Hechos 4

Pedro mu̶u̶d je̱'e̱ Juan tuungmu̶u̶dpu̶du̶jk winduuy

1Pedro mu̶u̶d je̱'e̱ Juan, je̱'e̱ mayjya'ay najty je̱'e̱ myu̶dmu̶dyaakku̶xypyñu̶ ko je̱'e̱ judío teedy oy jya'tku̶xy mu̶u̶d je̱'e̱ mu̶jtzajptu̶jk kweentu̶'ajtpu̶ windzú̶n y mu̶u̶d je̱'e̱ saduceo ja'ay ajku̶xy. 2Mu̶k najty je̱'e̱ jyanchjootma'tku̶xy ko je̱'e̱ Pedro mu̶u̶d je̱'e̱ Juan je̱'e̱ mayjya'ay najty yaj'u̶xpu̶jkku̶xy y nu̶maaygyu̶xy najty ko juugypyú̶gu̶p je̱'e̱ o'ogyjya'ay ajku̶xy, je̱' ko juugypyu̶jk je̱'e̱ Jesús ko y'o'ky. 3Chi majtzku̶xy y kujaboomnu̶ pujxtu̶gooty pu̶daakku̶xy, je̱' ko najty tu̶ chu'uju̶u̶yñu̶. 4Janch nimay najty je̱'e̱ ajku̶xy, je̱'e̱ mu̶dyiibu̶ je̱'e̱ Pedro y'ayuuk najty tu̶ amdo'ijtku̶xyu̶ñ, y myu̶bu̶jkku̶x je̱'; y je̱' je̱'e̱ mu̶bu̶jkpu̶du̶jk agu̶ ya'aydyu̶jkpu̶ yajmu̶choomujky ja'awe̱e̱n kya'amu̶gooxk mílu̶ch.

5Kujaboom ñayyo'oymyujku̶gu̶xy jim Jerusalén je̱'e̱ judío windzu̶ndu̶jk ajku̶xy, je̱'e̱ amu̶jja'aydyu̶jk ajku̶xy y je̱'e̱ escribu̶ ja'ay ajku̶xy. 6Nan jim najty je̱'e̱ Anás nandu'un je̱'e̱ mu̶dyiibu̶ je̱'e̱ teedy windzu̶n'adu̶u̶ najty nigu'ubajk'ajtpu̶ñ, je̱'e̱ Caifás, je̱'e̱ Juan, je̱'e̱ Alejandro y ku̶xyu̶ je̱'e̱ teedy windzú̶n nigu'ubajk'ajtpu̶ jyuugytyu̶jk myu̶gu'ugtu̶jk ajku̶xy. 7Chi je̱'e̱ Pedro mu̶u̶d je̱'e̱ Juan woomiingu̶xy y pu̶daakku̶xy agujk ma najty tu̶ ñaymyujku̶gu̶xyu̶ñ, y chi yajtu̶u̶gu̶xy:

—¿Pu̶n je̱'e̱ mu̶k'ajtu̶ñ tu̶ xymyooygyu̶xy o pu̶n xyu̶u̶ adaa du'un mu̶u̶d mduunu̶ ajku̶xy?

8Mu̶'it je̱'e̱ Pedro, je̱' ko myu̶dajtypy najty je̱'e̱ Espíritu Santo ma je̱'e̱ jyoot wyinma'añdyu̶ñ, chi adzoogu̶xy:

—Miich kajpt windzú̶n ajku̶xy y amu̶jja'aydyu̶jk ajku̶xy: 9miich ajku̶xy je̱' u̶u̶ch miich cham xyaj'amdoogu̶xp je̱'e̱ oybyu̶ tu̶u̶bu̶ yajtúñ ma je̱'e̱ pa'amja'ayu̶ñ, y mnejwu̶'u̶waangu̶xy neby tu̶ cho'ogyu̶ñ. 10Cham u̶u̶ch nimu̶dyaakta'ay ajku̶xy ma je̱'e̱ mwinduuy miich ajku̶xyu̶ñ, wan je̱'e̱ Israel ja'ay nigu̶xyu̶ nejwu̶ydya'awu̶ch ajku̶xy, ko adayaaba ja'ay mu̶dyiibu̶ najty tekymya'adu̶ñ, cham ya yajpaady ma je̱'e̱ mwinduuy miich ajku̶xyu̶ñ oy mu̶k, mu̶u̶d je̱'e̱ Jesucristo je̱'e̱ Nazaretpu̶ xyu̶u̶ y myu̶k'ajt, je̱'e̱ mu̶dyiibu̶ miich myajcruutzpe̱jtu̶ñ ajku̶xy, je̱'e̱ mu̶dyiibu̶ je̱'e̱ Dios yajjuugypyu̶jku̶ñ ko najty tu̶ y'o'ogy. 11Je̱'e̱ Jesús du'un je̱' neby je̱'e̱ oybyu̶ tzaa mu̶dyiibu̶ miich tu̶jkkojpu̶du̶jk ka'p myajtuungu̶xyu̶ñ, peru̶ je̱' oy tu̶ wyu̶'u̶mnu̶ ma je̱'e̱ poch chonda'agyu̶ñ. 12Ka'p jii ni pu̶n mu̶dyiibu̶ je̱'e̱ n'aanu̶mu̶ mu̶baad xyajni'idzooku̶yu̶ ajtu̶m ajku̶xy. Jesucristo tu'kpajk mu̶dyiibu̶ je̱'e̱ Dios ye̱jk ma je̱'e̱ ja'ayu̶ñ ya naaxwiiñ mu̶dyiibu̶ je̱'e̱ n'aanu̶mu̶ mu̶baad xyajni'idzooku̶yu̶ ajtu̶m ajku̶xy.

13Ko je̱'e̱ tuungmu̶u̶dpu̶du̶jk du'un ijxku̶x neby je̱'e̱ Pedro mu̶u̶d je̱'e̱ Juan aamú̶k jootmú̶k kyápxku̶xyu̶ñ, y je̱' ko ñejwu̶u̶ygyu̶xypy ko ka'p y'u̶xpu̶kyjya'ayu̶ch ajku̶xy y ko yuung naaxypy jya'ay'ajtku̶xy, chi mu̶k tyajku̶xy myaaygyu̶xy, nan y'u̶xkajpku̶x ko jye̱'e̱ju̶ch ajku̶xy je̱'e̱ mu̶dyiibu̶ je̱'e̱ Jesús najty tu̶ mu̶dwu̶dijtku̶xyu̶ñ. 14Y ko najty je̱'e̱ ja'ay jyaktimyjyímu̶chpyu̶ mu̶dyiibu̶ najty tu̶ cho'ogyu̶ñ tyu̶na'ay mu̶u̶d je̱' ajku̶xy, y paady najty ka'p mu̶baad myu̶naangu̶xy ko ka'p jyaanchu̶ch. 15Chi je̱'e̱ tuungmu̶u̶dpu̶du̶jk ane̱'e̱mu̶ñ ye̱jkku̶xy ko wan yajpu̶dzu̶myii ajku̶xy ma je̱'e̱ mayjya'ay najty tu̶ ñaymyujku̶gu̶xyu̶ñ, y agu̶ je̱du̶'ajty wyu̶'u̶mu̶u̶ygyu̶xy nigapx nimu̶dyaakku̶xy je̱'e̱ Pedro mu̶u̶d je̱'e̱ Juan pyoky kyu̶dyeey ajku̶xy. 16Myu̶naangu̶xy:

—¿Ti nduunu̶mu̶py ajku̶xy mu̶u̶d adayaaba ja'ay ajku̶xy? Ku̶xyu̶ je̱'e̱ ja'ay nejwu̶u̶ydyaaygyu̶xy mu̶dyiibu̶ ya Jerusalén tzu̶naaygyu̶xpu̶ñ ko je̱'e̱ ijxpe̱jt mu̶jwinma'añbyu̶ tu̶ tuungu̶xy, y ka'p mu̶baad nmu̶naanu̶m ajku̶xy ko kya'abu̶ch. 17Ka'pu̶ adaa ayuuk du'un wya'kx'adu̶'u̶dzu̶ch, tzu̶k adzu̶gu̶u̶yu̶m ajku̶xy, ka'pu̶ je̱'e̱ Jesús xyu̶u̶ oknimu̶dyaakku̶xnu̶ch.

18Chi je̱'e̱ Pedro mu̶u̶d je̱'e̱ Juan mu̶jwoogu̶xy y nu̶maaygyu̶xy ko ka'p je̱'e̱ Jesús mu̶baad oknimu̶dyaakku̶xnu̶, y nan ka'p mu̶baad y'ok'yaj'u̶xpu̶jkku̶xnu̶ mu̶u̶d je̱'e̱ Jesús xyu̶u̶. 19Mu̶'it je̱'e̱ Pedro mu̶u̶d je̱'e̱ Juan y'adzoogu̶xy:

—Winmaaygyu̶x miich ku̶'u̶m pu̶nu̶ oy du'un ma je̱'e̱ Diosu̶ñ, ko u̶u̶ch miich jayu̶jp ngapxymyu̶doogu̶xu̶ch y ka'p je̱'e̱ Diósu̶ch. 20U̶u̶ch ajku̶xy ka'p u̶u̶ch mu̶baad amoñu̶ n'ijtku̶xy neby u̶u̶ch tu̶ n'ijx tu̶ nmu̶doogu̶xyu̶ñ.

