Yoane 11

Lǎtsorə a kfoə

1Ŋwɔn wu tse a kə́ ngǒ a Bɛtani, ɨkum ɨyi be Lǎtsorə ghe. Bɛtani a bé ntáʼmbagə wa Mɛrɨ bo Marɨta kɨ́nə́ nchyɛ̌ ɨwu ə. 2(Mɛrɨ məwen a bé lá mangye wa a chwírɨ́nɨ́ mɨvwurɨ mɨ ɨfɔgɨ wu shiʼnɨ a mɨku Maʼmbyí nkɨ nchiʼ nɨ ɨnyɔŋ atú ɨchi lá. Lǎtsorə wa a kɨ́nə́ ngǒ a bé lá mɨma Mɛrɨ məwiŋ ə.) 3Ɨbɔmbɨma ɨbyi ben bə bəngye tíʼ ntsagɨ ntom a mbó Yeso ngə́ á bɨ ghɛn ɨ soŋ a mbó Yeso ngə́, “Maʼmbyí, mbɔŋ ɨson ɨgho a ghǒ ghe.”

4Yeso a ghɨnə ndzúʼ a zɛrə ɨ soŋ ngə́, “Ndwitɨ nɨghɔ niŋ mɨ keʼ be nɨvwo nɨ Lǎtsorə ghe; məzen a fu lá taŋ ɨ gha nɨfáŋ a mbó Ŋwi, a mɨ kɨ be ndóm wa Mɔn Ŋwi wu Mbáŋnɨ́ a mɨ tsa ɨwu ɨ kwarɨ nɨfáŋ ə.”

5Yeso a kɔ́ŋ a Marɨta, Mɛrɨ abɔʼnɨ Lǎtsorə ghe. 6Lá mbáʼ wɛrə a kwárɨ́nɨ́ nkən ngə́ Lǎtsorə a kə́ ngǒ lá, mbə nkwiʼ ntsi adiʼ wa a tsínɨ́ ɨwu lá atú njwi tsi bá ghe. 7Ntiʼ soŋ a mbó bɨyɛʼ ɨbyi ngə́, “Bɨgɨnə bə́ mbən ngɛn a Yudiya ghe.”

8Bɨyɛʼ ɨbyi chwɨ́gɨ́ wəmbo ngə́, “Rabai, aghagɨ a bvurɨ tɨ sagɨ mbáʼ bə Yuda kɨ chinə ndǒ ntumtɨ gho nɨ mɨngɔʼ, o bɨŋə ndǒ ngə́ á bɨgɨnə kwiʼ ngɛn ɨwu le?”

9Yeso a chwɨ́gɨ́ a mbó bo ngə́, “Be nəzhwɨgɨnɨ ɨ tsi lá nɨ bɨnyom nɨghúm ntsɔb bá le? Be ŋwɔn a ngyíŋə́ nəzhwɨgɨnɨ, a chi keʼ kɔmkɨ ngvo mbɨ́ʼ ngə́ a zě nkaʼ wa ɨ fúgɨ́nə́ a mu mbyi ɛ. 10Lá be ŋwɔn a ngyíŋə́ nɨ ɨtfúʼ, a kɔmkɨ ngvo, mbɨ́ʼ ngə́ ka bo tsi awa nɨ nkaʼ ə.” 11Yeso a ghám ma lan ntiʼ soŋ a mbó bo ngə́, “Ɨson ɨwɨgɨnə Lǎtsorə a nɔŋ ndyě ghe, lá ma mɨ ghɛn zɛm ayi a fɨlye ə.”

12Bɨyɛʼ ɨbyi sóŋ wəmbo ngə́, “Maʼmbyí, be a be ngə́ a nɔŋ ndyě, muŋ a mɨ shwetə.”

13Anu za Yeso a sóŋnɨ́ a díʼ lá ngə́ Lǎtsorə a kfóə, lá bɨyɛʼ ɨbyi wíʼtɨ́ ngə́ a sóŋ lá ngə́ a nɔ́ŋ ndyě tsɛʼ lyenə. 14Ma lan, Yeso a tíʼ sóŋ a mbó bo asaŋəsaŋ ngə́, “Lǎtsorə a kfoə; 15lá mbɨ́ʼ atú azən ma dorɨtɨ ngə́ ma lo nkaʼ ɨwu tsi, taŋ á nɨ chi nɨŋ mɨntəm ɨmən a nye me ghe. Bɨgɨnə ghɛn wə mbyɛn ə.”

