Tateta 40

Yauwe ina Kaba Kaiyaka siivataoe tetelina

1E ilatuwokoigu idigo kana,

2‘Tukówana vakuumgoina#40:2 Tukówana vakuumgoina: Ame nakona tukówana Mats ana kaba lukavava o Eipuru ana kaba vatowo. ana maliyalina vakuumgoina goi guna , o kada, “Guna Kaba Valoboda”, bei kovatāoe. 3Kovataoe ikavava, sinaena Tukunu goi koyatogamogamōne namlieta baige vabodaupa kaarekoina kovakosāine dedeogayana kotabōde. 4Ikavava, teboro kokābi, kovaisīu, e yatana konanina kokatubayasīdi. Ikavava, rampa adi kaba yata kovaisīu be ina rampa koyatōidi. 5Ikavava, matana goi go, vabodaupa kaarekoina toluyena goi koyatogamogamōne. Ikavava, Aba Kaiyakayana ana kaba siu ana taboda kaarekoina kovakosāine. 6Ikavava, aba kasala vininabeso ana kaigabu manuna guna Kaba Kaiyakayana ana kaba siu toluyena goi kovatumasābe. 7Ikavava, kopa guna Kaba Kaiyakayana be aba kasalayana go, nauyayanaidi goi koyāto namlieta baige bwae kosiwōi. 8Ikavava, guna Kaba Kaiyakayana kokāli go, aliyana ana kaba siu ana taboda kaarekoina kovakosāine. 9Ikavava, pútuma aba kokābi, guna Kaba Kaiyakayana be nakae kaga liliuna sinaena kosiwōi be kokimasabēdi yau umagu, e bei guna Kaba Kaiyakayana ma konanina kimaasabaidi yau umagu. 10Ikavava, pútuma aba kaipaku kokābi, aba kasala vininabeso ana kaigabu manuna ma konanina koputumīdi be kokimasabēdi yau umagu, e bei aba kasalayana kimaasabaina toina. 11Ikavava, pútuma aba kaipaku kokābi, nokobaba ma kaena koputūmi, e kokimasābe yau umagu.

12E ma natunao komēdi guna Kaba Valoboda ana kaba siu goi kovaisivēdi. 13Ikavava, kwama kimaasabaidi kokabīdi, Eroni kovalōsi. Niga pútuma aba kaipaku kokābi, tauyana koputūmi be kokimasābe yau umagu, e bei tauyana nakae ipaaisewa yau umagu. 14Ikavava, Eroni natunao komēdi, kwama maanawedi goi kovalosīdi. 15Ikavava, pútuma aba kaipaku kokābi, tauyadi koputumīdi tamadi nakae, e bei tauyadi Tonúwala nakae sipaaisewa yau manugu. Go moe nakae Eroni ma natunao be nakae tubunao liliudi kokimasabēdi yau umagu, e bei kidi nakae Tonúwala nakae sipaaisewa yau manugu ame tuta be nakae tuta simamaima yaidi.’

16E kaga liliuna Yauwe ilovinaegu aguinuwedi, nakae aguinuwedi.

17E tuwo tukówana vakuumgoina ana maliyalina vakuumgoina goi Yauwe ina Kaba Kaiyaka kavataoe. Moe bogina tala tayamo ikavava ima sowóduwo Itipita mlina goi. 18E Livai tubunao alatuwokoidi adigo kagu,

‘Aba Kaiyakayana kovatāoe.’

E ame nakae siguinuwe: Vabodakalova adi kaba taoya siyatoidi, e vabodakalovayadi simosidi. Niga logógana sivaisiudi goi be nakae kówala sivataoedi. 19Sivataoedi ikavava, aba vatumna areko sikabi, Aba Kaiyakayana madabokina sivatum. Ikavava, aba vatumna aito sikabidi, aba vatumnayana areko sivapopo nakae boi Yauwe bogina ilovinaegu.

