Marika 2
2
Sa Vakabula e Dua na Tamata Paralase ko Jisu
(Maciu 9.1-8; Luke 5.17-26)
1Sa bogi vica, sa qai curu tale ki Kapenaumi ko koya; a sa qai rogovaki ni sa tiko e vale. 2A ra sa lewe vuqa sa soqoni vata sara mai, a sa sega kina na tikina me rauti ira, e segai e na mata ni katuba. A sa vunautaka na vosa vei ira ko koya. 3A sa qai lako mai vei koya eso, eratou kauta mai e dua sa tauvi-paralase, sa colati koya e le va. 4Ia ni ratou sa sega ni torovi koya rawa e na vukudra na lewe vuqa, eratou sa basuka na dela ni vale sa tiko kina ko koya; ia ni ratou sa basuka sara, eratou sa tukuca sobu nai mocemoce sa davo kina ko koya sa tauvi-paralase. 5Ia ni sa raica ko Jisu na nodratou vakabauta, sa kaya vua sa tauvi-paralase, “Na luvequ, sa vosoti na nomu i valavala ca.” 6Ia ka so na vunivola era sa tiko kina, a ra sa veinanuyaka e lomadra, ka vakaoqo, 7“Sa vosavakacacataka na Kalou ko koya oqo e na vuku ni cava? Ko cei tale sa vosota rawa nai valavala ca, a Kalou duaduaga?” 8Sa kila sara e yalona ko Jisu ni ra sa veinanuyaka vakakoya e lomadra, ka sa kaya vei ira, “A cava dou sa veinanuyaka kina na ka oqo e na lomamudou? 9A cava vei rau e rawarawa cake, me kaya vua sa tauvi-paralase, ‘Sa vosoti na nomu i valavala ca,’ se me kaya, ‘Mo tucake, ka kauta na nomu i mocemoce, ka lako?’ 10Ia mo dou kila kina ni sa tu vua na Luve ni Tamata na kaukauwa e vuravura me vosota nai valavala ca”—ka sa qai kaya ko koya vua sa tauvi-paralase— 11“Au sa kaya vei iko, mo tucake, ka taura na nomu i mocemoce, ka lako ki na nomu vale.” 12A sa tucake sara ko koya, ka taura na nonai mocemoce, ka lako yani e na matadra kecega; a ra sa kurabui kecega kina, ka vakarokorokotaka na Kalou, ka kaya, “Eda sa sega ni raica eliu na ka e vakaoqo na kenai valavala.”
Sa Kacivi Livai ko Jisu
(Maciu 9.9-13; Luke 5.27-32)
13A sa lako tale yani ko koya ki matasawa, a ra sa lako vei koya ko ira kecega na lewe vuqa, a sa vakavulici ira ko koya.
14Ia ni sa lako voli yani, sa raici Livai na luve i Alifio sa tiko e na vale ni soli vakacavacava, a sa kaya vua, “Muri au.” A sa cavu tu ko koya, ka muri koya.
15Ia ni sa tiko ko koya e na nona vale me kana, era sa lewe vuqa na kumuna nai vakacavacava kei na tamata i valavala ca era sa tiko me kana vata kei Jisu kei ira na nona tisaipeli—ni ra sa lewe vuqa era sa muri koya. 16Ia ni ra sa raica ko ira na vunivola kei ira na Farisi ni sa kana vata ko koya kei ira sa kumuna nai vakacavacava kei ira na tamata i valavala ca, era sa kaya vei ira na nona tisaipeli, A cava sa kana vata ka gunu vata kina ko koya kei ira sa kumuna nai vakacavacava kei ira na tamata i valavala ca? 17Ia ni sa rogoca ko Jisu, sa kaya vei ira, “Sa sega ni yaga na vuniwai vei ira sa bula vinaka, vei ira ga sa tauvi-mate. Au sa sega ni lako mai me'u kacivi ira sa yalododonu, ko ira ga nai valavala ca, me ra veivutuni.”
Na Taro me Baleta na Lolo
(Maciu 9.14-17; Luke 5.33-39)
18A ra sa daulolo ko ira na tisaipeli i Joni kei na nodra tisaipeli na Farisi. A ra sa lako mai ka kaya vua, “A cava sa lolo kina ko ira na tisaipeli i Joni kei na nodra tisaipeli na Farisi, ia na nomu tisaipeli era sa sega ni lolo?” 19A sa kaya vei ira ko Jisu, “Era sa lolo rawa li na weka ni tagane sa qai vakawati, ni sa tiko vata kei ira na tagane sa qai vakawati? Ni sa tiko ga kei ira na tagane sa qai vakawati, era sa sega ni lolo rawa. 20Ia ena yaco mai na siga, ena kau tani kina vei ira na tagane sa qai vakawati; ka ra na qai lolo e na gauna ko ya. 21Ia sa sega na tamata sa cula vata na tiki ni sulu vou kei nai sulu madra. Ke sa vakakina, ena dresuka na kena madra na tikina vou sa botani kina, a sa kadresu vakalevu kina. 22Sa sega talega na tamata sa vakataloca na waini vou ki na tavaya kuli-ni-manumanu madra; ke sa vakakina, ena vakacabotetaka na tavaya na waini vou, ka na dave yani na waini, ka rusa na tavaya; e vinaka ga me vakataloca na waini vou ki na tavaya vou.”
Na Taro me Baleta na Siga ni Vakacecegu
(Maciu 12.1-8; Luke 6.1-5)
23 #
Vrua 23.25
A sa lako ko koya e loma ni veiwere ni sila e na Siga ni Vakacecegu; ia ni ra sa lako voli na nona tisaipeli, era doloka na veisola ni sila. 24A sa kaya vua ko ira na Farisi, “Raica, a cava era sa kitaka kina ko ira e na Siga ni Vakacecegu na ka e sega ni tara?” 25Sa qai kaya vei ira ko koya, “Dou sa sega beka ni wilika na ka sa kitaka ko Tevita, ni sa sega na kena, ka sa viakana ko koya kei ira sa tiko vata kaya? 26#Vsoro 24.9#1Samu 21.1-6Ni sa curu ko koya ki na vale ni Kalou, e na gauna i Epaiaca na bete levu, ka sa kania na madrai dauraici, oqori sa sega ni tara me laukana, sa tara duaduaga vei ira na bete, ka sa solia talega vei ira era sa tiko vata kaya.” 27Sa kaya talega vei ira, “Sa caka na Siga ni Vakacecegu e na vukudra na tamata, e sega ni caka na tamata e na vuku ni Siga ni Vakacecegu; 28ia sa Turaga talega ni Siga ni Vakacecegu na Luve ni Tamata.”
Currently Selected:
Marika 2: FRV21
Highlight
Share
Copy
Want to have your highlights saved across all your devices? Sign up or sign in
