मर्कुस 14
14
येशुला सेकेन तेःदाम
(मत्ती २६:१-५; लुका २२:१-२; युहन्ना ११:४५-५३)
1नीस्तार मेःलीङ ओःले खमीर मालुक्योक खुरा साःगेन मेःलीङगीइ ङीःमा ङी तोःङ्ला छेस्यो पुजाहारीक्याइ ओःले छ्येइ ठीमगीइ लोबेनक्याइ येशुला खाजुम्जुबाले जुम्दी सेकेन लाःम छोल्देरा एःके। 2इःनाङ खुङक्याइ एःन्डुबा लाःतेरा एःके, “मेःलीङगीइ तीःजीलादी उःइ दी लेःगा पेःजे मेःयोङे, मीःङे लाःना मीःक्याइ छ्योम्बो खैलाबैला ओःङेन एः।”
बेथानीयाला येशुला अभीषेक पेःक्योक
(मत्ती २६:६-१३; युहन्ना १२:१-८)
3येशु बेथानीया युःलला जे नाःजा थेङ्क्योक सीमोनगीइ खीमला एःके। खुङगीइ साःदेरा एःकासुना मेःराङ चीग पेःन्पीःजाइ नेकी#१४:३ नेकी दीखो नेकीदी सीलखडी लाःकेन्दी तोःलाम्ले जोक्योक इःङे। चीगला माःङ्बुरा छेन्दी रीःनगीइ सीःम्बु टीःमा तेर्केन माःर्कु ख्योङ्दी ओःङ्सी। खुङगीइ ओःखो नेकीइ खाप्च्यु च्यासी ओःले ओः जटामसीलाःम्ले जोक्योक माःर्कु येशुइ गोला लुतेर्सी। 4इःनाङ काँःदी काँःदीइदी सीःताङ पेःदी लाःकाला स्युःसी, “दी माःर्कु चीले खाती पेःक्योक? 5चीलेलाःना दी माःर्कु चोङ्क्योक एःना क्याः सुम भन्दा माःङ्बु ङुलगीइ टाङ्गा डेबा ओःङ्जे एःके ओःले ओः डेबा प्राङ्नाक्याला तेर्पाना ओःङ्जे एःके।” ओःले खुङक्याइ ओः पेःन्पीःजाला केताङ्सी।
6इःनाङ येशुइ लाःसी, “खुङला पोःर्तेर! ख्योक्या चीले खुङला केताङ्क्योक? खुङगीइ नी ङाःइ लागी माःङ्बुरा याःबु लेगा पेःदी एः। 7चीलेलाःना प्राङ्नाक्या नी ख्योक्या ङीमु तेन्दुरा तेःकुए, ओःले ख्योक्याला नाःम सेम थेपा ओः तीःजीला खुङक्याला याःबु पेःजे खुउए। इःनाङ ङाः नी ख्योक्या ङीमु तेन्दुरा मेःतेःए। 8दी पेःन्पीःजाइ ची पेःखुउबा ओःखोरा पेःदी एः। खुङगीइ ङाःइ जुबुला ङाः सीजेतोःङ्लारा तीःप्चेइ लागी तयार जोदी एः।#१४:८ ओः तेःकासु यहुदीक्याइ सीक्योक मीःइ जुबुला माःर्कु टुःल्गुके। ओः सोङ्गारा, ओः जुबु कुङ्जे तोःङ्ला याःबु टीःमा तेर्कुके। 9तेःन्दामरा ङाः ख्योक्याला लाःके, जाम्बुलीङ काःङ्रा काःला काःला दी याःबु लेःङ्गो प्रचार पेःबा, दी पेःन्पीःजाइ पेःक्योक लेःगाइ बारेलाङ मीःक्याइ टेःम्बा साल्गेन एः।”
यहुदाइ येशुला तुःक तेर्चेला ङीःन्क्योक
(मत्ती २६:१४-१६; लुका २२:३-६)
10ओःले मेःन्दा चीङ्ङी योबाक्या नाःङ्ला यहुदा इस्करीयोत लाःकेन योबादी छेस्यो पुजाहारीक्यासाःला काःल्दी येशुला जुम्जेला रोः पेःतेर्केन टेः पेःसी। 11यहुदाइ ताम कोःदी छेस्यो पुजाहारीक्या माःङ्बुरा केःदाङ काःल्दी खुङला डेबा तेर्केन ताःम्ज्या पेःसी। ओः सोङ्गारा, यहुदाइ येशुला जुम्दी खुङक्याला तेर्केन लाःम छोल्गाला स्युःसी।
येशुइ राःङगीइ योबाक्या ङीमु अन्तीम डेन साःक्योक
(मत्ती २६:१७-३०; लुका २२:७-२३; युहन्ना १३:२१-३०; १ कोरीन्थी ११:२३-२५)
12खमीर मालुक्योक खुरा साःगेन मेःलीङगीइ तोःङ्गीइ ङीःमा ओःङ्सी। ओःखो ङीःमाला नीस्तार मेःलीङगीइ लुःककीइ रीःउ बली तेर्कोःउके। येशुइ योबाक्याइ खुङला टीःसी, “ङीः काःला काःल्दी ख्याइ लागी मेःलीङगीइ डेन जोगा?”
