Hechos 5

Ananías mu̶u̶d je̱'e̱ Safira Dios mu̶duundu̶gooy ajku̶xy

1Peru̶ je̱'e̱ ja'ay ja'adu'ug mu̶dyiibu̶ xu̶u̶'ajtpu̶ñ Ananías, mu̶u̶d je̱'e̱ tyo'oxyu̶jk Safira tókku̶xy je̱'e̱ tyuundaakt tu'ug. 2Ananías kyoonwu̶'u̶m je̱'e̱ meeñ, y mu̶'it je̱'e̱ apóstolestu̶jk je̱'e̱ jakwe̱e̱nu̶bu̶ oy yajku̶'u̶du̶gu̶'u̶y, y je̱'e̱ tyo'oxyu̶jk ñejwu̶u̶by najty je̱'e̱ du'un. 3Chi je̱'e̱ Pedro nu̶maay je̱'e̱ Ananías:

—Ananías, ¿ti je̱'e̱ mu̶jku'u wyinma'añ ko tu̶ myajtuunu̶, ko je̱'e̱ y'Espíritu Santo mwin'u̶u̶na'añ y tu̶ mbugóñ je̱'e̱ meeñ neby je̱'e̱ pu̶da'agy tu̶ tzoo'adyiiju̶ñ je̱'e̱ tu̶u̶bu̶ mdoogy? 4¿Nej ka'p najty je̱'e̱ miich mduundaakt'ajtypyu̶? Y ko tu̶ mdoogy, ¿nej ka'p najty je̱'e̱ meeñ miich mje̱'e̱'ade̱e̱mbyu̶? ¿Ti ko du'un tu̶ mduundu̶góy? Dios tu̶ mwin'u̶u̶ñ, y ka'p jya'ayu̶ch.

5Ko du'un mu̶dooy, timymyu̶'ityu̶ je̱'e̱ Ananías kyu̶daay, y chi y'o'ky. Y ku̶xyu̶ pu̶njaty du'un mu̶doogu̶xu̶ñ mu̶k je̱'e̱ chu̶gu̶u̶ygyu̶xy. 6Mu̶'it je̱'e̱ tzugajy'ana'ktu̶jk nije̱' myiingu̶xy, chi je̱'e̱ Ananías ñi'kx mo'ongu̶xy y oy yajnaaxtu̶gu̶u̶ygyu̶xy.

7Kudu̶gu̶u̶g hooru̶ naxy, je̱'e̱ Ananías tyo'oxyu̶jk oy tyu̶gu̶'u̶y, y ka'p najty tii nejwu̶'u̶y tii najty tu̶ tyuñ tu̶ jyadyii mu̶u̶d je̱'e̱ ñiya'aydyu̶jk. 8Chi je̱'e̱ Pedro yajtu̶u̶wu̶:

—Awaanu̶u̶ygyu̶ch, ¿nej jaanch je̱'e̱ tuundaakt du'un tu̶ mdókku̶xy neby tu̶ mnigápxku̶xyu̶ñ?

Chi je̱'e̱ to'oxyu̶jk y'adzooy:

—Jaanch u̶u̶ch je̱'e̱ du'un tu̶ ndókku̶xy.

9Chi je̱'e̱ Pedro ñu̶maayu̶:

—¿Ti ko kipxy kyapxy tu̶ mduungu̶xy ko mwin'u̶u̶naangu̶xy je̱'e̱ Windzú̶n y'Espíritu? Chi je̱'e̱ ja'ay myiingu̶xy mu̶dyiibu̶ je̱'e̱ mniya'aydyu̶jk oy tu̶ yajnaaxtu̶gu̶u̶ygyu̶xyu̶ñ, y nan cham miich nandu'un xyajnu̶kxa'añ ajku̶xy.

10Timymyu̶'ityu̶ je̱'e̱ Safira kyu̶daay y o'ogy oy kyu̶da'agy ma je̱'e̱ Pedro tyekymyu̶jku̶ñ. Ko je̱'e̱ tzugajy'ana'ktu̶jk tyu̶gu̶u̶ygyu̶xy, chi oy paatku̶xy o'ogy, y chi yajpu̶dzu̶u̶mgu̶xy y oy yajnaaxtu̶gu̶u̶ygyu̶xy ma je̱'e̱ ñiya'aydyu̶jk ñamu̶jku̶ñ. 11Y ku̶xyu̶ je̱'e̱ mu̶bu̶jkpu̶du̶jk, y ku̶xyu̶ mu̶dyiibu̶ ijx mu̶doogu̶xu̶ñ neby najty tu̶ tyuñ tu̶ jyadyii oy mu̶k chu̶gu̶u̶ybyu̶jkku̶xy.

