Yoane 12

Bɨ Zɔʼ a Yeso a Bɛtani ə

(Mat 26:6-13; Mar 14:3-9)

1A bé njwi tsi ntugə bɔŋ á njwi Nɨdorɨ nɨ Tsa-yɛʼnɨ ɨ kuʼ, Yeso a ghɛ́n a Bɛtani, a ndá Lǎtsorə, zɨ wa Yeso a zhwémnɨ́nɨ́ a mbó nɨvwo lá. 2Ɨwu, bɨ ghɨ́ mɨdzɨ mɨ nkwɛfɔ wəmbo; Marɨta a tsagɨnɨ a mɛrə ghe. Lǎtsorə a bé táʼ ŋwɔn wa a tsínɨ́ atú atɛkɨ bo bɨ Yeso ghe. 3Mɛrɨ a lɔ́gɨ́ akum a lita a mɨvwurɨ mɨ atɨŋndvuŋ mɨ ɨfɔgɨ wu shiʼnɨ ma bɨ kámnɨ́ tsɛʼ mɛrə mɛrə a nye atɨ za bɨ kɨ́nə́ ntɔ́ŋə́ nɨ nadɨ, nchwirɨ a mɨku Yeso, ɨ mɛtɨ nchiʼ nɨ ɨnyɔŋ atú ɨchi ɛ. Ɨfɔgɨ mɨvwurɨ mɨ atɨŋndvuŋ mɨ ɨfɔgɨ wu shiʼnɨ wa tíʼ ndúŋ ndá tsum ə. 4Lá Yudasɨ Iskario, táʼ ŋwɔn abɔʼnɨ bɨyɛʼ ɨbyi ba (zɨ wa a tsínɨ́ ɨ ghɨ fen a Yeso), a bítɨ́ ngə́, 5“Bɨ ló nkeʼ fiŋ mɨvwurɨ mɨ atɨŋndvuŋ mɨ ɨfɔgɨ wu shiʼnɨ men nɨ nkáb za be bɨ tfu a ŋwɔn tɨ abó afaʼ ɨwu atú bɨsaŋ bi nɨfə̧ nga nkáb zɨ wu a mbó ɨfúm lá ngə́ ke le?” 6A sé sóŋ a məzen lá mbɨ́ʼ ngə́ wɛrə a kɔ́ŋ ndə̌tú nɨ ɨfúm ə. A nɨ mbɨ́ʼ ngə́ wɛrə a bé ndzɛrə ghe. Wɛrə a kə́ ndě aban za bɨ kɨ́nə́ nɨ̌ŋ nkáb wə mu, nkə́ ngaʼə fɨ́gɨ́ nkáb məza ngɨ̌ mɨnu ɨmyi ɨwu ə.

7Lá Yeso a sóŋ ngə́, “Nyɛʼtɨ ayi ɛ! Bɨ kwɛ́nə nkyaŋtɨ ngə́ á lɛn mɨvwurɨ mɨ atɨŋndvuŋ məmen a njwi za bɨ ghɨnɨ twə́ŋ aghə. 8Ɨfúm tsi bɨŋ bo tsɛʼ nkfu tsum, lá ma ghɨ kaʼ nkfu tsum bɨgɨnə chyɛ.”

Mɨnaŋ a Ndwɛʼtɨ Lǎtsorə ghe

9Ɨnɔ ɨbɛn wu wi zúʼ ngə́ Yeso a tsí a Bɛtani ə. Ma lan, bo ghɛ́n ɨwu, lá nkeʼ tsɛʼ mbɨ́ʼ atú a Yeso be, lá bo kə́ ndǒ ɨ kɨ zɛ́n a Lǎtsorə, zɨ wa Yeso a zhwémnɨ́nɨ́ a mbó nɨvwo lá. 10Ma lan, Bɨntumshe bə wi ghɨ́ akyaŋtɨ ɨ kɨ zhwitɨ a Lǎtsorə, 11mbɨ́ʼ ngə́ bə Yuda a ɨnɔ kə́ ntíʼə nyɛ́ʼnə awa, ɨ nɨ̌ŋ mɨntəm ɨma a nye Yeso mbɨ́ʼ anu za a fúnɨ́ a nye Lǎtsorə lá.

