মার্ক 3
3
আলাক আসং লুঃউচা কেইংমালিরি
(মথি ১২:৯-১৪; লূক ৬:১১)
1য়াংনক যীশু প্রেংরো তাঃরা চেঃরেতু লাঃলিইরি। য়াংদেমা লুঃউ তয়ক হিকলিরি, যাসুমা আলাক তাফাক আসং। 2ফরীশীরোগা লৈগায়ক যীশুগো আপ্রই ক্যাফু কিজু আপ্রই হ্রাগেলিরি। সাদাং রাকমা যীশু থুঃউঃ লুঃউগো কেইংমাজিরি লঃ, য়াংচাগো ক্রিফু কিজু, ফরীশীরোচা যীশু আপমা কংগং আহ্লাপা প্যাংরো ম্যাকচি খ্যাগেলিরি। 3যীশু থুঃউঃ আলাক আসিই লুঃউগো প্রলিরি, “আলুংসুউ হ্রিঃগা লাঃরো রেঃ।”
4য়াংনক যীশু ফরীশীরোগু মিংলিরি, “সাদাং রাকমা আকং অলুককো লুকসাংতি লঃ, মুহুকিলি মকংগোরা লুকসাংতি লঃ? আসাককো কিছিসাং লঃ, মুহুকি সেঃ সাং লঃ?”
ফরীশীরোচা তুখুউলি আফ্রিঃ মিপিইগেলিই। 5য়াংখা যীশু চিই নকরো, ফরীশীরোগু ক্রিলিরি অর য়াংসুউরোমা চিইঞই কেইংরি কিজু কংগং চিইদানা দুখাওয়া রাঃরো, য়াং আলাক আসিই লুঃউগো প্রলিরি, “নাক আলাক ছেং।”
য়াং লুঃউচা আলাক ছেংব্রিনক, য়াংসুউ আলাকচা আহ্লাপা প্যাংরো কেইংমালিরি। 6য়াংখা ফরীশীরোচা প্রাংদুঃ লাঃখাগেতি অর যা পুয়েং প্যাংরো যীশুগো সেঃনৈংফুলি, য়াং আক্রংলিলাগো য়ুউরো মাং হেরোদ আফুয়িইমা লুঃউরোনা আতৈংবাং প্যাংগেলিরি।
আস্যাং যীশু নক্কা নক্কা লুঃউ আপংরো
7-8য়াং নক যীশু য়াংসুউ তিবিরোনা ম্রঃনাদুঃ লাঃখারি। গালীল প্রিনিগা লুঃউম্যারোচা যীশু নক্কা নক্কা লৈকেতি। যীশু যা অলুকরোগু লুকলিইরিলি, য়াংচারোগু ক্রারো যিহুদিয়া, যিরূশালেং, ইদোম, যর্দন খ্যং থুঃউগাব্রাক দিগ্রাব্রাক অর সোরনা সীদোন ম্রু লিফাক লাকচিগা লুঃউম্যারোচা যীশুবাদুঃ লাঃগেলিইরি। 9যীশু কো কিজু লংশ্যি তাজাং য়াংরো থাঃ ছুরো তিবিরোগু প্রলিইরি, আক্রংগা লুঃউ ম্যারি আতুওয়ক তয়ককো তয়ক তুঃগেরো, যীশু আপমা মাক্যারাঅং। 10যীশু লুঃউম্যারোগু কেইংমাজিলিরি কিজু, সানাসিরোচা যীশুগো ম্হেংফুকিজু তয়ককো তয়ক তুঃগেলিরি।
11মকং ওয়িঞেংরো যাখা যীশুগো ম্রাংরি, য়াংখা যীশু হ্রিইগা কাঃবামা ওয়েরো অঃরো প্রগেতি, “কোবাংচা থাওরা ফুরা ঈ সাঃ।” 12য়িগিলি যীশু কংগং কেগেং প্যাংরো, মকং ওয়িঞেংরোগু আঃনা পিইচাগা, য়াংসুউরো তয়ককোলি মঃপ্রগি, যীশু যাসুলি।
তিছিনৈয়ক তিবিগু তেমেংদ আঃরাগু পিইখ্রাং
(মথি ১০:১-৪; লূক ৬:১২-১৬)
13-15য়াংনক যীশু তং আথাকতু তাকলিরি অর কো চিইতগ্রঃ, লৈংগায়ক লুঃউগো কোবাদুঃ খলৈতি। য়াংসুউরো যীশুবাদুঃ লাঃব্রিনক যীশু তিছিনৈয়ককো তেমেংদ আঃরাগো পিইলিরি, যাফুলিছুগি য়াংসুউরো যীশুনা আতু আতু নিঅং অর মকং ওয়িঞেংগো নাআং থুঃউনৈঅং ক্ষেমতাগো পিইরো, য়াংসুউরোগু তাঃরা হঃফু রুওয়েনৈঅং। 16যা তিছিহ্নয়ককো যীশু তেমেংদ লুকলিইরি, য়াংসুউরোচা ফ্রইতি, শিমোন-যাসুগো যীশু নাঃমি মিয়িলিরি পিতর; 17সিদদিয়মা সাঃ হ্নয়ক যাকোবনা যোহন (দিঃসুরোগু নাঃমি মিহিকলিইরি বোয়ানেরগিস, প্রফুছুগি মুগ্রুনেঃসাঃ); 18আন্দ্রিয়, ফিলিপ, বর্থলয়, মথি, থোমা, আলফেয়ের সাঃ যাকোব, থদ্দেয়, জেকো খ্যসু শিমোন, 19অর যিহূদা ইষ্কারিয়ৎ, যাসুউ যীশুগো রেংসুরো আলাকমা তিপিইলৈতি।
