मर्कुस 15
15
येशुला पीलातसकीइ तोःङ्ला ख्योङ्क्योक
(मत्ती २७:१-२,११-२६; लुका २३:१-५,१३-२५; युहन्ना १८:२८–१९:१६)
1ङाःमु नुःपलारा छेस्यो पुजाहारीक्या, छेस्यो मीःक्या, छ्येइ ठीमगीइ लोबेनक्या ओःले थाम्जेर महासभाइ मीःक्या जोम्सी ओःले टेः पेःसी। खुङक्याइ येशुला ताःम्दी रोमी हाकीम पीलातससाःला खेर्सी। 2पीलातसकीइ खुङला टीःसी, “ची ख्या यहुदीक्याइ क्याःल्बु इःङे?” येशुइ लेःन लोदी लाःसी, “ओःखो नी ख्या राःङगीइरा लाःतेरा एः।” 3छेस्यो पुजाहारीक्याइ येशुला माःङ्बुरा तामक्याला माःताक्पा च्याःङ्सी। 4ओः सोङ्गारा, पीलातसकीइ खुङला फीर्च्या टीःसी, “लेःन लोजेला ख्या ङीमु चीङ म्याःपा? तादो ले खुङक्याइ ख्याला काःजे माःङ्बु माःताक्पा च्याःङ्देरा एः।” 5इःनाङ येशुइ चीङ लेःन मालो, ओः सोङ्गारा, पीलातस याःमाछाक नेसी।
6नीस्तार मेःलीङगीइ तीःजीला मीःक्याइ दाम्क्योक मेःराङ चीग कैदीला पीलातसकीइ पोःर्तेकेन्दी पेःउके। 7ओः तीःजीला बारब्बा मीःन पेःक्योक मेःराङ चीग मीः ओःले राःङ्सा चीङ मीःक्या चेङाङला एःके। ओः खुङक्याइ आन्दोलनला मीः सेती एःके। 8ओःले मीःक्याइ पोर्चोमगीइ पीलातससाःला ओःङ्सी ओःले ङीःइ लागी तेन्दुइ च्योःङ्रारा मेःन्दा चीग कैदीला पोःर्तेर लाःती खुङला वासी पेःगाला स्युःसी। 9पीलातसकीइ खुङक्याला टीःसी, “ची ङाः ख्याक्याइ लागी यहुदीक्याइ क्याःल्बुला पोःर्तेर्का ले?” 10छेस्यो पुजाहारीक्याइ सीःताङगीइरा येशुला खुङसाःला जुम्दी ख्योङ्क्योक इःङे लाःकेन ताम पीलातसकीइ याःबुले छोर्ती एःके।
11इःनाङ छेस्यो पुजाहारीक्याइ येशुला मीःङे, बारब्बालारा पोःर्तेर लाःती मीःक्याला लाःच्युसी। 12पीलातसकीइ मीःक्याला फीर्च्या टीःसी, “ख्याक्याइ यहुदीक्याइ क्याःल्बु लाःकेन्दीलादी ङाः ची पेःगा?” 13खुङक्याइ केताङ्देरा लाःसी, “ओःखोला क्रुसला प्याङ्दो!” 14पीलातसकीइ टीःसी, “दीखोइ ची माःताक्पा पेःदी एःपा?” इःनाङ खुङक्याइ ताःरुङ माःङ्बु केताङ्दी लाःसी, “ओःखोला क्रुसला प्याङ्दो!” 15पीलातसकीइ पोर्चोमला केःदाङ जोतेर्का लाःती बारब्बाला पोःर्तेसी। ओःले खुङगीइ येशुलादी कोर्रा क्याःप्च्युसी ओःले क्रुसला प्याङ्जेला थेक्याला क्याप च्योल्सी।
थेक्याइ येशुला ङ्याप्च्युक पेःक्योक
(मत्ती २७:२७-३१; युहन्ना १९:२-३)
