Guinuwa 2

Yeisu ina tonumisayao Baloma Kimaasabaina siibabane tetelina

(Guinuwa 2:1-47)

Pentikosi tetelina

1Tutayana ina tonumisayao liliudi taudiva situgúguna vada tayamo goi sikaaiyaka. 2Sikaaiyaka go, yábana goi butukáwana tayamo ima yágira yailúwasa butukáona nakae. Tuwo madabokiidi vadayana goi sikaaiyaka sinove. 3Sinove go, máena sisowóduwo adi kaigigita yeu nakae go, sitasapasapa sina tomota tamo tamo dabadi goi sitowotowo. 4Sitowotowo go, madabokidi ivakayaodeidi, tuwo sivatowo ta kaníyana be ta kaníyana goi sibobóbwara nakonakae Balomayana ikitogagedi.

5Ego kaasalaidi Yaubada yaina dadava liliuna poyapoya ame goi bogina sima Yerusalema goi sikaaiyaka. 6E butukawanayana sinove, tuwo sideli sima; latuwodi siyagoi kaga butukáona. Sima, tamo tamo toinidi niyadi sinovedi, tauna nuwodi siwówana. 7E madi kainaopa gagaina sidigo kadi,

‘Iyaa! Amo kaga? Amo tobobwarayadi liliudikova da Galili, tauna niyada geya siyagoidita 8go, manakae tanovedi kita tamo tamo toinida niyada goi sibobóbwara? 9Kita da Paritiya, da Mediya, da Elam, da Mesopotémia, da Yudiya, da Kapadosiya, da Pontosi, da Esiya, 10da Parugiya, da Pampíliya, da Itipita, da Libiya asainao Sairini ana dadava goi be nakae da , 11e nakae da Kiriti be da Arábiya. Ego maniyeda Diyuu go, maniyeda sitalavaaitedi.’

12E nava sikaiinaopa be nakae nuwodi siwowówana taudiva sibobóbwara kadi,

‘Ame kaga ana yagoina nakona?’

13Ego maniyena tomota sivaponupoonuyedi kadi,

‘Oine vau sinim ginagina, e siyaluwo!’

14Go kina yawou tayamo taiyao go, niyana gagaina goi boda ilatuwokoidi idigo kana,

‘Segowo da Yudiya be nakae madabokimi Yerusalema ana tokaiyakoyao, guna livala ame konovedokōidi bei koyagoi ame kaga ana yagoina. 15Ame korotoyadi be yau koogitema manuma konuwonúwana kami, “Komi koyaluwo.” Ago ame nava nobuyana go! Nobuyana goi geya tanimnim, tauna komi kotainasi; kai geya kayaluwoita geya! 16Go sem ame dogoiyana kogitegite moe kaga nakae boi Yaubada ina Iyoeli italavaite Baloma Kimaasabaina manuna; idigo kana,

17“Yaubada idigo kana,

‘Nava bei tuta ana kaba lukavava goi Balomaigu asiwoi

isou ina tomota liliudi yaidi goi ikaaiyaka.

Tuwo natumiyao koroto be vevina

guna livala bei sikabivalevale.

Imi tubuwauyao bei go,

imi tomoyamoyayao bei sikanamimi.

18Moe tutayana Balomaigu bei asiwoi isou ina

kidi guna liliudi

koroto be vevina yaidi nakae,

e bei guna nuwonúwana sikabivalevale.

19-20Aba kainaopa yábana osasaina goi bei amadagidi.

Aba kainaopayadi moe níyala bei ikamamaníwana

be nakae tukówana matana ivakayakaya ikaika nakae.

Aiyuwoina aba kinana poyapoya goi bei amadagidi.

Aba kinanayadi moe ikaika, yeu sabeninimina

be aubowo gagaina.

Moe dogoiyadi sikavava,

namlieta baige gagaina

nakae dedevina bei isowóduwo.

