2 KHO:KHAM 17
17
Israel Kho:kham Hoshea
1Yuda kho:kham Ahaza eib: ru daxe: shid' zin ein: zin mae Ela nho: yauggai zo: Hoshea wa Israel kho:kham boe" lo: ra". Yao: wa Samari mae gug zin eib: na: ra". 2Yao: wa Asang re qobo shad' lhoe" ra". Ngadqere: yao" qhid' au: mae Israel mung" re eib: lo ko" ra" kho:kham qenho" maxo ngad: ra". 3Assorikhosin" Shamanese wa yao: we' gye jho" khe' ra". Hoshea wa Shalmanese re lo, tau: pye' mung:zin khao: ngo" khang: byid' ra". 4Ngadqere: dazin mae Hoshea wa Egutu kho:kham So jhao" lagyo: nhao yang: yao: re bao" yu nae" mho' nhao: ke' ra". Amung: zin khao: ngo" Asuri re byid' na: ra" khang: re mabyid: lo: thang: pye' ra". Shamanese wa aikhyo re ba lao"- yao: wa Hoshea re taung" yu mung: thaung: lhaung" to" ra".
Samari vogaung: gyo" seim" lo" khyo
5Ai: thao Shamanese wa Israel mung" khyo jhin" vao ye: mung: Samari vogaung: re vang" ci: ru sam zin ein: zin- 6Hoshea eib: ru gug zin ein: zin mae Asuri- Khosin" wa Samari re sang: yu mung: kyam: byu qekhyo" Israel byu qere Asuri mung" khyo jhui" lo" ako". Daqhae: re Hala vogaung: mae- daqhae re Gozan mung" dau mae" Habora qid gyaung: nhae mae- daqhae: re wa Media byu qe: vogaung: jham mae na nhao: ra".
7Israel byu qe wa Yao: bam re Egutu kho:kham lo, mae" khyad' yu yang- yao: bam re Egutu mung" mae" jhui" thug' lo yaug ngad: ra" yao: bam: Mao"So Asang re qobo shad' lhoe" geyang: Samari vogaung: gyo" seim" lo" ru ngad: ra". Yao: bam wa gatau: so jham re caung:pa" mung:- 8Yao" byumyu" qe: qhid' khyo jhin" ye" lo" au: Asang: yang khe' thug' pye' ra" byumyu" qenho: thung" li jham re cao" mung:-Israel kho:kham qeyang bang" se" byid' ra" thung" li jham re cao" kad' ako". 9Israel byu qe wa yao: bam Mao"So Asang ma o: ra" ja: jham re kad' ako". Yao: bam wa ngai: thao" ra" vogaung: mae" qi" thao" vogaung: joe" sho' yao: bam: vogaung: alhab' mae taung bug so re caung:pa" ra" jo, qo jham re kad' ako". 10Yao: bam wa bug gaung alhab'- ba sham qab sag' gae khao: ngo" mae laug baui zang baung: jham- so myhi" Ashe nho: khyao dau alho jham re to: mung:- 11Yao: bam wa ai: mung"dan: mae" Asang: yang khe' thug' pye' ra" byumyu" qe kad' ra" lo, mau" re cao" yang: tarha" taung bug phan jham: dao alhab' mae sheim nae pyo: ja: phad' ngaui" ako". Yao: bam wa yao: bam: makhyang" ra" lo, mau" alhab' yang Asang: nhag' jam: yo" rure lhau: zhung" to" ke' ako". 12Amung: so alho jham re macaung:pa" nae" byid' to" ra" Asang: amyin" re maphug' cao" ngad: ako".