13येशुइ मेःराङ ङी योबाक्याला लाःसी, “ख्योक्या क्याःसाला सुङ, ओःला ख्याक्याइ साःङ्बुङला छ्यु खुर्क्योक मेःन्दा चीग मीःला फ्रेकेन एः। खुङ स्युःगेन खीमथुप खुङगीइ 14तीङ तीङ्ला सुङ। ओःले ख्योक्याइ ओः खीमगीइ तोःप्ताला लोःप, ‘ङीःइ लोबेनगीइ एःन्डु लाःती एः, ङाःइ योबाक्या ङीमु तेःती नीस्तार मेःलीङगीइ डेन साःगेन कोठा काःला एःपा?’ 15खुङगीइ ख्योक्याला तेङ्खाला डेनगीइ लागी छेदी ज्याक्योक छ्योम्बो कोठा चीग तेङ्तेर्केन एः। ख्योक्याइ उःइ लागी ओःलारा डेन जोदो।” 16योबाक्या क्याःसाला काःल्सी ओःले थाम्जेर ताम येशुइ लाःक्योक च्योःङ्रारा ज्योर्सी ओःले खुङक्याइ नीस्तार मेःलीङगीइ डेन जोसी।
17कुःङ्मु काःल्मीःजीक येशु मेःन्दा चीङ्ङी योबाक्या ङीमु ओःङ्सी। 18डेन साःदेरा पेःगासुना येशुइ लाःसी, “तेःन्दामरा ङाः ख्योक्याला लाःके, ख्योक्या नाःङ्ला ङाः ङीमु साःदेरा पेःक्योक मेःराङ चीगकीइ ङाःला तुःक तेर्केन एः।” 19दी ताम कोःदी योबाक्याला तुःक्पु नेसी ओःले मेःन्दा रेः रेः पेःदी खुङक्याइ येशुला टीःगाला स्युःसी, “ची ओःखो ङाः इःङे?”
20येशुइ लाःसी, “ओःखो ख्योक्या मेःन्दा चीङ्ङी नाःङ्ला मेःन्दा चीग इःङे, ओःखोइदी ङाः ङीमुरा मेःन्ज्याला खुरा पादी साःदेरा एः। 21पेज्याला प्रुःक्योक च्योःङ्रारा ङाः मीःइ पुः नी सीराकोःउए, इःनाङ ङाःला तुःक तेर्केन मीःला काःन्डुबा जीबा लाःङ्जे च्योःङ्रा ओःङेन एः! ओःखो नी बरु केरामाकेक्योक एःना याःबु ओःङ्जे एःके!”
