যোহন 19
19
1য়াংখা পিলাত যীশুগো য়ুলাঃরো কংগং আম্যা ক্রোদুঃনা বুঃফু আঃনা পিলিরি।
2সুরুয়িরোচা চুঃউনুয়িনা তুখু গংভং লুকরো যীশু আগংমা ওয়েচিগেলিরি। 3য়াংনক যীশুগো ঞোঞো আওয়ে ওয়েচিরো য়াংসুউ নেংমা লাঃরো প্রলিরি, “অঃ, যিহুদী মাং, অংম্রাংবাজি!” দিঃচাগাঃ প্ররো সুরুয়িরোচা পাঃমা সেঃকেলিরি।
4পিলাতচা প্রেংরো প্রাংদু থওয়করো লুঃউরোগু মিংলিরি, “ক্রিগে, ঙা য়াংসুউগো নাংরোবাদু থুঃউকখামি, যাস্যালিছুগি নাংরো সিঃঅংচাগা, ঙা য়াংসুউমা তুখুউলি আপ্রই মাম্রাং।” 5যীশুচা থুঃউঃ চুঃউনুয়িনা আওয়ে ঞোঞো কাইংথামা হিচানা প্রাংদু লাঃলিইরি। য়াংখা পিলাত লুঃউরোগু প্ররিলি, “দিঃ ক্রিগে, য়াং লুঃউচা।”
6যীশুগো ম্রাংরো আগ্রি ফুংগ্রিরোনা য়ুংসিরোচা অঃরো প্রগেলিরি, “য়াংসুউগো থুউখে, য়াংসুউগো থুউখেরো সেঃ।”
পীলাত মাংচা লুঃউরোগু প্রলিরি, “নাংরো, দিঃ লুঃউগো য়ুউ লাঃরো থুউ খেলঃকে, আক্রংগা ঙা দিঃ লুঃউমা তুখুউলি আপ্রই মাম্রাং।”
7যিহুদী গংখ্যুকরো পিলাতকু প্রলিরি, “ঙারোমা থুংজৈং তুখুহিকরি, য়াং থুংজৈং আতৈং, য়াংসুউ সিইরাফু তেংরি, আক্রংগা য়াংসুউ কুগোকু সাগ্রা সাঃ খেংরি।”
8পিলাত যাখা দিঃচাগাঃগো ক্রালিরিলি, য়াংখা অর আম্যা ক্রকলিরি। 9পিলাত প্রেংরো ঈংদুঅংমা লাঃরো যীশুগো মিংলিরি, “নাং যাগা লাঃচালি?” ছুগি যীশুচা পিলাতগো তুখুউলি আফ্রি মিপিলি।
10য়াংচাকিজু পিলাত যীশুগো প্রলিরি, “নাং ঙানা চাগাঃ মপ্রব্যালঃ? নাং সিকরিলঃ নাংকু রুওয়েফুনা থুউখেরো সেঃফু ক্ষেমতা ঙামা হিকরি?”
11যীশু আফ্রি পিলিরি, “আথাক্কা কুবাংগো ক্ষেমতা মিপিছুগি, ঙা আঃপমা কুঃবাং তুখুউলি ক্ষেমতা মিহিকলিই মুহুক। য়াংচাকিজু ঙাগো কুঃবাং আঃলাকমা যাসু পিইলি রিলি, য়াংসুউ আপ্রইচা আম্যা।”
12দিঃ চাগাঃগো ক্রারো পিলাত যীশুগো রওয়েফু ক্রেংলিরি, য়িগিলি যিহুদী গংখ্যুকরো অঃরো প্রগেলিরি, “কুঃবাং দিঃ লুঃউগো রওয়েতিরাছুগি, কুবাংচা সিঃথি কৈসরমা মিছুয়ি মুহু। খ্যাংসুউমুছু কুগোকু মাং খেংগি, য়াংসুউগা সিঃথি কৈসরমা রেংসুউ।”
13দিঃ চাগাঃগো ক্রারো পিলাতচা যীশুগো প্রাংদু থুউখারি অর ক্যকনা লুঃউচা আঃরামা তাঃরা পেংহ্লাংমা থৈলিরি। ঈব্রীয় চাগাঃনা য়াং আঃরাগো গাব্বাথা খরি। 14য়াং রাকচা হিকলিরি রুওয়েম্রকতিগো ফুংখিং য়াংরাক ফ্রইতি। য়াংখা আখিংচা তিছিঃ নৈখ্যাক ফ্রব্যা।
পিলাত যিহুদী গংখ্যুকরোগু প্রলিরি, “দিঃ ক্রিগে, নাংরো মাং।”
15য়াংখা য়াংসুউরো অঃরো প্রগেলিরি, “য়ুউ লাঃলি, য়ুউ লাঃলি! য়াংসুউগো থুউখেরো সেঃবলৈ!”
