যোহন 21
21
আস্যাং যীশু খনঃয়ক তিবিগু আম্রাং পিলিরি।
1য়াং নক তিবিরিয়া ম্রঃনামা তিবিরোবামা যীশু প্রেংরো প্রালিইরি। প্রাসানা দিঃপুয়েং ফ্রইলিরি:
2শিমোন-পিতর, থোমা(যাসুগো মুঃরুওয়া প্রগেতি) গালীল প্রিনিমা কান্না রুওয়ামা নথনেল, সিবদিয়মা সাঃরো অর যীশু আখ্রা তিবি নৈয়ক তেরেতৈংমা হিকগেলিইরি। 3শিমোন-পিতর য়াংসুউরোগু প্রলিরি, “ঙা ঙাঃআ ফেংজং লাঃরি।”
য়াংসুউরো প্রগেলিরি, “ঙারোলি নাংনা লাঃফু।” য়াংখা য়াংসুউরো থুঃওয়করো লংমা তাক্কেরি, ছুগি য়াং ঞিনি তুখুউলি ফেংফু মাঃরাগেলি।
4মুঃ লাংখিংখা যীশু ম্রঃ কাইংনাঃমা লাঃরো রেঃলিরি। ছুগি তিবিরো মিঃসিগেলিচাগা, দিঃ লুঃউচা যীশু লুঃউ। 5য়াংসুউ তিবিরোগু প্রলিরি, “সাঃরো, তুখুউলি মাঃরাগেলি লঃ?”
য়াংসুউরো প্রগেলিরি, “অহৈ, মাঃরাগেলি।”
6যীশু য়াংসুউরোগু প্রলিরি, “লং ঞাফাকক দুঃ কুয়েং বঃ, রাঃমি।” য়াংখা য়াংসুউরো কুয়েং বঃকেলিরি, অর প্রফুমিহিক ঙাঃআ রাঃরি, য়াংসুউরো য়াংচাগো ঙাং মাতাংনৈলিগে।
7যীশু যা তিবিগু খ্যতিলি, য়াং তিবি পিতরগো প্রলিরি, “দিঃ লুঃউচা আস্যাং।” য়াং আখিংমা শিমোন-পিতর কাইংথামা আওয়ে মিহিলি। ছুগি যাখা য়াংসুউ ক্রালিরি, “দিঃ লুঃউচা আস্যাং।” য়াংখা কাইংথামা আওয়ে রঃরো ম্রঃমা ছাংলিরি। 8য়াংসুউরো কেইংগা আম্যা আওয়ি মিহিলি। আম্যাছুগি লাকতং নৈরালক হিকলিরিব্যা। য়াংচাকিজু আখ্রা তিবিরোচা ঙা আব্রি কুওয়েংগু লংমা ঙাং তাংরো কেইংনাদু লাঃগেলিরি।
9কাইংনাঃমা সাকরো য়াংসুউরো মুসুয়িই মিং অর য়াং মিং আঃপমা ঙাআ ম্রাংগেলিরি; য়াংমা ভংমুঃলি হিকলিরি। 10য়াংখা যীশু য়াংসুউরোগু প্রলিইরি, “অাগু যা ঙ্হা রাগেরি, য়াংচাগা লৈগং য়ুউখা।” 11শিমোন-পিতর লংদু লাঃরো কুয়েংগু ঙাংরো কেইংনাদু য়ুখালিরি। তাঃরা ঙাছি সুংগং আগ্রি ঙাআ কুয়েংমা আব্রি হিকলিরি। ছুগি আম্যা ঙা হিলিগিলি, কুয়েংচা মুচুকলি। 12যীশু য়াংসুউরোগু প্রলিরি, “লাঃগে, চাঃগে।” তিবিরো আতুওয়ংমা তয়কমালি চিঃ খেংরো মিংফু মানৈলিচাগা, “কুঃবাং যাসুলি?” আক্রংগা য়াংসুউরো সিলিরি, দিঃসুচা আস্যাং। 13নক্কা যীশু লাঃরো ভংমুঃগো য়ুউরো য়াংসুউরোগু পিলিরি, অর য়াং ঙাআগোলি পিলিরি।
14আঃসিগা হ্রাং থারিনক যীশু তিবিরোগু দিঃনা পংরো সুংখক আম্রাং পিলিরি।
আস্যাং যীশু পিতরগো আঃনা পিচা
15য়াংসুউরো চাব্রিনক যীশু শিমোন- পিতরগো প্রলিরি, “যোহনমা সাঃ শিমোন, য়াংসুউরো আখ্যথাক আম্যা ঙাগো খ্যতিলঃ?”
