2 Corintios 3
3
Je̱'e̱ jembyu̶ Dios kyapxytyuunu̶ñ
1Ko u̶u̶ch du'un nmu̶naangu̶xy, ¿neby mmu̶naangu̶xp miich ko u̶u̶ch ya ja'adu'ook ku̶'u̶m agu̶ u̶u̶ch nnaygyu'umaaydyu̶gu̶u̶yu̶gu̶xnu̶ba? ¿O neby nyajkápxku̶xu̶py miich ajku̶xy o nyujkwaanu̶py miich je̱'e̱ tu̶y'ajt naky ajku̶xy, neby je̱'e̱ ja'ay nije̱' y'adu̶u̶tzku̶xyu̶ñ? 2Miich du'un ku̶'u̶m ajku̶xy neby je̱'e̱ tu'kpajkpu̶ tu̶y'ajt naky je̱'e̱ mu̶dyiibu̶ u̶u̶ch nyajmayjyajtku̶xypyu̶ñ: je̱'e̱ naky mu̶dyiibu̶ jootjooty winma'añjyooty nmu̶dajtu̶mbyu̶ñ ajku̶xy, je̱'e̱ mu̶dyiibu̶ ku̶xyu̶ yajni'igu̶xu̶'kpu̶ñ ko je̱'e̱ tzu̶naay jugy'ajtu̶ñ naty tu̶ tyu̶gach ko je̱'e̱ tu̶y'ajt naty tu̶ nmu̶bu̶jku̶m ajku̶xy. 3Y je̱'e̱ Cristo du'un ku̶'u̶m yajni'igu̶xu̶'kp ko miich mdu'unu̶ch ajku̶xy neby je̱'e̱ tu̶y'ajt naky kuja'aybyu̶ju̶ñ, je̱'e̱ mu̶dyiibu̶ u̶u̶ch tu̶ ngapxwa'kxku̶xy ma miich ajku̶xyu̶ñ; je̱'e̱ naky je̱'e̱ mu̶dyiibu̶ je̱'e̱ juugypyu̶ Dios y'Espíritu tu̶ kuja'ay, y ka'p jye̱'e̱ju̶ch je̱'e̱ mu̶dyiibu̶ tiintu̶'aam tu̶ yajkuja'ayu̶ñ. Je̱'e̱ tu̶y'ajt naky miich ajku̶xy je̱'e̱ mu̶dyiibu̶ tu̶ yajkuja'ay ma je̱'e̱ ja'ay jyoot wyinma'añdyu̶ñ, y ka'p jye̱'e̱ju̶ch je̱'e̱ mu̶dyiibu̶ tzaagú̶xp yajkujaayu̶ñ.
4Nju̶jp'ijxypy u̶u̶ch ma je̱'e̱ Diosu̶ñ Cristo kyu̶xpu̶ ko u̶u̶ch je̱'e̱ Dios xypyube̱t xypyudu̶gu̶'u̶wa'añ, y nmu̶dajtypy u̶u̶ch je̱'e̱ tu̶y'ajt du'un ajku̶xy ko du'un jyaanchu̶ch neby u̶u̶ch nmu̶naangu̶xyu̶ñ. 5Ka'p u̶u̶ch nmu̶naangu̶xy ko u̶u̶ch je̱'e̱ mu̶k'ajt ku̶'u̶m n'ijxku̶xy nbaatku̶xy; ku̶xyu̶ tii u̶u̶ch mu̶baad nduungu̶xy n'ijxku̶xyu̶ñ je̱'e̱ Dios u̶u̶ch je̱'e̱ mu̶k'ajt xymyooygyu̶xp neby u̶u̶ch je̱'e̱ nduungu̶xu̶chu̶ñ, 6je̱' u̶u̶ch je̱'e̱ mu̶k'ajt tu̶ xymyooygyu̶xy neby u̶u̶ch je̱'e̱ jembyu̶ Dios y'ayuuk tyu̶y'ajt ngapxwa'kxu̶chu̶ñ ajku̶xy, ka'p jye̱'e̱ju̶ch je̱'e̱ mu̶dyiibu̶ kuja'ay miimbu̶ñ, je̱' je̱'e̱ mu̶dyiibu̶ je̱'e̱ Espíritu Santo njootjooty nwinma'añjyooty tu̶ xypyu̶daaku̶yu̶ ajtu̶m ajku̶xy. Je̱'e̱ Moisés y'ane̱'e̱mu̶ñ kuja'aybyu̶ je̱'e̱ o'ku̶ñ ye̱jkp, peru̶ je̱'e̱ juugy'ajtu̶ñ je̱'e̱ Dios y'Espíritu je̱'e̱ ye̱jkp.