পিলাত য়াংসুউরোগু প্রলিরি, “নাংরো মাংগো ঙা, থুউখেরো সেঃবলৈফু লঃ?”
আগ্রি ফুংগ্রিরোচা আফ্রি পিগেলিরি, “সিঃথি কৈসরগো মুহুকপ্রি অর তয়কলি ঙারোমা মাং মিহিকব্যা।” 16য়াংখা পিলাতচা যীশুগো থুউখেরো সেঃফু আতুওয়ক য়াংসুউরো আলাকমা পিইলিইরি।
থুঃউঃমা আস্যাং যীশু সিঃখ্রাং
(মথি ২৭:৩২-৫৮; মার্ক ১৫:২১-৪১; লূক ২৩:২৬-৪৯)
য়াংখা সুরুয়িইরোচা যীশুগো য়ুউ লাঃখাগেতি 17যীশুচা কুঃ থুউখেফুচাগো কুঃ রুওয়করো, গংখুওয়েং নাঃমিনা তুখু আঃরাদু লাঃলিইরি। য়াং আঃরাচা ঈব্রীয় নাঃমি হিকলিরি গল্গথা। 18য়াংদেমা য়াংসুউরো যীশুগো থুউখেকেলিরি। যীশুগো আঃলিমা খ্যারো বিফাক ঞাফাক্কা নৈয়ক হিকলিরি। 19পিলাত তুখু আপ্রই লাকখেং রুঈরো যীশু থুঃউঃমা ছুয়িলিরি। য়াংদেমা রুঈরো হিকলিরি, “নাসারতগা যীশু, যিহুদীরোমা মাং।” 20যাদেমা যীশুগো থুউখেলিরিলি, য়াং আঃরাচা ম্রুনা আঃপা হিকলিরি। য়াং আক্রংনা যিহুদীরোমা আম্যা লুঃউরো য়াং আপ্রই লাকখেং চাগো ফেক্রিগেলিরি। য়াংচা ঈব্রীয়না, রোমীয়না গ্রীকনারি রুঈরো হিকলিরি।
21য়াংখা যিহুদীরোমা আগ্রি ফুংগ্রিরোচা পিলাতগো, “প্রলিরি ‘যিহুদীরোমা মাং, দিঃ চাগাঃগো মারুইগি, ছুগি রুইফুচাগা, ‘য়াংসুউ প্ররি, ঙা যিহুদীরোমা মাং।’”
22পিলাত প্রলিরি, “ঙা যা রুইরি, রুইব্রিব্যা।”
23যীশুগো থুউখেব্রিনক, সুরুয়িরোচা য়াংসুউ আওয়েচাগু য়ুরু কুরু আতুওয়ংমা লিঃফু ফুগেলিরি। নক্কা য়াংসুউরো যীশু আংগিকুলি য়ুগেলিরি। য়াং আংগিচা তুখুউলি আখ্রুও মিহিলি, আঃথাক কাবাং অকঃ রকঅং রাকচা হিকলিরি। 24য়াংচাগু ম্রাংরো সুরুয়িরোচা তয়্ক্কু তয়ক প্রগেলিরি, “দিঃচাগো মুছুকব্রি, ঙারো মিঃফক লুককেরো ক্রিগেমি, দিঃচা যাসুচা ক্যাফুলি।”
দিঃচা ফ্রলিরিচা সেংস্যাংস কেইং চাউমা আতৈং চাগাঃ প্রিজুংঅং,
য়াংসুউরো কুরু আতুওয়ংমা ঙা আওয়েচাগো ফুঃগেতি,
অর ঙা আওয়েকিজু য়াংসুউরো মিফক লুককেতি।
য়াং চাগাঃ আতৈং সুরুয়িরোচা লুক্কেলিইরি।
25যীশুমা আঃমি, য়াংসুউমা ঞিংমা, ক্লোপামা মাঃয়া অর মগদলীনী মরিয়ম যীশুর থুউখেরাবামা রেঃ হিকগেলিইরি। 26যীশু আঃমিনা অর যা তিবিগু য়াংসুউ খ্যলিরি, য়াংসুউ রেঃ হিচাগো ম্রাংলিরি। পাথামা যীশু মিখাংগো প্রলিইরি, “থুউদু ক্রি, কুঃবাং সাঃ।” 27য়াং নাক থুউ তিবিগু প্রলিরি, “থুউদুঃ ক্রি, নাক আঃমি।” য়াংখাকাবাং য়াং তিবিচা যীশু আঃমিগো য়াংসুউ ঈংদু য়ুলালিরি।
28য়াং নক আলুংচা কুংব্যাগো সিকরো, সেংস্যাংস কেইং চাউমা চাগাঃচা প্রিজুংঅং যীশুচা প্রলিরি, “ঙা রিইসক মুওয়েতি।”
