Efesios 2
2
Dios tu̶ xyajni'idzooku̶m je̱' ko xychojku̶m xyjyu̶wu̶u̶yu̶m
1Jékyu̶p du'un miich najty ajku̶xy neby o'ogypyu̶ju̶ñ, je̱' gyu̶xpu̶ ko najty mdzu̶naaygyu̶xy mjuugy'ajtku̶xy ju̶bu̶ktuum y pokyjyooty. 2Je̱' najty mba'ijxku̶xypy neby je̱'e̱ naaxwiiñjya'ay y'adu̶u̶tzku̶xyu̶ñ y mguydyuunu̶ je̱'e̱ ka'a'óybyu̶ chojku̶ñ ajku̶xy je̱'e̱ mu̶dyiibu̶ je̱'e̱ poj naaxwiimbu̶ ane̱'e̱mbu̶ñ y mu̶dyiibu̶ je̱'e̱ ja'ay ane̱'e̱mgu̶xpu̶ñ je̱'e̱ mu̶dyiibu̶ je̱'e̱ Dios ka'p kapxymyu̶doogu̶xyu̶ñ. 3Y du'un najty jékyu̶p u̶u̶ch nandu'un nigu̶xyu̶ ndzu̶naay njugy'ajtu̶m ajku̶xy, nguydyuunu̶m je̱'e̱ ngu̶'u̶mdzojku̶ñ ajku̶xy y je̱'e̱ ngu̶'u̶mjoot ngu̶'u̶mwinma'añ ajtu̶m ajku̶xy, je̱'e̱ mu̶dyiibu̶ tu̶ nmu̶ma'axung'ajtu̶m ajku̶xy pokymyu̶u̶d ku̶dyeeymyu̶u̶d. Ko du'un tu̶ yajma'axung'áty pokymyu̶u̶d ku̶dyeeymyu̶u̶d xyjya'awinmajtzp ijty je̱'e̱ mu̶jpu̶ tzaachpyu̶ ajtu̶m ajku̶xy je̱'e̱ mu̶dyiibu̶ je̱'e̱ Dios kye̱xe̱e̱mbyu̶ñ, du'un neby je̱'e̱ wiingpu̶ ja'ay ajku̶xyu̶ñ. 4Peru̶ je̱'e̱ Dios mu̶j pa'a''ayo'on je̱'e̱ mu̶u̶du̶ch, y mu̶j xychojky xyjyu̶wu̶u̶y ajtu̶m ajku̶xy, 5ko je̱'e̱ jugy'ajtu̶ñ kipxy xymyooyu̶m ajku̶xy mu̶u̶d je̱'e̱ Cristo ko najty du'un nyajpaatu̶mnu̶ ajku̶xy neby o'ogypyu̶ju̶ñ mu̶u̶d je̱'e̱ gyu̶xpu̶ ko najty nbokymyu̶u̶d ngu̶dyeeymyu̶u̶du̶ch ajtu̶m ajku̶xy. Peru̶ mu̶u̶d je̱'e̱ Dios pya'a''ayo'on miich tu̶ miich je̱'e̱ aanu̶mu̶ ni'idzooku̶ñ mbaatku̶xy. 6Neby je̱'e̱ Dios je̱'e̱ Cristo Jesús yajjuugypyu̶jkyu̶ñ, du'un je̱'e̱ kipxy tu̶ xyajjugypyu̶jku̶m mu̶u̶d je̱'e̱ Cristo Jesús, neby jiiby tzajpjooty kipxy n'ane̱'e̱mu̶mu̶chu̶ñ ajku̶xy mu̶u̶d je̱'. 7Paady je̱'e̱ Dios du'un tuuñ neby du'un yajni'igu̶xu̶'u̶ga'añu̶ñ ma je̱'e̱ xu̶u̶ tiempo mu̶dyiibu̶ miimb ku̶daakpu̶ñ, ko mu̶j xychojku̶m xyjyu̶wu̶u̶yu̶m ajku̶xy y xypya'a''ayoowu̶m ajku̶xy Cristo Jesús kyu̶xpu̶. 8Je̱' ko je̱'e̱ Dios tu̶ xypya'a''ayoogu̶xy, paady miich je̱'e̱ m'aanu̶mu̶ ni'idzooku̶ñ tu̶ mbaatku̶xy ko je̱'e̱ Jesucristo tu̶ mmu̶bu̶jkku̶xy. Ka'p pyaadyu̶ch ko miich tii du'umbu̶ ku̶'u̶m tu̶ mduungu̶xy, tu̶ mni'ipaatku̶xy miich je̱'e̱ m'aanu̶mu̶ ni'idzooku̶ñ ko je̱'e̱ Dios tu̶ xyñi'imooygyu̶xy, 9ka'p je̱'e̱ du'un paady tu̶ mbaatku̶xy ko miich tii du'umbu̶ ku̶'u̶m tu̶ mduungu̶xy, y paadyu̶tz ka'p mu̶baad ni pu̶n ni tii ñayyajku'umayii. 10Je̱' ko je̱'e̱ Dios je̱'e̱ jembyu̶ jugy'ajt tu̶ xymyooyu̶m ajku̶xy, je̱' je̱'e̱ Cristo Jesús tu̶ xyajmu̶bu̶jku̶m ajku̶xy neby je̱'e̱ oybyu̶ tuung mu̶baad nduunu̶mu̶ñ ajku̶xy, du'un neby je̱'e̱ jékyu̶p niwinmayu̶u̶yu̶ñ.