16थेक्याइ येशुला छ्योम्बो हाकीमगीइ क्याःल्खाङनाःङ्गीइ इल्दोकला खेर्सी ओःले खुङक्याइ छोबाइ राःङ्सा थाम्जेर थेक्याला केक्याःप्ती ख्योङ्सी। 17खुङक्याइ येशुला बैजनी रङगीइ फोँस्योक#१५:१७ बैजनी रङगीइ फोँस्योक ओः तेःकासु ओःम्डुबा बैजनी रङगीइ केःला क्याःल्बुइ केःङ्गुके। केङ्तेर्सी ओःले छेर्मागीइ मुकुट जोदी गोला केङ्तेर्सी। 18ओः तीङ्ला खुङक्याइ येशुला ङ्याप्च्युक पेःसी ओःले केताङ्दी लाःकाला स्युःसी, “यहुदीक्याइ क्याःल्बुइदी जय काःल्ज्युक!” 19ओःले खुङक्याइ माःङ्बुरा थाङ्मा येशुइ गोला नीमाइ पेःर्काइ रोप्सी, खुङला छेमाक क्याःप्सी ओःले पीमु चुदी ङ्याप्च्युक पेःदेरा खुङला फ्या छाल्सी। 20एःन्डुले ङ्याप्च्युक पेःसीःङ्मीःजीक खुङक्याइ ओः बैजनी रङगीइ फोँस्योक पीती खुङगीइ राःङगीइ केःला केङ्तेर्सी। ओः तीङ्ला खुङक्याइ येशुला क्रुसला प्याङ्जेला पाङ्ला खेर्सी।
येशुला क्रुसला प्याङ्क्योक
(मत्ती २७:३२-४४; लुका २३:२६-४३; युहन्ना १९:१७-२७)
21खुङक्या लाःमला डोदेरा पेःगासुना सीमोन लाःकेन मेःन्दा चीग मीः क्याःसाछ्योले ओःङ्देरा पेःक्योक फ्रेसी। थेक्याइ खुङला येशुइ क्रुस जबरजस्ती खुर्च्युसी। (खुङ कुरेनी क्याःसाइ मीः एःके ओःले खुङ अलेक्जेन्डर रा रुफसकीइ आबा एःके।) 22ओःले खुङक्याइ येशुला गलगथा लाःकेन ठाउँला ख्योङ्सी। (गलगथा लाःक्योकदी रीःसीलगीइ ठाउँ इःङे।) 23ओःला लेःप्ती खुङक्याइ येशुला मुर्र लाःकेन मेन सेक्योक अङ्गुरकीइ नीःङ्गार तेर्सी। इःनाङ येशुइ माःथुङ। 24ओः तीङ्ला खुङक्याइ येशुला क्रुसला प्याङ्सी। ओःले खुङक्याइ येशुइ केःलाइ काःखो बो काँःदीइ ज्योर्केन्दी लाःती बो जोजेला चीट्ठा लुसी।
25येशुला क्रुसला प्याङ्सुना ङामुइ कुः बाज्तीदी एःके। 26खुङला माःताक्पा च्याःङ्क्योक ताम क्रुसला एःन्डुले प्रुःदी एःके “यहुदीक्याइ क्याःल्बु”। 27येशुला क्रुसला प्याङ्सुना खुङक्याइ मेःराङ ङी च्याःक्पाक्यालाङ चीगला येशुइ च्याःबुछ्योले ओःले राःङ्सादीला योमाछ्योले क्रुसला प्याङ्सी। 28[“खुङला माःताक्पा मीःक्या ङीमुरा टाःङ्सी”#यशैया ५३:१२ लाःती छ्येइ पेज्याला प्रुःक्योक ताम एःन्डुले छाङ्सी।]
29ओः लाःम पेःदेरा डोगेनक्याइ गो योङ्देरा येशुला ङ्याप्च्युक पेःदेरा लाःसी, “लो तादो ले! कोन्ज्योइ मन्दीर रोम्दी फीर्च्या ङीःमा सुमलारा जोगेन्दी! 30ओःन्डु एःना क्रुसलाःम्ले पाःप्तो ओःले राःङला सेन्च्युदो!” 31ओःन्डुलेरा छेस्यो पुजाहारीक्या ओःले छ्येइ ठीमगीइ लोबेनक्याइयाङ येशुला ङ्याप्च्युक पेःसी। खुङक्याइ राःङ राःङरा लाःलुङ चासी, “खोइ राःङ्साला नी सेन्च्युसी, इःनाङ राःङलारादी सेन्च्युमाःखु! 32दीखो इस्राएलगीइ क्याःल्बु, थार्च्युगेन ख्रीष्ट क्रुसलाःम्ले पाःप्ती ओःङ्ज्युक, ओःले ङीःइ ओःखो थोङे ओःले सेमल्हुक लुगे।” येशु ङीमुरा क्रुसला प्याङ्क्योक मेःन्दा ङी च्याःक्पाक्याइयाङ खुङला ङ्याप्च्युक पेःसी।
येशु सीक्योक
(मत्ती २७:४५-५६; लुका २३:४४-४९; युहन्ना १९:२८-३०)