22खुङक्या साःदेरा एःकासुना येशुइ खुरा चीग लेःङ्दी कोन्ज्यो ङीमु मोलाम लाङ्सी ओःले च्यादीमाराङ योबाक्याला केःदी तेर्तेरा लाःसी, “दीखो लेःङ्दो, दीखो ङाःइ जुबु इःङे।” 23ओः तीङ्ला खुङगीइ मेःन्ज्या लेःङ्सी, कोन्ज्योला थुजीछे तेर्सी ओःले योबाक्याला तेर्सी ओःले खुङक्या थाम्जेरकीइ ओःलाःम्ले थुङ्सी। 24ओःले येशुइ लाःसी, “दीखो ङाःइ ठा इःङे, दी ठाइ कोन्ज्यो रा खुङगीइ मीःक्याइ कील्ला पेःक्योक ताःम्ज्याला ताःम्गुए। दी ठा माःङ्बुरा मीःक्याइ लागी स्याःल्च्युगेन एः। 25तेःन्दामरा ङाः ख्योक्याला लाःके, ङाःइ कोन्ज्योइ क्याःल्खापला अङ्गुरकीइ सेम्बा नीःङ्गार माःथुङथुप फीर्च्या दी आङ्गुरकीइ नीःङ्गार मीःथुङेन एः।” 26ओः तीङ्ला खुङक्याइ भजन चीग लेःङ्सी ओःले जैतुङ काःङला काःल्सी।#१४:२६ यहुदीक्याइ डेनगीइ साःप्च्या साःमीःजीक खुङक्याइ भजनसंग्रहइ ११५ मीःजीक ११८ थुपला प्रुःक्योकलाःम्ले भजन चीग लेःङ्गुके।
येशुइ खुङला पत्रुसकीइ इन्कार पेःउए लाःक्योक
(मत्ती २६:३१-३५; लुका २२:३१-३४; युहन्ना १३:३६-३८)
27येशुइ योबाक्याला लाःसी, “ख्योक्या थाम्जेरकीइ ङाःला पोःर्ती छ्योङेन एः चीलेलाःना पेज्याला एःन्डुले प्रुःदी एः,
‘ङाः कोःरालुला सेकेन एः,
ओःले लुःकक्या थाम्जेर पाःरास्यारा ओःङेन एः।’#जकरीया १३:७
28इःनाङ सीक्योकलाःम्ले सोम्बो लोःमीःजीक ङाः ख्योक्या भन्दा तोःङ्ला गालीलला डोगे।” 29पत्रुसकीइ खुङला लाःसी, “थाम्जेरकीइ पोःर्ती छ्योङ्नाङ ङाःदी ख्याला नाःमाङ पोःर्ती मेःन्डो।”
30येशुइ पत्रुसला लाःसी, “तेःन्दामरा ङाः ख्योला लाःके, ङार्तो ङामु थाङ्मा ङी च्याःबु प्रेःचे तोःङ्ला ख्योइ थाङ्मा सुम ङाःला ङोःमेसेए लाःकेन एः।” 31इःनाङ पत्रुसकीइ ताःरुङ माःङ्बु डेपी पेःदी लाःसी, “ङाः ख्या ङीमुरा सीकोःनाङ ख्याला ङोःमेसेए लाःती नाःमाङ मेःलाःप्केन एः।” ओःले राःङ्सा थाम्जेर योबाक्याइयाङ ओःन्डुरा लाःसी।
येशुइ गेतसमनीला प्रार्थना पेःक्योक
(मत्ती २६:३६-४६; लुका २२:३९-४६)
32ओः तीङ्ला येशु राःङगीइ योबाक्या ङीमु गेतसमनी मीःन पेःक्योक ठाउँला काःल्सी। ओःला लेप्ती येशुइ योबाक्याला लाःसी, “ङाः काःल्दी प्रार्थना पेःमाःसीःङ्थुप ख्योक्या दीलारा तेः।” 33इःनाङ पत्रुस, याकुब ओःले युहन्नालादी येशुइ राःङ ङीमुरा खेर्सी। खुङगीइ सेम तुःङालगीइ माःङ्बुरा छाबाछुबे काःल्सी। 