मत्ती 24
24
कोन्ज्योइ मन्दीर रोःम्ङेन बारेला येशुइ लाःक्योक
(मर्कुस १३:१-१३; लुका २१:५-१९)
1येशु कोन्ज्योइ मन्दीरलाःम्ले थेङ्दी डोदेरा एःकासुना, खुङगीइ योबाक्या खुङला मन्दीरकीइ खीमक्या तेङ्जे लाःती खुङगीइ सुःर्ला ओःङ्सी। 2ओःले येशुइ खुङक्याला लाःसी, “ख्योक्याइ दी खीमक्या थोङ्देरा एः, मीःङे? तेःन्दामरा ङाः ख्योक्याला लाःके, दी खीमक्याइदी तोः चीगखाला राःङ्सा तोःङ माःपोःर्पा थाम्जेर रोम्दी क्युर्केन एः।”
3येशु जैतुन काःङला तेःकासुना योबाक्या खाजुम्बाले खुङसाःला ओःङ्दी टीःसी, “ङीःला लोःप, दी थाम्जेर तामक्या नाःम ओःङेन एःपा? ओःले ख्या ओःङ्जे छोल्दी एः ओःले जाम्बुलीङगीइ अन्त्य ओःङ्जे छोल्दी एः लाःती छोर्चेला ची चुःन्डुल थोङ्गुबा?”
4येशुइ खुङक्याला लाःसी, “च्यागाताःक्पु पेःदी तेः, ओः सोङ्गारा, सुइयाङ ख्योक्याला स्योप माःक्युःर्च्युक! 5चीलेलाःना माःङ्बुरा मीःक्या ङाःइ मीःनला ‘थार्च्युगेन ख्रीष्ट ङाःरा इःङे’ लाःतेरा ओःङेन एः ओःले खुङक्याइ माःङ्बुरा मीःक्याला स्योप क्युःर्केन एः। 6ख्योक्याइ माकक्या क्याःप्क्योक ओःले थारीःङ्बुइ माकक्याइ बारेला हल्लाक्या कोःगेन एः, इःनाङ ओः तेःकासु माःजी। ओः थाम्जेर तामक्या ओःङ्रा कोःउए, इःनाङ ओः तेःकासुरादी जाम्बुलीङगीइ अन्त्य मेःयोःङेन एः। 7देश चीगकीइ राःङ्सा देशला माक क्याःप्केन एः, क्याःल्खाप चीगकीइ राःङ्सा क्याःल्खापला माक क्याःप्केन एः। थाम्जेरछ्योले सायुक्या डोगेन एः ओःले माःङ्बुरा ठाउँक्याला मुःगी क्याःप्केन एः। 8इःनाङ दी थाम्जेर तामक्या नी तुःक्पु छुजे तोःङ्गीइ तामक्या चीग्रा इःङे।
9ओः तेःकासु खुङक्याइ ख्याक्याला जुम्ङेन एः, दण्ड तेर्केन एः ओःले सेकेन एः। ङाःला सेमल्हुक लुक्योक सोङ्गारा थाम्जेर मीःक्याइ ख्याक्याला ङ्याप्च्युक पेःगेन एः। 10ओः तेःकासु माःङ्बुरा मीःक्याइ सेमल्हुक लुजे पोःर्केन एः, खुङक्या चीगकीइ राःङ्साला तुःक तेर्केन एः, ङ्याप्च्युक पेःगेन एः। 11स्योप क्युर्ती कोन्ज्योइ लेःङ्गो तेर्केन मीःक्या माःङ्बुरा थेङेन एः ओःले माःङ्बुरा मीःक्याला स्योप क्युःर्केन एः। 12काःनाथेते माःइबा तामक्या फेल्देरा डोगेन एः ओःले माःङ्बुरा मीःक्याइ चीगकीइ राःङ्साला च्याःम्बु पेःजे पोर्केन एः। 13इःनाङ तीङथुपरा ङाःला सेमल्हुक लुदी तेःकेनक्यालादी थार्च्युगेन एः। 14थाम्जेर मीःक्याइ लागी पाङ्बु काःल्ज्युक लाःती नाःम्खालीङगीइ क्याःल्खापकीइ बारेला दीखो याःबु लेःङ्गो साजाम्बुलीङ काःङ्रा कोःच्युगेन एः। ओः तीङ्ला साजाम्बुलीङगीइ अन्त ओःङेन एः।
