যোহন 20
20
আস্যাং যীশুচা আঃসিগা আহ্রাং ফ্রইরি
(মথি ২৮:১-৮; মার্ক ১৬:১-৮; লূক ২৪:১-১২)
1খাঃলি পাথামা রাকনি চঃজগা, মুম্যুয়েং হিরি আখিংমা মগদলীনী মরিয়ম য়াঙ সাংখ্যুংদু লাঃলিইরি। য়াংসুউ ম্রাংলিরি, সাংখ্যুং আঃওয়াগা ক্যকলুংগো রুয়িপ্রিঃব্যা। 2য়াংচাকিজু য়াংসুউ শিমোন-পিতর অর যা তিবিগু যীশু খ্যতিলি য়াং তিবিদু ব্রি লাঃরো প্রলিরি, “লুঃউরো আস্যাংগো সাংখেংগা য়ুউ লাঃখাগেব্যা। য়াংসুউগো যামা থাঃগেলিরিলি ঙারো মিঃসি।”
3পিতরনা য়াং তিবিচা য়াংখা প্রাংদু তুওয়করো সাংখেংদু লাঃগেলিরি। 4নৈয়কচুং তালাকতৈংমা ব্রিগেতি। আখ্রা তিবিচা পিতর থাক আয়াং ব্রিলো হ্রিঃগা সাংখ্যুংদু লাঃলিইরি। ছুগি য়াংসুউ সাংখ্যুং আথিঃদু মাঃলালি। 5য়াংসুউচা অকতু ঙুকরো ক্রিলিরিখা, যীশু কাইংথামা যা আওয়েকু রক্কেলিরি, য়াংচারোচা ক্যারো হিরি। 6পিতরচা য়াংসুউ নক্কা নক্কা ব্রি লাঃরো সাংখ্যুংদু ওয়ংলিরি অর আওয়েরো ক্যা হিচাগো ম্রাংলিরি। 7য়াংসুউ অরলি ম্রাংলিরি, য়াংসুউ আগংমা যা রুম্মাগো খ্যুংলিরি, য়াংচা আখ্রা আওয়েরোনা মিহিকলিরি। ছুগি আখ্রা আঃরা তেরেমা লুঃউং চুরো হিকলিরি। 8যা তিবিচা পাথামা সাংখ্যুংদু রকলিরি য়াংসুউলি য়াংখা আথিদুঃ ওয়ংলিরি অর ম্রাংরো ক্যুংগেলিরি। 9আঃসিগা যীশু আহ্রাং ফ্রইরো থাঃরাফু হিরি, সেংস্যাংস কেইং চাউমা থুঃউঃ চাগাঃগো য়াংসুউরো নামিলিগেলি।
আস্যাং যীশু মরিয়মগো আম্রাং পিলিরি
(মার্ক ১৬:৯-১১)
10য়াংনক তিবিরো ঈংদু প্রেং লাগেলিরি, 11ছুগি মরিয়মচা সাংখ্যুং প্রাংগা রেঃরো ঙুলিরি। য়াংসুউচা ঙুরো ঙুরো ঙুকরো সাংখ্যুং আঃথিদু ক্রিলিরি, 12যীশু আঃলংগো যা আঃরামা হ্লেং থাঃগেলিরিলি, য়াং আঃরামা আওয়ে আঃফ্রু ওয়েরো নৈয়ক সাগ্রা তেমেংদ থৈংরো হিকলিরি, তয়ক আগং আথাক্কা অর তয়ক খারাংগা হিকলিরি। 13য়াং সুরো মরিয়মগো প্রলিরি, “যাফু ঙুরিলি?”
মরিয়ম য়াংসুউরোগু প্রলিরি, “লুঃউরো ঙা আস্যাংগো য়ুউ লাঃখাগেতি অর য়াংসুউগো যামা থাঃলৈতিলি য়াংচাগো মিঃসি।”
14দিঃ চাগাঃ প্ররো মরিয়ম নকতো প্রেং ক্রিলিরিখা, যীশু রেঃ হিচাগো ম্রাংলিরি, য়িগিলি য়াংসুউচা যীশু লুঃউ মিঃসিলি।
15যীশু য়াংসুউগো প্রলিরি, “যাফু ঙুরিলি? যাসুগো হ্রারিলি?”