29য়াং আঃরামা আঃরাক তুদুং হিকলিরি। য়াংখা য়াংসুউরো ফঃঅ তুখুমা য়াং আঃরাক্কু ছুওয়েরো এসোব আঃপাং আঃখাকমা য়াংচাগো খ্যুংরো যীশু খুনাংমা তঃলিরি। 30যীশু য়াং আঃরাক্কু সকপ্রিনাক প্রলিরি, “তুংব্যা।” য়াংনক যীশু আঃগংগো অক খ্যারো য়াংসুউ ওয়িঞেংগো চুকতিলিরি।
31য়াং রাকচা হিকলিরি ফুংখিং য়াং রাক। মুলাংগিচা হিকলিরি, সাদাংরাক। য়াং সাদাং রাকচা কংগং আক্যুওরাক হিকলিরি আক্রংনা যিহুদী গংখ্যুকরো ক্রিগেলিচাগা য়াং রাকমা আঃকংচা থুউমা মিহিরাঅং। য়াংচা কিজু য়াংসুউরো পিলাতগো আতংবেং থাগেলিরিচাগা, থুউমা যাসুরো হিরি য়াংসুউরো আখ্রিইগো খ্যেরো থুউগা আরতেরেতু য়ুউ লাঃঅং। 32য়াংখা সুরুয়িরো লাঃরো যীশুনা অর নৈয়ক থুউমা হিকচা আখ্রিইগো খিউগেলিরি।
33নক সুরুয়িরো যীশুবাদুঃ লাঃরো ম্রাংগেলিচাগা যীশু সিঃব্যা, য়জংকিজু য়াংসুউগো মখ্যেগেলিব্যা। 34ছুগি তয়ক সুরুয়িচা যীশু খুরোমা ক্যক পকছিংনা বকলিরি, য়াংখা খ্যাং খ্যাং য়াংগা সুয়িনা রিই থুওকলিইরি। 35য়াসুউ কুঃ ম্রাকচিইন য়াংচাগো ম্রাংলিরি, য়াংসুউ সাকসি পিরো প্রলিরি, অর য়াংসুউ সাকসিইচা আম্হেং। য়াংসুউ সিলিরিচাগা, য়াসু যা প্ররিলি, য়াংচা আলুংচা আম্হেং। ছুগি নাংরোলি ক্যুংনৈঅং।
36দিঃ প্রাসানারো ফ্রইলিচাগা সেংস্যাংস কেইং চাউমা দিঃ চাগাঃচা প্রিজুংঅং, “য়াংসুউমা আঃরো তুখুগুলি মুখিউমুহু।” 37অর কেইংমা চাগাঃ তুখুউচা ফ্রইতি, “যাসুগো য়াংসুউরো ক্যুংগেলিরি, য়াংসুউরো য়াংসুউগো আগং মঃরো ক্রিগেমি।”
আস্যাং যীশু সাংখ্যেয়েং।
(মথি ২৭:৫৭-৬১; মার্ক ১৫:৪২-৪৭; লূক ২৩:৫০-৫৬)
38দিঃ প্রাসানারো ফ্রইব্রিনক অরিমাথিয়া রুওয়ামা যোষেফচা যীশু আলংগো য়ুউ লাঃফু আতুওয়ক পিলাতগা খুঃঅং তংলিরি। যোষেফচা হিকলিরি যীশুমা আঃথিখু তিবি, আক্রংগা য়াংসুউ যিহুদী গংখ্যুকরোগু ক্রকলিরি। পিলাত খুঃঅং পিব্রিনক, য়াংসুউ লাঃরো যীশু আলংগো য়ুউ লালিরি। 39হ্রিইগা যাসুউ ঞিসুয়েংখংমা যীশুবাদুঃ লাঃলিইরি, য়াং নীকদীম সুংছি সুংসঃহ্লক ম্যুয়িছিনা নেংসা রঃরো য়ুউ লালিরি। 40নক য়াংসুউরো যীশু আলংগো য়ুলারো যিহুদীরোমা যা পুয়েং সুঃ সাংরিলি, য়াং পুয়েং আলুং ম্যুয়িছিনা রঃরো আলংগো আঃওয়ে রঃকেলিরি।
41যীশুগো যামা থুউখেকেলিরি, য়াং আঃরাচা ওয়ায়েং তুখু হিকলিরি অর য়াংদেমা তুখু আঃস সাংখ্যেয়েং হিকলিরি। য়াং সাংখ্যেংমা তাখালি তয়্ক্কু মাঃথাসি। 42য়াং রাকচা হিকলিরি যিহুদীরোমা ফুঃখিংগো য়াং রাক। অর সাংখেংচালি য়াং নেংমা হিকলিরিলুঃউ, য়াংসুউরো যীশুগো য়াং সাংখেংমা থাঃগেলিরি।
Currently Selected:
যোহন 19: BBSRMZ
Highlight
Share
Copy
Want to have your highlights saved across all your devices? Sign up or sign in