7Ko je̱'e̱ Dios y'ane̱'e̱mu̶ñ jékyu̶p tzaagú̶xp kujaay, mu̶k najty je̱'e̱ jyanch'adu̶kxy jyanch'ajajy y ka'p je̱'e̱ Israel ja'ay je̱'e̱ Moisés wyiiñjyu̶jp najty mu̶baad win'ijxpe̱jtu̶ ajku̶xy, je̱' gyu̶xpu̶ ko najty mu̶k jyanch'ajajy. Peru̶ oy je̱'e̱ du'umbu̶ ane̱'e̱mu̶ñ najty jya'a''adú̶kxy jya'a''ajajy ni'igu̶ ku'udu̶goyaamb je̱'e̱ najty. Peru̶ pu̶nu̶ miin je̱'e̱ ane̱'e̱mu̶ñ je̱'e̱ mu̶dyiibu̶ je̱'e̱ o'ku̶ñ ye̱jkpu̶ñ mu̶u̶d je̱'e̱ Dios y'oy'ajtu̶ñ. 8¡Ni'igu̶ mu̶j je̱'e̱ oy'ajtu̶ñ ni'igyu̶ mu̶miiñ je̱'e̱ mu̶dyiibu̶ je̱'e̱ jembyu̶ Dios kyapxytyuunu̶ñ nigapxp nimu̶dyaakpu̶ñ, je̱'e̱ mu̶dyiibu̶ je̱'e̱ Espíritu Santo yejkypyu̶ñ! 9Je̱' u̶u̶ch du'un ndijpy, pu̶nu̶ mu̶j je̱'e̱ ane̱'e̱mu̶ñ Dios y'oy'ajtu̶ñ mu̶miinu̶, je̱'e̱ ane̱'e̱mu̶ñ mu̶dyiibu̶ je̱'e̱ o'ku̶ñ ye̱jkp ma u̶u̶ch ajtu̶m ajku̶xyu̶ñ, ¡ni'igu̶ mu̶j je̱'e̱ oy'ajtu̶ñ ni'igyu̶ mu̶u̶du̶ch je̱'e̱ jembyu̶ y'ane̱'e̱mu̶ñ je̱'e̱ mu̶dyiibu̶ nigapxp nimu̶dyaakpu̶ñ ko je̱'e̱ Dios xyajpokyñi'iwaatzu̶m ajku̶xy! 10Je̱' ko ka'p je̱'e̱ jékyu̶p ane̱'e̱mu̶ñ y'oy'ajt je̱'e̱ jembyu̶ Dios y'ayuuk tyu̶y'ajt mu̶baattu̶, ni'igyu̶ je̱'e̱ jembyu̶ Dios y'ayuuk tyu̶y'ajt oy'ajt mu̶u̶du̶ch. 11Y pu̶nu̶ myu̶dajt je̱'e̱ oy'ajtu̶ñ, je̱'e̱ ane̱'e̱mu̶ñ mu̶dyiibu̶ najty ni'igyu̶ ku'udu̶goyaambu̶ñ, ni'igyu̶ oy'ajtu̶ñ je̱'e̱ mu̶u̶du̶ch je̱'e̱ jembyu̶ Dios y'ayuuk tyu̶y'ajt je̱'e̱ mu̶dyiibu̶ wiinu̶u̶xu̶u̶ ijtu̶u̶bu̶ñ.