34ओःले येशुइ योबाक्याला लाःसी, “ङाःइ सेम तुःङालगीइ छाबाछुबे काःल्दी नीङरा केःटोरारा काःल्देरा एः। ख्योक्या दीलारा ङीचु माःलोबा तेः।” 35ओःले येशु तीबी चीग फार्ला काःल्दी पीमु चुसी ओःले ओःङ्खुउए लाःना खुङगीइ खुर्कोःन तुःक्पु खुङलाःम्ले तेङ्तेर लाःती कोन्ज्योला प्रार्थना पेःसी। 36खुङगीइ एःन्डुले प्रार्थना पेःसी, “ए आबा, ए ङाःइ आबा, ख्याइ थाम्जेर ताम पेःखुए। दीखो तुःक्पुइ मेःन्ज्या ङाःलाःम्ले तेङ्तेर। इःनाङ ङाःइ सेम थेक्योक ताम मीःङे, ख्याइ सेम थेक्योक ताम पेःदो।”
37येशु लोःदी ओःङ्गासुना मेःन्दा सुम योबाक्या ङीचु लोःदी तेःक्योक फ्रेसी। खुङगीइ पत्रुसला लाःसी, “सीमोन, ची ख्यो ङीचु लोःक्योक? ख्यो घण्टा चीगकाङ ङीचु माःलोबा तेःमाःखुबा? 38च्यागाताःक्पु पेःदी तेः ओःले परीक्षाला मालेप्च्युक लाःती प्रार्थना पेःदो। ख्योक्याइ याःबु पेःजे नी सेम थेती एः, इःनाङ ख्योक्याइ जुबु कम्जोर एः।”
39येशु फीर्च्या लोःदी काःल्सी ओःले ओःन्डुलेरा प्रार्थना पेःसी। 40ओःले फीर्च्या योबाक्या एःक्योक ठाउँला लोःदी ओःङ्गासुना खुङक्या फीर्च्या ङीचु लोःदी तेःक्योकरा फ्रेसी। खुङक्याइ ङीचुइ पेःगासुना मी तारामाःखु ओःले खुङक्याइ लेःन तेर्चेला चीङ ताम माःसे।
41खेप सुमगीइ पाली योबाक्या एःक्योक ठाउँला लोःदी ओःङ्गासुना येशुइ लाःसी, “ची ख्याक्या ताःरुङ ङ्याल्देरा ओःले ङाःल सोदेरा एःपा? ताः दाङ्सी। ङाः मीःइ पुःला जुम्दी माःताक्पा मीःक्याइ लाःक्पाला तेर्केन तीःजी काःल्सीःङ्दी एः। 42ताः लोःङ, डोगा! तदो, ङाःला तुःक तेर्केन मीः ओःङ्सीःङ्दी एः।”
येशुला जुम्क्योक
(मत्ती २६:४७-५६; लुका २२:४७-५३; युहन्ना १८:३-१२)
43येशु ताम लाःतेरा एःकासुना चीङ्ङी योबाक्या नाःङ्ले यहुदा लाःकेन मेःन्दा चीग योबादी पोर्चोम चीग मीःक्या ङीमु ओःला ओःङ्सी। खुङक्याइ पेःर्काक्या रा तरवारक्या खुर्ती एःके, ओःले खुङक्याला छेस्यो पुजाहारीक्या, छ्येइ ठीमगीइ लोबेनक्या ओःले छेस्यो मीःक्याइ ताङ्दी एःके। 44येशुला तुःक तेर्केन यहुदाइ ओः मीःक्यला एःन्डु लाःती एःके, “काःखोला ङाःइ च्य्वाक पेःबा ओःखोरा येशु इःङे, ओःखोलारा जुम्दो ओःले याःबुले ताःम्दी खेर।” 45यहुदा लेप्लुङम्याःपा सरासर येशुसाःला काःल्दी “लोबेन!” लाःती खुङगीइ डाम्बाला च्य्वाक पेःसी। 46ओः सोङ्गारा, खुङक्याइ येशुला जुम्सी। 47इःनाङ थामालारा लाःङ्दी तेःक्योकक्या नाःङ्ले मेःन्दा चीग योबाइ तरवार तेङ्सी ओःले चोइ पुजाहारीइ लाबुला क्याःप्ती खुङगीइ नाम्ज्यो तुप्ती चेतेर्सी।
