Vakatekivu 26
26
Na Vosa ni Yalayala ni Kalou kivei Aisake
1A sa dausiga na vanua, ka duatani nai matai ni dausiga ka yaco e na gauna i Eparaama. A sa lako ko Aisake kivei Apimeleki na tui ni kai Filisitia, ki Kira. 2A sa rairai vua ko Jiova, ka kaya, “Mo kakua ni lako sobu ki Ijipita; mo tikotiko ga e na vanua ka'u a vosa kina vei iko. 3#Vteki 22.16-18Mo tiko vulagi ga e na vanua oqo, ia ka'u na tiko vata kei iko, ka vakalougatataki iko; ni'u na solia vei iko kei ira na nomu kawa na veivanua kecega oqo; ia ka'u na vakataudeitaka na noqu bubului vei Eparaama na tamamu. 4Ia ka'u na vakalewevuqataka na nomu kawa me ra vaka na kalokalo kei lomalagi, ka solia talega na veivanua kecega oqo vei ira na nomu kawa; ena kalougata talega na veimatanitu kecega e vuravura e na nomu kawa, 5ni sa vakarorogo ki na noqu vosa ko Eparaama, ka vakabauta na ka ka'u a lesia, na noqu i vakaro, na noqu i lesilesi, kei na noqu lewa.”
Ko Aisake kei Apimeleki
6A sa tiko ga mai Kira ko Aisake. 7#Vteki 12.13; 20.2Ia ko ira na tamata e na yasana ko ya ni ra sa tarogi koya e na vuku ni watina, a sa kaya ko koya, “A ganequ ko koya”; ni sa rere ni kaya, “A watiqu,” ni sa nanuma, “de ra na vakamatei au na tamata e na vanua ko ya e na vuku i Repeka, ni sa matavinaka ko koya.” 8Ia ni sa tiko vakadede mai kea ko Aisake, sa iro yani e na katuba ko Apimeleki na tui ni kai Filisitia ka raici Aisake ni rau veiqitori tiko kei Repeka na watina. 9A sa kacivi Aisake ko Apimeleki, ka kaya, Raica, sa dina ga sa watimu! Ia na cava ko a kaya kina, Sa ganequ ko koya?
A sa kaya vua ko Aisake, E na vuku ni'u a kaya, De'u na qai vakamatei e na vukuna. 10A sa kaya ko Apimeleki, A cava mada na ka oqo ko sa mai kitaka vei keimami? E rawarawa me veimoceri loa kei na watimu e dua vei ira na tamata, ia ko sa qai vakavuna vei keimami nai valavala ca. 11A sa vakaroti ira kecega na tamata ko Apimeleki, ka vaka, Ko koya sa tara na tamata oqo, se na watina, ena vakamatei vakaidina.
12A sa kabukaburaki e na vanua ko ya ko Aisake, ka kumuna na kena vakadrau e na yabaki ko ya; ka sa vakalougatataki koya ko Jiova. 13A sa tubu me tamata yaco na tamata oqo, a sa toso cake ka tubu tiko me vutuniyau sara. 14A sa taukena na qele ni sipi kei na bulumakau, ka sa lewe vuqa na nona tamata. A ra sa vuvutaki koya na kai Filisitia. 15Ia nai keli-wai kecega era kelia na tamata nei tamana, e na gauna i Eparaama na tamana, era sa vakasosoga e na qele ko ira na kai Filisitia. 16A sa kaya vei Aisake ko Apimeleki, “Mo lako tani vei keimami; ni ko sa kaukauwa sara, ka sa malumalumu koi keimami.”
