HOSEA 2
2
1Aimung: ni" Israel mao:nhaung: qere Mao"So: byumyu" we' Asang: yang Jhid'de; ra" mo, ein: mhang" wa,- ga: ta" ra".
Jhaug' Mazaug: Ra" Gome- Jhaug' Mazaug: Ra" Israel
2Nga" zo: qe we"- naonhae ho' yao: myhi" wa nga" yham sang myhi" mangad: lo: Ngore: yao" yham sang pho: mangad: lo: Ngadqere:- yao: re ceim" ta" ge,- yao: re myi: shad' lao shad' mau" we' shava myhi" makad' nae" qhid' mae" ceim" ta" ge,. 3Yao: mathang yang: ngad: re- ngo wa yao: re yao: khau: li" ra" ba na mae gaung pyad' ngad: ru we' dakhyo: yao: re mai bau: khyad' pye' byid: nae". Ngo wa yao: re myid kyaug' myid gao: we' dakhyo: to" pye' nae"- aimung: yao: wa qid shab' yang: shid lo" li" nae". 4-5Ngo wa yao: zo: qere nhag' khyag' myid maqhu" byid: nae". Yao: bam wa qho' maba: ra" shava myhi" yao: zo: qe ngad: ako". Yao: wa nga" jhid'de; zoqae: pho" qejhao" ye: nae"- yao: bam wa ngore zo:ve we' qid- sug' gug we' jid: mo" gai- zhanlun xau we' sabyi qang: byid' ako" ga: yao: re yao: ta" ra".
6Aimung: ngo wa yao: re zau: kyi paung" yang kyae" tam" pye' mung:- yao" khyo re khyae kyae" jhid' pye' naeva". 7Yao: wa yao" zoqae: pho" bam jhao" tao" ye: qere: yao: bam re mamyhi nae". Yao: wa yao: bam re cao" qho ngadqere: yao: bam re maqhug' nae". Ailao" yao: wa- Ngo wa sao qhid' mae" nga" yham sang pho" jhao" dam: tug' lo" nae". Ngo wa ana" mae" tho' qhid' phyao: mae" ru aje: gai:- ga: ta" li" nae".
8Yao: wa - yao: re khaung:- sabyi qang:- zhanlun xau we' yao" yang Bala re caung:pa" ra" au: ngaui" byid: ra" ngaui we' qhang alhab' wa ngoyang byid' ru ngad:- ga" rure khonhae" re: lhang: yu nae" mangad:- 9Aimung: gaug yad yo, re ngo wa nga" jhaung qhu" khaung: we' sabyi qang: re dam: tug' yu: pye' byid: nae"> yao: re mai bau: qhid' mae" ngo byid' to" ra" sug' gug we' jid: mo" pin: gai re dam: yu: pye' byid: nae". 10Ngo wa yao: re yao" zoqae: pho" bam: qhid' kheim: mae mai bau: khyad' pye' byid mung: gaung pyad' kad' pye' byid: nae" Nga" kheim: so' mae" mali" qo" khyad' yu: genae". 11Ngo wa yao" poe jham ngad: ra" zin nge, poe- lho" nge, poe we' Dugno: Ba poe we'- caung:pa" thung" ham phaung poe ru"ru poe alhab' re thao" lo" nhao nae". 12Yao" zoqae: pho" bam re yao" yang caung da" byid' ra" aphug' khyo" yao: bam: yang byid' to" ru ngad: ga: ta" ra". Yao" sabyi naui jham we' yao" pho' ham" shigae jham re ngo phyo' qheim" pye' byid: nae". Ngo wa yao" sabyi khyae jham we' shikhyae jham re seyo boe" nhao: pye' nae". Seyo: gug'nyhug' kyao jham: yang ai: gu: re phyo' qheim" pye' byid' li" genae". 13Yao: wa- yao" zoqae: pho" jham jhao" lao do; do' lo" nae" qhid' mae" Bala re nae pyo: cid' phad' ngaui" mung: laug sin" qhang zai ve; ra" au: ngore to" myhid' pye' ra" ayo, qhid' mae" yao: re ngo qobo dae byid: nae" ga: Asang ta" ava".
Asang: Yang Yao" Byu" Re Jhid'de; Ra" Myid
14Aimung: ngo wa yao: re din"pyad' yo khyo dam: jhui" ye: naeva". Ai: jo, qo mae ngo wa yao: re jhid'de; dao: khyo" dam: ta" aung: yu nae". 15Yao: qo" lai: lo: ra" sabyi khyae jham rere: yao: re ngo dam: byid: mung:- Qug: Khai: Lao: Khaung: rere: myid: lao" nae" kham: mo" boe" nhao nae". Ai: jo, qo mae yao: wa- genae" Egutu mae" yao: phao: lo: ra" yao: ngai shi" au: mae" we' dakhyo: ngore tau: byid' li" nae". 16Ailao" yao: wa ngore yao" yham sang pho" ga: dam: mhang" li" nae". Yao: wa ngore yao" nho: Bala ga: mamhang" lo nae". 17Ngo wa yao: re Bala nho: mang khonhae" re: mata" thug' nhao nae".
18Ai: ayo, mae- ngo wa seyo: gug'nyhug' kyao we' ngho' alhab' re dao: thang" to: mung: yao: bam wa nga" byumyu" qere dae mate' genae". Ngo wa ai: mug: mae" gye shae gyezai alhab' re sham" yu: pye' byid: nae". Shae pyang: alhab' we' lo, la: alhab' yu: pye' byid: mung: nga" byumyu" qere yaug yo cae: tae" ru we' gug:gam za: na nhao nae".
19Israel we"- ngo wa nao re nga" yham sang myhi" boe" nhao nae".
Ngo wa dangman: mung: jhaug' zaug nae".
Ngo wa nao re mabaui mabyo; ra" jhid'de; myid we' nhag' khyag' ru qhu" byid: nae".
Aimung: nao re apyad ato mae nga" mae" boe" nhao nae".
20Ngo wa nga" dao:so: re zam: mung: nao re nga" mae" boe" nhao nae".
Aimung: nao wa ngore ni" Asang khyo" lhang: yu: li" nae".
21-22Ai: ayo, mae ngo wa nga" byumyu" Israel nho: akyu" mho' thoe re tau: byid: nae".
Ngo wa myidgaung dao mae mug: qu: gyo" nhao nae".
Aimung: myidgaung wa gaug zo we' sabyi we' zhanlun re thug' nhao: li" nae".
23Ngo wa nga" byumyu" re ai: mug: mae te" nha: to: mung: yao: bam re na: dai nhao nae".
Majhid'De, Yaug ein: mhang" pye' va" mo, re
Nga" Byumyu" Mangad: ein: mhang" pye' va" mo, re ngoyang jhid'de; myid qhu" byid: nae".
Ngo wa- Naonhaung" re nga" byumyu" ngad: ein: ta" nae".
Aimung: yao: bam wa- nao wa ngonhaung" nho: Mao"So ngad: ra"- ga: tau" li" genae".
Currently Selected:
HOSEA 2: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