21Go avatauwa neta yaina goi

siduduwo adi vaita manuna,

bei adi yava sibabane.’”’

Iyoeli 2:28-32

22Pita nava ibobóbwara idigo kana,

‘Komi , guna livala ame konovēdi: Yeisu guma Nasareta goi Yaubada guinuwa toogagaidi be aba kinana kainaaopaidi iguinuwedi yaimi. Aba kinanayadi goi ivatulukoimi bego Yeisu bogina ikinave. Moe bogina koyagoi. 23Ame Yeisuyana ana tonuwotulu iwo inuwotuluye komi nimami goi go, moe Yaubada ina nuwonúwana boi bogina igimilosinapu be igimilovina. E inuwotuluye ikavava, komi imi lovina goi Tauyana sinave kidi Yaubada ina Katukeda ana tokapipilovayao nimadi goi siyato. Tuwo siyoisi, kerose goi situpatuko, e sikaumate.#Mad 27:35; Mak 15:24; Luk 23:33; Iyo 19:18. 24Ame Yeisuyana komi imi lovina goi sikaumate go, ámasa geya itoboineyeta iyoisikavate, tauna ámasa ana yówana goi Yaubada italigei, ikaitaoemnei.#Mad 28:5-6; Mak 16:6; Luk 24:5. 25Ámasa geya itoboineyeta Yeisu iyoisikavate. Moe ana kamoitamo Devida ina gínina goi tababane. Tauyana italavaite idigo kana,

“Yauwe kakataigu goi ituwanuwo,

e bei geya atameyeta.

Moe pasina tuta liliuna Tauyana agitegite

yaigu goi ikaaiyaka.

26-27Tauna ategu iuyáwana be sopagu iyapali gagaina.

Aiyuwoina Yaubada,

tokámasa idi dadava goi bei geya kwalaveguta.

Nakae bei geya kutagoneta

yau im koroto kimaasabaigu umam

wowogu valiwoga goi idáura.

Tauna yau tomota tauna go,

ayagoidoko wowoguyana bei geya idaureta.

28Yáwana dedevina ina kenao bogina kuvatulukoigu.

Im kaiyaka yaigu pasina uyáwana goi kuvakayaodeigu.”

Same 16:8-11

Moe pasina tauna ámasa geya itoboineyeta Yeisu iyoisikavate.

29Segowo, alatuwokodokoimi bego ame livalayadi geya tubuda Devida manuna geya. Boi Devidayana ikámasa, wowona sikabi sivaliwoge, e ame tuta ina nava ikaaiyaka, nakae itoboineda tagite.

30Tauna Devida geya toinina manuna ibobóbwara geya. Tauyana Yaubada ina tokabivalavala tayamo, tuwo bogina iyagoi Yaubada ikatótula bego tubuna tayamo nava bei ikinave ietokalibúbuna go, atotulayana bei iguinuwe.#2Sa 7:12-13; 1Te 17:11-12; Sam 132:11. 31Ame Devidayana bogina igimiyagoi, tauna ina taoyamna ámasa goi manuna ibobóbwara bego Yaubada Guyauyana tokámasa idi dadava goi geya ikalaveyeta, nakae bei geya itagoneta Tauyana wowona idáura.#Sam 16:10. Moe pasina ame livalayadi geya Devida manuna geya, go sem livalayadi moe kina Guyau ina taoyamna manuna.

32Ame Yeisuyana boi ikámasa go, Yaubada bogina ámasa goi ikaitáoe, e kai madabokima matama goi bogina kagite, e ame kataalavaite yaimi. 33E tauna Yaubada ámasa goi ikaitáoe ikavava, ikailagasi wowoina basekoina kakataina goi itusobu be nakae Baloma Kimaasabaina boi Tamana bogina ikaatotule ibabane. Tauna kaga ame kogitegite be nakae konovenove moe Balomayana kina Yeisu iisiwoi yaima ina guinuwa. 34Moitamo Yeisu ituko ina yábana. Devida toinina idigo kana,

“Yauwe ibóbwara guna Tomoya ilatuwoko kana,

‘Kūma wowoina basekoina kakataigu goi kutusōbu

35ana kadókana im kaleyayao avasobusoobuyedi

kulovinaedi.’”#Mad 22:44; Mak 12:36; Luk 20:42-43; Ibe 1:13.