17A sa lako tani mai kea ko Aisake, ka birika na nona veivalelaca e na buca mai Kira, ka sa tiko mai kea. 18A sa kelia tale ko Aisake nai keli-wai ka sa keli eliu e na gauna i Eparaama na tamana; ni ra sa vakasogota na kai Filisitia ni sa mate ko Eparaama; a sa vakayacana e na yaca ka vakatoka kina eliu ko tamana. 19Ia ni ra sa kelikeli e na buca na tamata nei Aisake ka kunea kina e dua nai keli-wai vure, 20era sa qai veiletitaka ko ira nai vakatawa ni manumanu mai Kira kei ira nai vakatawa ni manumanu i Aisake, a ra sa kaya, “Sa neitou na wai.” A sa vakatoka kina ko koya na yaca ni keli-wai ko Eseki,#26.20 Kenai balebale Veileti e na vuku ni ra sa veileti kaya. 21A ra sa qai kelia e dua tale nai keli-wai, ka ra sa veileti talega kina; a sa vakayacana kina ko koya ko Sitina.#26.21 Kenai balebale Veimecaki 22A sa toki tani mai kea ka kelia e dua tale nai keli-wai, ka ra sa sega ni veiletitaka; a sa vakayacana ko koya ko Riopoci,#26.22 Kenai balebale Vanua lalaga se Rumu ni sa kaya, “Sa qai vakalalagataki keda ko Jiova, ia eda na qai tubu e na vanua oqo.”
23A sa lako cake mai kea ki Peri-sepa. 24A sa rairai vua ko Jiova e na bogi ko ya, ka kaya, “Koi au na Kalou i Eparaama na tamamu; kakua ni rere, ni'u sa tiko vata kei iko, ia ka'u na vakalougatataki iko, ka vakalewevuqataka na nomu kawa, e na vuku i Eparaama na noqu tamata.” 25A sa cakava mai kea e dua nai cabocabo-ni-soro, ka masuta na yaca i Jiova, a sa birika mai kea na nona valelaca. A ra sa kelia mai kea e dua nai keli-wai na tamata i Aisake.
Veiyalayalati ko Aisake kei Apimeleki
26 #
Vteki 21.22
A sa lako vua ko Apimeleki mai Kira kei Ausaci e dua na nona i tokani, kei Fikoli na kavetani ni nona mataivalu. 27A sa kaya vei iratou ko Aisake, “A cava dou sa lako mai kina vei au, ni dou sa cati au, ka talai au tani vei kemudou?” 28A ratou sa kaya, “Keitou a kunea vakaidina ni sa tiko kei kemuni ko Jiova; ia keitou a kaya, me dua mada na bubului vei kedatou, io vei keitou kei kemuni, me keitou ia talega na veiyalayalati kei kemuni 29mo ni kakua kina ni vakacacani keitou, me vaka ga ni keitou a sega ni vakacacani kemuni, ni keitou sa sega ni cakava vei kemuni e dua na ka ca, na ka vinaka ga, ka sa talai kemuni yani e na vakacegu. Koi kemuni sa vakalougatataki vei Jiova.” 30A sa caka magiti vei iratou ko koya, a ratou sa kana ka gunu. 31A ratou sa sou e na mataka, ka bubului vakai iratou. A sa talatala vei iratou ko Aisake, a ratou sa lako tani vua e na vakacegu. 32Ia e na siga dina ko ya, era sa lako mai na tamata nei Aisake, ka tukutuku vua e na vuku ni keli-wai era sa kelia, ka vaka, “Keitou sa kunea na wai!” 33A sa vakayacana ko koya ko Sepa;#26.33 A vosa ka rogorogo vaka na vosa vakaIperiu na bubului o koya sa vakatokai kina na yaca ni koro ko ya ko Peri-sepa me yacova na gauna oqo.
Yalewa Tani e Wati Iso
34Ia ni sa vasagavulu na yabaki i Iso, sa vakawati kei Jutici, ko koya na luve i Pieri vei ira na Itaiti, kei Pasemaca na luve i Eloni vei ira na Itaiti; 35ia koi rau oqo sa rarawa kina na loma i Aisake kei Repeka.
Currently Selected:
Vakatekivu 26: FRV21
Highlight
Share
Copy
Want to have your highlights saved across all your devices? Sign up or sign in