48येशुइ खुङक्याला लाःसी, “ची ङाः च्याःक्पा इःङेरा ख्योक्याइ ङाःला जुम्जेला तरवारक्या ओःले पेःर्काक्या खुर्ती ओःङ्क्योक? 49ङाः ङीःमारी टाःङ्मा कोन्ज्योइ मन्दीरला ख्योक्याला लोप्तेरा एःके, ओःलेङ ख्योक्याइ ङाःला जुम्जे माःछोल। इःनाङ छ्येइ पेज्याला प्रुःक्योक ताम छाङ्राकोःउए।” 50ओःले थाम्जेर योबाक्याइ येशुला पोःर्ती छ्योङ्सी।
51राःङगीइ जुबुला सुतीइ केःला चीग्रा केःङ्क्योक मेःराङ चीग स्यारा मीः येशुइ तीङ्ला ओःङ्सी ओःले खुङक्याइ ओःखोलाङ जुम्जे छोल्सी। 52इःनाङ खुङगीइ राःङगीइ केःलारा पोःर्ती चीःनाङ्मुरा छ्योङ्सी।
महासभाइ तोःङ्ला येशु
(मत्ती २६:५७-६८; लुका २२:५४-५५,६३-७१; युहन्ना १८:१३-१४,१९-२४)
53खुङक्याइ येशुला चोइ पुजाहारीइ खीमला खेर्सी। ओःले छेस्यो पुजाहारीक्या, छ्येइ ठीमगीइ लोबेनक्या ओःले राःङ्सा छेस्यो मीःक्या ओःला जोम्सी। 54पत्रुसदी थारीङ्बुलेरा येशुला ब्य्राङ्देरा छेस्यो पुजाहारीइ खीमगीइ इल्दोक नाःङ्ला स्युःसी ओःले खीम ह्रुङेनक्या ङीमु तेःती मेः तुःगाला स्युःसी।
55छेस्यो पुजाहारीक्या ओःले थाम्जेर महासभाइ मीःक्याइ येशुला सेचेला खुङगीइ वीरुद्धला दास्यीक्या छोल्गाला स्युःसी। इःनाङ खुङक्याइ दास्यी चीगकाङ फ्रेमाःखु। 56येशुइ वीरुद्धला माःङ्बुरा पाङ्बु मीःक्याइ येशुइ वीरुद्धला स्योप क्युःर्सी, इःनाङ खुङक्याइ लाःक्योक ताम माःडीक। 57ओः तीङ्ला काःजे मीःक्यादी लाःङ्दी येशुइ वीरुद्धला माःताक्पा च्याःङ्गाला स्युःसी। खुङक्याइ एःन्डु लाःसी, 58“दीखोइ एःन्डु लाःक्योक ङीःइ कोःसी, ‘मीःइ लाःक्पाइ जोक्योक कोन्ज्योइ मन्दीर ङाः रोम्ङे, ओःले ङाः राःङ्सा मन्दीर मीःक्या बीनारा ङीःमा सुमला जोसीःङे।’” 59दीखुङक्याइ लाःक्योक तामाङ माःडीक।
60ओःले चोइ पुजाहारी थाम्जेरकीइ तोःङ्ला लाःङ्सी ओःले येशुला टीःसी, “ची ख्यो ङीमु चीङ लेःन म्याःपा? दी मीःक्याइ ख्योइ वीरुद्धला च्याःङ्क्योक माःताक्पा ची इःम्बा?” 61इःनाङ येशु खाजुमरा तेःसी ओःले खुङगीइ चीङ लेःन मालो। फीर्च्या चोइ पुजाहारी खुङला टीःसी, “ची ख्यो तेःन्दामरा चाङ्मा कोन्ज्योइ पुः थार्च्युगेन ख्रीष्ट इःङे?” 