আস্যাং যীশুনা মকং ওয়িইঞেংরোমা মাং
(মথি ১২:২২-৩২,৪৬-৫০; লূক ৮:১৯-২১; ১১:১৪-২৩; ১২:১০)
20যীশু ইংদুঃ লাঃব্রিনক প্রেংরো কংগং লুঃউম্যা যীশুবাদুঃ লাঃগেতি, য়াংচাকিজু যীশুনা তিবিরোচা তুখুউলি চাঃফু আখিং মাঃরাগেলি। 21যীশু লুঃউরো দিঃ সাদাংগো ক্রারো, যীশুগো য়ুজং লাঃফু আওয়ক লাঃগেলিরি। য়াংসুউরো প্রগেলিরি, “যীশু রুপাহাব্যা।”
22যিরুশালেংগা যা কেইং ছারারো, লাঃগেলিরি য়াংসুউরো প্রগেলিরি, “য়াংসুউগো বেলসবূলে কৈংরি। মকং ওয়িঞেংরোমা মাং আকোউনা, দিঃ লুঃউ মকং ওয়িঞেংগো ঙাং থুঃউতি।”
23যীশু য়াং কেইংছারারোগু খঃলিইরি অর সুয়েংসাং পিইফু কিজু প্রলিরি, “আপ্যাক লুঃউ, যাপুয়েং প্যাংরো আপ্যাক লুঃউগো লঅ রুওয়েনৈফুলি? 24তুখু মাং আঃরা কোরো খ্যাং খ্যাং কুয়িরো লাঃগি, য়াং মাং আঃরাচা মিম্রিব্যা। 25অর তুখু ইংথং কুয়িরো লাঃরিছুগি, য়াং ইংথংচালি মিম্রিব্যা। 26য়াংচানা আতু আপ্যাক লুঃউলি কোদৈংগো য়ুউরো ছেংগ্যাংফাক লুঃউকরো, কো গুংদগো প্যাংতিছুগি, য়াংসুউলি মিম্রিনৈং অর য়াংদেমা য়াংসুউ ছুং লাঃরিব্যা। 27দিঃ চাঃগা ম্হেংরিচাগা, ইংস্যাং তয়ককো পাথামা খ্যয়েং মাঃথাব্রি, য়াংসুউ ইংদুঃ ওয়ংরো, য়াংসুউ ওয়েংছেংগো তয়কলি মুয়ুউনৈং। য়াংসুউগো খ্যয়েংব্রি নকরা, য়াংসুউ ইংথংগো য়ুনৈংরি। 28ঙা কোবাংরোগু আম্হেং প্ররি, লুঃউরোমা হিচা আলুং আপ্রই অর থাওরা ফুরাগো য়ুউরো ছেংগ্যাংফাক প্রচা চাঃগাগো খুওয়ং রুওয়েমি, 29ছুগি সেংস্যাংস ওয়িঞেংগো ছেংগ্যাংফাক লুঃউকরো ঞ্যচি চাঃগাগো তাখালি খুওয়ং মুরুওয়ে। য়াং আপ্রইচা তাসাকপেলুং হিকফু।”
30কেইং ছারারো প্রগেলিরি মুহু লঃ, “য়াংসুউগো নেঃছু কৈংরি,” য়াংসুউরো য়াং চাঃগা প্ররিকিজু যীশু দিঃ চাঃগারোগু প্রলিইরি।
31য়াংনক যীশু ঞিংনা মিখাংচা য়াংদুঃ লাঃগেলিরি অর প্রাংগা রেঃ নিংরো, যীশুগো খঃফু রুওয়েলৈতি। 32যীশু লিফাক লাকচি য়াংখা লুঃউম্যা থৈংরো হিকগেলিইরি। য়াংসুউরো যীশুগো প্রগেলিরি, “কোবাং মিখাংনা ঞিংরো কোবাংগো হ্রাগেতি।”
33যীশু প্রলিইরি, “যাসুউলি ঙা মিখাং অর যাসুরোলি ঙা ঞিং?”
34যাসুরো যীশুগো ওয়েংরো থৈং হিইগেলিরি, য়াংসুউরোগু ক্রিরো প্রলিইরি, “দিঃসুরোরা ঙা মিখাংনা ঞিংরো! 35থাওরা ফুরা ঈ ছেংদাগো যাসুরো রুসিইরি, য়াংসুউরোরা ঙাক ঞিং, ঞিংমানা মিখাং।”
Currently Selected:
মার্ক 3: BBSRMZ
Highlight
Share
Copy
Want to have your highlights saved across all your devices? Sign up or sign in
