Guinuwa 1

Tétala ana kaba vatowo

(Guinuwa 1:1-14)

Yeisu ikatótula Baloma Kimaasabaina manuna

1Tiyopilo e,

Guna buki vakuumgoina boi agiimigini manum sinaena moe kaga liliuna iguinuwedi be nakae ivatulúkwana. Moe ina paisewayana ana kaba vatowo#Luk 1:1-4. 2ana kadókana kiinavaidi adi lovina ivinidi namlieta baige Yaubada ikabi itukoe inave yábana. 3Ame tauyadi yaidi Yeisu ina mamayuyu be ina kámasa mlidi toinina ivagitako kina maa yawoina. Ina taoyamna ana kiyakiyaya badabadaidi ivatulukoidi bei siyagoi kina moitamo maa yawoina ame nakae: Maliyalina poti (40) sinaedi iisowóduwo yaidi go, ina sowoduwoyadi goi ivatuulukoidi manuna. 4-5Ego nava taiyao sikaaiyaka sikakáika, ilovinaedi idigo kana,

‘Boi go, maliyalina maniyedi sikavava, Yaubada Balomaina Kimaasabaina goi bei isayoyoimi.#1:4-5 Yaubada Balomaina Kimaasabaina goi bei isayoyoimi: Ame geya kada idi goyo pasidi geya, go sem Baloma Kimaasabaina ietune ina tomota sinaedi isiu ikaiyako vata go, ivakayaodeidi sitogaga (Luk 24:48-49).#Mad 3:11; Mak 1:8; Luk 3:16; Iyo 1:33. Tauna Yerusalema taabu kookalāve, go sem kootuyāwata ana kadókana Tamada Balomainayana boi ikaatotule ivinimi. Atotulayana yaigu goi boi bogina konove.’#Luk 24:49.

6E tuwo lavayana situgúguna Yeisu taiyao, sidigo kadi,

‘Ima Tomoya, ame tuta bei Devida ina kalibúbuna kuyolimemnei go, kita taudava takalibubuda o geya?’

7Go Yeisu idigo kana,

‘Geya itoboineyeta koyagoi ava tuta Tamada bogina iupe bei toinina ina lovina goi alibubunayana ana yolímana iguinuwe, 8go sem itoboine koyagoi tutayana Baloma Kimaasabaina iwo yaimi goi, togaga bei kobabane, e komi bei guna totalavaitayao Yerusalema goi nakae Yudiya ana dadava madabokiina goi, ana dadava goi be nakae asa liliuna poyapoya ame goi.’#Mad 28:19; Mak 16:15; Luk 24:47-48.

Yeisu ituko ina yábana

9Moe livalayadi ilatuwokoidi ikavava, Yeisu sigitegite go, Yaubada itukoe inave yábana, e gaota sinaena goi isiu itagau, tauna geya itoboinedita sigite.#Mak 16:19; Luk 24:50-51.

10Ego tutayana ituko inonoina, kidi nava yábana osasaina sikandoolagae go, koroto adi taiyuwo madi kwama poowoudi kikidi goi siitaoya 11kadi,

‘Komi Galili korotoimi, kaga pasina kootaoya yábana osasaina kopotepote? Mae Yeisuyana bogina kogite yaimi goi Yaubada ikabi itukoe inave yábana, bei ikaluvilamna ima go, ina kaluvilamnayana ana kaigigita tauna mae ina tuko nakae bogina kogite.’

Yeisu ina vamoleyanayao yawou tayamo idi sinapu awanoi manuna

12Niga koya yoina goi nakae siketoiya. 13Tutayana Yerusalema goi sisiu go, vada tayamo vaapopoina goi simwera sikaaiyaka. Tauyadi moe , Iyoni, Yemesa, Anduru, Pilipo, Tomasi, Batolomiu be nakae Madiu, Alipiyo natuna Yemesa, Saimoni (tauyana Isileli tubunao idi kaba lovina ana tokokoila)#1:13 Tokokoila: Saimoni boi mainao ikokoila bego ivayaviya da Roma taiyao; latuwona bego da Roma ivatapiyedi go, Isileli tubunao idi kaba lovina sikabimnei. Ago niga Yeisu ibabane, e amo sinapuyana ikalave. be nakae Yemesa natuna Yudasa.#Mad 10:2-4; Mak 3:16-19; Luk 6:14-16. 14Moe tauyadi, maniyedi vevina, Yeisu senao be nakae sinana Meri taiyao sikaaiyaka go, madabokidi nuwodi tayamo goi tuta liliuna toinidi sikaasaledi idi kawanoi Yaubada yaina goi.

