Cakacaka 2
2
Na Lako Mai ni Yalo Tabu
1 #
Vsoro 23.15-21; Vrua 16.9-11 Ia ni sa yaco sara na siga ni Penitiko, era sa tiko lomavata ko ira kecega e na dua na tikina. 2Sa qai lako vakasauri mai lomalagi e dua na rorogo, e vaka na cagi vakacevaruru kaukauwa, a sa vakasinaita na vale taucoko era sa tiko kina. 3A sa rairai vei ira na ka e vaka na veiyameyame ni bukawaqa sa dui veisebayaki, a sa tiko yadua vei ira vakaaduaga. 4A ra sa vakasinaiti kecega e na Yalo Tabu, a ra sa vakatekivu me vosataka na vosa tani eso, me vaka sa solia vei ira na Yalo Tabu me ra cavuta.
5A sa tiko mai Jerusalemi na Jiu eso, a tamata lotu, mai na veivanua kecega e ruku i lomalagi. 6Ia ni sa rogovaki yani na ka oqo, era sa soqoni vata na lewe vuqa, a ra sa kurabui ni ra sa dui rogoci ira na tamata yadua ni ra sa vosataka na nona vosa. 7A ra sa kidacala kecega ka kurabui, ka kaya vakai ira, “Raica, era sa sega li ni kai Kalili ko ira kecega oqo era sa vosa? 8Ia ka vakaevei oqo ni da sa rogoca koi keda kecega, e na noda vosa eda a sucu kaya? 9Ko ira na kai Paricia, kei Mitia, kei Ilama, kei ira sa tiko mai Mesopotemia, kei Jutia, kei Kapatosia, mai Ponito, kei Esia, 10mai Firijia, kei Pamifilia, mai Ijipita, kei na yasayasa vaka-Libiya e voleka ki Kirini, kei ira na vulagi mai Roma, ko ira na Jiu, kei ira sa vuki ki na lotu vaka Jiu, 11ko ira na kai Kiriti kei Arapea—eda sa rogoci ira ni ra sa tukuna e na noda vosa na nona cakacaka veivakurabuitaki na Kalou.” 12A ra sa kurabui kecega ka kidroa, ka sa veikayaka vakai ira, “A cava nai balebale ni ka oqo?” 13Ia era sa vakalialia ko ira eso tale, ka kaya, “Era sa mateni e na waini vou.”
Sa Vunau ko Pita
14Sa qai tucake ko Pita, kei ira na le tinikadua, ka sa tabalaka cake na domona, ka tukuna vei ira, “Oi kemudou na Jiu, kei kemudou kecega sa tiko e Jerusalemi, mo dou kila na ka oqo, ka rogoca na noqu vosa. 15Ni ra sa sega ni mateni ko ira oqo, me vaka na ka dou sa nanuma, ni sa kenai katolu ga ni aua. 16Ia sai koya ga oqo sa tukuna na parofita ko Joeli:
17 #
Joeli 2.28-32
‘Sa kaya na Kalou, Ena yaco e na gauna mai muri,
ka’u na sovaraka na Yaloqu kivei ira na tamata kecega,
era na parofisai kina ko ira na nomudou gonetagane kei ira na nomudou goneyalewa,
ia ena raica na raivotu eso ko ira na nomudou cauravou,
ia ena tadrataka na tadra eso ko ira na nomudou qase.
18Io, vei ira talega na noqu tamata kei na noqu vada,
ka’u na sovaraka na Yaloqu e na gauna ko ya;
a ra na parofisai kina.
19Ia ka’u na vakatakila na ka e veivakidacalataki eso mai lomalagi e cake,
kei nai vakatakilakila eso e vuravura e ra,
na dra, kei na bukawaqa, kei na o kubou.
20Ena vuki na mata-ni-siga me butobuto,
kei na vula me dra,
ena qai yaco e muri na siga i Jiova sa levu ka rogo tiko.
21Ia ena yaco ko koya yadua ena masuta na yaca i Jiova ena bula.’
22“Oi kemudou na tamata na Isireli, rogoca na vosa oqo: Ko Jisu na kai Nasareci, a tamata sa vakadinadinataka vei kemudou na Kalou e na cakacaka-mana, kei na ka e veivakurabuitaki eso, kei nai vakatakilakila eso, sa solia na Kalou kivei koya me cakava e na kemudou maliwa, me vaka dou sa kila— 23#Maciu 27.35; Mari 15.24; Luke 23.33; Joni 19.18ko Jisu oqo, ni sa soli oti yani vei kemudou, me vaka ka nakita dina na Kalou ka lewa eliu, dou sa taura ka vakota ki na kauveilatai ka vakamatea e na ligadra na tamata ca. 24#Maciu 28.5,6; Mari 16.6; Luke 24.5Ia sa vakaturi koya cake na Kalou, ni sa sereki koya mai nai vau ni mate, ni sa sega ni rawa me vauci tikoga kina ko koya. 25#Same 16.8-11Ni sa vosa me baleti koya ko Tevita, ka kaya,
‘Au a raici Jiova tikoga ni sa tu e mataqu,
ni sa tu ko koya e na ligaqu i matau, ka’u sa sega kina ni vakayavalati;
26o koya oqo sa reki kina na yaloqu, ka sa marau na yamequ;
ena vakacegu talega na lewequ e nai nuinui.
