DAO: ZHAM" 3
3
Ve, Qae" Qere Pha,jhi" Byid' Ra" Dao:
1Nga" zo: we"- ngo mho" shid' ra" khyo re dato" myhid'. Nao re kad' nhao: ra" khyo re khonhae" re: myid: beim" na wa, 2Nga" mho" shid' dao: wa nao re kao so' qhang nhao mung: na: dai nhao: li" nae". 3Lam ga" kyid: ru we' xam: mag mung: ru we' dao: thang" mabaui mabyo, khyo khonhae" dalhaui" pye' co'. Ni" lang zang: mae ve; ci mung: ni" nhag' lam: khug mae tung" xam" to: wa, 4Nao airu cao" re Mao"So re:- byu re: nao re ngaui: li" genae".
5 Asang re ni" nhag' lam: alhab' yang lam khug: na wa, nao ba: ein: myid: ra" khyo mae khonhae" re: dangha daye, wa,. 6Nao kad' ye" ra" khyo alhab' mae Asang re beim: so: wa, ailao" yao: wa ni" khyo re qhu" shid' byid' li" nae". 7Nao yao: pha,jhi" ba: ra" tho' je yang: pha,jhi" ba: ein: khonhae" re: damyid: yu wa,- Asang re za: gyaug phug' mung: mashab makhyang" ra" khyo re dakad' wa, 8Airu: cao" ye" re mocid' re" ru: gai byid' li" nae". Ni" dae jham re gai nhao mung: ni" qug: khai: re yo: lo" nhao nae". 9Ni" myid gaung mae" thug' ra" qhovo: mae" gai: thao" ru Mao"So re byid: yang: yao: re phug' myao: nga: yhe' byid: wa,. 10Airu: kad' re ni" gaug jhi mae qhovo: byang" jo, mung: matho' qaung" to: losho' mung: ra" sabyi qang: qo" yu: li" nae".
11Nga" zo: we"- Mao"So nao re mho" shid' re nyang" za: gyo" yu mung: ta" peim: byid' ra" dao: khyo" khae: yu wa,- 12myhi" pho" qe wa yao: bam ngaui: ra" zoshao qere mho" jhao: byid' ru we' dakhyo: Asang wa yao: jhid'de; ra" mo, re mho" jhao: byid' na: ra". 13Pha,jhi" re the' yu mung: ba: gyo" ra" myid qo" yu: ra" yaug wa ngaui lho" ra" wo". 14Aiwa ngaui mae bo: ra" aphug' tho' mago" aimae bo: ra" qhang tho' mago" re: ni" qhid' mae" phug' de; ra". 15Aung khug: pha,jhi" wa phug' de; ra" laugsin" tho' je: phug' ra". Nao o: ra" ja: pe" ja: we' re: ai we' magai: tau". 16Aung khug: pha,jhi" wa nao re kao qhang: ru we' jo,nho" qo" nga: ye; ru byid' ra". 17Aung khug: pha,jhi" wa ni" byuna pyad re ngaui lho" nhao mung: gug: gam: na nhao: ra". 18Pha,jhi" bo mo, wa ngaui lho" ako". Aung khug: pha,jhi" wa yao: bam re kao so' byid' li" nae". 19Asang wa myid gaung re yao" pha,jhi" yang
phan" jaung: to" ra"-
mug:gaung rere: yao"
pha,jhi" laba lajhao: yang nyhang" to" ra".
20Yao" pha,jhi" jham re: qid gyaung: jham re yug: lo" nhao: ra".
Jham thaui: jham wa myid gaung re mug: qu byid' ra".
21Nga" zo: we"- ni" khug qag nyan: we' laba lajhao re tang za: zaui" zag: ci wa,- ni" lo, mae" khonhae" re: dalhag' ke'. 22Ai shid' lam: wa nao re ngaui lho" ra" kao so' byid' li" genae". 23Ni" gyaung: khyo mae nao yaug yo za: su: mung: khonhae" re: khyid au: mathaung: nae". 24Yab qo vao lo" re magyaug ca" nae"- amung: myikhyeim nyang" za: qo" yab: yu nae". 25Mashab makhyang: yaug jhao" phyad za: joe" li" ba: ra" qug: khai: byo; qeim ja: wa nao jhao" joe" li" nae" mangad:. 26Asang wa nao re lhaug' zaung" byid' li" nae"- nao re lha" mae gyo" myi" nhao nae" mangad:.
27Bao" thaug' yu ca" mo, re khonhae" re: gai: boe" qhi" bao" yu wa,. 28Ni" yham kyo: cao: re ana" qo" bao" ngad: re- ne, mo" ba joe" sho' lao" shi: ein: khonhae" re: data" ke'. 29Ni" yham kyo: re qug: khai: qhug' nae" ja: dakad'- yao: wa nao re lam khug mung: ni" nhae mae na yaug ngad: ra". 30Nao re dae mate' yaug we' pe" si: mabo: ru myan" dajho" myo: ge,. 31Lhad' zo: lhad' shaug' mo, re daqu" nhung- mangad: lao"- yao: bam kad' ruru: kad' nae" damyid. 32Pe"mung:ga"re Asang wa magai kad' mo, re nghang: mung:- din:man: mo, re kam" wa yao" lam ga" mo, toe' yu: li" nae". 33Asang wa makhyang: mo; yham re nhang: kheim: ke' mung:- din:man: mo; yham re shaman" byid' ra". 34Ngad beim" ra" mo, re yao: nhaung thao" phaug' pye' mung:- nhag' lam: khyo" ra" mo, re- yao: o ngaui: ra" myid qhu" byid' ra". 35Pha,jhi" bo mo, wa mang gai nga: qo" li" genae". Ngadqere: nhag' magyang: mo, wa- yao: bam: aqho' aqhid re za: laung" yu: li" genae".
Currently Selected:
DAO: ZHAM" 3: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009