Madiu 4

Yeisu ana vakakona tetelina

(Maki 1:12-13; Luke 4:1-13)

1E tuwo ima ivakakone.#Ibe 2:18; 4:15. 2Sina yoyowo goi, Yeisu maliyalina poti (40) be sabamgo poti (40) idiiyakímwana go, maliyalinayadi mlidi loga bogina ikámasa. 3Ma logaaina go, kina Tovakakonayana ima idigo kana,

‘Kom moitamo Yaubada Natuna ae? Tauna gurewa ame kulovinaēdi bego simalakawoinu.’

4Go kina Yeisu idigo kana,

‘Geya! goi idigo kana,

“Geya awoinu kaka goi kita tomota yawoida bei dedevidi, go sem Yaubada ina livala liliudikova takabikaonedi, e bei yawoida dedevidi.”’

Atukeda 8:3

5E tuwo Totagiwayayana itaoya, Yeisu ikabi itukoe inave goi. Asayana moe Yerusalema. E Yerusalema goi inave Yaubada ina Vada Kimaasabaina goi imwerae, e Vadayana yatana toina goi iyato. 6Maeko goi idigo kana,

‘Bego kom moitamo Yaubada Natuna ae? Tauna ameko goi kupēla kusōu go, geya kuvailaita. Moe moitamo. Gínina Kimaasabaina idigo kana,

“Yaubada ina ilovinaedi

bei simatakavatem.

Nimadi goi bei siyoisim,

govila bei gurewa goi aem isaiko.”’

Same 91:11-12

7Go kina Yeisu idigo kana,

‘Go aiyuwoina Gínina Kimasabainayana idigo kana,

“ imi Yaubada taabu kovaakakōne.”’#Tat 17:2.

Atukeda 6:16

8Aiyuwoina Totagiwayayana itaoya, Yeisu ikabimnei, itukoe koya maanawena yatana goi go, aba lovina liliuna poyapoya goi madi esaesa adi ivatuluko. 9Tuwo idigo kana,

‘Neta aem kuvatugúyala be kusakululu yau yaigu, e aba lovina ame liliudikova bei avinim.’

10Go kina Yeisuyana idigo kana,

‘Kaleya, kom kusīya! Gínina Kimaasabaina idigo kana,

“Moe Yauwe ida Yaubada yaina tasaakulūlu be anetava yaina tataaimāmina.”’

Atukeda 6:13

11E tuwo Totagiwayayana itaoya, Yeisu ikalave go, anerose sima Yeisu simataakavate.

Yeisu ina paisewa ivatowo

(Maki 1:14-15; Luke 4:14-15)

12E Yeisu vala inove bego bogina siyoisi deri goi sivaisiu, tuwo itaoya Yudiya ikalave go, ikaluvilamna ina Galili dadavina. Amoko goi mainao ina Nasareta.#Mad 14:3; Mak 6:17; Luk 3:19-20. 13Go Nasaretayana goi geya ikaiyakoita, go sem ina Kapaneumi goi ilokasa.#Iyo 2:12. Kapaneumiyana moe Galili Bwaena kikina go, Sebuloni tubunao be nakae Napatali tubunao idi kaba lovina sinaedi. 14Yeisu ina lokasayana goi Aiseya ina livala imalatomotamna nakae boi idigo kana,

15‘Sebuloni tubunao be nakae Napatali tubunao

idi poyapoya moe négwasa kikina,

sákala Iyoridani kótala dadavina.

Moe Galili goi kidi sikaaiyaka.

16Tomotayadi kokonótuya goi sikaaiyaka

moe nakae amasa vata kikina goi go,

mavada gagaaina bogina sigite.

Mavadayana moe Yaubada ina yava

ikaiwoduwe yaidi.’

Aiseya 9:1-2

Yeisu ina vatulúkwana Yaubada ina bodao idi sinapu manuna

(Madiu 4:17—7:27)

Yeisu ina paisewa Galili goi

(Maki 1:16-20; Luke 5:1-11; 6:17-19)

17E tuwo Yeisu ina talavaita ivatowo idigo kana,

‘Kotugavīla! bogina imaiyaba bei itoboinemi kosiu.’#Mad 3:2.

18E Yeisu Galili Bwaena labutabutaina goi iivayali go, koroto maa siyana igitedi; tayamo yoina Saimoni go, youyuwoina moe , e siyana yoina Anduru. Adi taiyuwokova idi úwata bwae goi silavelave. Bogina koyagoi. Tauyadi toúwata. 19E igitedi, ilatuwokoidi idigo kana,

‘Kōma kosabokuliyēgu bei avayokoimi tomota adi touwatayao.’

20E tuwo moitamo kidi mainao sitaoya, idi úwata sikalave go, Yeisu sisabokuliye. 21Tauyadi sivayalikova go, Yeisu ikandobala ituli ta korotova adi taiyuwo igitedi, koroto tayamo maa siyana. Moe Sebedi natunao Yemesa be Iyoni. Tauyadi tamadi taiyao oga goi idi úwata siyaanumedi. Yeisu igitedi, iduduwedi idigo kana,

‘Komi kōma kosiukōigu!’

22E moitamo kidi mainao sitaoya, idi oga be nakae tamadi sikalavedi go, Yeisu sisabokuliye.

23Galili ana madabokina goi Yeisu ivanibiníbita go, tamo tamo goi ivaatulúkwana be nakae Yaubada ina kalibúbuna Valena Dedevina itaalavaite. Tauyadi neta ituli ta visiyava siyooisidi be nakae tokatówana liliudi ikidedeevinedi.#Mad 9:35; Mak 1:39. 24Tauna Tauyana valena inúnuwo Siriya ana madabokina goi. Boda sinove, tuwo idi togogolatayao, idi yaluwoyao be nakae kidi naagovaidi liliudi simedi Tauyana yaina. Togogolatayaoyadi ame nakae: Maniyedi madi vísiya, maniyedi madi gedageda, maniyedi madi pem. Madabokiidi simedi Tauyana ikidedevinedi. 25Boda gagaina sima sisabokuliye. Bodayadi da Galili, da Dekapoli, da Yerusalema nakae Yudiya ana madabokina be kidi Iyoridani go, bomatu dadavina asaina madabokidi goi sima.

Currently Selected:

Madiu 4: GVS

Highlight

Copy