San Mateo 18

Pu̶n ni'igyu̶ jakmu̶j

(Mc 9.33-37; Lc 9.46-48)

1Nan je̱'e̱ mu̶'it xu̶u̶ je̱'e̱ discípulotu̶jk je̱'e̱ Jesús nimu̶jwa'kku̶xy y chi yajtu̶u̶gu̶xy:

—¿Pu̶n ni'igyu̶ jakmu̶j'idaamb jiiby ma je̱'e̱ Dios y'ane'emyu̶ñ?

2Mu̶'it je̱'e̱ Jesús je̱'e̱ pi'k'ana'k tu'ug mu̶j'yaaxy, chi kujkjooty pu̶daaky ma je̱' ajku̶xyu̶ñ 3y myu̶naañ:

—Janch tu̶y'ajtu̶ñ du'un nnu̶maaygyu̶xy pu̶nu̶ ka'p miich je̱'e̱ mjoot mwinma'añ myajtu̶gajtzku̶xy y pu̶nu̶ ka'p du'un mnaybyu̶daaku̶gu̶xy neby je̱'e̱ pi'k'ana'ktu̶jku̶ñ, ka'p jiiby mdu̶gu̶u̶ygyu̶xu̶ch ma je̱'e̱ Dios y'ane'emyu̶ñ. 4Je̱'e̱ mu̶dyiibu̶ ni'igyu̶ jakmu̶j'idaamb jiiby ma je̱'e̱ Dios y'ane'emyu̶ñ, je̱' je̱' je̱'e̱ mu̶dyiibu̶ yuung naaxypy ja'ay'ajtpu̶ñ y je̱'e̱ mu̶dyiibu̶ du'un naybyu̶daaku̶bu̶ñ neby adayaaba pi'k'ana'ku̶ñ. 5Y pu̶n mu̶u̶d u̶u̶ch kyu̶xpu̶ nxu̶u̶ je̱'e̱ pi'k'ana'k ku'ubu̶jkpu̶ñ, du'un neby adayaaba pi'k'ana'ku̶ñ, u̶u̶ch naty je̱'e̱ du'un xykyu'ubu̶jkp.

Je̱'e̱ mu̶dyiibu̶ mu̶k kudzu̶gu̶'u̶ñdyu̶ñ ko xyajpokykya'awu̶mu̶ch

(Mc 9.42-48; Lc 17.1-2)

6“Wanpú̶nu̶ch pu̶n adaa pi'k'ana'ktu̶jk nidu'ugtu̶ yajwinma'añdyu̶goobyu̶ñ je̱'e̱ mu̶dyiibu̶ u̶u̶ch je̱'e̱ n'ayuuk ndu̶y'ajt xymyu̶bu̶jku̶byu̶ñ ajku̶xy, ni'igu̶ oy ko u̶xyu̶py yaj'yo'kxodzu̶'u̶yii tu'ug mu̶jpu̶ molinu̶tzaa y yajku'uju̶bijpnáxu̶ch mejyjyooty ma je̱'e̱ mejy kyómu̶chu̶ñ. 7¡Janch ju̶bu̶k mu̶u̶d je̱'e̱ naaxwiimbu̶ je̱' ko janchmay je̱'e̱ ja'ay jii mu̶dyiibu̶ je̱'e̱ mayjya'ay yajwinma'añdyu̶gooygyu̶xpu̶ñ mu̶u̶d je̱'e̱ anu̶u̶! Peru̶ ni'igu̶ jii'ádu̶p je̱'e̱ du'umbu̶ ja'ay ajku̶xy, y ¡ayo'on mbadaamb je̱' pu̶njaty je̱'e̱ ja'ay naty yajwinma'añdyu̶gooygyu̶xpu̶ñ!