16Lá Tɔməshi (zɨ wa bɨ kɨ́nə́ ntɔ́ŋə́ ngə́ Mɔn Nɨfágɨ́ lá) a sóŋ a mbó ɨbɛn ba bo bo bénɨ́ bɨyɛʼ lá ngə́, “A bɨgɨnə ghɛn bɨgɨnə bɨ Ndiʼ Aŋwaʼnɨ, taŋ be a be ngə́ wɛrə a tsi nɨ nkfoə, bɨgɨnə chi kfo bɨgɨnə bɨ wɛrə ghe!”

Yeso, zɨ wa a Ghánɨ́ Ntsi Ntən abɔʼnɨ Nzhwemnə a mbó Nɨvwo ə

17Yeso a ghɨnə ngyén nkón, ndzɛn ngə́ njwi tsi nɨkwa tsánə mbáʼ bɨ twə́ŋnɨ́ a Lǎtsorə ghe. 18Bɛtani a tsí ɨ fátɨ́ a Yerosalɛm, mbe nɨyen tso bɨmarɨ bɨbá ghe. 19Bə Yuda bə ghaʼnɨ yén a mbó Marɨta bo Mɛrɨ a ndɛ́tɨ́ bo a nɨvwo mɨma ɨwa ghe.

20Marɨta a ghɨnə ndzúʼ ngə́ Yeso a kə́ ngyiŋə, ɨ fu ngɛn a mbom zɨ, lá Mɛrɨ a baŋnɨ ntsi a mu ndá ə. 21Marɨta a sóŋ a mbó Yeso ngə́, “Maʼmbyí, o lo mba be tsi ɨghan muŋ ka mɨma ɨghan wu mbáŋnɨ́ a kfo ayi ɛ! 22A baʼtɨnə nkfo ɨ kfonɨ lá, ma zhi ngə́ atsum atsum za o bitɨnɨ a mbó Ŋwi, Ŋwi a mɨ gha ɨwa.”

23Yeso a sóŋ wəmbo ngə́, “Mɨma ɨgho wu mbáŋnɨ́ a mɨ zhwemnɨ a mbó nɨvwo ə.”

24Marɨta a sóŋ wəmbo ngə́, “Ma zhi ngə́ a ghɨ zhwemnɨ a mbó nɨvwo a ntsɨrɨndzum njwi ɛ.”

25Yeso a sóŋ wəmbo ngə́, “A zhwémnə́ me nzhwemnɨ ɨbɛn a mbó nɨvwo nkə́ ngǎ ntsi ntɨŋ ə. Ba bɨ nɨŋnɨ mɨntəm ɨma a nye me, bɨ baʼtɨ nkfo ɨ kfonɨ lá, bo ghɨ tsi ntən; 26ŋwɔn tsum wa a tsinɨ ntən, nkɨ nɨŋ ntəm ɨyi a nye me, a láʼ keʼ kfoə. O nɨŋ ntəm ɨgho a nye məzen le?”

27Marɨta a chwɨ́gɨ́ a mbó Yeso ngə́, “Eŋə, a Maʼmbyí; ma nɨŋ ntəm ɨghan ɨwu ngə́ o nɨ Wa bɨ Zɔ́ʼnɨ́, mbe Mɔn Ŋwi wu Mbáŋnɨ́, zɨ wa a tsínɨ́ nɨ ngyiŋə a mu mbyi ɛ.”

Yeso a Zɛʼə

28Marɨta a ghɨnə sóŋ a məzen, ntiʼ mbə mbən ngɛn ntɔŋ a mɨma ɨyi Mɛrɨ adiʼ wa bo zɨ tsínɨ́ ɨwu tsɛʼ bo bo, ntsumtɨ wəmbo ngə́, “Ndiʼ Aŋwaʼnɨ a tsi ɨghan ntɔŋə agho ə.” 29Mbáʼ a zúʼnɨ́ a məzen lá, ndyiʼ ndo atɨ́ ɨ ghɛn bom ayi ɛ. 30(Yeso a bvúrɨ́ tɨ yen nkon a mu atom za, wɛrə a bvúrɨ́ ntsí tsɛʼ adiʼ wa Marɨta a ghɛ́nɨ́ mbom ayi ɨwu lá.) 31Mbáʼ ɨbɛn ba bɨ tsínɨ́ a ndá wa ndɛ́tə́ a Mɛrɨ bɨ zɛ́nɨ́ ngə́ Mɛrɨ a lyíʼ ndo atɨ́ ntsa abyɛn lá, bo zɔ́ŋ ayi, ngwíʼtə́ ngə́ a kə́ ngěn atú a nɨshe ɨ ghɛn ɨ bugɨ ɨwu ə.