Adzaŋ za Yeso a Kónɨ́ a Yerosalɛm tso Ɨfɔ ghe

(Mat 21:1-11; Mar 11:1-11; Alu 19:28-40)

12Njwi zɨ mɔʼɔ bənə ndan, ɨnɔ ɨbɛn wa ɨ yénɨ́ adiʼ a Nɨdorɨ nɨ Tsa-yɛʼnɨ na zúʼ ngə́ Yeso a kə́ ngyiŋə a Yerosalɛm ə. 13Ma lan, bo tíʼ nchwán ɨdzáŋ mbaŋ ɨ fu ngɛn a mbom zɨ, ntɔ́nkə́ ngə́, “A bɨgɨnə bontɨ a Ŋwi ə! A Ŋwi a fɔgɨ a zɨ wa a yenə nɨ ɨkum Maʼmbyí ɛ! A Ŋwi a fɔgɨ a Ɨfɔ bə Izrai ghe!”

14Yeso a tíʼ ndɔgɨ a mɨmu jakashi nkɔʼ wu atú, tsɛʼ tso mbáʼ aŋwaʼnɨ a Ŋwi a soŋnɨ ngə́,

15“Ntáʼmbagə wu wi wu Zayɔn, koʼ bɔgə!

Ɨfɔ ɨwən a wen mbáʼ a yenə lan,

nkɔʼ atú mɨmu jakashi ɛ.”

16A nyom məwa, bɨyɛʼ ɨbyi sé zúʼ nkɨ njí anu za ɨnu mətsiŋ díʼnə́; lá a nkfu za bɨ kɔ́ʼsɨ́nɨ́ a Yeso a mu nɨfáŋ ɨni lá, bo wáʼtɨ́ ngə́ aŋwaʼnɨ a Ŋwi a sóŋ ɨnu mətsen mbɨ́ʼ ayi ɛ. Bo kɨ́ ngwáʼtɨ́ ngə́ bo kɨ́nə ngɨ ɨnu mətsen wəmbo ə.

17Ɨbɛn ba bɨ tsínɨ́ bo bɨ Yeso a nkfu za a tɔ́ŋnɨ́ a Lǎtsorə a mu nɨshe wa, nzhwemnɨ ayi lá, ghɛ́n nɨ mbyi nkə́rɨ́ anu za a fúnə́. 18Lá nɨ anu za a ghɨ́nɨ́ ɨnɔ wa fu ngɛn mbom ayi ɛ — mbɨ́ʼ ngə́ bo zúʼ ngə́ a ghɨ́ anu zə yerɨnɨ-yerɨnɨ məziŋ ə. 19Bə Farisao tíʼ ngamnɨ bo nɨbo ngə́, “Zɛnə azɨŋ ə, anu zə ghɨnɨ zə daŋ a se be; mbyi tsum tiʼə nkumə ndzɔ́ŋə́ tsɛʼ wə ndzum ə!”

Bə Grikɨ bə Tsɛrə Tsɔʼ Aku a Yeso ghe

20Bə Grikɨ bə tsɛrə tsí a tɨtərɨ ɨbɛn ba bɨ ghɛ́nɨ́ a Yerosalɛm a ngúʼsɨ́ Ŋwi a nkfu Nɨdorɨ nɨ Tsa-yɛʼnɨ wa. 21Bo ghɛ́n a mbó Firɨbɔ (ŋwɔn Bɛtɨsaida a mu Galili) ɨ soŋ wəmbo ngə́, “Tə̧, bɨgɨ lǒ ndze Yeso ghe.”

22Firɨbɔ a ghɛ́n sóŋ a mbó Andɨrɨya, bo bɨbá tiʼ ngɛn soŋ a mbó Yeso ghe. 23Yeso a chwɨ́gɨ́ a mbó bo ngə́, “Nyom a kuʼnə á Mɔn Ŋwɔn a kwarɨ nɨfáŋ nə wi ə. 24Ma sǒŋ nkənu a mbó bɨŋ ə: mbum nchwi ɨ ghɔ́ŋə́ tsɛʼ zɛrə zɛrə mbáʼ be bɨ tú bi a zɛrə a ɨshe, á ɨ kfoə, be ɨ kfo, ɨ tiʼ ntom ngɨ mbum tsə ghaʼnə. 25Ŋwɔn tsum wa a kɔŋnɨ ntsi ntən ɨzhi, a mɨ sam a zɛrə; ŋwɔn wa a banɨ ntsi ntən ɨzhi atuəshe wen, a mɨ lɛn a zɛrə taŋ ɨ ghɨ tiʼ tsi ntən nɨnkoŋ ə. 26Ŋwɔn tsum wa a faʼnə a mbó me a tsi nɨ ɨ zagɨ zɔŋ aghan, taŋ á ŋwɔn afaʼ ɨghan a tsi bɨgɨ zɨ adiʼ wa ma tsinɨ ɨwu ə. Ta ɨghan a mɨ kɔʼsɨ a ŋwɔn tsum wa a faʼnə a mbó me atɨ́ ə.”