13 Asang wa Israel we' Yuda re ta" peim: byid: nae" ra" qhid' mae" yao" lagyo: qe we' lapa qere nhao: ke' ra". Naonhaung" nho: makhyang" ra" khyo jham re to" pye' mung:-naonhaung" phug' pho" qere ngo byid' to" ra" tarha" mae we'- nga" daui daui mo, nhad' khyo" naonhaung" re byid' to" ra" tarha" mae bo: ra" nga" amyin" dao: jham re phug' cao" ge,- ga: ta" peim: byid' ako". 14Ngadqere: yao: bam mho dao magyo: ngad: ako". Yao: bam: Asang re makhug ngha ko" ra" yao: bam: phug' pho" qe we' dakhyo: yao: bam nhag' lam: qao: ako". 15Yao: bam wa yao" mho" dao: jham re matae" gyo:- yao: bam: phug' pho" qe we' kad' to" ra" dao: thang" re yao: bam maphug' cao"- yao" ta" peim: dao: jham re pe" xan: masun: ngad: ako". Yao: bam wa pe" phug' made; ra" so alho jham re caung:pa" mung: yao: bam yao" gaung re pe" aphug' made, mo, boe" nhao: ako". Amung: yao: bam wa lhang" gam: mae" byumyu" qenho: thung" li jham re cao" ako". Aibam: lag maqu" yu nae" qhid' mae" ta" ra" Asang: amyin" dao: re maphug' cao" ngad: ako". 16Yao: bam wa yao: bam: Mao"So Asang: tarha" jham alhab' re lhoe" pye' mung:- caung:pa" nae" to' nung: jaung nau" lho shid' dau: re kad' ako". Yao: bam wa so myhi" Ashe nho: khyao dau rere: kad' mung: kyi jham re caung:pa" ako". Bala so rere: caung da" byid' ako". 17Yao: bam yauggai- myiqe: zo: qere phad' ngaui" byid' ra" xeim: khyo" tarha" taung bug so jham re phad' ngaui" byid' ako". Yao: bam wa jan: zho: mo, we' geim phan" phan" mo, re dao: myid' ako". Yao: bam wa Asang: qhid' kheim: mae shad' ra" lo,mau" kad' nae" qhid' mae" yao: bam: gaung re bin sho' qhaug' to" ako". Amung: yao" nhag' jam: yo" rure lhau: zhung" ako". 18Asang wa Israel byu qere nhag' yo: mung:- ai bam re yao" qhid' kheim: mae" khe' thug' pye' ra". Yuda mung"dan: re za: tang" to" ra".
19Yuda byu qere: yao: bam: Mao"So Asang: tarha" jham re maphug' cao" ngad: ako". Yao: bam wa Israel byu qeyang cao" kad' ra" thung" li jham re lag qu" yu: ako". 20Asang wa Israel byu qe alhab' re ngag: pye' mung: yao: bam re qobo dae byid' ra". Amung: yao: bam re yao" qhid' kheim: mae" bin sho' khe' thug' pye' sho' se' da: be, khyad' kad' ra" gyevo qe: lo, khyo yao: bam re byid' pye' ra".
21 Asang wa Israel re Yuda mae" bin: kho' yu thao Israel byu qe wa Nebad nho: yauggai zo: Yeroboam re kho:kham kad' nhao: ako". Yeroboam wa yao: bam re Asang: yang shapye' nae" kad' mung:- qu" gyaug qu" lhaung sho' ra" qobo jham re qobo jhui" shad' ra". 22-23Asang wa yao" daui daui mo, lapa qe: nhad' khyo" yao: kad' nae"- ga: ta" to" ru we' dakhyo:- yao: bam re yao" qhid' kheim: mae" khe' thug' pye' sho'- yao: bam wa Yeroboam: thao cao" mung:- yao: shad' lhoe" ra" qobo alhab' re xo' yang: cao" kad' ako". Aimung: Israel byu qe wa ana" yao: bam na: jo, shiko" ra" Asuri mung" khyo pyaung" jhui" lo" ru qhug' ako".
Israel Mung" Mae Asuri Byu Qe Te" Na: Ru
24Assori khosin" wa Babelon,- Khutha- Iva- Hamad- Sepharaim vogaung: jham mae" byu qere pyaung" jhui" yu mung: pyaung" nha: pye' qhug' ko" ra". Israel byu qe: jo, qo ngad: ra" Samari vogaung: jham mae aibam re na nhao: to" ra". Yao: bam wa ai: vogaung: jham re sang: yu mung: aimae te" na: ako". 25Yao: bam aimae sao qhid' yete" na ko" au:- yao: bam wa Asang re macaung:pa" ngad: ako". Amung: Asang wa khang khyi jham re nhao: ke' yang: yao: bam daqhae: re bin" se' pye' ako". 26Yao" yang Samari vogaung: jham mae yete" nha: to" ra" byu qe wa ai: mung"dan: nho: so tarha" re maba geyang: ai: so wa khang khyi jham re nhao: ke' mung: yao: bam re bin" se' pye' ra" ga: Asuri khosin" re lota" kyo" ako". 27Aimung: khosin" pho" wa kyam: byu khyo" ngonhaung" jhui" lo: ra" khinjaung qemae" dayaug re dam: tug' dai" ke' ge,. Ai: mung"dan: so: nho: tarha" re mung" byu qere mho" byid: nae" qhid' mae" yao: re aimae lo" na nhao ge,- ga: amyin" byid' ra". 28Amung: Samari mae" pyaung" lo" qhug' ra" khinjaung dayaug wa lo" mung: Bethela jo, qo mae lo" na mung:- mung" byu qe Asang re khoru: caung:pa" genae" khyo lo" mho" byid' ra".