32Mɛrɨ a yén nkuʼ adiʼ wa Yeso a tsínɨ́ ɨwu lá. Tsɛʼ mbáʼ a byínɨ́ ndzɛ́n ayi lá, ngvo wə mɨku ɨ soŋ ngə́, “Maʼmbyí, o lo be tsi ɨghan, muŋ ka mɨma ɨghan a kfo ayi ɛ!”

33Yeso a zɛ́n a Mɛrɨ a bugɨnə, nkɨ ndzɛn adzaŋ za ɨbɛn ba bɨ tsínɨ́ bo bo kɨ́nə́ mbúgə́ wəbɔʼ; anu zə wu a tsɔ́ʼtɨ́ ayi a mu azhwi, ntəm ɨyi kɨ mbɨ́gɨ́; 34a tiʼ mbitɨ ngə́, “Nɨ twəŋ ayi lá adiʼ ake?”

Bo sóŋ wəmbo ngə́, “Maʼmbyí, yen ndzɛn azo ə.”

35Yeso a zɛ́ʼə. 36Ɨbɛn sóŋ ngə́, “Ze adzaŋ za a kɔ́ŋnɨ́ ayi ɛ!”

37Lá bə mɔʼɔ bítɨ́ ngə́, “A ghɨ́ ɨmɨgɨ mɨ ɨfɨgɨ ŋaʼnə, kə ndé? A lo nchi keʼ chwa a Lǎtsorə á keʼ kfo le?”

Bɨ zhwemnɨ a Lǎtsorə ghe

38Anu za a kwíʼ ntsɔ́ʼtɨ́ ntəm Yeso, wɛrə a ghɛn atú a nɨshe wa. A bé ɨfúʼ wa bɨ kə́nɨ́ ntsu ɨyi nɨ ngɔʼ ə. 39Yeso a sóŋ ngə́, “Nɨ bɨŋsɨ ngɔʼ za ndotɨ nɨ zɛrə ghe.”

Marɨta, mɨma ŋwɔn wa a kfónɨ́ lá, a chwɨ́gɨ́ ngə́, “Maʼmbyí, ɨfɔgɨ tɨbɔŋ mɨ fu ɨwu ə. A nɨ njwi tsi nɨkwa mbáʼ bɨ kɨ twəŋnɨ ayi ɛ!”

40Yeso a bítɨ́ a Marɨta ngə́, “Tso ma lo mbá soŋ ngə́, be o nɨŋ ntəm ɨgho ɨwu, o mɨ ze nɨfáŋ nɨ Ŋwi le?” 41Bɨ bɨŋsɨ ngɔʼ za ndotɨ nɨ zɛrə ghe. Yeso a bíʼ ɨmɨgɨ ɨmyi atɨ́ ɨ soŋ ngə́, “Ta ɨghan, ma gha a mɨya a mbó gho mbɨ́ʼ ngə́ o zúʼə aghə. 42Ma zhi ngə́ o zúʼə aghan nkfu tsum, lá ma soŋ a məzen lá mbɨ́ʼ atú a ɨbɛn ba bɨ tɛmnkɨnɨ ɨghan, taŋ á bo nɨŋ mɨntəm ɨma ɨwu ngə́ o tságɨ́ aghə.” 43Mbáʼ a sóŋnɨ́ a məzen lá, ntɔnkɨ nɨ nji zɨ ntən ngə́, “Lǎtsorə, fu ngyiŋə!” 44Akfú a ŋwɔn za a fú a ntáʼ, bɨ korɨ mbó ɨmyi bo bɨ mɨku ɨmyi nɨ ɨsagɨ ɨtsɛʼ nɨshe, bɨ kɨ ndyim ɨshi ɨyi nɨ atsɛʼ ə. Yeso a sóŋ a mbó ɨbɛn ba ngə́, “Nɨ kyɛgɨ ayi, ɨ nyɛʼtɨ á ghɛn ayi ɛ.”