8“Paady pu̶nu̶ jii je̱'e̱ mgu̶'u̶ o je̱'e̱ mdeky miich xyajtu̶goya'añ, timy'u̶xpux y ju̶gue̱m pu̶da'ag; ni'igu̶ oy ko ku̶'u̶dúk o tekytyuk mdu̶gu̶'u̶wu̶ch ma je̱'e̱ jugy'ajt wiinu̶u̶xu̶u̶bu̶ju̶ñ, y ni'igu̶ ka'p ko myajku'uju̶bijpnáxu̶ch mu̶u̶d je̱'e̱ mgu̶'u̶ me̱jtz'adu'um y mu̶u̶d je̱'e̱ mdeky me̱jtz'adu'um jiiby ka'a'oydyaaktuuby wiinu̶xu̶u̶. 9Y pu̶nu̶ jii je̱'e̱ mwiin miich xyajtu̶goya'añ, timyyajpu̶dzú̶m y ju̶gue̱m pu̶da'ag; ni'igu̶ oy ko je̱'e̱ mwiin tu'k'adu'um mmu̶du̶gu̶'u̶wu̶ch ma je̱'e̱ jugy'ajt wiinu̶xu̶u̶bu̶ju̶ñ, y ni'igu̶ ka'p ko myajku'uju̶bijpnáxu̶ch mu̶u̶d je̱'e̱ mwiin me̱jtz'adu'um jiiby ju̶u̶njooty ka'a'oydyaaktuuby.

Je̱'e̱ borreegu̶ ijxpe̱jt mu̶dyiibu̶ tu̶gooyu̶ñ

(Lc 15.3-7)

10“Ka'p adayaaba pi'k'ana'ktu̶jk ni tu'ug m'u̶xtijku̶xy. U̶u̶ch miich nnu̶maaygyu̶xypy ko jiiby tzajpjooty y'ángelestu̶jk yu̶'u̶ je'emy ajku̶xy ma u̶u̶ch je̱'e̱ nDeedy tzajpjootypyu̶ wyinduuyu̶ñ. 11[Je̱' ko u̶u̶ch je̱' je̱'e̱ ja'ay mu̶dyiibu̶ tzon tzajpjooty tu̶ nmíñu̶ch ya naaxwiiñ ko u̶u̶ch nyajni'idzo'ogu̶ch je̱'e̱ tu̶u̶bu̶ najty tyu̶gooygyu̶xy].#18.11 Adayaaba texto korchete mu̶u̶dpu̶, ka'p je̱'e̱ jaaybyu̶du̶jk nije̱' tu̶ paatku̶xy.

12“¿Nej miich m'okmu̶naangu̶xpu̶? Pu̶nu̶ jii je̱'e̱ ja'ay tu'ug borreegu̶ mu̶u̶du̶ch tu'kmu̶go'px y y'oktu̶góyu̶ch nidu'ugtu̶, ¿nej ka'p je̱'e̱da'a yajwu̶'u̶mu̶ch je̱'e̱ mu̶da'px majmókx mu̶daaxkpu̶ jim koptku̶xp ko naty nu̶kxy u̶xta'awa'añ je̱'e̱ mu̶dyiibu̶ naty tu̶ tyu̶goyu̶ñ? 13Y pu̶nu̶ pyaatypy, ni'igyu̶ je̱'e̱ xyonda'agu̶ch mu̶u̶d je̱'e̱ tu'ugpu̶ borreegu̶ ni'igu̶ ka'p mu̶u̶d je̱'e̱ mu̶da'px majmókx mu̶daaxkpu̶ mu̶dyiibu̶ ka'p tyu̶goyu̶ñ ajku̶xy. 14Y nandu'unu̶tz je̱'e̱ mDeedy miich ajku̶xy je̱'e̱ mu̶dyiibu̶ jiiby tzajpjooty yajpaatpu̶ñ, ka'p je̱'e̱ tzoky nu̶kxy adaa pi'k'ana'ktu̶jk nidu'ugtu̶ tyu̶gooygyu̶xy.

Neby je̱'e̱ nbuya'ay mu̶baad nbokywyinmé̱kxu̶mu̶ñ

(Lc 17.3)

15“Pu̶nu̶ jii je̱'e̱ mmu̶gu'ug ju̶bu̶k axu̶u̶g xytyuñ, mu̶dkapx'oyu̶'u̶w adu'ug mu̶u̶d je̱' y yajku'ubú̶k je̱'e̱ pyoky kyu̶dyeey. Y pu̶nu̶ xymyu̶mu̶doob, tu̶ naty je̱'e̱ mmu̶gu'ug du'un mu̶dnaymyu̶gu'ugpu̶gyii. 16Pu̶nu̶ ka'p xymyu̶mu̶doy, jak'u̶xta'a je̱'e̱ ja'ay tu'ug o me̱tzk, wan je̱' nidu̶y'ajtku̶xu̶ch neby du'un tyu̶ydyu̶gu̶'u̶wu̶chu̶ñ neby naty je̱'e̱ me̱tzkpu̶ o je̱'e̱ tu̶gu̶u̶gpu̶ nidu̶y'ajt'ajtpu̶ myu̶naangu̶xyu̶ñ. 17Y pu̶nu̶ nan ka'p je̱'e̱ mu̶mu̶doy ajku̶xy, mu̶'íttu̶tz tu̶y je̱'e̱ mu̶bu̶jkpu̶du̶jk du'un m'awaanu̶ñu̶ch ajku̶xy, y pu̶nu̶ nan ka'p je̱'e̱ mu̶bu̶jkpu̶du̶jk mu̶mu̶doy ajku̶xy, mu̶'it du'un myajnajxnu̶ch neby je̱'e̱ ja'ay mu̶dyiibu̶ je̱'e̱ Dios y'ayuuk tyu̶y'ajt ka'p mu̶bu̶kyu̶ñ o neby je̱'e̱ yajkugube̱jtpu̶du̶jk ajku̶xyu̶ñ mu̶dyiibu̶ je̱'e̱ gobierno romano mu̶duungu̶xpu̶ñ.