21Mu̶'it je̱'e̱ tuungmu̶u̶dpu̶du̶jk y'adzu̶gu̶u̶yu̶gu̶xy. Ka'p mu̶winma'añbyaatku̶xy neby tzaachtyuungu̶xu̶chu̶ñ, je̱' ko ku̶xyu̶ je̱'e̱ ja'ay Dios najty ja'aymye̱jtz o'owu̶dajtku̶xy mu̶u̶d je̱'e̱ mu̶dyiibu̶ najty tu̶ tyuñ tu̶ jyadyii. 22Je̱'e̱ tekymya'atpu̶ja'ay mu̶dyiibu̶ tzooku̶ñ ko je̱'e̱ Dios mu̶jwinma'añ tuuñ, juxytyikxy ñaxy najty jyumu̶jt je̱'.

Je̱'e̱ mu̶bu̶jkpu̶du̶jk jootkujk'ajtu̶ñ y jootmu̶k'ajtu̶ñ yujkwaangu̶xy ma je̱'e̱ Diosu̶ñ

23Ko je̱'e̱ Pedro mu̶u̶d je̱'e̱ Juan yajnajtzmadzu̶u̶y ajku̶xy, chi ñú̶kxku̶xy ma je̱'e̱ myu̶gu'ugtu̶jk najty ajku̶xyu̶ñ y yajmu̶dmu̶dyaaktaaygyu̶xy ku̶xyu̶ neby je̱'e̱ teedy windzú̶n y je̱'e̱ amu̶jja'aydyu̶jk najty tu̶ ñu̶maayu̶gu̶xyu̶ñ. 24Ko du'un mu̶doogu̶xy, chi je̱'e̱ Dios nigu̶xyu̶ kipxy mu̶bu̶jktzoodu̶gu̶u̶ygyu̶xy, myu̶naangu̶xy: “Windzú̶n Dios, miich je̱'e̱ tzajp tu̶ m'oydyúñ, je̱'e̱ naaxwiimbu̶, je̱'e̱ mejy y ku̶xyu̶ tijaty ya naaxwiiñ yajpaatpu̶ñ. 25Miich mu̶u̶d je̱'e̱ m'Espíritu Santo myajkápx je̱'e̱ mduumbu̶ David, myu̶naañ:

‘¿Ti adaa naaxwiiñjya'ay ko yaaxku̶xy jyojkku̶xy?

¿Ti ko winmaaygyu̶xy mu̶dyiibu̶ ka'p y'oyu̶'u̶waanu̶gu̶xyu̶ñ?

26Je̱'e̱ naaxwiiñ ane̱'e̱mbu̶du̶jk myu̶dzibu̶u̶ygyu̶xypy je̱'e̱ Dios,

y je̱'e̱ tuungmu̶u̶dpu̶du̶jk naymyujku̶p je̱'e̱ ajku̶xy

y mu̶dzibu̶u̶ygyu̶xy je̱'e̱ windzú̶n Dios

y je̱'e̱ Cristo mu̶dyiibu̶ je̱'e̱ Dios tu̶ win'ixyu̶ñ.’

27“Jaanch je̱'e̱ ane̱'e̱mbu̶ Herodes mu̶u̶d je̱'e̱ gobernador Poncio Pilato ya ñaymyujku̶ ajku̶xy ma adayaaba kajptu̶ñ mu̶u̶d je̱'e̱ ka'pu̶ jyudíoja'ayu̶chu̶ñ ajku̶xy, y mu̶u̶d je̱'e̱ judío ja'ay ajku̶xy, mu̶dzibu̶u̶ygyu̶xy je̱'e̱ wa'adzpu̶ m'Ung Jesús mu̶dyiibu̶ najty tu̶ mwin'ixy neby je̱'e̱ Crístoju̶ñ. 28Je̱' du'un ku̶xyu̶ kuydyuungu̶x neby najty miich Windzú̶n Dios tu̶ myajnigu'udugu̶'u̶yu̶ñ ko du'un tyunu̶u̶ jyadu̶u̶ju̶ch. 29Jada'achám Windzú̶n Dios, m'ijxypy neby u̶u̶ch yu̶'u̶ tuungmu̶u̶dpu̶du̶jk xy'adzu̶gu̶u̶ygyu̶xyu̶ñ y mo'o je̱'e̱ mduumbu̶du̶jk jootmu̶k'ajtu̶ñ ajku̶xy, neby je̱'e̱ m'ayuuk mdu̶y'ajt mu̶baad aamú̶k jootmú̶k kapxwa'kxku̶xyu̶ñ, 30y mu̶u̶d miich je̱'e̱ mmu̶k'ajtu̶ñ yajtzookku̶xu̶py je̱'e̱ pa'amja'aydyu̶jk, y tyuungu̶xu̶py je̱'e̱ ijxpe̱jt y mu̶jwinma'añ ajku̶xy mu̶u̶d je̱'e̱ wa'adzpu̶ m'Ung Jesús xyu̶u̶.”

