨnɔ ɨnɔ ɨbɛn wa abɔʼnɨ bɨyɛʼ ɨbyi ngə́, 2“Bɨdiʼ bɨ Nyɔngɔŋ bo bɨ bə Farisao lɔgɨ ɨtumbəm tsa tso ɨbɛn ba bɨ tíʼnə́ faʼə afaʼ a Mose a ndiʼ nyɔngɔŋ ə. 3Ma lan, á nɨ ndzúʼnə́ nkə́ ngɨ̌ ɨnu ɨtsum tsa bo sóŋnə́ ngə́ á nɨ ngɨə; lá nkeʼ ngɨə a tsa bɛrə ghɨnə; mbɨ́ʼ ngə́ bo sóŋə́ nkeʼ ngɨə ghe. 4Bo kórə́ ɨbyɛʼ tsə wi tɨ ɨdentɨ, njiʼə a mbyɛʼnɨ ɨbɛn; lá bo mboŋ, bo chi keʼ gha akwatɨ tsɛʼ nɨ shwi abó a ntsɔ́ʼ tsɛrə ɨ byɛʼə. 5Ngɨnɨ mɨnu ɨma mɨtsum tsi lá tsɛʼ ngə́ á ɨbɛn zɛn awa ghe. Nɨ ze ɨbobtɨ tsɨ sa mɨnkɨ tsa bɨ vwuŋnɨ anu a Ŋwi ɨwu, tsa tsɨ dzənkɨnɨ a nye mɨdzenɨ ɨma abɔʼnɨ mɨnkwe ɨma ghe. Nɨ ze adzaŋ za tsɨ fankɨnɨ ə! Nɨ kɨ ndze adzaŋ za mɨndzə́gɨ́rɨ́ mɨ ɨtsɛʼ tsa sakɨnə! 6Bo kɨ nkɔŋ ɨlaŋ ɨbɛn bə wi a nye ɨdiʼ nɨdorɨ abɔʼnɨ ɨlaŋ ɨbɛn bə wi a mu ndáŋwi bə Yuda; 7bo kɔŋ ngə́ á bɨ ntsáʼtə́ awa ngvótə́ a tɨshe nɨ ɨdiʼ mɨtan, á ɨbɛn kə́ ntɔ́ŋə́ awa ngə́, ‹Ndiʼ Aŋwaʼnɨ›. 8Ka bɨ tsi ayi nɨ ɨ zagɨ tɔŋ agho ngə́, ‹Ndiʼ Aŋwaʼnɨ›, mbɨ́ʼ ngə́ bən bɨtsum nɨ ɨbɔmbɨma nkɨ ntsi tsɛʼ nɨ táʼ Ndiʼ Aŋwaʼnɨ ə. 9A nkwiʼtə, ka nɨ tsi awən nɨ ntɔŋ ŋwɔn tse atuəshe ngə́, ‹Tarɨ› mbɨ́ʼ ngə́ nɨ tsi tsɛʼ nɨ táʼ Tarɨ, mbáʼ a tsinɨ a fɔməbvurə ghe. 10Kə ngə́ á bɨ tɔŋ agho ngə́, ‹Ntsagɨnɨ›, mbɨ́ʼ ngə́ nɨ tsi tsɛʼ nɨ táʼ ntsagɨnɨ, mbe Wa bɨ Zɔ́ʼnɨ́ wa. 11Ŋwɔn wu ngwi a tɨtərɨ bən a tsi nɨ ɨ zagɨ be be ŋwɔn afaʼ ɨwɨŋ ə. 12Ŋwɔn tsum wa a kɔ́ʼsɨ́nə́ atuəmbəm azhi atɨ́, bɨ ghɨ shíʼsɨ́ ayi, á ŋwɔn tsum wa a shíʼsɨ́nə́ atuəmbəm azhi a tɨshe, á bɨ kɔʼsɨ ayi ɛ.”