27Ni kemuni na sega ni biuta na yaloqu mai Etesi,
se laiva na nomu Le Dua Yalosavasava me vakacacani.
28Ko ni sa vakatakila mai vei au na sala ni bula;
ko ni na vakasinaiti au e na marau mai na matamuni.’
29“Oi kemudou na veiwekani, dou vosota ni’u sa doudou me'u tukuni Tevita na noda qase vei kemudou, ni sa mate ko koya ka bulu, ka sa tu ga vei keda na nona i bulubulu ka yacova na siga oqo. 30#Same 132.11; 2Samu 7.12,13Ia ni sa parofita ko koya, a sa kila ni sa bubului vua na Kalou ni na tubu mai vua ko ira ena vakatubura mai kina ko koya na Karisito, me tiko e na nona i tikotiko vakaturaga. 31Ia ni sa kila eliu, sa tukuna na nona tucake tale mai na mate na Karisito,
‘ni na sega ni biu tu mai Etesi,
se me vuca mai na yagona.’
32Ko Jisu oqo sa vakatura cake na Kalou, ka sai vakadinadina ni ka oqo koi keitou kecega. 33Ia ni sa kau cake e na liga i matau ni Kalou, ka rawata ko koya mai vei Tamana na Yalo Tabu ka yalataki, sa qai sovaraka mai na ka oqo, dou sa qai raica ka rogoca. 34#Same 110.1Ni sa sega ni lako cake ki lomalagi ko Tevita, ia sa kaya ko koya,
‘Sa kaya ko Jiova vua na noqu Turaga,
“Mo tiko e na ligaqu i matau,
35me yacova ni'u sa vakamalumalumutaki ira mada na nomu meca mei tutu-ni-yavamu.” ’
36O koya oqo, me kila sara kina na vale i Isireli taucoko ni ko Jisu oqo, ko koya dou a vakota ki na kauveilatai, sa lesia na Kalou me Turaga ka Karisito talega.”
Nai Sevu ni Lotu
37Ia ni ra sa rogoca, sa laucoka na yalodra, a ra sa kaya vei Pita kei ira nai apositolo sa vo, “Oi kemudou na veiwekani, a cava me keimami kitaka?” 38Sa qai kaya vei ira ko Pita, “Dou veivutuni, ka papitaisotaki, koi kemudou yadua, e na yaca i Jisu Karisito, me vosoti kina na nomudou i valavala ca, ka dou na rawata na Yalo Tabu mei solisoli. 39Ni sa caka vei kemudou na vosa ni yalayala, vei ira talega na nomudou gone, kei ira vakaaduaga era sa vakayawa, io, vei ira vakayadua ga ena kacivi ira vua na Turaga na noda Kalou.” 40Ia sa vuqa tale na vosa sa tukuna ko koya ka vakarota, ka kaya, “Dou vakabulai kemudou mai nai tabatamata takelo oqo.” 41Ia ko ira sa vakabauta na nona vosa, era sa papitaisotaki, ka sa kenai kuri vei ira sa lotu e na siga ko ya e lewe tolu beka na udolu na tamata. 42A ra sa qarava matua na nodra i vakavuvuli nai apositolo kei na veilomani, kei na dovi madrai, kei na masumasu.
Na Bula ena Kedra Maliwa na Vakabauta
43A sa kani ira kecega na rere; a sa levu na ka e veivakurabuitaki kei nai vakatakilakila era sa kitaka ko ira nai apositolo. 44#Caka 4.32-35Ia ko ira kecega sa vakabauta era sa tiko vata, a ra sa dui solia na nona i yau yadua me ra taukena vata; 45a ra sa volitaka na nodra vanua kei na nodra i yau, a ra sa vota kivei ira kecega, me vaka na nodra dui dravudravua. 46A ra sa gumatua sara e na lako ki na vale-ni-soro e na veisiga, a ra sa lomavata, a ra sa dovi madrai e na veivale, a ra sa kania na kedra e na marau kei na yalo dina, 47ni ra sa vakavinavinaka tiko vua na Kalou, a sa vinakati ira ko ira na tamata vakaaduaga. Ia na Turaga sa vakaikuritaka kivei ira nai soqosoqo lotu, e na veisiga, na tamata era sa vakabulai tiko.
Currently Selected:
Cakacaka 2: FRV21
Highlight
Share
Copy
Want to have your highlights saved across all your devices? Sign up or sign in