31Y ko je̱'e̱ Dios mu̶bu̶jktzoodaay ajku̶xy, chi je̱'e̱ naax chu̶yuuy ma najty nigu̶xyu̶ yajpaatku̶xyu̶ñ, y nigu̶xyu̶ je̱'e̱ Espíritu Santo y'adu̶gu̶u̶y jyoottu̶gu̶u̶yu̶ ajku̶xy, y aamú̶k jootmú̶k najty je̱'e̱ Dios y'ayuuk tyu̶y'ajt kapxwa'kxku̶xnu̶.

Je̱'e̱ mu̶bu̶jkpu̶du̶jk ku̶xyu̶ je̱'e̱ pyu̶da'agy najty nigu̶xyu̶ je̱'e̱'ajtku̶xy

32Je̱'e̱ mayjya'ay mu̶dyiibu̶ najty tu̶ mu̶bu̶jkku̶xyu̶ñ, tu'ugyu̶ najty jyoot wyinma'añ je̱'e̱ ajku̶xyu̶ñ. Ni pu̶n najty kya'amu̶na'añ ko naydyu'um tijaty je̱'e̱'áty, agu̶ du'un najty myu̶naangu̶xy ko nigu̶xyu̶ je̱'e̱'ajtku̶xy. 33Je̱'e̱ apóstolestu̶jk kyapxwa'kx'adu̶u̶tzku̶xypy najty je̱'e̱ mu̶k'ajtmu̶u̶dpu̶ tu̶y'ajt, du'un neby je̱'e̱ Windzú̶n Jesús jyuugypyu̶jkyu̶ñ ko y'o'ky. Y janch mu̶j najty je̱'e̱ Dios nigu̶xyu̶ pyube̱jt pyudu̶gu̶u̶yu̶gu̶xy. 34Ma je̱' ajku̶xyu̶ñ ka'p najty ni pu̶n, pu̶n tii yajmayjyajtpu̶ñ, je̱' ko ku̶xyu̶ tijaty najty myu̶dajtku̶xypyu̶ñ naax o tu̶jk, tyókku̶xypy je̱'e̱ najty, 35y je̱'e̱ meeñ je̱'e̱ apóstolestu̶jk najty yajku̶'u̶du̶gu̶u̶ygyu̶xypy, y je̱' najty je̱'e̱ yajwa'kxku̶xp du'uñdyu̶ pu̶njaty nidu'ug nidu'ug yajmayjyátyu̶ñ. 36Jim najty levitu̶ja'ay tu'ug mu̶u̶du̶ch ajku̶xy mu̶dyiibu̶ tuumb ma je̱'e̱ mu̶jtzajptu̶jku̶ñ, mu̶dyiibu̶ xu̶u̶'ajtpu̶ñ José, mu̶dyiibu̶ ma'axung'ajtu̶ñ ma je̱'e̱ naax mejy'agujkpu̶ mu̶dyiibu̶ xu̶u̶'ajtpu̶ñ Chipre, je̱'e̱ mu̶dyiibu̶ je̱'e̱ apóstolestu̶jk xyu̶u̶mooyu̶ñ ajku̶xy Bernabé, (je̱'e̱ mu̶dyiibu̶ wimbu̶dzu̶u̶mbu̶ñ: “Yajjootkujk'ajtpu̶”). 37Je̱'e̱ Bernabé tyok je̱'e̱ tyuundaakt mu̶dyiibu̶ najty myu̶u̶du̶ñ, y chi je̱'e̱ meeñ mu̶nu̶kxy y yajku̶'u̶du̶gu̶u̶y je̱'e̱ apóstolestu̶jk ajku̶xy.

Currently Selected:

Hechos 4: MIXE

Highlight

Copy