Yeso a Tum Abvú Atú Ɨtsi ɨwa ghe

(Mar 12:40; Alu 11:39-42, 44, 52; 20:47)

13“Wei ngɨ́ʼ zɨ ngwi a nye bɨŋ bɨdiʼ bɨ Nyɔngɔŋ abɔʼnɨ bə Farisao! Bɨŋ ngaŋ ngɨ ɨtsi! Nɨ vwuʼnɨ ntsundá a mbó ɨbɛn a nkúŋə́ a mu Nɨfɔ nɨ fɔməbvurə ghe. Bɨŋ mboŋ ka nɨ kə́ nkúŋə́ awən ɨwu, nkeʼ nkə́ nyɛ́ʼtə́ á ɨbɛn ba bɨ lɔnɨ nkuŋə ɨwu, á bɨ kuŋə. 14#23:14 Ɨŋwaʼnɨ tsɨ lvuŋ tsɨ mɔʼɔ tsa bɨ tsánɨ́ mbyi ɨ ŋwaʼnɨ kwiʼtɨ nkaŋ 14 ngə́, “Wei ngɨ́ʼ zɨ ngwi a mbó bɨŋ bɨdiʼ bɨ Nyɔngɔŋ abɔʼnɨ bə Farisao! Bɨŋ ngaŋ ngɨ ɨtsi! Nɨ támtɨ́ bɨkfugɨ bɨ bəngye nɨ ɨtsaʼtɨ Ŋwi tsɨ sa nkwárɨ́ ɨdzúm ɨtsa ghe. Bɨ ghɨ diʼ ngɨ́ʼ za ɨ tsanɨ mbó a mbó bɨŋ ə!”

15Wei ngɨ́ʼ zɨ ngwi a nye bɨŋ bɨdiʼ bɨ Nyɔngɔŋ abɔʼnɨ bə Farisao! Bɨŋ ngaŋ ngɨ ɨtsi! Nɨ tǒm bɨsagɨrə bə wi nkə́ ngyǐŋ nɨyen nə sa taŋ ɨ chi bəŋ tsɛʼ ntəm táʼ ŋwɔn ə. A kɨ mbəŋ ntəm ɨyi, nɨ ghɨ ayi a kuʼnɨ a ngén a mu ɨmugɨ nɨnkoŋ nkfu tsi bá ntsa adzaŋ za nɨ benɨ lá!

16Wei ngɨ́ʼ zɨ ngwi a nye bɨŋ bɨdiʼ bɨ ndómnji bɨ tə́ ndzě ɨdiʼ! Nɨ sóŋə́ ngə́, ‹Be ŋwɔn a kan nɨ ɨkum Ndáŋwi zɨ Ngwi, ka a tsi ayi nɨ ɨ zagɨ lɛn akan azhi ɛ; lá be a kan nɨ ɨkum ŋwaʼŋwaʼ wa a tsinɨ a mu Ndáŋwi zɨ Ngwi, a tsi nɨ nde akan azhi ɛ.› 17Bɨŋ ɨbərɨ tsa tsɨ nɨ bɨfɨgɨ! A tsi zɨŋə ntsi nɨ ɨlɨŋ ngɛn nɨ mbyi ɛ? Ŋwaʼŋwaʼ wa kə Ndáŋwi zɨ Ngwi za ɨ ghɨnə ŋwaʼŋwaʼ wa a be wu fɛmnɨ le? 18Nɨ kə́ sóŋə́ ngə́, ‹Be ŋwɔn a kan nɨ ɨkum atú a mɨkúʼ, ka a tsi ayi nɨ ɨ zagɨ lɛn akan azhi ɛ; lá be a kan nɨ ɨkum azúm zə ghanɨ za a nɔŋnɨ atú a mɨkúʼ, a tsi nɨ nde akan azhi ɛ.› 19Bɨŋ bɨfɨgɨ! A tsi zɨŋə ntsi nɨ ɨlɨŋ ngɛn nɨ mbyi ɛ? Azúm zə ghanɨ za kə atú a mɨkúʼ za a ghɨnə azúm zə ghanɨ za a fɛm le? 20Ma lan, ŋwɔn tsum wa a kanɨ nɨ ɨkum atú a mɨkúʼ, a kan lá nɨ ɨkum atú a mɨkúʼ abɔʼnɨ ɨdzúm tsə ghanɨ ɨtsum tsa tsɨ nɔŋnɨ ɨwu; 21ŋwɔn tsum wa a kanɨ nɨ ɨkum Ndáŋwi zɨ Ngwi, a kan lá nɨ ɨkum zɛrə abɔʼnɨ ɨkum Ŋwi, zɨ wa a tsínə́ wə mu; 22ŋwɔn tsum wa a kanɨ nɨ ɨkum fɔməbvurə, a kan lá nɨ ɨkum abərɨ a Ŋwi abɔʼnɨ zɨ wa a shíʼtɨ́nə́ nchyɛ̌ atú abərɨ məza.

