যোহন 17
17
তিবিরো আতুওয়ক ছুতংচা
1দিঃচাগারো প্রব্রিনক যীশু নেঃফুংদু ক্রিরো প্রলিরি, “ফাখাং, আখিং ফ্রব্যা। নাকঈ সাঃ গুংধগো ফুঅং প্রাবা, যাফুলিছুগি সাঃলি নাং গুংধগো ফুঅংপ্রানৈঅং। 2নাং য়াংসুউরো আলুংসুউ আঃপমা তাওয়েং পিলিরি, যাস্যালিছুগি যাসুরোগু নাং য়াংসুউ আঃলাকমা পিইলি রিলি, য়াংসুউরো আলুংসুউগো তিম্রিজবাওয়াগু পিনৈঅং। 3নাককো, প্রফুছুগি আম্হেং সাগ্রানা অর নাং যাসুগো রুওয়েলৈতি য়াং যীশু খ্রীরিতগো সিঃকচা ফ্রইতি, তিম্রিজ বাওয়া। 4নাং ঙাগো যা আলুক লুকফু পিলিরি, য়াংচা আছুং ফ্রেরো ঙা দিঃ লঃগামা নাংঈ গুংধগো ফুঅংপ্রালিরি। 5ফাখাং, দিঃকাবা মৃফুহ্রিইগাকাবাং নাংনা ঙা যা গুংধ হিকলিরি, য়াং গুংধগো নাং প্রেংরো ঙাগো পিবা।
6“কাবা আতওয়ংগা নিংরো নাং যাসুরোগু ঙাগো পিলিরি, য়াংসুউরোবামা ঙা কুবাংগো ফুঅংপ্রালিরি। য়াংসুউরো কুবাংচা হিকলিরি অর কুঃবাং য়াংসুউরোগু ঙাগো পিলিরি। য়াংসুউরো কুঃবাং চাগাঃতৈং লাঃগেতি। 7য়াংসুউরো অগুরা সিঃগেতিচাগা, কুঃবাং ঙাগো যা পিলিরি, য়াংচা কুবাংবাগা লাঃচা। 8য়াং আক্রংচাগা ফ্রইতি, কুঃবাং ঙাগো যা যা প্রফু প্রলিরিলি, য়াংচা ঙা য়াংসুউরোগু প্রলিরি। য়াংসুউরো য়াংচাগো লাকখেংরো আম্হেং সিঃগেলিচাগা, ঙা কুবাংবাগা লাঃচা অর ক্যুংগেলিচাগা, কুঃবাং ঙাগো রওয়েলৈতি।”
9“ঙা আলুংসুউ আতওয়ক আতংবেং থাচামুহু, ছুগি কুঃবাং যাসুউরোগু ঙা আলাকমা পিলিরি, য়াংসুউরো কিজুরা আতংবেংথারি আক্রংগা য়াংসুউরোগা কুবাংচারা। 10ঙাচা যাচালি, য়াংচা আলুংচা কুবাংচা অর যাচা কুবাংচালি য়াংচা আলুংচা ঙাচা। য়াংসুউরো আতওয়ংগা নিংরো ঙা গুংধচা পুঅংবেচি। 11ঙা দিঃ লঃগামা মিহিকব্যা। ছুগি য়াংসুউরোগা দিঃ লঃগামা হিকরি, অর ঙা কোবাংবাদু লাঃরি। সেংস্যাংস ফাখাং কুঃবাং ঙাগো যা নাঃমি পিরিলি, য়াং নাঃমি গুংধনা দিঃ সুউরোগু মাঃবা। প্রফুছুগি ঙারো যাপুয়েং তখুতৈংলি, দিঃসুরোলি তখুতৈং ফ্রইঅং। 12ঙা মনৈরাক তৈঅং য়াংসুউরোনা আতু হিকলিরি, য়হ্লকরাক কুঃবাং যা নাঃমি ঙাগো পিলিরি, ঙা য়াক নাঃমিনা য়াংসুউরোগু মাঃরো লালিরি। ঙা য়াংসুউরোগু অচং-অাঃরেং থালিরি, য়াংসুউরো আতুওয়ংমা তয়কলি মাপ্যাকেলি। ছুগি যাসু প্যাকফু হিকলিরি, য়াংসুউরা প্যাকলিরি, যাস্যালিছুগি সেংস্যাংস কেইংচাউ চাগাঃতৈং আঃব্রিচুং ফ্রইঅং।”