Je̱'e̱ jootkujk'ajtu̶ñ mu̶dyiibu̶ nmu̶dajtypy ajtu̶m ajku̶xy Cristo kyu̶xpu̶
11Y du'unu̶tz miich ajku̶xy, mu̶dyiibu̶ ka'p jyudíoja'ayu̶chu̶ñ ajku̶xy, mu̶dyiibu̶ je̱'e̱ judío ja'ay tyijku̶xypyu̶ñ “je̱'e̱ ka'pu̶ tyu̶y'ajtu̶'u̶yu̶chu̶ñ ajku̶xy” (je̱'e̱ mu̶dyiibu̶ je̱'e̱ ja'ay tu̶y'ajtu̶u̶ygyu̶xpu̶ñ ma je̱'e̱ ni'kx koptu̶ñ y ñaygyu'umaayu̶gu̶xy ko “tyu̶y'ajtu̶'u̶yu̶ch ajku̶xy”), 12ja'aymye̱jtzku̶x ko je̱'e̱ tu̶u̶bu̶ xu̶u̶ tiempo ñaxy ka'p najty je̱'e̱ Cristo mmu̶bu̶jkku̶xyñu̶, ka'p najty du'un mnaybyudu̶gu̶u̶yu̶gu̶xy mu̶u̶d je̱'e̱ Israel ja'ay ajku̶xy, y ka'p najty mbadaangu̶xy je̱'e̱ mu̶dyiibu̶ je̱'e̱ Dios wyaandaaku̶ñ ma je̱'e̱ judío ja'ay ajku̶xyu̶ñ y ni je̱'e̱ mu̶dyiibu̶ yajwinwaanu̶u̶yu̶ñ ajku̶xy. Mdzu̶naay mjugy'ajtku̶xy najty ya naaxwiiñ ka'p je̱'e̱ Dios mmu̶duungu̶xy y ka'p tii ju̶jp'ijxu̶ñ ma je̱'e̱ Diosu̶ñ. 13Peru̶ jada'achám, miich tu'ugyu̶ miich myajpaatku̶xnu̶ ma je̱'e̱ Cristo Jesúsu̶ñ, je̱' ko je̱'e̱ ñe'pty te̱e̱m yojky mu̶u̶d miich kyu̶xpu̶ mboky mgu̶dyeey ajku̶xy, miich ajku̶xy mu̶dyiibu̶ najty je̱'e̱ Dios ka'p ixy'atyu̶ñ y jada'achám m'ixy'ajtnu̶py je̱' ajku̶xy. 14Cristo je̱'e̱ oy'ajt xymyooby ajtu̶m ajku̶xy. Je̱' je̱'e̱ judío ja'ay y je̱'e̱ ka'pu̶ jyudíoja'ayu̶ch tu̶ yajtu'ugmúky. Yajku̶jxy yajnajxy je̱'e̱ tzip ma'ad mu̶dyiibu̶ najty ka'p xyajnaybyudu̶gu̶u̶yu̶gu̶xy, ñaygyu̶'u̶ye̱jku̶ ku̶'u̶m ko cruutzkú̶xp yaj'o'ogu̶u̶ju̶ch. 15Y du'un je̱'e̱ Cristo je̱'e̱ Moisés y'ane̱'e̱mu̶ñ yajku'udu̶gooyu̶, je̱'e̱ mu̶dyiibu̶ ijty je̱'e̱ ku'utujku̶ñ y je̱'e̱ ane̱'e̱mu̶ñ mu̶dajtpu̶ñ; yajtu'ugmujky du'un je̱'e̱ me̱jtzpú̶kypyu̶ ja'ay ajku̶xy, je̱'e̱ judío ja'ay y je̱'e̱ ka'pu̶ jyudíoja'ayu̶ch ajku̶xy, y du'un du'un tu'ugyu̶ yajpaatku̶xnu̶ mu̶u̶d je̱'. Y du'un je̱'e̱ tzip ma'ad yajku̶jxy yajnajxy. 16Ko cruutzkú̶xp y'o'ky, du'un je̱'e̱ tzip ma'ad yajku̶jxy yajnajxy ma je̱'e̱ me̱jtzpú̶kypyu̶ ja'ay ajku̶xyu̶ñ, je̱'e̱ judío ja'ay y je̱'e̱ ka'pu̶ jyudíoja'ayu̶ch ajku̶xy, ka'pu̶ je̱'e̱ Dios mu̶dzip'ajtku̶xu̶ch y wan du'un tu'ugyu̶ yajpaatku̶xnu̶ch neby tu'kjuugy tu'kmu̶gu'ugpu̶ju̶ñ.