23Wei ngɨ́ʼ zɨ ngwi a nye bɨŋ bɨdiʼ bɨ Nyɔngɔŋ abɔʼnɨ bə Farisao! Bɨŋ ngaŋ ngɨ ɨtsi! Nɨ yɛbtɨ ɨdzúm ndza tsa bɨ tɔ́ŋnə́ ngə́ mintɨ, dilɨ abɔʼnɨ kuminɨ ɨdiʼ tsi nɨghúm, ngǎ a táʼ adiʼ a mbó Ŋwi, lá ngwágɨ́nɨ́ ɨnu tsɨ dɨtɨnɨ tsa Nyɔngɔŋ a diʼnə tso ngɨ̌ ɨnu tsa tsɨ tɛmnɨnɨ abɔʼnɨ akǒmɨlɨŋnɨ abɔʼnɨ ɨ faʼə nɨ táʼ ntəm; mbáʼ a nɨ tsɛrə tsa nɨ tsinɨ nɨ ngɨə nkeʼ a tsə daŋ a ngwágɨ́nə́ ghe. 24Bɨŋ bɨdiʼ bɨ ndómnji bɨ tə́ ndzě ɨdiʼ, nɨ kyɛ́rə́ ɨbagɨ ɨdzúm tsɨ kɨʼnɨ a mu mɨluʼ ɨmən, lá mbaŋnə myiɛ a tsə wi ə!

25Wei ngɨ́ʼ zɨ ngwi a nye bɨŋ bɨdiʼ bɨ Nyɔngɔŋ abɔʼnɨ bə Farisao! Bɨŋ ngaŋ ngɨ ɨtsi! Nɨ sugɨ ndzum ndɔ́ŋ ɨtsən abɔʼnɨ ndzum ɨbatɨ ɨkáŋ ɨtsən, lá ɨmu ɨtsa lon nɨ ɨdzúm tsa nɨ kwarɨnɨ nɨ adaʼ abɔʼnɨ mbɔm amyiɛnɨngam ə. 26Bɨŋ bə Farisao ba nɨ nɨ bɨfɨgɨ! Fom sugɨnə ɨmu ndɔ́ŋ za abɔʼnɨ ɨmu abatɨ akáŋ za taŋ á ndzum ɨzhi tiʼ nkɨ fɛmə!

27Wei ngɨ́ʼ zɨ ngwi a nye bɨŋ bɨdiʼ bɨ Nyɔngɔŋ abɔʼnɨ bə Farisao! Bɨŋ ngaŋ ngɨ ɨtsi! Nɨ fi ɨtú mɨshe tsa bɨ zɔʼnɨ tsɨ fúgɨnə, mbáʼ tsɨ lanɨ mbɔŋ abyɛn lá wə mu a luŋ ɨkwɛn ɨkfú ɨbɛn abɔʼnɨ ɨkfú ɨbɛn tsa tsɨ byenə ghe. 28Ndəŋndəŋ nɨ tsi tso nɨ bɔŋ a ɨshi ɨmɨgɨ ɨbɛn abyɛn, lá ɨtsi abɔʼnɨ ɨbvu ɨ lon a mu ɨnye ɨtsɨŋ ə.”