29Ngadqere: Samari mae lo" te" na ko" ra" mung" byu qe wa xo' yang: yao: bam yao" so alho jham re kad' mung: aijham re Israel byu qe kad' to" ra" phan zaung jham mae ke' to" ako". Yao: phung: yao: yao: bam yao: na: ra" vogaung: jham mae so alho jham re kad' ako". 30Babelon byu qe wa Sukhod Benod so alho jham- Khutha byu qe wa Nerga so alho jham- Hamad byu qe wa Ashima so alho jham- 31Iva byu qe wa Nibha we' Tartag so alho jham- Sepharaim byu qe wa yao: bam: so Adrameleg we' Anameleg re phad' ngaui" xeim: khyo" yao: bam: zoshao qere ngaui" xeim: ngaui" byid' ako". 32Ai: byu qe wa Asang rere: caung:pa" mung: tarha" taung bug so re caung:pa" ra" jo, qo mae yao: bam: qhid' mae" aimae ngaui" xeim: ngaui" byid: nae" khinjaung qekhyo" caung: da" byid' ra" byu aja: ja rere: yao: bam: phaung mae" khyin: yu: ako". 33Airu: yao: bam Asang re caung:pa" gengadqere: yao: bam wa yao: bam li" ra" mung"dan: qe mae" thung" li jham re cao" yang: yao: bam yao" so jham rere: caung:pa" ako".
34Yao: bam wa ana" ba joe" sho' yao: bam yao" thung" li jham re ci: ashiko". Yao: bam wa Asang rere: macaung:pa" yao" yang Israel ga: mhang" byid' ra" Yaku nho: myid:zo: qere byid' ra" tarha" we' amyin" dao: jham rere: maphug' cao" ngad: ako". 35Asang wa yao: bam we' dao: thang" kad' to: mung: yao: bam re- gatau: so jham re dacaung:pa" ge,- aijham re dagoe; pa" ge,- dacaung da" ge, ngaui" xeim: re: dangaui" byid: ge,. 36Naonhaung" wa qi" qhang: ra" qam: so' we' qam" yang Egutu mung" mae" naonhaung" re jhui" thug' lo: ra" Asang ngore mho dao: gyo: nae" ngad: ako". Naonhaung" wa ngore goe; pa" mung: ngaui" xeim: ngaui" byid: nae" ngad: ako". 37Naonhaung" wa ngoyang naonhaung" qhid' mae" tung" byid' to" ra" tarha" we' amyin" dao: jham re khonhae" re: phug' cao" nae" ngad: ako". Gatau: so jham re naonhaung" magai: phug' cao" nae". 38Naonhaung" we' ngo kad' to" ra" dao: thang" re naonhaung" magai: to" myhid' genae". 39Naonhaung" wa naonhaung" Mao"So Asang ngore mho dao: gyo: mung: naonhaung" gyevo qe: lo, mae" ngo naonhaung" re khyad' yu nae" ga: amyin" byid' to" ra". 40Ngadqere: ai: byu qe wa manug: tae" gyo: ngad: ako". Yao: bam wa yao: bam: thung" li xug' jham re xo' yang: cao" ako".
41Aimung: byu qe wa Asang re caung:pa" ako". Ngadqere: yao: bam wa yao: bam: so alho jham rere: caung:pa" ako". Ana" ba joe" sho' yao: bam: myid:zo: qe wa airu: dakhyo: za: xo' yang kad' ako".
Currently Selected:
2 KHO:KHAM 17: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009