Ka'anaag mu̶jwinma'añ y ijxpe̱jt

12Je̱'e̱ apóstolestu̶jk tyuungu̶xypy najty je̱'e̱ ijxpe̱jt y mu̶jwinma'añ ma je̱'e̱ ja'ay ajku̶xyu̶ñ, y ku̶xyu̶ je̱'e̱ ja'ay mu̶dyiibu̶ mu̶bu̶jkku̶xpu̶ñ, jaboom jaboom najty ñayyo'oymyujku̶gu̶xy ma je̱'e̱ mu̶jtzajptu̶jk winduuy mu̶dyiibu̶ xu̶u̶'ajtpu̶ñ Salomón. 13Ka'p najty je̱'e̱ apóstolestu̶jk ni pu̶n pyuyo'oy pyunaxu̶'u̶wa'añyii ajku̶xy, peru̶ je̱'e̱ mayjya'ay mu̶dyiibu̶ je̱'e̱ Jesús mu̶bu̶jkku̶xpu̶ñ janch wingudzu̶gu̶u̶yu̶py je̱'e̱ najty ajku̶xy. 14Y mayjya'ay mu̶bu̶jkku̶x je̱'e̱ Jesús y'ayuuk tyu̶y'ajt, ya'aydyu̶jktu̶jk y to'oxyu̶jktu̶jk ajku̶xy. 15Y yajpu̶dzu̶u̶mgu̶xypy najty je̱'e̱ pa'amja'aydyu̶jk mu̶jtu'ugujk, pu̶daakku̶xy ku̶jx'aam y catru̶ku̶xp, ko naty je̱'e̱ Pedro jim ñaxu̶'u̶y ka'p jyékyu̶ch nu̶kxy je̱'e̱ y'aa'é̱pk jya'ady ma je̱'e̱ pa'amja'aydyu̶jk nidu'ugtu̶ ajku̶xyu̶ñ. 16Nandu'un je̱'e̱ mayjya'ay mu̶dyiijáty tzóngu̶xpu̶ñ ma je̱'e̱ wingonbu̶ kajptu̶ñ, myiingu̶xy najty Jerusalén, mu̶dmiingu̶xy je̱'e̱ pa'amja'aydyu̶jk y mu̶dyiijáty je̱'e̱ ka'a'óybyu̶ yaj'ayoowu̶bu̶ñ ajku̶xy, y tzooktaaby najty je̱'e̱ nigu̶xyu̶ ajku̶xy.

Pedro mu̶u̶d je̱'e̱ Juan yaj'u̶xwu̶dijt yajpawu̶dijtku̶xy

17Mu̶'it je̱'e̱ teedy windzú̶n nigu'ubajk'ajtpu̶ y mu̶dyiibu̶ je̱'e̱ saduceo y'u̶xpu̶jku̶ñ mu̶jpu̶daakku̶xpu̶ñ mu̶dyiibu̶ najty mu̶u̶d tu'ugyu̶ y'ijtku̶xyu̶ñ jyootma'ttaaygyu̶xy, y ka'p du'un yajmu̶'oy'ijxku̶xy je̱'e̱ apóstoltu̶jk, 18y chi je̱'e̱ apóstolestu̶jk majtzku̶xy y pu̶daakku̶xy ma je̱'e̱ mu̶jpujxtu̶jku̶ñ. 19Peru̶ je̱'e̱ Windzú̶n Dios y'ángel tu'ug je̱'e̱ mu̶'it koodz, yaj'awaatz je̱'e̱ pujxtu̶jk y yajpu̶dzu̶u̶mu̶ ajku̶xy; ñu̶maayu̶gu̶xy: 20“Nú̶kxku̶x ma je̱'e̱ mu̶jtzajptu̶jku̶ñ, y yajmu̶dmu̶dyaakku̶x je̱'e̱ mayjya'ay ku̶xyu̶ je̱'e̱ Jesucristo y'ayuuk tyu̶y'ajt neby je̱'e̱ jembyu̶ jugy'ajtu̶ñ mu̶baad paatku̶xyu̶ñ.” 21Ko du'un mu̶doogu̶xy, chi kujaboom jopy ñú̶kxku̶xy ma je̱'e̱ mu̶jtzajptu̶jku̶ñ y yaj'u̶xpu̶jktu̶gu̶u̶y ajku̶xy.