Yeso a Gham Mbɨ́ʼ Nɨvwo ɨni ɛ

27“Tɨtsɔŋnɨ, ma mɨ soŋ lá ngə́ ke le? Zə tse a zen ngágə aghan a mu ntəm me — a nə́ ma mɨ soŋ be ngə́, ‹Ta ɨghan, njimbɨʼ o nyɛʼtɨ ma ze ndvuŋ ngɨ́ʼ wen wa ma zhinɨ ngə́ ma mɨ zɛn lá le›? Lá, be lá anu za ma yénɨ́ mbɨ́ a zɛrə — taŋ á ma chi ze ngɨ́ʼ məzen za ma mɨ tsa wə mu a nye nkfu zen lá. 28Tarɨ, ghɨ á ɨkum ɨgho tsi nɨ nɨfáŋ ə!”

Nji zɨ tse tíʼ ndo a fɔməbvurə ɨ soŋ ngə́, “Ma ghanə nɨfáŋ ɨwu ə, ma mɨ bə kwiʼ kwátɨ́ ɨ gha.”

29Ɨnɔ ɨbɛn wa ɨ tɛ́mnɨ́ ɨwu zúʼ nji za, bə tse sóŋ ngə́ a kǔm mbəŋ, lá bə mɔʼɔ sóŋ ngə́, “Ntsendá Ŋwi ɨ gham wəmbo ə!”

30Lá Yeso a sóŋ a mbó bo ngə́, “Ka nji za gham ayi lá mbɨ́ʼ atú azə, ɨ gham lá mbɨ́ʼ atú azɨŋ ə. 31Tɨtsɔŋnɨ a nɨ nyom á bɨ sáʼ ɨbɛn bɨ mbyi ziŋ ə; nkfu ɨ kuʼ za bɨ mɨ gháʼ a zɨ wa a sáʼnɨ́ mbyi ziŋ ə. 32Bɨ ghɨ ntsɔʼ aghan atuəshe ntsagɨ atɨ́, ma mɨ ghɨ á ŋwɔn tsum a tiʼ ngyen a mbó me ghe.” 33(A sóŋ a məzen lá a ndiʼ abə́ŋ a nɨvwo za zɨə ghɨnɨ kfóə.)

34Ɨnɔ ɨbɛn wa ɨ chwɨ́gɨ́ wəmbo ngə́, “Nyɔngɔŋ ɨwɨgɨ a soŋ a mbó bɨgɨ ngə́ Wa bɨ Zɔ́ʼnɨ́ wa a ghɨ tsí atuəshe nɨnkoŋ ə. O tiʼ ntsa lá ɨ nə́, ɨ soŋ ngə́ bɨ ghɨ zagɨ tsɔʼ a Mɔn Ŋwɔn ɨ kɔʼsɨ atɨ́ le? Mɔn Ŋwɔn wen a lanɨ mbe lá ɨwa le?”

35Yeso a chwɨ́gɨ́ a mbó bo ngə́, “Nkaʼ mɨ bə bvurɨ tsi a tɨtərɨ bən a nye məbaŋtɨ wu sa ghe. A nɨ ndzɔ̌ŋ ndómnji ɨwən mbáʼ nkaʼ ɨ bvurɨnɨ ntsi, taŋ á ndzumnɨ keʼ yen nkubɨnɨ awən; mbɨ́ʼ ngə́ ŋwɔn wa a yenə a mu ndzumnɨ ka a zhi ayi ndóm wa a ghɛnə ɨwu ə. 36A nɨ tíʼ lá nɨŋ mɨntəm ɨmən a nye ŋwɔn wa a ghánɨ́ nkaʼ, mbáʼ a bvurɨnɨ ntsi bɨŋ bo, taŋ ɨ be ɨbɛn ba bɨ tsinɨ a mu nkaʼ ə.”