Yeso a Soŋ Ɨnɨŋ Ngɨ́ʼ za ɨ Lonɨ Yen a mbó bo ghe

(Alu 11:47-51)

29“Wei ngɨ́ʼ zɨ ngwi a nye bɨŋ bɨdiʼ bɨ Nyɔngɔŋ abɔʼnɨ bə Farisao! Bɨŋ ngaŋ ngɨ ɨtsi! Nɨ vwǔ ɨtú mɨshe ntóm Ŋwi nkə́ ŋwɛ́ʼsə́ tsə ɨbɛn ba bɨ chinɨnɨ 30ɨ sóŋə́ ngə́, ‹Bɨgɨ bá be tsi atuəshe a nkfu za mbáʼ bɨta ɨbɨgɨ bə kɔ́ʼɔ́nguʼ tsínɨ́ atuəshe muŋ bɨgɨ sé nɨŋ mbó ɨmɨgɨ a njwítɨ́ ntóm Ŋwi tsa bo zhwítɨ́nɨ́ lá.› 31Ma lan, nɨ bémə́ nɨ mɨntsu ɨmən ngə́ nɨ lá ɨbɔ bɨ ɨbɛn ba bɨ zhwítɨ́nɨ́ ntóm Ŋwi lá. 32Ghɛnə nɨ mbyi lá ntiʼ mɛtɨnə ɨnu tsa bɨta ɨbən bə kɔ́ʼɔ́nguʼ bíʼnɨ́nə́. 33Bɨŋ mɨnyo abɔʼnɨ ɨbɔ bɨ mɨnyo! Nɨ kwɛ ngwiʼtɨ ngə́ nɨ ghɨ lɛʼ ɨmugɨ nɨnkoŋ a nkfu wa bɨ ghɨnɨ sáʼ awən ɨ tsagɨ ɨwu lá ɨ nə́ le? 34Ma lan, ma sóŋə́ awən ngə́ ma mɨ tsagɨ ntóm Ŋwi, ngaŋ zóŋ abɔʼnɨ bɨdiʼ bɨ aŋwaʼnɨ a mbó bɨŋ ə; nɨ mɨ zhwitɨ a bə mɔʼɔ, ɨ kwemtɨ a bə mɔʼɔ atú abaŋnɨ-baŋnɨ, ɨ ləŋ a bə mɔʼɔ nɨ ngwan a mu ndáŋwi bə Yuda ɨtsən ɨ kə́ númə́ vwugɨnə a bɛrə a mu ntáʼmbagə, a ndɔgɨnə a nye wen ɨ ghɛn kuʼ a nye yirɨ ə. 35Adzaŋ məwen, ɨnɨŋ ngɨ́ʼ zɨ njwitɨ ɨbɛn ba ka bɨ fə awa anu zə tsɛrə mɨ chwinɨ atú bən, ɨ lɔgɨnɨ a nye Abɛrɨ wa nɨ zhwítɨ́nɨ́ wa a sé anu zə tsɛrə fan ɨ shiʼ kuʼ a nye Zakaria mɔn Barakɨya wa nɨ zhwítɨ́nɨ́ a tɨtərɨ atú a mɨkúʼ bo Ndáŋwi zɨ Ngwi lá. 36Tsɛʼ a nkənu, ma sóŋə́ awɨŋ ə, ɨnɨŋ ngɨ́ʼ ɨnu tsiŋ ɨtsum ghɨ kúbɨ́nɨ́ atú a ɨbɛn bɨ nɨwə niŋ ə!”

Akɔŋnɨ a Yeso a nye Yerosalɛm ə

(Alu 13:34-35)

37“Yerosalɛm, Yerosalɛm! O zhwítɨ́ ntóm Ŋwi nkə́ ntúmtɨ́ ɨbɛn ba Ŋwi a tsagɨnə a mbó gho nɨ mɨngɔʼ ə! Nkfu tsə ghaʼnɨ ma kwaʼtɨnə a ngótɨ́ ɨbɛn ɨbo bɨtsum a mu mbó me tso mbáʼ má ngúbɨ́ a ghótɨ́nɨ́ ɨbɔ ɨbyi a mu mɨbabɨnɨ ɨmyi, o ton agho ə! 38Zɛn nda, bɨ mɨ nyɛʼtɨ ndá ɨzo, á ɨ tɛm zɨ ndzobɨnə. 39Ɨ lɔgɨnɨ tɨtsɔŋnɨ ɨ ghěn nɨ mbyi, ma sóŋə́ agho, o láʼ koʼ aghan zɛn ɨ kɔʼ kuʼ nkfu za o ghɨnɨ sóŋ ngə́, ‹A Ŋwi a fɔgɨ a zɨ wa a yenə nɨ ɨkum Maʼmbyí ɛ.› ”

Currently Selected:

Matyo 23: MNT

Highlight

Copy