2 KHO:KHAM 18
18
Yuda Kho:kham Hezekia
(2 Kho:kham mhomyi: 29.1, 2; 31.1)
1-2Ela nho: yauggai zo: Hoshea Israel kho:kham khyo" eib: ru sam zin ein: zin mae Ahaza nho: yauggai zo: Hezekia wa apyad shid' xe: ngo" zin mae Yuda kho:kham boe" lo: ra". Yao: wa Yerusalem mae shid' xe: gug zin eib: na: ra". Yao: myhi" wa Zekharia nho: myiqe: zo: Abiya ga" ru ngad: ra". 3Yao" phug' pho" kho:kham Davi nho: ave, aso: re cao" mung: Asang o ngaui: ra" lo, mau" re kad' ra". 4Yao: wa tarha" taung bug so re caung:pa" ra" jo, qo jham re phyo' pye' mung: laug zang baung: jham re khyug' pye' yang: so myhi" Ashe nho: khyao dau alho jham re be; khyug' khyo" ra". Yao: wa Moshe kad' to" ra" gyid: lhao maui lho re aje, aman" be; khyoe' pye' ra". Aire Nehushtan ga: mhang" ako". Ai: ayo, joe" sho' Israel byu qe wa aire nga: yhe' byid: mung: sheim nae pyo: ja: phad' ngaui" ako". 5Hezekia wa Israel nho: Mao"So Asang re lam khug: ra". Yao" qhid' au: mae re:-yao" thao mae re: Yuda mung" wa yao: we' dau: ra" kho:kham khonhae" re: maqo" qu" ngad: ra". 6Yao: wa Asang re jhaug' zaug mung: mho dao: magyo: khonhae" re: makad' ngad: ra". Asang: yang Moshe re byid' to" ra" amyin" dao: jham alhab' re nyang" za: phug' cao" ra". 7Aimung: Asang wa yao: we' daga" ngad: ra" yao: kad' ra" lo,mau" ja: khao: ngo" mae aung myaug: ra". Yao: wa Asuri khosin" re gye kad' tau: lhan: mung: yao" qao: mae na nae" rure ha: pye' ra". 8Yao: wa Phalistina re aung: pye' mung: Gaza we' aire lhang" gam" to" ra" mug: myid bobo: yang: ngai: thao" vogaung: mae" qi" thao" vogaung: joe" sho' yao: bam: na jo, qo jham re yekhe' zin" ra".
9Hezekia eib: ru byid zin ein: zin- kho:kham Hoshea Israel mung" re eib: ru nhad' zin ein: zin mae Asuri kho sin" Shalmanese wa Israel mung" khyo jhin" vao ye: mung: Samari vogaung: re vang" ci: ra". 10Vang" ci: ru sam zin ein: zin mae Samari vogaung: wa gyo" seim" lo" byaug: ra". Ceru wa Hezekia eib: ru khyaug' zin ein: zin we' Hoshea eib: ru gug zin mae ngad: ra". 11Asuri khosin" Israel byu qere kyam: byu qekhyo" Asuri mung" khyo pyaung" jhui" lo" mung:- daqhae: re Hala mae- daqhae: re Gozan mung" dau mae" Habora qid gyaung: nhae mae- daqhae: re Media mung" mae" vogaung: jham mae lo" nha: to" ako".
12Samari vogaung: gyo" seim" lo" ru wa Israel byu qe yao: bam: Mao"So Asang re mho dao: magyo: lo:- yao: bam we' kad' to" ra" dao: thang" re lhoe" pye' mung: Asang: daui daui yaug Moshe yang byid' to" ra" tarha" alhab' re manug: tae" gyo:- manug: phug' cao" ngad: ako".