Yudasa ana katumapu ana kinava

(Guinuwa 1:15-26)

15Moe tutayana goi Pita senao nuumisaidi adi badabada tayamo andedi tuwenti (120) nakae situgúguna go, nauyayanaidi goi Pitayana itaoya ilatuwokoidi idigo kana,

16‘Segowo, itoboine imalatomota. Gininayana boi nimatu Baloma Kimaasabaina Devida nukotona isanayato, e Yudasa ina guinuwa igimitalavaitedi. Yudasayana boi Yeisu ana toyoitayao ivaitedi. 17Tauyana boi mainao kai taiyao kaeboda tayamo; kai madabokima Yeisu ina vamoleyanayao o tadigo kada, “Yeisu ikawoi kai taiyao.”

18Tuwo amo tauyana ina goyo ana maisa Gagaidi sikabidi, e tauyana yoina goi toinina ina poyapoya sigimone. Sigimone ikavava, tauyana itaoya, ina poyapoyayana goi isouye gamona ivatupave, e sileuna madabokina isowóduwo. 19Amo tetalayana Yerusalema ana tokaiyakoyao liliudi bogina sinove, tauna Yudasa ina kámasa pasina kidi toinidi niyadi goi asayana sivayou Akeladama.’

Moe ana yagoina ikaika poyapoyaina.#Mad 27:3-8. 20Pita nava ibobóbwara kana,

‘Moe moitamo. Gininayana itaalavaite moe Same goi tagite. Sameyana Devida igini kana,

“Toinina ina kasa tomota sikalave,

asayana goi tomota taabu sikaaiyāka.”

Same 69:25

Aiyuwoina kana,

“Ana katumapu itoboine

bei tauyana ina baseko ikabi.”

Same 109:8

E Sameyadi silatuwokoida kaga itoboineda taguinuwe. 21Tauna itoboineda Yudasa ana katumapu takinave. Ago koroto besobeso geya, go sem ava korotova boi sisabokuuliyema tutayana ida Tomoya Yeisu nava yaida goi ikaaiyaka. 22Nakae boi ana sayóyova Iyoni goi#Mad 3:16; Mak 1:9; Luk 3:21. go, ana kadókana matama goi Yaubada ikabi itukoe inave yábana.#Mak 16:19; Luk 24:51. E ame tauyadi yaidi goi tayamo takinave, e bei korotoyana imalatotalavaita Yeisu ina taoyamna manuna kai taiyao.’

23Pita ibóbwara ikavava, you aiyuwo sikailagasidi: Tayamo yoina Iyosepa, tauyana siduduwe Basabasi go, youyuwoina moe Yusto. Tayamo yoina Mataya. 24-25Youyadi sikailagasidi ikavava, sikawanoi Tomoya yaina sidigo kadi,

‘Ima Tomoya, Yudasa boi paisewa ikalave go, iilusale ame baige wowona ikaivanuwe. Ame tuta ana katumapu kaalusale. Ago kom tomota liliuma nuwoma bogina kuyagoidi. Tauna kakawanoi yaim kuvatulukoima ame korotoyadi yaidi goi avatau bogina kukinave kina Yudasayana ana katumapu, e bei tauyana im vamoléyana ipaisewa manum.’

26Sikawanoi ikavava, aba yagoina#1:26 Aba yagoina: Gurewa giyaidi sikabidi, yatadi goi korotoyadi yoidi siginidi. Ikavava, keiga goi sidodoidi namlieta baige siege ana kadókana gurewa tayamo isou. Isou, sigite ava you ikaaiyaka, e amo tauyana kinava ikabi. tayamo siwodugu go, Mataya kinava ibabane. Tuwo tauyana Yeisu ina vamoleyanayao yawou tayamo isiukoidi.

Currently Selected:

Guinuwa 1: GVS

Highlight

Copy