মার্ক 2
2
আখ্রিই আলাক আসিই সানাসিচা কেইংমালিইরি
1লৈগারাক নক যীশু প্রেংরো কফরনাহুমদুঃ লাঃলিইরি। লুঃউ ক্রাগেলিরি যীশুচা ইংমা হিকরি। 2য়াংখা লুঃউ প্রিরি-মিপ্রিরিচাগা, ইংগো থাঃফি, প্রাংগা লেংখাওয়ামাবাং আঃরামিহিলিইব্যা। যীশু লুঃউরোবামা থাওরা ফুরা ঈ তাঃরাগো হঃ প্রালিইরি। 3য়াং আখিংমা লিঃয়ক লুঃউচা আখ্রিই আলাক আসিই সানাসি তয়ককো যীশুবাদুঃ য়ুউ লাঃগেতি। লুঃউ লিঃয়ক রুঅক য়ুউখাগেতি, 4য়িগিলি লুঃউ মেছেং কিজু য়াংসুউরো যীশুবাদুঃ লাঃফু মনৈংগেলি। য়জংকিজু যীশু যামা হিকলিরি, হিকচা তিঃদিই, ইংখংগো তেঃকে ফুঅংগেলিরি। য়াংনক য়াং ফুঅংচা আপককা আখাংনা আতুই, থুঃউ সানাসিগো অকতো খ্যালৈইকেতি। 5যীশু য়াংসুউরো ক্যুংচাগো ম্রাংরো, য়াং সানাসিগো প্রলিইরি, “নাক আপ্রইকো খুওয়ং রুওয়েলৈব্যা।”
6য়াংদেমা লৈংগায়ক ক্যাইংপ্রু ছারা থৈংরো হিকলিইরি। য়াংসুউরো চিইমা চিইমা তুওয়ককেলিইরি, 7“দিঃ লুঃউ দিঃপুয়েং চাঃগা যাফু প্ররিলি? য়াংসুউগা থাওরা ফুরাগো সিরিই ফ্যাকতি। থাওরা ফুরা মুহুকপ্রি অর যাসুলি আপ্রইকো খুওয়ং রুওয়েনৈংরি?”
8ক্যাইংপ্রু ছারারো চিইমা তুওয়ককেচা চাঃগাগো, খ্যাংখ্যাং যীশুচা কোঃ চিই নুনুংগা সিকলিইরি। য়জংকিজু যীশু য়াংসুউরোগু প্রলিরি, “কোবাংরো চিইমা চিইমা যাফু য়াং চাঃগাগো তুওয়ককেতিলি? 9দিঃ সানাসিগো যা প্রচা ল্যুয়িফুলি- ‘নাক আপ্রইকো খুঅং রুওয়েলৈইব্যা,’ মুহুকি, ‘থাঃ, নাক আখাংগো ককরো, থাঃরো লিঃ’? 10য়িগিলি কোবাংরো সিঅং, দিঃ কাবামা আপ্রইকো খুঅং রুওয়েনৈংরি ক্ষেমতা মনুসাওয়া সাঃমালি হিকরি”- দিঃল্হক চাঃগা প্ররো যীশু য়াং সানাসিগো প্রলিরি, 11“ঙা নাককো প্ররি, থাঃ, নাক আখাং কক য়ুউরো ইংদো লাঃলিই।”
12খ্যাং খ্যাং য়াং লুঃউচা থাঃরো, কোঃ আখাংগো ককরো, আলুংসুউ হ্রিইথাকমা প্রাংদুঃ থুওয়ক লাঃলিইরি। য়াংচাগো ম্রাংরো আলুংসুউ এংঅরো থাওরা ফোরাগো খিম্যুয়েংরো প্রগেলিইরি, “ঙারো দিঃপুয়েং তাখালি মাম্রাংসিই।”
আস্যাং যীশু লেবিগো খঃলিইরি
13নক্কা যীশু প্রেংরো গালীল ম্রঃনাদুঃ লাঃলিইরি। য়াংখা লুঃউম্যারোচা যীশুবাদুঃ লাঃগেলিইরি, অর যীশু য়াংসুউরোগু সুয়েংসাং পিইলিইরি। 14য়াংনক যীশু লেংমা লাঃখা অালফেয় সাঃ লেবিগো ফেংদা ককচা ইংমা থৈংরো ম্রাংলিইরি। যীশু য়াংসুউগো প্রলিইরি, “লাঃ, ঙামা তিবি ফ্রইখিলি।” য়াংখা লেবি থাঃরো যীশু নক্কা লৈলিরি।
15নক্কা যীশু লেবিরো ইংমা চাঃফু থৈংলিরি। য়াংখা ফেংদা ককসা লুঃউম্যারোনা মকং লুঃউরোলি, যীশু অর তিবিরোনা আতু চাআফু থৈংগেলিরি, আক্রংগা লুঃউম্যাচা যীশু নক্কা নক্কা লৈইকেতি। 16ফরীশী আফুয়িইমা ক্যাইংপ্রু ছারারো যাখা যীশু ফেংদা ককসারোনা মকং লুঃউরোনা আতু চাআচাগো ম্রাংলিরি, য়াংখা য়াংসুউরো যীশু তিবিরোগু প্রগেলিরি, “য়াংসুউ ফেংদা ককসারোনা মকং লুঃউনা আতু যাফু চাআরি-সকতিলি?”