Asuri Byu Qe Yerusalem Re Kyaug' Nhin" Ko" Ra" Khyo
(2 Kho:kham mhomyi: 32.1-19; Esaia 36.1-22)
13Kho:kham Hezekia eib: ru daxe: byid zin ein: zin mae Asuri khosin" Senanakherib wa Yuda nho: gyetab vogaung: jham re gyekhe' mung: aijham re aung: pye' ra". 14Hezekia wa Lakhi mae na: ra" Senakherib re- ngo shad' va"- nao gyekhe' rure thang: pye' wa,- nao mho' ru pe" ngad ngad ngo byid: nae"- ga: mungdao: pyang: ke' ra". Khosin" nho: dao: phyid' wa Hezekia yang yao: re ngaui talenta sam yo- qhang talenta sam yo yao: re vhin: ke' byid: ca" nae" ga" ru ngad: ra". 15Hezekia wa Caung:pa" Yham mae" we' kho:kham kho" mae" ngaui jhi mae" ngaui jham alhab' re yao: re vhin: ke' byid' ra". 16Yao: wa caung:pa" yham kham: zang mae" qhang jham we' yao" yang yao: kham: baung jham mae thab' to" ra" qhang jham re qhid' yu mung: yao: wa aijham alhab' re Senakherib re vhin: ke' byid' ra". 17Asuri khosin" wa Yerusalem mae na: ra" Hezekia re gyekhe' nae" qhid' mae" Lakhi mae" gyephung: mo" nhao: ke' ra". Aire aya: myhao: thao" ra" yao" gyezug: sam yaug: yang jhui" ako". Yao: bam Yerusalem khyo joe" ye: gelao"- tho' qid tham: mae" qid she: yu: ra" qid khyo: nhae mae" mai bau: cid' mo, ra" jo, qo mae" khyodang re yao: bam sang: yu: pye' ako". 18Ai: thao yao: bam wa kho:kham Hezekia re khai: ke' ako". Ailao" Hezekia nho: zug: qe sam yaug ngad ko" ra" kho:kham kho" au: jhaung ngad: ra" Hikia nho: yauggai zo: Eliakim- kho:kham kho" mugsug' tung" yaug ngad: ra" Shebna- tung" xam: au: jhaung ngad: ra" Asab nho: yauggai zo: Yoahaza bam re yao: bam we' yeqhug' nae" qhid' mae" nhao ke' ako". 19Asuri gyezug: qemae" dayaug wa yao: bam re kho:kham Hezekia wa pe" re aiqhi" myid: lam: na: ra" khyo re khosin" pho" ba nug: ra"- ga: ta" ra". 20Yao: wa nhad' dao: thoe wa gyekhe' jhao: ru we' gye qam: re atha" qo" kad' li" nae" ein: naonhaung" jho ko" i? Asuri re gye kad' tau: lhan" ra" mau" mae naonhaung" re khag' bao" li" nae" ein: jho ko" i? 21Naonhaung" re Egutu yang li" bao" nae" ein: myid: jho ko" i? Ngadqere: airu wa qid phaung: yao: re zaung: bao" kad' ci: ru we' dakhyo: ngad mung:- ai wa gyug' lo" mung: ni" lo, re the' thug' yu: li" nae". Airu wa yao: re dayaug yaug khug ngha: ra" au: Egutu kho:kham qemae boe" ruru: ngad: ra".
22Asuri gyezug: pho" wa xo' yang: -mangad: lao" naonhaung" Mao"So Asang re naonhaung" khug ngha: na ko" ra" khyo ngore ta" genae" i? Yao: Yuda byu qe we' Yerusalem byu qere Yerusalem mae jo; ra" phan mae za: caung:pa" nae" ta" au:- Asang: phan zaung yham we' phan jham re phyo' pye' yaug wa Hezekia yao: ngad: ava". 23Ngo wa khosin" pho" mang mae naonhaung" we' gau jho" ta" nae". Naonhaung" mae myao: jui: byu myo: sho' yaug na ko" re wa ngo naonhaung" re myao: shid' taung dau: byid: nae". 24Naonhaung" wa Asuri zug: nyham: thao yaug we' lhao" re: mai maqo" jho" qhi" ngad: ra". Ngadqere: gyekhe' myao: lhin" jham we' myao: jui: mo, re naonhaung" jhao" nhao: ke' byid: nae" naonhaung" myid: lao" ako". 25Asang: bao" thaug' ru mabo lo:- naonhaung" mung"dan: re phyo' qheim" nae" ngo gyekhe' va" ru ngad: ein: naonhaung" jho ko" i? Aire gyekhe' yang: phyo' qheim" pye' nae" qhid' mae" Asang yao: ngore ta" ra"- ga: ta" ra".