Bə Yuda bə Ghaʼnɨ Ton awa a Nɨŋ Mɨntəm ɨma a ɨnye Yeso ghe

Yeso a ghɨnə mɛ́tɨ́ a sóŋ məzen lá, ndo ɨ fu ayi ngɛn ndyɛmtɨ taŋ á bo keʼ ayi ze. 37A báʼtɨ́ ngɨ ɨnu tsɨ yerɨnɨ-yerɨnɨ tsen a ɨnɔ ɨnɔ a ɨshi ɨmɨgɨ bo ɨ ghɨnɨ lá, bo bvúrɨ́ nkeʼ mɨntəm ɨma wə ɨnye nɨŋ, 38taŋ á kɔʼ mbomnkɨ bo anu za ntom Ŋwi za bɨ kɨ́nə́ ntɔ́ŋə́ ngə́ Asaya a ŋwáʼnɨ́nɨ́ ngə́:

“Maʼmbyí, a nɨ́ŋ ɨwa ɨ nɨŋ ntəm ɨyi a nye nkən wa bɨgɨ sóŋnɨ́ le?

Maʼmbyí a kyɛ́ʼ mɨtən ɨmyi lá a mbó ɨwa le?”

39Ma lan, bo ghúʼ ɨ nɨŋ mɨntəm ɨma a nye Ŋwi kɨ́káŋ, mbɨ́ʼ ngə́ Asaya a kwɛ́nə nkɨ sóŋ ngə́:

40 # 12:40 Asaya 6:10 “Wɛrə a nɨŋnə ɨfɨgɨ a nye ɨmɨgɨ ɨma

nkɨ fɨŋ ɨtú ɨtsa,

taŋ á ɨmɨgɨ ɨma chi keʼ ɨdiʼ zɛn,

á ɨtú ɨtsa keʼ zuʼ nkɨ nji,

á bo keʼ bəŋ mɨntəm ntsi a bagɨ me,

taŋ á ma tsuʼ awa ghe.”

41Asaya a sóŋ a məzen mbɨ́ʼ ngə́ wɛrə a zɛ́n nɨfáŋ ɨni nkɨ ngam mbɨ́ʼ ayi ɛ.

42A báʼtɨ́ mbé be mə lan lá, bɨsáʼ bɨ ɨlaʼ bɨ bə Yuda bə ghaʼnɨ nɨ́ŋ mɨntəm ɨma a nye Yeso; lá mbɨ́ʼ bə Farisao bo sě fɨ́gə́ anu məzen ɨ sóŋə́ asaŋəsaŋ, mbɨ́ʼ bɨ fɨgɨ awa ɨ kwiʼ bə kon a mu ndáŋwi bə Yuda ghe. 43Bo kɔ́ŋ abemtɨ a ŋwɔn mɨsɔŋ ntsa abemtɨ a Ŋwi ə.

Mɨgham mɨ Yeso ghɨ Sáʼ Mɨsáʼ mɨ Ɨbɛn

44Yeso a ghám nji ɨzhi kɔʼ atɨ́ ɨ soŋ ngə́, “Ŋwɔn tsum wa a nɨŋnɨ ntəm ɨyi a nye me, ka a nɨŋ ayi ntəm ɨyi lá tsɛʼ a nye me ghe, a kɨ nɨŋ ntəm ɨyi lá a nye zɨ wa a tságɨ́nɨ́ aghə. 45Ŋwɔn tsum wa a zɛ́nə́ aghan, a kə́ ndzě a wɛrə wa a tságɨ́nɨ́ aghə. 46Ma yen atuəshe tso nkaʼ, taŋ ŋwɔn tsum wa a nɨŋnɨ ntəm ɨyi a nye me a mɨ keʼ ghɔŋ a mu ndzumnɨ ə. 47Be ŋwɔn tse a zuʼ nkən ɨghan nkeʼ a wɛrə zuʼnɨ, ma mɨ kaʼ ayi sáʼə. Ma sá yen lá a sáʼ atuəshe, ma yén be a ndoŋ zɛrə ghe. 48Ŋwɔn tsum wa a tonɨ ayi aghan, nkeʼ nkən ɨghan kwarɨ, a tsi nɨ ŋwɔn wa mbáʼ a ghɨnɨ sáʼ ayi ɛ. Mɨgham ma ma ghamnə ghɨ sáʼ ayi a ntsɨrɨndzum njwi ɛ! 49Məzen a nɨ nkənu, mbɨ́ʼ ngə́ ka ma gham aghan lá nɨ ɨmə mɨtən, lá Tarɨ wa a tságɨ́nɨ́ aghan, a fɨ́ʼtɨ́ anu za ma mɨ zagɨ ghamə. 50Ma zhi ngə́ ntɨgə ɨzhi ɨ yiŋə nɨ ntsi ntən nɨnkoŋ ə. Anu za ma sóŋnə́ lá, a nɨ za Tarɨ a soŋnɨ a mbó me ngə́ á ma soŋə.”

Currently Selected:

Yoane 12: MNT

Highlight

Copy