17Ko je̱'e̱ Cristo myiiñ, je̱'e̱ oybyu̶ ayuuk tu̶y'ajt je̱'e̱ myu̶'ooy neby je̱'e̱ oy'ajtu̶ñ nigu̶xyu̶ mbaatku̶xu̶chu̶ñ, miich ajku̶xy mu̶dyiibu̶ ka'p mjudioja'ayu̶ch ajku̶xy, je̱'e̱ mu̶dyiibu̶ je̱'e̱ Dios najty ka'p mmu̶bu̶jkku̶xyu̶ñ y miich ajku̶xy judío ja'ay, je̱'e̱ mu̶dyiibu̶ je̱'e̱ Dios najty ja'amu̶bu̶jkku̶xpu̶ñ. 18Y paady je̱'e̱ Cristo yaa y'ooy neby je̱'e̱ Dios Teedy mu̶baad tu'ugyu̶ nbaattu̶mu̶ñ ajku̶xy, judío ja'ay y ka'pu̶ jyudíoja'ayu̶ch ajku̶xy y nmu̶dajtu̶nu̶ch ajku̶xy tu'ugyu̶ je̱'e̱ Espíritu Santo. 19Paady miich du'un ka'p myajpaatku̶xnu̶ ma je̱'e̱ Diosu̶ñ neby je̱'e̱ jaybyokxyu̶ñ, ka'p miich wiing naax wiing kajpt m'adzu̶naaygyu̶xnu̶, tu'ugyu̶ miich jada'achám myajpaatku̶xnu̶ mu̶u̶d je̱'e̱ Dios jya'ay y xypyaatku̶xp miich je̱' je̱'e̱ mu̶dyiibu̶ je̱' paattu̶bu̶ñ ajku̶xy, y du'un miich jada'achám ajku̶xyu̶ñ ma je̱'e̱ Diosu̶ñ mu̶u̶d je̱'e̱ judío ja'ay ajku̶xy neby tu'kjuugy tu'kmu̶gu'ugpu̶ju̶ñ. 20Miich ajku̶xy, du'un miich ajku̶xy neby tu'ug ni'ibe̱ttu̶jk mu̶dyiibu̶ tu̶ yajpojtzu̶'u̶gyu̶ñ ma je̱'e̱ apóstolestu̶jk ñi'igú̶xp ajku̶xyu̶ñ y ma je̱'e̱ Dios y'ayuuknajtzkapxu̶u̶ybyu̶du̶jk ñi'igú̶xp ajku̶xyu̶ñ, y Jesucristo je̱' du'un ku̶'u̶m neby je̱'e̱ mu̶jtzaa mu̶dyiibu̶ je̱'e̱ ni'ibe̱ttu̶jk nigopt'ajtpu̶ñ. 21Ko tu'ugyu̶ nyajpaatu̶mu̶ch ajku̶xy mu̶u̶d je̱'e̱ Cristo, ku̶xyu̶ je̱'e̱ ni'ibe̱ttu̶jk pyu̶du̶'u̶gu̶ch myu̶jju̶'u̶wu̶ch ñi'ibe̱ttu̶'u̶wu̶ch u̶xtu̶ koonu̶ myu̶jtzapjtu̶jkkojju̶ch; tu'ug je̱'e̱ mu̶jtzajptu̶jk oybyu̶ wa'adzpu̶ y tu'ugyu̶ mu̶u̶d je̱'e̱ Windzú̶n. 22Nandu'un miich ajku̶xy ko tu'ugyu̶ myajpaatku̶xu̶ch mu̶u̶d je̱'e̱ Cristo, chi nigu̶xyu̶ mdu'ugmujkku̶xu̶ch agu̶ miich neby mu̶baad mmu̶jtzajptu̶jkojku̶xyu̶ñ ma je̱'e̱ Dios y'Espíritu chu̶na'ayu̶.
Currently Selected:
Efesios 2: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005