যোহন 16
16
1“ঙা নাংরোগু দিঃ চাঃগারো প্ররিচাগা, নাংরো চিইমা মাঃতা রাঃঅং। 2লুঃউরো নাংরোগু রিঃফুংজাংগা ন্হাং থুউমি, প্রফুছুগি আঃখিং লাঃব্যা, যাসুরো নাংরোগু সেঃবৈফু য়াংসুউরো তুওয়কফুচাগা, য়াংসুউরো থাওরা ফোরাগু রুসিইরি। 3য়াংসুউরো দিঃচারোগু লুকফু আক্রংগা য়াংসুউরো ফাখাংগুলি মিঃসিক, ঙাগোলি মিঃসিক। 4ঙা নাংরোগু দিঃ চাঃগারোগু প্ররি আক্রংগা, য়াং আঃখিং লাঃখা নাংরো তুওয়ক রাঅংচাগা, ঙা নাংরোগু দিঃ চাঃগাগু প্রলিরি।
“ঙা পাথামাকাবাং দিঃ চাগাঃরোগু নাংরোগু মপ্রলি, আক্রংগা ঙা নাংরোনা আঃতু হিকলিরি। 5যাসু ঙাগো রুওয়েলৈতি, ঙা আঃগু য়াংসুউবাদুঃ লাঃরি অর নাংরো আতুওয়ংমা তয়কলি মিমিং, ‘কুঃবাং যাদুঃ লাঃরিলি?’ 6ঙা দিঃ চাঃগারোগু প্রলিরি আক্রংনা নাংরো চিইমা দুঃখুওয়া রকরি। 7য়িগিলি ঙা নাংরোগু আম্হেং প্ররি, ঙা লাঃগি নাংরোকিজু আকং আক্রংগা ঙা মাঃলাগি থুউ অাকুঞিং পিইসাচা নাংরোবাদুঃ মাঃলা। ছুগি ঙা লাঃগিরা, য়াংসুউগো নাংরোবাদুঃ রুওয়েলৈফু। 8য়াংসুউ লাঃরো আপ্রই আক্রংলিলাগু, থাওরা ফোরা ঈ চিইদানাতৈং লাঃফু আক্রংলিলাগু অর সাগ্রা তাঃরা আক্রংলিলাগু য়ুউরো চিইদানা পিইমি। 9য়াংসুউ আপ্রই আক্রংলিলাগু য়ুউরো চিইদানা পিইফু, আক্রংগা লুঃউরো য়াংসুউ আঃপমা মক্যুংগে; 10সাগ্রা চিইদানাতৈং লাঃফু আক্রংলিলাগু চিইদানা পিইফু আক্রংগা ঙা ফাখাংবাদুঃ লাঃরিব্যা অর নাংরো ঙাগো মাম্রাংব্যা; 11তাঃরা আক্রংলিলাগু য়ুউরো চিইদানা পিইফু আক্রংগা লঃগাগু গংখ্যুকসু তাঃড়াচা চঃপ্রিইব্যা।
12“নাংরোবামা অর চাগাঃপ্রফু আম্যা হিকরি, য়িগিলি অগু নাংরো য়াংচাগো সিঃমাখেংগেনৈ মুহুক। 13ছুগি য়াং আম্হেং ওয়িঞেং যাখা লাঃফুলি, য়াংখা য়াংসুউ নাংরোগু লেং প্রারো আঃব্রিচুং লেংদু য়ুউলাঃমি। য়াংসুউ কুঃদৈং চাগাঃমপ্র, ছুগি য়াংসুউ যা ক্রাফুলি য়াংচারা প্রফু। অর যামুছু ফ্রফু য়াংচাগো নাংরোগু প্রপ্রাফু। 14-15য়াং আম্হেং ওয়েঞেংচা ঙাক গুংধগোরা ফুঅংপ্রাফু। আক্রংগা ঙা যা প্ররি অর যা লুঃউঃতি য়াংচারোগুরা য়াংসুউ নাংরোবামা ফুঅংপ্রাফু। ফাখাং যা হিকরি য়াংচা আলুংচা ঙাচা। য়াংচাকিজু ঙা প্রলিরি, ঙা যা লুকতি অর প্ররি য়াংচারোগুরা য়াংসুউ নাংরোবামা ফুঅংপ্রাফু।”
16“অরতছংমিগি নাংরো ঙাগো মাম্রাংমুপ্যা, অরপ্রেংরো তছংমিগি ঙাগো ম্রাংগেমি।”
তিবিরোগু চিঃমুছুরাঅং প্রচা
17দিঃ চাঃগারোগু ক্রারো যীশু তিবিরোমা লৈগায়ক চাঃগা গ্রাক্কেরিচাগা, “দিঃসু ঙারোগু যা প্ররিলি, ‘অরতছংমিগি নাংরো ঙাগো মাম্রাংমুপ্যা, অরপ্রেংরো তছংমিগি ঙাগো ম্রাংগেমি?’ অর য়াংসুউ প্ররি, ‘ঙা ফাখাংদুঃ লাঃরিব্যা।’ 18দিঃসু তছংপ্রচা আখিংচা, যালি? ঙারো নামিঃলিনৈং দিঃসু যা প্ররিলি।”
