Madiu 3

Iyoni tosayóyova ina katubayásina Yeisu ina sowóduwo manuna

(Maki 1:1-8; Luke 3:1-9; Iyoni 1:19-28)

1E sikaaiyaka aaa, gomanayana bogina ikaitubuwaumatuwo. E amo tutayana tosayóyova ina Yudiya yoyowoina goi tomota yaidi itaalavaita 2idigo kana,

‘Kotugavīla! bogina imaiyaba bei itoboinemi kosiu.’#Mad 4:17; Mak 1:15.

3Ame tauyana manuna Aiseya boi nimatu bogina igini idigo kana,

‘Toduduwo niyana gagaina yoyowo goi iiduduwo kana,

“ ina kenao kounāi

be nakae kokitotomōi!”’

Aiseya 40:3

4E kina go Iyoniyana ana kwama moe Yaubada ina tokabivalavala ana kwama nakae tuta liliuna ilosilosi. Ana kwamayadi be mokava.

5E tuwo Iyoni itaalavaita go, da Yerusalema be tomota madabokidi Yudiya dadavina goi be nakae tomota asa liliudi sákala Iyoridani kikina goi sima tauyana sitaiyakeke 6be nakae idi goyo sitalavaitedi namlieta bwae Iyoridani goi .

7E Iyoniyana ikandobala badabadaidi igitedi simamaima; latuwodi adi sayóyova go, ilatuwokoidi idigo kana,

‘Komi siyasiyaimi moteta nakae!#Mad 12:34; 23:33. Manakae? Konuwonúwana bego sayóyova kaka goi itoboinemi Yaubada ina egamogamogu imamaima yaina kosiya ae? Sayóyova kaka geya ivaitemita! Mainao imi goyo goi kotugavīla! 8Tauna neta sayóyova vavagimi koma bego Yaubada ina egamogamoguyana yaina kosiya, e mainao imi tugavilayana goi keuwoimi dedevidi koguinuwēdi. 9Ago taabu taumiva kodigoopopōita kami,

“Kai tuwo unana kai Eberamo tubunao, tauna liuna bei geya kababaneyeta.”

Nakae geya go, ame alatuuwokoimi konōve: Eberamo tubunaoyadi kaga? Yaubada itoboine gurewa ame ikabidi, e Eberamo tubunao imadagidi. Tauna neta komi Eberamo tubunao, moe geya ivaitemita.#Iyo 8:33. 10E Yaubada ina egamogamoguyana kíyama nakae. Kiyamayana bogina alova lamdi goi iyokaabubune, tauna ava kalovava neta sikéuwo goyogoyo, bei itaunanedi go, ikabidi ilavedi yeu goi igabudi.#Mad 7:19. Tauna nakae ina egamogamogu giyakainava isowóduwo yaimi neta geya kotugavileta.

11Yau bwae goi asaayoyoimi. Moe imi tugavila ana kaba kinana. Go koroto tayamo mligu goi imamaima itobukukuyuigu;#Mak 1:7; Luk 3:16; Iyo 1:15,30. nakae geya itoboineguta bei ana sendoro akavaledi unana yau sobuyekoina. Tauyana be yeu sabeninimina goi bei isayoyoimi. 12Tauyana ina kaba takínona#3:12 Ina kaba takínona: Ame poke gagaaina nakae takínona manuna. Mainao witi ma saakavaina sikaaiyaka go, bulumakau sivakavatedi ana kadókana sakavaidi sivapavepavedi. Ikavava, witi kutukutuna be nakae mosamosaina taiyao sikaaiyaka. Tauna pokeyana sikabi kutukutu mosamosa taiyao sikalalagasi. Tutayana sikalalagasi, yagira mosamosa iyawoisave ibala ina masigava goi itowo go, kutukutu sisou poyapoya goi unana simoumou. bogina iyokaabubune; giyakainava bei kutukutuna be mosamosaina itakinodokoidi. Ikavava, ana kutukutu bei ikabidi, ina sánala goi idodoidi go, mosamosayana, bei ikabidi yeu aiyako vaatayaina goi igabudi.’

Yeisu ana sayóyova tetelina

(Maki 1:9-11; Luke 3:21-22)

13Amo lavayana itaoya Galili goi ina sákala Iyoridani bei Iyoni goi isayóyova. 14E kina go Iyoniyana ipoikíkina Yeisu isanabode kana,

‘Itoboine yau kusayoyoigu go, kom kuma bego asayoyoim?’

15E tuwo kina Yeisuyana idigo kana,

‘Ame tuta kutagōna kusayoyoigu. Moe nakae Yaubada ina nuwonúwana madabokina ina yava ana kenao manuna bei takibobosidoko.’

Tuwo moitamo itagona. 16E Yeisu ana mlina mainao bwae goi isinalaga go, Yaubada matabuwona yábana ikatupáeve. Yeisu ikandolaga, Yaubada Balomaina igite, ana kaigigita bunabuna nakae isou imamaima Tauyana goi itowo. 17Níyana tayamo matabuwona yábana goi itumasobu idigo kana,

‘Moe natugu guna kakaya. Tauyana auyaonedoko.’#Abv 22:2; Sam 2:7; Ais 42:1; Mad 12:18; 17:5; Mak 1:11; Luk 9:35.

Currently Selected:

Madiu 3: GVS

Highlight

Copy