17দিঃ চাঃগা ক্রারো যীশু, য়াং ক্যাইংপ্রু ছারারোগু প্রলিরি, “কেইংমারি লুঃউরো কিজু ছিইসামা মুলুঃউ, প্রফুছুগি মেকেইংমা লুঃউরো কিজুরা অলু হিকরি। ঙা সুদগং লুঃউরোগু খঃফু মাঃলা, প্রফুছুগি আপ্রইসিরোগোরা খঃফু লাঃচা।”
সাদাং রাককো য়ুউরো সুয়েংসাং পিঃচা
(মথি ৯:১৪-১৭; লূক ৫:৩৩-৩৯)
18তখকখা রিঃঙুক মাঙ্গালা পিইসা যোহন তিবিরোনা ফরীশী তিবিরো সাদাং সুংগেলিরি। য়াংচাগো লৈংগায়ক লুঃউ ম্রাংরো, যীশুবাদুঃ লাঃরো প্রগেলিরি, “যোহন তিবিরোনা ফরীশী তিবিরো সাদাং সুংগেতি, ছুগি কোবাং তিবিরোগা সাদাং মুসুংগে?”
19যীশু য়াংসুউরোগু প্রলিইরি, “সামাক লং হিয়াকপাং, সামাক লংনা লুঃউরো যাফু সাদাং সুংরাফুলি? মন্হরাক তৈঅং সামাক লংনা হিকরি, য়াল্হকরাক তৈঅং সাদাং মুসুংরা। 20য়িগিলি রাক লারি, যাখা য়াংসুউরোগা সামাক লংগো য়ুউ লাঃফুলি, অর য়াং আখিংমারা য়াংসুউরো সাদাং সুংরাফু।”
21“তয়কলি আওয়ে আসৈইমা, অহং আওয়েকো মাঃফা। ফারিরাছুগি, য়াং আওয়ে অহংগা আসৈই আওয়েচা চুক লাঃরি। য়াংখা থুঃউ আচুকচা অর আম্যা কিয়িলারি। 22অহং সিঃরি ওয়িইমা তয়কলি, আঃস চব্যরিগো মাঃথা। থাগিনা, য়াংখা চব্যরি আঃস কিজু ওয়িইচা পুঅংলারো আঃরিনা ওয়িই নৈখুকচুং প্যাকলারি। আঃস চব্যরিগো, আঃস ওয়িইমা থাঃরারি।”
সাদাং রাককো য়ুউরো সুয়েংসাং পিইচা
(মথি ১২:১-৮; লূক ৬:১-৫)
23তারাক সাদাং রাকনি যীশু খ্রেংনাগা লাঃরি। য়াংসুউ তিবিরোচা লাঃরো লাঃরো আঞই খ্যুওগেলিরি। 24য়াংচাগো ম্রাংরো ফরীশীরোচা যীশুগো প্রগেলিরি, “বাঃসা থুঃউংজৈং আলই সাদাং রাকমা যাচাগো মুলুকরালি, য়াংসুউরো য়াংচাগো যাফু লুককেতিলি?”
25-26যীশু য়াংসুউরোগু প্রলিইরি, “অবিয়াথর যাখা মাহা ফুংগ্রি হিকলিরি, য়াং আখিংমা দায়ুদনা য়াংসুউ মিছুয়িইরো তখকখা ম্যুয়েকেলিরি, ছুগি য়াংসুউরোমা তুখুউলি আঃচা আঃসক মিহিকলি। য়াংখা দায়ুদ যা লুকলিরিলি, য়াংচাগো কোবাংরো তাখালি মেফেলি লঃ? দায়ুদগা থাওরা ফুরা ঈ ক্যংদুঃ ওয়ংরো ফুরাগো তাংচা ভংমুংগো চাঃলিরি অর কুঃ মিছুয়িরোগুলি পিইলিরি। ছুগি থুংজৈংমা হিকলিইরিগা য়াং মুংগো ফুংগ্রিই আপি তয়কলি মাঃচানৈং।”
27যীশু য়াংসুউরোগু অরলি প্রলিরি, “লুঃউ কিজুরা সাদাং রাক ফ্রইচা, ছুগি সাদাং রাক কিজু লুঃউ তিম্রিজচা মুহুক। 28য়জংকিজু মনুসাওয়া লুঃউচা সাদাং রাকমা আস্যাং ফ্রইতি।”
Currently Selected:
মার্ক 2: BBSRMZ
Highlight
Share
Copy
Want to have your highlights saved across all your devices? Sign up or sign in