যীশুগো ওয়ায়েংমা আচংসা তওয়করো মরিয়ম প্রলিরি, “ক্রি, কুবাংরা য়াংসুউগো য়ুউ লাঃরো হিকগি, প্রঃ যামা থলৈতিলি। ঙা য়াংসুউগো য়ুউ লাঃফু।”
16যীশু য়াংসুউগো প্রলিরি, “মরিয়ম।”
ছুগি মরিয়মচা হ্লিক্রিরো অরামীয় আঃমুনা যীশুগো প্রলিরি, “রব্বুনি।” রব্বুনি আঃদিপি ফ্রইতি- ছাঃরা।
17যীশু মরিয়মগো প্রলিরি, “ঙাগো তিঃরো মাঃথাগি, আক্রংগা ঙা আগুতয়ং ফাখাংবাদু মাঃলাসি। নাং জং প্যাং, নাং ঞিংরোমা লাঃরো প্রঃ, যাসু ঙামানা নাংরোমা ফাখাং, যাসু ঙামানা নাংরোমা থাওরা ফোরা, ঙা আঃথাকতু য়াংসুউবাদু লাঃরি।”
18য়াংখা মগদলীনী মরিয়ম তিবিরোগুবামা লাঃরো সাদাং পিলিরি, কুঃ আস্যাংগো ম্রাংলিরি অর আস্যাংরা দিঃ চাঃগারো ঙাগো প্রলিইরি,
আস্যাং যীশু তিবিরোগু প্রালিইরি
(মথি ২৮:১৬-২০; মার্ক ১৬:১৪-১৮; লূক ২৪:৩৬-৪৯)
19য়াং তারাক তৈঙমা, খাঃলি পাথামা রাকনি ঞাউগাখা তিবিরো যিহুদী গংখ্যুকরোগু ক্রকরো, ঈংমা আলুং লেংখুওয়াগু পুয়িরো তারেকমা আঃচু ফ্রইকেলিরি। য়াংখা যীশু লারো য়াংসুউরো আঃলিমা রেঃরো প্রলিরি, “নাংরো খেয়েংসাগেলি।” 20দিঃ চাগাঃ প্ররো য়াংসুউ য়াংসুউমা আঃলাক নৈফাকনা খুঃরোগু তিবিরোগু প্রালিইরি। আস্যাংগু ম্রাংরো তিবিরো কংগং প্যগেলিরি।
21নক্কা যীশু প্রেংরো য়াংসুউরোগু প্রলিরি, “নাংরো খেংসাগেলি। যা পুয়েং ফাখাং ঙাগো রুওয়েলৈতিলি, য়াং পুয়েং ঙালি নাংরোগু রওয়েতি।” 22দিঃ চাগাঃ প্ররো যীশুচা তিবিরো আঃপমা লিইমুহুংরো প্রলিরি, “সেংস্যাংস ওয়িঞেংগো লাকখেংগে। 23নাংরোরা খ্যাংসুমুছুগো আপ্রইগা খুঅং রুওয়েকিরা য়াংসুউ আপ্রইগো খুওয়ং রুয়েএ পিফু। অর খ্যাংসুমুছু আপ্রইগো মারওয়েকি, য়াংসুউ আপ্রইগোলি মারওয়ে।”
মক্যুংসি থোমা ক্যুংখ্রাং
24যীশু যাখা লাঃলিরিলি, য়াংখা য়াং তিছিনৈয়ক তিবিমা তয়ক তিবিচা মিহিকলি। দিঃ থোমাগো মুওরা খঃগেতি। 25আখ্রা তিবিরো নক্কা থোমাগো প্রগেলিরি, “ঙারো আস্যাংগো ম্রাংগেলিরি।”
থোমা য়াংসুউরোগু প্রলিইরি, “ঙা য়াংসুউ আলাক নৈফাকমা মুঃওস্যি আঃরাগু মাম্রাংবি, য়াং আঃরামা লাকঞ্যং মাখ্যাব্রি অর য়াংসুউ খুঃরো মা আলাক মাখ্যাব্রি, ঙা খ্যাংঞ্যংছু মুক্যুং।”
26য়াং তাখালি নক তিবিরো প্রেংরো ঈংমা আচুক ক্যাগেরি অর থোমালি য়াংসুউরোনা হিকলিরি। আলুং লেংখাওয়া আপুয়ি হিকলিরি, য়িগিলি যীশু য়াংসুউরো আঃলিমা রেঃরো প্রলিইরি, “নাংরো খেংসাগেলি।” 27নক্কা যীশু থোমাগো প্রলিরি, “নাং লাকঞ্যং দিঃমা খ্যারো ঙা আলাক নৈফাকগো ক্রি অর নাং আলাক হ্লেংরো ঙা খুঃরো মা খ্যা। মক্যুং মাপ্যাংগি, ক্যুং।”
28য়াংখা থোমা প্রলিইরি, “ঙা আস্যাং, ঙা থাওরা ফোরা।”
29যীশু য়াংসুউগো প্রলিরি, “থোমা, নাং ঙাগো ম্রাংরিকিজু ক্যুংচালঃ? যাসুরো মাম্রাংব্রি ক্যুংরি য়াংসুউরোগু ছুউক পিইরি।”
30যীশুচা তিবিরো হ্রিঃগা অর আম্যা এংঅফুয়ি অলুক লুকলিইরি, য়াংচারোগু দিঃ চাউমা মারুয়িলিব্যা। 31য়িগিলি দিঃ চারোগু রুইয়িলিরি আক্রংগা নাংরো ক্যুংঅং, যীশুচা হিকলিরি মশীহ, সাগ্রামা সাঃ অর য়াংসুউগো ক্যুংগি, য়াংসুউ আতুওয়ংগা নিংরো বাওয়া রাবেচি।
Currently Selected:
যোহন 20: BBSRMZ
Highlight
Share
Copy
Want to have your highlights saved across all your devices? Sign up or sign in
