YONA 3
3
Asang: Mho Dao: Re Yona Tae" Gyo" Ra" Khyo
1 Asang wa Yona re dalhang dam: ta" va". 2Yao: wa ai: vogaung: mo" Nineve khyo ye: mung: ai: vogaung: byu qere nao re ngo byid' ra" mungdao: ta" kyo: wa,- ga: ta" ra". 3Aimung: Yona wa Asang: mho dao: gyo: mung: Nineve khyo ye" lo" ra". Ai: vogaung: mo" wa gyai qi" ruyang sam ba su" re she, jao: sho' qo" su" phyid' ra" vogaung: ngad: ra". 4Yona wa ai: vogaung: khug khyo su" vao ye: mung: daba gyam su: thao re yao: wa Ba na byid xe ba joe" lao" Nineve byo; qeim: lo" li" nae" ga: ta" hau" ra".
5Nineve vogaung: byu qe wa Mao"So: mungdao re lam" ako". Aimung: yao: bam wa yaug khao: ngo" zo:ve jao" ca" va" ga: myid: phyid' mung: yao: bam nhag' lam: tha" va" rure qhu" byid' ra" khyo" qi" thao" yaug mae" ngai: thao" yaug joe" sho' vobyu alhab' mo, wa jid: mo" mai bau: ve, yang: zo:ve jao" ako".
6Ai: ra" khyo re Nineve kho:kham the' gyo: lao" yao" kho:kham tao" mae" to" mung: yao" bau: qhang khyad' pye' yang: jid: mo" mai bau: ve, mung: myimhab bam mae zaung: jo; ra". 7Yao: wa Nineve vogaung: byu qejhao" hau: dao: dakheim: pyo: ke' ra". Ce wa kho:kham we' yao" nho: zug: jham mae" amyin" ngad: khag' re: zo:ve maqo" zo: nae" byu alhab' nung: jaung nung: laui: alhab' yao alhab' pe" re: mazo: mashaug' nae" qhid' mae" tam" to: va". 8Byu alhab' we' gug'nyhug' alhab' wa jid: mo" mai bau: ve, ca"- yaug khao: ngo" wa Mao"So re kyid kyid za: mho' yao: mung: yao: yaug yao" nho: makhyang: mashab: ra" mau" we' magai: ra" ave, re to" pye' ca". 9Mao"So wa yao: myid: to" rure dam: lhai" re dam: lhai: maba yao: nhag' yo" ru thang: pye' mung: ngonhaung" mashid: re mashid nae" maba ga: hau" pyo: ke' ra".
10Mao"So wa yao: bam kad' rure myao ava"- yao: bam: makhyang: mashab: khyo re to" pye' rure myao byid' ra". Aimung: yao: wa nhag' lam: dam: lai: mung: yao: kad' nae" ga: ta" to" ra" khyo: yao: bam re qobo mabyid: lo:ngad: ra".
Currently Selected:
YONA 3: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