18“Janch tu̶y'ajtu̶ñ du'un nnu̶maaygyu̶xy ko je̱'e̱ mu̶dyiibu̶ miich ya naaxwiiñ m'agapxtujkku̶xypyu̶ñ, nan y'agapxtúgu̶py je̱'e̱ Dios jiiby tzajpjooty nandu'un, y je̱'e̱ mu̶dyiibu̶ miich ya naaxwiiñ ka'p m'agapxtujkku̶xyu̶ñ, nan ka'p je̱'e̱ Dios jiiby tzajpjooty agapxtúgu̶ch.

19“Cham du'un nnu̶maaygyu̶xy: Pu̶nu̶ mnaygyápxu̶gu̶xp miich nime̱tzk ajku̶xy ya naaxwiiñ ko tijaty myujkwa'anaangu̶xy ma je̱'e̱ Diosu̶ñ, xymyooygyu̶xu̶p je̱'e̱ mDeedy je̱'e̱ mu̶dyiibu̶ jiiby tzajpjooty yajpaatpu̶ñ. 20Je̱' ko ma je̱'e̱ ja'ay tu'ug me̱tzk ñaymyujku̶gu̶xy mu̶u̶d u̶u̶ch kyu̶xpu̶ nxu̶u̶, jim kujkjooty u̶u̶ch nyajpaady ma je̱' ajku̶xyu̶ñ.”

21Mu̶'it je̱'e̱ Pedro je̱'e̱ Jesús ninu̶kxy y yajtu̶u̶y:

—Windzú̶n, ¿naag'ook u̶u̶ch je̱'e̱ nmu̶gu'ug mu̶baad nwinmekxy pu̶nu̶ jii u̶u̶ch naty ju̶bu̶k axu̶u̶g xytyuñ? ¿U̶xtu̶ juxtujk'ook?

22Chi je̱'e̱ Jesús y'adzoowu̶:

—Ka'p yam nnu̶ma'ay u̶xtu̶ juxtujk'ook, du'un yam nnu̶ma'ay ko tu̶gu̶'px majk'ook juxtujkjáty.

Je̱'e̱ tuumbu̶ ijxpe̱jt mu̶dyiibu̶ je̱'e̱ myu̶gu'ug ka'p winmekxyu̶ñ

23“Paady, du'un je̱'e̱ Dios y'ane̱'e̱mu̶ñ neby tu'ug je̱'e̱ mu̶j'ane̱'e̱mbu̶ mu̶dyiibu̶ je̱'e̱ tyuumbu̶du̶jk ñukxy najty payo'oyaanu̶byu̶ñ du'uñdyu̶ najty myu̶nukxy'ajtu̶gu̶xyu̶ñ. 24Cham najty je̱'e̱ nukxy payo'oydyu̶gu̶'u̶y ko je̱'e̱ myoonsu̶ tu'ug yajnimiinu̶ ajku̶xy je̱'e̱ mu̶dyiibu̶ najty may millón mu̶nukxy'ajtu̶bu̶ñ. 25Je̱' ko ka'p najty je̱'e̱ tyuumbu̶ meeñ mu̶u̶du̶ch tii je̱'e̱ ñukxy mu̶u̶d kubé̱ttu̶chu̶ñ, chi je̱'e̱ mu̶j'ane̱'e̱mbu̶ ane̱'e̱mu̶ñ yejky ko wan yajtoogy neby tu'ug tuumbu̶ ni'idoogypyu̶ju̶ñ kipxy mu̶u̶d je̱'e̱ y'ung tyo'oxyu̶jk, y'ung y'ana'k y ku̶xyu̶ tijaty najty myu̶dajtypyu̶ñ, wan je̱'e̱ ñukxy du'un y'adujkta'awu̶ch. 26Chi je̱'e̱ tuumbu̶ ñayñajtzkojxtu̶na'awu̶u̶yu̶ ma je̱'e̱ mu̶j'ane̱'e̱mbu̶ winduuyu̶ñ, y mu̶nukxtaaky nu̶maay: ‘Windzú̶n, u̶u̶ch okmu̶me̱kxtujk, nmu̶gube̱jtta'awe̱e̱mby ku̶xyu̶.’ 27Y je̱'e̱ mu̶j'ane̱'e̱mbu̶ pya'a''ayoow je̱'e̱ tyuumbu̶, chi je̱'e̱ ñukxy winme̱kxu̶ y yaj'awa'adzpu̶dzu̶u̶my.