Chi je̱'e̱ teedy windzú̶n nigu'ubajk'ajtpu̶ y pu̶njaty najty jim myu̶u̶d, kapxyñiguejxy je̱'e̱ judío amu̶jja'aydyu̶jk ajku̶xy ko wan naymyujku̶gu̶xy ma je̱'e̱ mu̶jjúntu̶ju̶ñ, y chi je̱'e̱ apóstolestu̶jk kapxyñigue̱jxku̶xy ko wan nu̶kxy yajtzónu̶gu̶xyu̶ jiiby pujxtu̶gooty. 22Peru̶ ko je̱'e̱ policía jim jya'tku̶xy ma je̱'e̱ pujxtu̶jku̶ñ, ka'p je̱'e̱ apóstolestu̶jk paatku̶xy y chi je̱'e̱ ayuuk mu̶wimbijtku̶xnu̶, 23myu̶naangu̶xy:

—Aduky u̶u̶ch je̱'e̱ pujxtu̶jk tu̶ nbaatku̶xy, y je̱'e̱ tziptuumbu̶tu̶jk jim tu̶jk'aguuy kyweentu̶'ajtku̶xy, peru̶ ko u̶u̶ch je̱'e̱ pujxtu̶jk tu̶ nyaj'awaatzku̶xy ka'p u̶u̶ch jiiby ni pu̶n tu̶ nbaatku̶xy.

24Ko du'un mu̶dooy je̱'e̱ teedy windzú̶n nigu'ubajk'ajtpu̶, je̱'e̱ mu̶jtzajptu̶jk kweentu̶'ajtpu̶ windzú̶n y je̱'e̱ teedy windzu̶ndu̶jk, chi wyinmaaydyu̶gu̶u̶ygyu̶xy, myu̶naangu̶xy: “¿neby adaa y'okkugu̶xu̶'u̶wu̶ch?”. 25Mu̶'it je̱'e̱ ja'ay tu'ug myiiñ mu̶dyiibu̶ nu̶maayu̶ju̶ñ ajku̶xy:

—Je̱'e̱ ja'ay mu̶dyiibu̶ miich pujxtu̶gooty mbu̶daakku̶xu̶ñ, chim je̱'e̱ mayjya'ay janch yaj'u̶xpu̶jkku̶xy ma je̱'e̱ mu̶jtzajptu̶jku̶ñ.

26Chi je̱'e̱ mu̶jtzajptu̶jk kweentu̶'ajtpu̶ windzú̶n mu̶u̶d je̱'e̱ policiatu̶jk ñú̶kxku̶xy ma je̱'e̱ apóstolestu̶jk najty jya'ayyaj'u̶xpu̶jkku̶xyu̶ñ, chi majch ajku̶xy y yajnú̶kxku̶xy oyjyoot, je̱' ko najty chu̶gu̶u̶ygyu̶xy ko je̱'e̱ mayjya'ay nu̶kxy chaaga'achii ajku̶xy. 27Ko yajja'tku̶xy, chi pu̶daakku̶xy mu̶jjuntu̶jooty, chi je̱'e̱ teedy windzú̶n nigu'ubajk'ajtpu̶ je̱'e̱ apóstolestu̶jk nu̶maaygyu̶xy:

28—U̶u̶ch miich tu̶ nja'a''agapxtujkku̶xy ko ka'p mu̶baad m'ok'yaj'u̶xpu̶jkku̶xnu̶ je̱'e̱ Jesús y'u̶xpu̶jku̶ñ. ¿Y ti tu̶ mduungu̶xy? Tu̶ je̱'e̱ u̶xpu̶jku̶ñ ku̶xyu̶ myajwa'kxtaaygyu̶xy ma je̱'e̱ Jerusalén kajptu̶ñ, y u̶u̶ch miich xypyoky'ijxku̶xp ko je̱'e̱ Jesús y'o'ky.

29Chi je̱'e̱ Pedro mu̶u̶d je̱'e̱ apóstolestu̶jk y'adzoogu̶xy:

—Tzipku̶xp u̶u̶ch je̱'e̱ Dios jayu̶jp ngapxymyu̶doogu̶xu̶ch y ka'p jya'ayu̶ch. 30Je̱'e̱ Dios mu̶dyiibu̶ je̱'e̱ nmu̶j'áp nmu̶jteedy y'o'owu̶dajtu̶ñ ajku̶xy, je̱' je̱'e̱ Jesús yajjuugypyu̶jk mu̶dyiibu̶ miich cruutzkú̶xp myaj'o'kku̶xu̶ñ. 31Jada'achám je̱'e̱ Dios y'a'oy'eemby Ane̱'e̱mbu̶ y Yajni'idzookpu̶ tu̶ pyu̶da'agyii neby je̱'e̱ judío ja'ay mu̶baad jyootwimbijtku̶xyu̶ñ y yajwinmé̱kxku̶xyu̶ñ je̱'e̱ pyoky kyu̶dyeey ajku̶xy. 32Y adaa u̶u̶ch nnidu̶y'ajt'ajtypy ajku̶xy y nandu'un je̱'e̱ Espíritu Santo mu̶dyiibu̶ je̱'e̱ Dios yejkypyu̶ñ mo'oy pu̶njaty kapxymyu̶doowu̶bu̶ñ.