Same 110:1

Ina Tomoyayana idigedige moe Yeisu. 36Tauna komi Isileli tubunao madabokimi koyagoidōko bego ame Yeisuyana kerose goi kotupatuko, Yaubada bogina ivayoko kina Tomoya be nakae .’

37E Pita ina bóbwara boda sinove, sivakúwana, tuwo Pitayana be nakae vamoleyanayaoyadi liliudi silatuwokoidi sidigo kadi,

‘Bogina kabágala! Semao, bei manakaema?’

38E kina go Pitayana idigo kana,

‘Kotugavīla namlieta komi tamo tamo kotagōna bego Yeisu , e bei imi goyo inuwotaoidi be nakae Yaubada Baloma Kimaasabaina ivinibesoimi. 39Moitamo. Boi Yaubada ikatótula Baloma Kimaasabaina manuna. Ame atotulayana moe komi manumi, natumiyao manudi be nakae kidi aduwanau goi manudi. Moe avatauwa neta Yauwe ida Yaubada iduduwedi toinina yaina.’

40Pita livala tuwaina goi ikatumatalidi go, iliiwoledi idigo kana,

‘Kokawanōi Yaubada yaina bego Yeisu ana tokaoliliwoyao goyogoyoidi adi liuna goi iyavemi!’

41Tuwo avatauwa neta Pita ina livala siuyaone, sisayóyova go, amo maliyalinayana goi Yeisu ana tonumisayao bogina ivaituwedi nakae adi badabada aito tausani (3,000) sisiukoidi. 42E tuta liliuna sikaasaledi vamoleyanayao idi vatulúkwana goi be nakae abivekoveko goi, aba nuwokavata aikanina#2:42 Aba nuwokavata aikanina: Ame áika siguinuwe, taiyao sikáika sikabivekoveko go, Yeisu ina kámasa be ina taoyamna sinuwokaavatedi. Aikayana ana kaba lukavava goi beredi sikivisi sikaiguyau nakae kita sakaramen taguuinuwe. goi be nakae awanoi goi.

Yeisu ana tonumisayao idi sinapu

43E Yeisu ina vamoleyanayaoyadi nimadi goi Yaubada aba kinana kainaaopaidi badabadaidi iguuinuwedi, e tomota liliudi sigitedi, madi matoita Yaubada siwoowoine. 44E kidi go Yeisu ana tonumisayaoyadi liliudi taiyao sikaaiyaka, e idi sinapu ame nakae: Konadi tayamo, avadi tayamo, adi kwama tayamo, e ame konadiyadi madabokina sikasaledi tomota yaidi.#Gui 4:32-35. 45Idi poyapoya maniyena be nakae konadi maniyedi sikaigimonedi go, maisadi sikabidi, avatauwa neta geya konadimo, yaidi goi sikaiguyauyedi.

46Maliyalina tamo tamo sina Yaubada ina Vada Kimaasabaina goi nuwodi tayamo sisaakululu be nakae idi vada goi aba nuwokavata aikanina siguuinuwe go, madi uyáwana be madi kasala avadi sikaiguyauye tomota liliudi yaidi goi, e taiyao sikakáika. 47Ago Yaubada siyaapaliye, e kidi boda madabokina sikanuwoiyedi. E kina go Tomoya maliyalina tamo tamo goi maniyena tomota iyavedi, e tauna ina tonumisayao ivaituwedi.

Currently Selected:

Guinuwa 2: GVS

Highlight

Copy