19তিবিরোচা দিঃ আক্রংলিলাগু মিংখ্যাংগেতি, য়াংচাগু সিকরো যীশু য়াংসুউরোগু প্রলিরি, “ঙা নাংরোগু প্রলিরিচাগা, ‘অরতছংমিগি নাংরো ঙাগো মাম্রাংমুপ্যা, অরপ্রেংরো তছংমিগি ঙাগো ম্রাংগেমি?’ দিঃ আক্রংলিলাগু য়ুউরো নাংরো চাগাঃ গ্রাক্কেতিল? 20ঙা নাংরোগু আম্হেং প্ররি, নাংরো ঙুগেমি অর দুঃখুওয়া রাগেমি, ছুগি লঃগামা লুঃউরোচা প্যগেমি। নাংরো চিইদুঃখুওয়া রামি ছুগি নক্কা য়াং দুঃখুওয়াচা মিহিমুপ্যা। দিঃচানক নাংরো প্যগেফুব্যা। 21সাঃ ম্যুংফুওয়া ফুখা মিঃমাচা দুঃখুওয়া রাঃরি, আক্রংগা য়াংসুউ আঃখিং রকহ্লাব্যা। ছুগি সাঃ ম্যুংব্রিনক লঃগামা আঃসক লুঃউতয়ক লাঃরি আক্রংনা য়াংসুউ প্যরো থুঃউঃ দুঃখুওয়া রাচাগো চিঃমা মিহিকব্যা। 22য়াংচাঞ্যং নাংরো অগু দুঃখুওয়া রাগেতি, ছুগি অর প্রেংরো নাংরোনা ঙা আত্যুয়ি রাঃফু। য়াংখা নাংরো চিঃমা আপ্যরাফু অর য়াং আপ্যচা তয়কলি নাংরোগা লুঃউমুয়ুনৈ মুহুক। 23য়াং রাকমা নাংরো ঙাগা তুখুউলি মিমিংমুব্যা। ঙা নাংরোগু আম্হেং প্ররি, নাংরো ঙা নামিনা ফাখাংবামা যা তংরিলি, য়াংচা য়াংসুউ নাংরোগু পিমি। 24আগুতয়ং নাংরো ঙাবামা তখুলি মতংসি। তংগে, নাংরো রামি অর নাংরোচিইচা আপ্য প্রিজুংমি।
25“দিঃ আলুং সুয়েংসাংরোগু ঙা নাংরোবামা উপমাগা নিংরো প্রপ্রালিরি। ছুগি আঃখিং লাঃচাগা যাখা ঙা অর উপমাগা নিংরো নাংরোবামা চাগাঃ মপ্রব্যা, ছুগি আব্রিচি লুঃউলোরা ফাখাং আক্রংলিলাগু প্রফুব্যা। 26য়াং রাকমা নাংরো কুঃদৈং ঙা নামিনা তংগেমি অর ঙা মপ্রচাগা, ঙা নাংরোফাক্কা নিংরো ফাখাংবামা আতংবেং থাফু। 27ফাখাংগা কুঃদৈং নাংরোগু খ্যতি, আক্রংগা নাংরো ঙাগো খ্যলিরি অর ক্যুংলিরিচাগা, ঙা ফাখাংবাগা লাঃচা। 28আম্হেংচাংজ ঙা ফাখাংবাগা দিঃ লঃগাদু লাঃচা। অরপ্রেংরো ঙা দিঃ লঃগাগো বৈরো ফাখাংবাদু লাঃফু।”
29য়াংখা যীশু তিবিরো য়াংসুউগো প্রগেলিরি, “ক্রিবা, অাগুগা কুঃবাং আঃব্রিচি লুঃউরো চাঃগা প্ররি, উপমানাগা মঃপ্র। 30নারো অগু সিচাগা, কুঃবাং মিসিরিচা তুখুউলি মিহি অর খ্যাংসুমুছু কুবাংগো তুখু মিংলঅং আলুলি কুবাংমা মিহিক। য়াংচাকিজু ঙারো ক্যুংচাগা, কুবাংচা সাগ্রাবাগা লাঃচা।”
31যীশু য়াংসুউ তিবিরোগু প্রলিরি, “ছুগি অগু ক্যুংগেতিল? 32ক্রি, য়াং আখিং লাব্যা, প্রফুছুগি আখিংচা লাঃব্যা, নাংরো যাখা আসাংগু পিরো ঙাগো নুংখ্যাং বৈরো কুঃআরাদু কুঃ লাগেফু। য়িগিলি ঙা নুংখ্যাং মুহু আক্রংগা ফাখাং ঙানা আতু হিরি। 33ঙা দিঃচারোগু নাংরোগু প্ররিচাগা, নাংরো ঙানা পংরো হিরিলুঃউ চিঃমা আখেংসা রাচা, দিঃলগামা নাংরো দুঃখুওয়ানা ফিইমা হিকরি, য়িগিলি চিইমুছুগি, ঙাগা কাবাগো ছইংরো রাব্যা।”
Currently Selected:
যোহন 16: BBSRMZ
Highlight
Share
Copy
Want to have your highlights saved across all your devices? Sign up or sign in