62येशुइ लेःन लोदी लाःसी, “ङाः इःङे, ओःले ख्याक्याइ ङाः मीःइ पुःला छ्योम्बो ल्हे एःक्योक कोन्ज्योइ च्याःबु लाःक्पाछ्योले तेःक्योक ओःले नाःम्खालीङलाःम्ले मुक्पा ङीमु ओःङ्क्योक थोङेन एः।” 63दी ताम कोःदी चोइ पुजाहारीइ सीःताङगीइ राःङगीइ केःला राल्सी ओःले लाःसी, “ताः उःला राःङ्सा दास्यी ची कोःपा रा? 64दीखोइ नी कोन्ज्योइ वीरुद्धला इश्वर नीन्दा पेःक्योक ख्याक्याइ कोःसी। ख्याक्याइदी ची ठीवा चेपाले?” ओःले खुङक्या थाम्जेरकीइ येशुला मृत्युदण्ड तेर्कोः लाःकेन तामला डीक्सी। 65ओःले खुङक्या नाःङ्ला मेःन्दा काःजेइदी खुङला छेमाक क्याःप्तेरा खुङगीइ मी केःला चीगकीइ कातेर्सी ओःले रोप्तेरा लाःसी, “ख्यो कोन्ज्योइ लेःङ्गो तेर्केन्दी इःङे लाःना, ङीःला लोःप ले, ख्योला सुइ रोप्पा।” ओःले थेक्याइ खुङला खेर्सी ओःले रोप्सी।
पत्रुसकीइ येशुला इन्कार पेःक्योक
(मत्ती २६:६९-७५; लुका २२:५६-६२; युहन्ना १८:१५-१८,२५-२७)
66पत्रुस ताःरुङ वाःला इल्दोकला एःकासुनारा चोइ पुजाहारीइ मेःन्दा चीग पेःन्पीःजा लाबु खुङगीइ सुःरला ओःङ्सी। 67ओःले खुङगीइ पत्रुसला मेः तुःदी तेःक्योक थोङ्दी याःबुले तासी ओःले लाःसी, “ख्याङ नी नासरतकीइ येशु ङीमुरा एःके, मीःङे ले?”
68पत्रुसकीइ लेःन लोदी लाःसी, “ख्योइ चीइ बारेला ताम लाःतेरा एःपा, ङाः नी चीङ मेसेए।” ओः तीङ्ला पत्रुस इल्दोककीइ कोःछ्योले काःल्सी ओःले ओःजेरा तीःजीला च्याःबु प्रेःसी।
69पत्रुसला कोःइ सुःरला थोङ्दी ओः लाबु पेःन्पीःजाइ फीर्च्या ओःला लाःङ्दी तेःक्योक मीःक्याला लाःसी, “दीखो मीः तेःन्दामरा खुङक्यानाःङगीइ मेःन्दा चीग इःङे!”
70इःनाङ पत्रुसकीइ फीर्च्याङ मीःङे लाःसी। चीङ बेर तीङ्ला ओःला लाःङेन मीःक्याइ पत्रुसला लाःसी, “ख्यो तेःन्दामरा खुङक्यानाःङगीइ मेःन्दा चीग इःङे चीलेलाःना ख्योङ गालीललाःम्लेरा ओःङ्क्योक इःङे।”
71फीर्च्या पत्रुसकीइ ना लुदी लाःसी, “ङाःइ ख्याक्याला स्योप क्युःर्तु लाःना कोन्ज्योइ ङाःला दण्ड तेर्च्युक! ख्याइ लाःक्योक मीःला नी ङाःइ ङोःरामेसे एः!”
72ओःन्डु लाःलुङम्याःपा राःङ्सा थाङ्मा च्याःबु प्रेःसी ओःले येशुइ खुङला एःन्डु लाःक्योक ताम टेःम्बा साल्सी, “थाङ्मा ङी च्याःबु पेःचे तोःङ्ला ख्याइ ङाःला थाङ्मा सुमथुप ङोःमेसेए लाःती लाःकेन एः।” ओःले खुङ क्वाँ क्वाँ ङुःगाला स्युःसी।
Currently Selected:
मर्कुस 14: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