12Je̱' ko nju̶jp'ijxypy je̱'e̱ oy'ajt ajtu̶m ajku̶xy je̱'e̱ mu̶dyiibu̶ je̱'e̱ Dios xymyo'owaanu̶mbu̶ñ ajku̶xy mu̶u̶d je̱'e̱ jembyu̶ y'ayuuk tyu̶y'ajt, y paady u̶u̶ch je̱'e̱ y'ayuuk tyu̶y'ajt amu̶j jootmu̶j ngapxwa'kxu̶ ajku̶xy y ka'p u̶u̶ch maa ndzu̶gu̶u̶y nju̶wu̶u̶ygyu̶xy. 13U̶u̶ch ka'p u̶u̶ch du'un n'adu̶u̶tzku̶xy neby je̱'e̱ Moisés y'adu̶u̶chu̶ñ ñayyajwingube̱'e̱nu̶'u̶yii je̱'e̱ wit ma je̱'e̱ wyiiñjyu̶jpu̶ñ, ka'pu̶ je̱'e̱ Israel ja'ay y'ixu̶u̶ju̶ch neby je̱'e̱ Dios y'oy'ajtu̶ñ najty tyu̶goyu̶ñ ma je̱' wyiiñjyu̶jpu̶ñ. 14Peru̶ ka'p je̱'e̱ Israel ja'ay du'un winju̶wu̶u̶ygyu̶xy tii je̱'e̱ Dios najty du'un tyuumby mu̶u̶d je̱'e̱ Moisés, y ni chamnu̶baad du'un ka'awinju̶wu̶u̶ygyu̶xyñu̶. Y ko je̱'e̱ jeky ane̱'e̱mu̶ñ kápxku̶xy je̱'e̱ mu̶dyiibu̶ je̱'e̱ Moisés kyujaayu̶ñ, je̱' je̱'e̱ du'un yaj'ijtu̶gu̶xp neby wingube̱'e̱nu̶'u̶ybyu̶ju̶ñ ka'pu̶ winju̶wu̶u̶ygyu̶xu̶ch, je̱' ko ka'p je̱'e̱ wit yajmu̶najxku̶xyñu̶ je̱'e̱ mu̶dyiibu̶ du'un mu̶dajtu̶gu̶xpu̶ñ neby wingube̱'e̱nu̶'u̶ybyu̶ju̶ñ, y mu̶'itnu̶ je̱'e̱ du'umbu̶ wit myu̶náku̶chñu̶ ma je̱'e̱ wyiiñjyu̶jp ajku̶xyu̶ñ ko je̱'e̱ Cristo mu̶bu̶jkku̶xu̶ch. 15U̶xtu̶ chamnu̶baad ko je̱'e̱ Moisés ñaky kapxu̶ ajku̶xy, ka'p je̱'e̱ Moisés ñaky winju̶wu̶u̶yu̶ ajku̶xy, je̱' ko je̱' je̱'e̱ jyoot wyinma'añ du'un adujkku̶xu̶p ajku̶xy neby je̱'e̱ wit tii adu̶u̶ydyúkyu̶ñ. 16Peru̶ ko je̱'e̱ ja'ay tu'ug jyootwimbíty ma je̱'e̱ Windzú̶n Jesucrístoju̶ñ, mu̶'it je̱'e̱ wit myu̶najknu̶ je̱'e̱ mu̶dyiibu̶ je̱'e̱ ayuuk tu̶y'ajt ka'ayajwinju̶wu̶u̶yu̶bu̶ñ. 17Je̱'e̱ Windzú̶n Jesucristo je̱' je̱'e̱ Dios y'Espíritu mu̶dajtu̶yu̶py; y ma je̱'e̱ Dios y'Espíritu yajpaadyu̶ñ, ka'p je̱'e̱ jeky ane̱'e̱mu̶ñ jim y'ok'ane̱'e̱mnu̶, tu̶ je̱'e̱ y'awa'adzpu̶dzu̶u̶mgu̶xnu̶. 18Paady u̶u̶ch nigu̶xyu̶, du'un ajtu̶m ajku̶xy neby tu'ug ijxk ma je̱'e̱ nWindzú̶n Jesucristo y'oy'ajtu̶ñ n'ijxu̶yu̶ ajtu̶m ajku̶xy, y ka'p du'un n'ok'ijtu̶nu̶ ajku̶xy neby je̱'e̱ winkube̱'e̱nu̶'u̶byu̶ju̶ñ; y du'un du'un n'awimbijt'adu̶u̶tzu̶m ajku̶xy neby je̱'e̱ju̶ñ, je̱' ko ni'igyu̶ je̱'e̱ y'oy'ajt n'ijx'adu̶u̶tz nbaat'adu̶u̶tzu̶yu̶ ajtu̶m ajku̶xy, je̱' ko je̱'e̱ Windzú̶n Jesucristo y'Espíritu xypyube̱jt xypyudu̶gu̶u̶yu̶m ajku̶xy.
Currently Selected:
2 Corintios 3: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005