13“আগু ঙা কুবাংবাদু লারি। অর ঙা চিইচা প্যরো তা রুওয়েংরিব্যা। য়াংচাকিজু লঃগামা হিখা দিঃচাগারোগু প্ররি। 14কুঃবাং যা প্রলিরি, ঙা য়াংচা য়াংসুউরোগু প্রলিরি। লঃগামা লুঃউরো য়াংসুউরোগু মুংগেতি, আক্রংগা ঙা যাপুয়েং দিঃলঃগা আতওয়ক মুহু, য়াংসুউরোলি দিঃ লঃগা আতওয়ক মুহু। 15ঙা কুবাংগু আতংবেং মাথাচাগা, কুঃবাং দিঃ লঃগাগা য়াংসুউরোগু য়ুলালি। প্রফুছুগি আতংবেং থাচাগা, রেংসুউ আঃলাকারা য়াংসুউরোগু কিঈছিবা। 16ঙা যাপুয়েং দিঃ লঃগা আতওয়ক মুহুলি, য়াংসুউরোলি মুহুবা।”
17আম্হেংনা কুবাংঈ আতুওয়ক আক্রং, কুঃবাং য়াংসুউরোগু আক্রা থাবা। কুঃবাং নু্ওরা আম্হেং । 18কুঃবাং যাপুয়েং ঙাগো দিঃ লঃগাদু রওয়েলৈতিলি, য়াংপুয়েং ঙা য়াংসুউরোগু লঃগাদু রুওয়েলৈতি। 19য়াংসুউরো আতুওয়ক কুবাংমা আতুওয়কচা ঙা কুঃগুকুঃ আখ্রা থালিরিচাগা, আম্হেংনা য়াংসুউরোগুলি আখ্রা লুকনৈঅং। 20“ঙা কেবেলে য়াংসুউরো আতুওয়ক আতংবেংথারি মুহু, ছুগি যাসুরো য়াংসুউরো চাগাঃ আতুওয়ংগা নিংরো ঙাগো ঙা আঃপমা অাক্যুংথারি য়াংসুউরো আতুওয়কলি আতংবেং থাবারিচাগা, য়াংসুউরো আলুংসুউ তুজুকতৈং ফ্রইপাজি। 21ফাখাং, কুঃবাং যাপুয়েং ঙানা পংরো হিবালি অর ঙালি কুবাংনা পংরো হিবারি, য়াংপুয়েং য়াংসুউরোলি ঙারোনা পংরো হিবাজি। য়াংপুয়েংছুগি দিঃ লঃগা লুঃউরো ক্যুংবাফুচাগা, কুঃবাং ঙাগো রুওয়েলৈতি। 22যা গুংধ কুঃবাং ঙাগো পিইলি রিলি, য়াংচা ঙা য়াংসুউরোগু পিলৈতি, আক্রংগা ঙারো যাপুয়েং তয়কতৈংলি, য়াংসুউরোলি তয়কতৈং ফ্রইপাজি, 23প্রফুছুগি, ঙা য়াংসুউরোনা পংরো হিরি অর কুবাংচা ঙানা পংরো হিরি। দিঃপুয়েং ফ্রইরো য়াংসুউরোলি তয়তৈং ফ্রইপাজি। য়জংছুগি দিঃলঃগামা লুঃউরো সিঅংচাগা, কুঃবাং ঙাগো রুওয়েলৈতি। অর যাপুয়েং ঙাগো খ্যতিলি, য়াংপুয়েং য়াংসুউরোগুলি খ্যপা।
24“ফাখাং, ঙা লুকচাগা যাসুউরোগু কুঃবাং ঙাগো পিইলি রিলি, ঙা গুংধগো প্রাফু আতওয়ক ঙা যামা হিরিলি, য়াংদেমা য়াংসুউরো ঙানা হিনৈঅং। য়াং গুংধচা কুঃবাং ঙাগো পিচা, আক্রংগা দিঃকাবা তিজরি হ্রিইগাকাবাং কুঃবাং ঙাগো খ্যলিরি। 25তাঃরা হিজ ফাখাং, লঃগামা লুঃউরো কুবাংগো মিসিকগে, ঙারা কুবাংগো সিরি। অর কুঃবাং ঙাগো রুওয়েলৈচাগু, য়াংসুউরো মিসিগে। 26ঙা য়াংসুউরোবামা কুবাংগো ফুঅংপ্রালিরি অরলি প্রাফুসি। যাস্যালিছুগি কুঃবাং যাপুয়েং ঙাগো খ্যতিলি, য়াং পুয়েং আঃখ্যচা য়াংসুউরো চিঃনুনুংমা হিবেচি। অর ঙাচা য়াংসুউরোনা পংরো হিবেচি।”
Currently Selected:
যোহন 17: BBSRMZ
Highlight
Share
Copy
Want to have your highlights saved across all your devices? Sign up or sign in