33Ko du'un mu̶doogu̶xy, chi jyoot'ambu̶jktaaygyu̶xy y ja'adimyaj'o'ogaañ ajku̶xy. 34Mu̶'it je̱'e̱ fariseo ja'ay tu'ug tyu̶naayu̶'ky ma je̱'e̱ tuungmu̶u̶dpu̶du̶jk ajku̶xyu̶ñ mu̶dyiibu̶ xu̶u̶'ajtpu̶ñ Gamaliel, mu̶dyiibu̶ je̱'e̱ Moisés y'ane̱'e̱mu̶ñ niwindzu̶n'ajtpu̶ñ, y mu̶dyiibu̶ je̱'e̱ mayjya'ay najty mu̶k yajmu̶j'ajtku̶xypyu̶ñ. Chi je̱'e̱ ane̱'e̱mu̶ñ yejky ko je̱'e̱ apóstolestu̶jk wan tzojku̶ yajpu̶dzu̶myii ajku̶xy jiiby tu̶ba'ay. 35Mu̶'it je̱'e̱ tuungmu̶u̶dpu̶du̶jk nu̶maay:

—Miich Israel ja'ay ajku̶xy, ix miich tii mduungu̶x mu̶u̶d adayaaba ja'ay ajku̶xy. 36Ja'aymye̱jtzku̶x ko je̱'e̱ Teudas jékyu̶p pyu̶du̶'ky, myu̶naañ ko je̱' mu̶j ku̶xp, y chi je̱'e̱ ja'ay pyanu̶kxu̶ oy nimu̶daaxk mu̶go'pxtu̶, chi je̱'e̱ romano tziptuumbu̶tu̶jk yaj'o'ku̶, y chi je̱'e̱ jya'ay ku̶xyu̶ y'ayo'oy y'anaxu̶u̶ydyaaygyu̶xy mu̶dyiijáty najty panú̶kxu̶bu̶ñ ajku̶xy, y chi du'uñyu̶ ku̶xyu̶ tyu̶gooydyaaygyu̶xy. 37Kujeky ko je̱'e̱ mayjya'ay ñakypye̱jtaay, mu̶'it je̱'e̱ Judas pyu̶du̶'ky mu̶dyiibu̶ Galilea tzombu̶ñ, mayjya'ay najty panú̶kxu̶p; peru̶ nan yaj'o'ku̶ je̱'e̱ nandu'un, y ku̶xyu̶ je̱'e̱ jya'ay y'ayo'oy y'anaxu̶u̶ygyu̶xy mu̶dyiijáty najty panú̶kxu̶bu̶ñ. 38Paady u̶u̶ch miich nu̶maaygyu̶xy, ko u̶xmajtzku̶x yu̶'u̶ apóstolestu̶jk y ka'p nej mduungu̶xy. Pu̶nu̶ kyu̶'u̶mwinma'añ myu̶wu̶dijtku̶xypy kú̶xu̶p tu̶góyu̶p je̱'e̱ mu̶naa, 39y pu̶nu̶ je̱'e̱ Dios jye̱' myu̶wu̶dijtu̶py ajku̶xy, miich ka'p mmu̶madaakku̶xu̶ch neby mu̶baad myajku'udu̶gooygyu̶xyu̶ñ. Naygyweentu̶'ajtu̶gu̶x, ka'p jékyu̶ch nu̶kxy je̱'e̱ Dios mmu̶dtziptuungu̶xy.

Y kyapxymyu̶doogu̶x je̱'e̱ Gamaliel. 40Mu̶'it je̱'e̱ apóstolestu̶jk mu̶jwoogu̶xy, chi wojpku̶xy y agapxtujkku̶xy ko ka'p mu̶baad y'ok'yaj'u̶xpu̶jkku̶xnu̶ y oknigapx oknimu̶dyaakku̶xnu̶ je̱'e̱ Jesús xyu̶u̶; mu̶'it najtzmadzu̶u̶y ajku̶xy. 41Chi je̱'e̱ apóstolestu̶jk pyu̶dzu̶u̶mgu̶xy ma je̱'e̱ tuungmu̶u̶dpu̶du̶jk winduuy ajku̶xyu̶ñ janch jootkujk, ko je̱'e̱ Dios najty du'un tu̶ a'ixu̶'u̶y ko yajtzaachtyuungu̶xu̶ch mu̶u̶d je̱'e̱ Jesús kyu̶xpu̶ xyu̶u̶. 42Jaboom jaboom najty yaj'u̶xpu̶jkku̶xy y kapxwa'kxku̶xy je̱'e̱ oybyu̶ Jesús, je̱'e̱ Cristo, y'ayuuk tyu̶y'ajt jiiby ma je̱'e̱ mu̶jtzajptu̶jku̶ñ, nan majaty je̱'e̱ tu̶jku̶ñ.

Currently Selected:

Hechos 5: MIXE

Highlight

Copy