Bɨ Taŋ a Mɨnaŋ Atú Yeso ghe

(Mat 26:1-5; Mar 14:1-2; Alu 22:1-2)

45Ɨbɛn bə ghaʼnɨ ba bɨ yénɨ́ a mbyɛn Mɛrɨ zɛ́n anu za Yeso a ghɨ́nɨ́, ntiʼ nɨŋ mɨntəm ɨma a nye zɨə. 46Lá bə tse a tɨtərɨ bo ló mbən a mbó bə Farisao nkərɨ anu za Yeso a ghɨ́nə́. 47Bɨntumshe bə wi abɔʼnɨ bə Farisao tíʼ mbomnkɨ bo bɨ Ngaŋ Sáʼ Abyɛn, ntiʼ soŋ ngə́, “Bɨgɨnə mɨ ghɨ lá ɨ nə́ le? Ze ɨnu tsɨ yerɨnɨ-yerɨnɨ tsa ŋwɔn wen a ghɨnə ghe! 48Be bɨgɨnə nyɛʼtɨ ayi a kə́ ngěn nɨ mbyi tsɛʼ adzaŋ məwen, muŋ ɨbɛn bɨtsum mɨ nɨŋ mɨntəm ɨma wə ɨnye, á bɨsáʼ bɨ ɨlaʼ bɨ bə Roma yen saʼ Ndáŋwi zɨ Ngwi ɨzɨgɨnə abɔʼnɨ alaʼ azɨgɨnə ghe!”

49Táʼ ŋwɔn nɨbo wa ɨkum ɨyi bénɨ́ Kayafasɨ wa a bénɨ́ Ntumshe wu Ngwi alom məwa, a sóŋ a mbó bo ngə́, “Ka nɨ zhi awən kə́ tsɛʼ a mɨnya mɨ anu ə! 50Nɨ se zɛn ngə́ a bɔŋtɨ ngə́ á nɨ nyɛʼtɨ á táʼ ŋwɔn a kfo atú ɨbɛn ntsa adzaŋ za be alaʼ atsum a ghɔʼnɨ le?” 51Tsɛʼ a nkənu, a sé a məzen soŋ lá nɨ atú azhi, lá mbɨ́ʼ ngə́ a bé Ntumshe wu Ngwi alom məwa, a kə́ sóŋə́ lá a za a ghɨnɨ fú ngə́ Yeso a ghɨ kfó mbɨ́ʼ atú a bə Yuda, 52ɨ keʼ tsɛʼ mbɨ́ʼ atú aza be, lá ɨ kɨ ghotɨ ɨbɛn bɨ Ŋwi adiʼ a mɔ́ʼɔ́ ba bɨ dzagɨnɨnɨ nɨ ɨdiʼ nɨ ɨdiʼ ə.

53Ndɔgɨnɨ njwi məwa, bɨsáʼ bɨ ɨlaʼ bɨ bə Yuda kə́mnɨ́ nkorɨ a mɨnaŋ a njwítɨ́ a Yeso ghe. 54Ma lan, Yeso a sé mbɨ́ŋə́ nkárə́ asaŋəsaŋ a mu Yudiya, lá ndo ɨwu ngɛn ayi adiʼ zə tse za a fátɨ́nɨ́ mɨkɨghonɨ, a nye ntáʼmbagə wu tse wa bɨ kɨ́nə́ ntɔ́ŋə́ ngə́ Efrem, ntsi ayi ɨwu bo bɨ bɨyɛʼ ɨbyi ɛ.

55Nkfu Nɨdorɨ nɨ Tsa-yɛʼnɨ tíʼ tsɛʼ abó, ɨbɛn bə ghaʼnɨ fú a mu alaʼ nkɔ́ʼ ngɛn a Yerosalɛm bɔŋ njwi nɨdorɨ za ɨ kuʼ, taŋ ɨ sugɨ awa ɨ fɛm a mu mbɔm ndzɔŋə a nyɔngɔŋ Mǒse ghe. 56Bo kə́ shwébtə́ a Yeso ghe. Mbáʼ bo ghótɨ́nɨ́ a mu Ndáŋwi zɨ Ngwi lá, bo kə́ mbítə́ a ŋwɔn nɨ ŋwɔn ngə́, “Nɨ wiʼtɨ ngə́ ke? Tsɛʼ a nkənu, a mɨ keʼ a nɨdorɨ wen yiŋə, kə ndé?” 57Bɨntumshe bə wi bo bɨ bə Farisao kwɛ́nə nga ntɨgə ngə́ be ŋwɔn tse a zhi adiʼ za Yeso a tsínɨ́ ɨwu, a zagɨ fɨʼtɨ, taŋ á bɨ ko ayi ɛ.

Currently Selected:

Yoane 11: MNT

Highlight

Copy