26Ailao" Eliakim- Shebna we' Yoahaza wa ai: gyezug: pho" re- zug: pho" we" ngonhaung" re Aramai myan" khyo" jhau la,- ngonhaung" ba: gyo" Hebre myan" khyo" da jhau wa,- vang dao mae na ko" ra" mung" byu qe alhab' tae" gyo" na: ako"- ga: ta" ako".
27Nao we' kho:kham pho" re za: cegu: alhab' re ta" nae" khosin" pho" yang ngore nhao: ke' ru ngad: ein: nao jho i? Mangad: lhe"- naonhaung" we' dakhyo: yao: bam: khyid' re zo:- yao: bam yhid' re shaug' genae" ra" vang dao mae zaung: jo, ko" ra" mung" byu qere re: ngo dao: jhau: na: ru ngad:- ga: ta" ra".
28Ai: thao gyezug: pho" wa to" ye, mung: Hebre myan" khyo"- Asuri khosin" naonhaung" re ta" na: ra" dao: re tae" gyo: ge,. 29Yao: wa Hezekia yang naonhaung" re mamhug' pyag' pye' nae" rure ta" peim: byid' ra". Hezekia wa naonhaung" re maqo" khyad' yu ngad: ra". 30Asang re khug ngha nae" naonhaung" re yao" yang da ngang: yu nhao: pye' ge,- Asang naonhaung" re khyad' yu: li" nae" ein: ngonhaung" Asuri gyetab yang naonhaung" vogaung: re khe' aung: yu nae" rure tam" pye' byid' li" nae"- ein: naonhaung" dajho ge,- 31-32Hezekia nho: dao: re datae" gyo: ge,- Asuri khosin"- wa vogaung: mae" thug' li" mung: lo, tau: pye' ge,- ga: amyin" byid' ra". Airulao" naonhaung" yao" mung"dan: we' myo: sho' dau: ra" mug: sabyi qang: myo: sho' thug' ra" sabyi khyae jham jo; ra" mug:- mug kad' nae" gaug zo myo: sho' jo; ra" mug:- zhanlun gae zhanlun xau we' byoyhid byang" ra" mung" mae khosin" pho"- naonhaung" re te" na nhao: ra" ba na joe" sho'- naonhaung" yao" pho' ham" gae jham mae" pho' ham" shi: jham re zo: nae" akhang" qo" mung:- naonhaung" yao" qid thaung: mae" qid qhug' shaug' nae" akhang" qo" li" genae". Yao" amyin" dao: jham re naonhaung" cao" kad' ko" re naonhaung" mashid genae"- daui: na: li" genae". Ngadqere: naonhaung" re Asang li" khyad' yu: li" nae" ga: naonhaung" myid: jho sho' Hezekia yang naonhaung" re da mhug' pyag' nhao ge,. 33Amyu" mung"dan: jham mae" so jham wa yao: bam: mung"dan: jham re- Asuri khosin" nho: lo, mae" qo" khyad' yu: ako" i? 34Ana"- Hamad we' Arpad so jham khai: mae ngad: ako" i? Sepharaim- Hena- Iva nho: so jham khai: mae ngad: ako" i? Samari re khag' khyad' yu: ra" i? 35Ai: mung"dan: alhab' mae" so jham: yang ngonhaung" nho: khosin" lo, mae" yao: bam: mung"dan: re kho au: khyad' yu: qu" ra" i? Aire pe" ja" yang Asang wa Yerusalem re qo" khyad' yu: ra" ga: naonhaung" re myid: jho nhao: ra" i? ga: zag: hug' ra".
36Kho:kham Hezekia yang yao: bam re ta" to" ru we' dakhyo: mung" byu qe wa sae za: na: jo; ako". Yao: bam pe" dakheim: mata" ngad: ako". 37Ai: thao re Eliakim- Shebna- Yoahaza bam wa kaug' ru we' yao: bam: mai bau: jham re lao" cad' pye' mung:- Asuri gyezug: pho" ta" ra" dao: kho:kham pho" re lau lo" ta" kyo" ako".
Currently Selected:
2 KHO:KHAM 18: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