20E aba vatulúkwana sikabidi, dedeoga sinaena sidodoidi. Niga aitakeo aiyuwo sikabidi, dedeogayana ana rini goura goi sivaisiudi. Ikavava, aba núwala sikabi, dedeogayana yatana goi sikailagasi. 21Sikailagasi ikavava, sikaitakeve sinave Tukunu goi sivaisiu namlieta baige vabodaupa kaarekoina sikabi, sivakosaine aba vatulúkwana dedeogaina sitabode nakae yau sopagu goi Yauwe bogina ilovina siguinuwe.

22E teboro sikabi, sikaitakeve sinave Aba Valobodayana goi sivaisiu go, yawéyana dadavina vabodaupa kaarekoina toluyena goi siyato. 23Ikavava, sikabidi, teboroyana yatana goi sikailagasidi go, Yauwe matana goi sikatubayasidi nakae boi Yauwe bogina ilovinaegu.

24E rampa adi kaba yata sikabi, Aba Valoboda goi sivaisiu go, youya dadavina vabodaupa kaarekoina toluyena goi siyato. 25Ikavava, Yauwe matana goi rampayadi silotuvaninimidi sininínima nakae boi Yauwe bogina ilovinaegu.

26E aba kasala goura sikabi, ina Kaba Valoboda goi sivaisiu go, vabodaupa kaarekoina toluyena goi siyatogamogamone. 27E yatana goi insensi mainina dedevina siyato, e sigabu nakae boi Yauwe bogina ilovinaegu.

28E ina Kaba Kaiyaka ana kaba siu ana taboda kaarekoina sikabi, sivakosaine. 29Ikavava, aba kasala vininabeso ana kaigabu manuna sikabi aba siu toluyena goi sivatumasabe. Ikavava, yatana yoguyogu vininabeso manuna sikailagasi sigabusave, e kutukutu vininabeso manuna sikailagasidi, sigabudi nakae boi Yauwe bogina ilovinaegu.

30E nokobaba kopa sikabi, ina Kaba Valoboda be aba kasala kopa go, nauyayanaidi goi siyato. Ikavava, bwae sitege nokobabayana goi sisiwoi moe adi kaba níkina. 31E amoko goi Eroni ma natunao be yau nimama be aema bei kaanikidi. 32Tutayana Yauwe ina Kaba Valoboda goi kasiu o kavalabelabena aba kasala goi, e mainao nimama be aema kanikidi. Ikavava baige kasiu nakae boi Yauwe bogina ilovinaegu.

33E Yauwe ina Kaba Kaiyaka be aba kasala sikalidi. Ikavava, aliyana ana kaba siu ana taboda kaarekoina sivakosaine.

E ameko goi paisewayana madabokina alukavave.

Yauwe ana káeyana tomoeeyalina ina Kaba Kaiyaka itaapasigi tetelina

34E gaota isou Yauwe ina Kaba Valoboda iumai#Mad 17:5; Mak 9:7; Luk 9:34. go, Yauweyana ana tomoeeyalina isiu ina Kaba Kaiyaka madabokina itapasigi.#1To 8:10-11; Ais 6:4; Isi 43:4-5; Nuw 15:8. 35E gaotayana Aba Valoboda iumai be nakae Yauwe ina kaeyanayana tomoeeyalina ivakayaodei, tauna geya itoboineguta bei Aba Valoboda goi asiu. 36Go tutayana gaotayana ituko ina, e kai kakatubayasi bei kataoya kaketoiya go, gaotayana kasabookuliye. Nako goi isou, amoko goi kakaaiyaka. Moe nakae kaguuinuwe ima ketoiya ana madabokina goi. 37Go gaotayana neta geya itukoita, e kai Isileli tubunao geya kaketoiyeta, go sem kakaaiyaka ana kadókana ituko ina. 38Moitamo. Yauwe ina gaota Aba Kaiyaka yatana goi ikaaiyaka maliyalina. Go sabamgo yeu sabeninimina gaotayana sinaena goi ikaaiyaka. Ame nakae kai Isileli tubunao madabokima ima ketoiya ana madabokina goi.

Currently Selected:

Tateta 40: GVS

Highlight

Copy