28“Peru̶ ko je̱'e̱ tuumbu̶ jiiby pyu̶dzu̶u̶my, chi je̱'e̱ myu̶gu'ug tu'ug paaty mu̶dyiibu̶ najty kipxy myu̶dmu̶duumbyu̶ñ, mu̶dyiibu̶ najty we̱e̱nu̶ mu̶nukxy'ajtu̶bu̶ñ mu̶go'px denario meeñ. Chi je̱'e̱ myu̶gu'ug yo'kmu̶madzu̶u̶y y tu̶gu̶'u̶y abe̱e̱n tu̶gu̶'u̶y yo'kpe̱e̱mbu̶, cham nu̶ma'ay: ‘¡Mu̶gube̱jtku̶ch du'uñdyu̶ u̶u̶ch xymyu̶nukxy'atyu̶ñ!’ 29Mu̶'it je̱'e̱ myu̶gu'ug ñayñajtzkojxtu̶na'awu̶u̶yu̶ ma je̱' wyinduuyu̶ñ, mu̶nukxtaaky nu̶maay: ‘U̶u̶ch okmu̶me̱kxtujk, nmu̶gube̱jtta'awe̱e̱mby ku̶xyu̶.’ 30Peru̶ je̱' ka'p je̱'e̱ myu̶gu'ug mu̶me̱kxtujky, chi yajtzuumu̶ u̶xtu̶ koonu̶ je̱' ñukxy yajkube̱jttaay. 31Adaa mu̶k adaa du'un yajju̶wu̶u̶y ajku̶xy je̱'e̱ wiingpu̶ tuumbu̶du̶jk ajku̶xy, chi je̱'e̱ mu̶j'ane̱'e̱mbu̶ oy ku̶xyu̶ awaandaayu̶ ajku̶xy neby najty tu̶ ijxku̶xyu̶ñ tu̶ tyuñ tu̶ jyadyii. 32Mu̶'it je̱'e̱ mu̶j'ane̱'e̱mbu̶ je̱'e̱ tyuumbu̶ oy yajwoyii, y chi nu̶maay: ‘¡Miich ju̶bu̶kja'ay miich! U̶u̶ch nwinme̱kxu̶ miich je̱'e̱ mnukxy ku̶xyu̶ je̱' ko u̶u̶ch xymyu̶nukxtaaky. 33Nandu'un u̶xyu̶py miich je̱'e̱ mmu̶gu'ug tu̶ mba'a''ayóy, du'un neby u̶u̶ch miich tu̶ nba'a''ayóyu̶ñ.’ 34Y mu̶k je̱'e̱ mu̶j'ane̱'e̱mbu̶ jyootma'ty, chi je̱'e̱ ane̱'e̱mu̶ñ yejky ko je̱'e̱ tyuumbu̶ wan yajtzaachtyúñ u̶xtu̶ koonu̶ ku̶xyu̶ myu̶gube̱jta'awu̶u̶ju̶ch du'uñdyu̶ najty myu̶nukxy'adyiiju̶ñ.”

35Chi je̱'e̱ Jesús jyakmu̶naañ:

—Y nandu'un u̶u̶ch je̱'e̱ nDeedy tzajpjootypyu̶ miich nandu'un xytyuungu̶xu̶ch, pu̶nu̶ ka'p miich je̱'e̱ mmu̶gu'ug nidu'ug nidu'ug tu'ug'aa tu'ugjoot mwinmé̱kxku̶xy.

Currently Selected:

San Mateo 18: MIXE

Highlight

Copy