শিমোন- পিতর য়াংসুউগো প্রলিরি, “ঈং, আস্যাং, কুঃবাং সিরিলঃ, কুঃবাং ঙামা মঃনক তয়ং সাঃয়াসুলি।”
যীশু য়াংসুউগো প্রলিরি, “ঙা আঃস্যি সাংফ ছুয়িরোগু ক্যং।”
16যীশু নৈক্রিংম্রকরো য়াংসুউগো প্রলিরি, “যোহনমা সাঃ শিমোন, নাং ঙাগো খ্যতিলঃ?”
পিতর য়াংসুউগো প্রলিরি, “ঈং, আস্যাং। কুবাংগা সিঃরি, কুঃবাং ঙামা মঃনক তয়ং খ্যসুলি।”
যীশু য়াংসুউগো প্রলিরি, “ঙা সাংফঃছুয়িরোগু ম্যুঈজে।”
17য়াংনক সুংগ্রিংম্রকরো প্রলিরি, “যোহনমা সাঃ শিমোন, অামেং নাং ঙাগো খ্যতিল?”
পিতর এখক চিঃ ঞ্যলিরি আক্রংগা যীশু য়াংসুউগো সুংখক চিঃঅং মিংলিরি, “ঙাগো আম্হেং নাং খ্যতিলঃ?” য়াংচাকিজু পিতর যীশুগো প্রলিরি, “আস্যাং, কুঃবাং আলুংচা সিঃরি। কুঃবাং সিঃরিচাগা, কুঃবাং ঙামা কংগং খ্যসু।”
যীশু য়াংসুউগো প্রলিরি, “ঙা সাংফ ছুয়িইকু ক্যং। 18ঙা নাককো আম্হেং প্ররি, যাখা নাং অাপ্যিও হিকলিরি, য়াংখা নাং কুখ্যাং খাআ খ্যংরি অর নাং চিঃ তুদুওয়ক লাঃরি। ছুগি যাখা নাং ওয়াগ্রি ফৈফু য়াংখা নাং আঃলাক ফ্রেংরো পিমি অর আখ্রা তয়ক নাংরো খাঃ খ্যয়েং পিমি। অর নাং যাদু লাঃখ্যাংলি য়াংদু য়ুউ লাঃমি।” 19থাওরা ফোরাঈ গুংধগো ফুঅং প্রাফু কিজু পিতর যাপুয়েং সিইফুলি, য়াংচাগো আসিক পিইফু যীশু দিঃ চাগাঃগো প্রলিরি।
দিঃ চাগাঃ প্রব্রিনক যীশু পিতরগো প্রলিরি, “ঙা নক্কা লাঃ।” 20পিতরচা নকতু প্রেংরো ক্রিলিরি, যীশু যাসুগো খ্যতিলি, য়াং তিবিচা নক্কা নক্কা লাঃরি। দিঃসুচা থুউ তিবি, যাসুউ চাঃগেতিখা যীশুদু ম্হেরো প্রলিরি, “আস্যাং, কুবাংগো যাসুউ রেংসুরো আঃলাকমা তিঃপিফুলি, য়াংসুউ যাসুলি?” 21পিতর য়াংসুউগো ম্রাংরো যীশুগো প্রলিরি, “আস্যাং, দিঃসু যা ফ্রফুলি?”
22যীশু পিতরগো প্রলিরি, “ঙারা লুরি ছুগি, দিঃসু ঙা প্রেং মাঃলাসাগ্রা নিংগি, নাকমা যালি? নাং ঙাক নক্কা লাঃ।”
23য়াংচাকিজু ঞিংরোমা দিঃ চাগাঃচা প্রিপাহারি, য়াং তিবি মিঃসিব্যা। ছুগি যীশুচা পিতরগো মপ্রলি, য়াং তিবিচা মিঃসিব্যা ছুরো। যীশু প্রলিরিচাগা, “ঙারা লুরি ছুগি, দিঃসু ঙা প্রেং মাঃলাসাগ্রা নিংগি, নাকমা যালি?”
যোহনমা সাকসি
24য়াং তিবিচা দিঃ আক্রংলিলাগো সাকসি পিরি অর দিঃচারো রুয়িলিরি। ঙারো সিকরি য়াংসুউ সাকসিইচা আম্হেং।
25যীশু অরলি আম্যা আলুক লুকলিইরি। য়াংচারোগু তুখু তুখু রুয়িইফুছুগি, প্রফু মারাঅং চাউ ফ্রইফু, ঙা তুওয়কচাগা য়াংচারো দিঃ লঃগামা মাছেং মুহুক।
Currently Selected:
যোহন 21: BBSRMZ
Highlight
Share
Copy
Want to have your highlights saved across all your devices? Sign up or sign in