33ङीःमा फेमीःजीक घण्ट सुमथुप देशकाःङरा नाक्जुककीइ उप्सी। 34सुम बज्तीसुना येशुइ छ्योम्बो के तेङ्दी लाःसी, “इलोइ, इलोइ लामा सबखथनी?” दीखोइ लेःन इःङे, “ङाःइ कोन्ज्यो, ए ङाःइ कोन्ज्यो, ङाःला चीले त्यग्तीक्योक?”#भजन २२:१ 35चीङ मीःक्याइ येशु एःन्डुले केताङ्क्योक कोःसी ओःले एःन्डु लाःसी, “कोःदो ले! दीखोइ नी एलीयाला का केक्याःप्कुदु।” 36ओःले मेःराङ चीग छ्योङ्देरा काःल्दी रुवाला कीर्पु अङ्गुरकीइ नीःङ्गार पादी नीमाइ च्योदोकला ज्यादी येशुइ खाला ज्यातेर्सी ओःले लाःसी, “कुःदो, कुःदो, काःलेङ एलीया ओःङ्दी दीखोला क्रुसलाःम्ले पाप्कुदुबा की तागा!” 37इःनाङ ओः तीःजीलारा येशुइ छ्योम्बो के तेङ्सी ओःले खुङगीइ उ काःल्सी।
38ओः तेःकासुरा कोन्ज्योइ मन्दीर नाःङ्ला प्याङ्क्योक पर्दा थोमीःजीक वाःथुप कील्ला राःल्दी बो ङी काःल्सी। 39येशुइ उ एःन्डुले काःल्योक थोङ्दी क्रुसकीइ तोःङ्ला लाःङ्दी तेःक्योक रोमी कप्तानगीइ लाःसी, “तेःन्दामरा दी मीः नी कोन्ज्योइ पुः इःङेन दुबा!” 40ओःला थारीःङ्बुले तादी तेःकेन चीङ पेःन्पीःजाक्या एःके। खुङक्या नाःङ्ला मरीयम मग्दलीनी, छ्यामे याकुब रा योसेफकीइ आमा मरीयम ओःले सलोमी एःके। 41येशु गालीलला एःकासुना खुङक्याइ येशुला ब्य्राङ्दी एःके ओःले खुङला मेःबा पेःदी एःके। येशु ङीमु यरुशलेमला ओःङ्क्योक राःङ्सा माःङ्बुरा पेःन्पीःजाक्याङ ओःला एःके।
येशुला तुःर्सा नाःङ्ला ज्याक्योक
(मत्ती २७:५७-६१; लुका २३:५०-५६; युहन्ना १९:३८-४२)
42दीखो ङीःमादी ङार्तो च्योःङ्रा यहुदीक्याइ ङाःल सोगेन ङीःमाइ लागी तयारी पेःगेन ङीःमा एःके। नुःप छेसीःङ्क्योक सोङ्गारा, 43अरीमाथीया क्याःसाइ योसेफकीइ जीरा माःजीबा पीलातससाःला काःल्दी येशुइ फुम्बु लाःङ्सी। खुङदी यहुदीक्याइ महासभाला सेःसा पेःक्योक मीः एःके ओःले खुङगीइ कोन्ज्योइ क्याःल्खापकीइ लाःम तादी तेःती एःके।
44येशु सीसीःङ्दु लाःक्योक कोःदी पीलातसला याःमाछाक नेसी। खुङगीइ रोमी कप्तानला केक्याःप्ती येशु सीसीःङ्क्योकरा इःङे लाःती टीःसी। 45येशु सीसीःङ्क्योक ताम पीलातसकीइ कप्तानलाःम्ले कोःमीःजीक योसेफला येशुइ फुम्बु खेर्चे तेर्सी। 46योसेफकीइ याःबु सुतीइ केःला ङ्योःदी ख्योङ्सी ओःले येशुइ फुम्बु क्रुसलाःम्ले पाप्ती ओः केःलाला तुम्सी ओःले ओःखोला च्यार्का तोः तुप्ती जोक्योक फुक च्योःङ्रा तुःर्साला ज्यासी। ओः तीङ्ला खुङगीइ छ्योम्बो तोः रील्दी तुःर्साइ कोः कातेर्सी। 47मरीयम मग्दलीनी ओःले योसेफकीइ आमा मरीयमगीइ येशु तुःर्साला ज्याक्योक तादी तेःती एःके।
Currently Selected:
मर्कुस 15: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