जीबा लाःङ्जे च्योःङ्रा तीःनाम
(मर्कुस १३:१४-२३; लुका २१:२०-२४)
15कोन्ज्योइ लेःङ्गो तेर्केन दानीएलगीइ लाःक्योक च्योःङ्रारा मन्दीरकीइ चाङ्मा ठाउँला ‘क्युक टोःजे च्योःङ्रा स्याः’ लाःङ्दी तेःक्योक ख्योक्याइ थोङेन एः। (दीखोइ लेःन टोःगेनक्याइरा सेज्युक।)#दानीएल ९:२७; ११:३१; १२:११ 16ओः तेःकासु यहुदीयाला एःकेनक्या काःङक्याछ्योले छ्योङ्ज्युक। 17खीम पाङ्ला एःकेनक्या खीम नाःङ्ला एःक्योक छेगाक्या लेःङ्गाला माःस्युबारा छ्योङ्ज्युक। 18सीःङला एःकेनक्या केःङेन केःला लेःङ्गाला खीम नाःङ्ला माःन्डोज्युक। 19ओः ङीःमाक्याला जुबु ङीःपाक काःल्क्योक पेःन्पीःजाक्या ओःले ङ्याल्दुङ पीःजाइ आमाक्याला छ्योम्बो काःबु ओःङेन एः। 20ख्योक्या सेर्काइ दावाक्याला की ङाःल सोगेन ङीःमाला छ्योङ माःकोःज्युक लाःती कोन्ज्योला प्रार्थना पेःदो। 21चीलेलाःना ओः ङीःमाक्याला ओःङेन च्योःङ्रा तुःक्पु नी कोन्ज्योइ जाम्बुलीङ जोमीःजीक ताःसेथुप नाःमाङ काःल्दी म्याः ओःले तीङ्लाङ नाःमाङ मेःयुङेन एः। 22इःनाङ कोन्ज्योइ ओः ङीःमाक्या घटाइतीदी एः, मीःङे लाःना नी सुङ सेन्जे मीःखुजेके। राःङगीइ दाम्क्योक मीःक्याइ पेःगासुना खुङगीइ ओः ङीःमाक्या घटाइतेर्ती एः।
23ओः तेःकासु ख्योक्याला सुइयाङ ‘तदो, थार्च्युगेन ख्रीष्ट नी दीला एः!’ की ‘खुङ ओःला एः!’ लाःसी लाःना ओः तामला सेमल्हुक मालु। 24चीलेलाःना स्योप क्युःर्केन थार्च्युगेन ख्रीष्टक्या ओःले स्योप क्युःर्ती कोन्ज्योइ लेःङ्गो तेर्केन मीःक्या थोङेन एः, ओःले खुङक्याइ छ्योम्बो छ्योम्बो चुःन्डुलक्या तेःङेन एः ओःले याःमाछाककीइ लेःगाक्या पेःगेन एः ओःले कोन्ज्योइ दाम्क्योक मीःक्यालाङ खुबाथुप स्योप क्युःर्चे छोल्गेन एः।
25ओः सोङ्गारा, कोःदो, ङाःइ ख्योक्याला थाम्जेर ताम तोःङ्मीःजीकरा लाःतेर्ती एः। 26मीःक्याइ ख्योक्याला ‘तादो, खुङ उजाड ठाउँला एः’ लाःसी लाःनाङ ख्योक्या ओःला माःन्डो। खुङक्याइ ‘तादो, खुङ नी नाःङ्ला कोठाला इःप्ती तेःती एः’ लाःसी लाःनाङ ख्योक्या ओः तामला सेमल्हुक मालु। 27चीलेलाःना ङाः मीःइ पुः ओःङेन ङीःमाला स्यार ओःले नुःपला बीजुली चम्कीइतीक्योक च्योःङ्रारा ङाः ओःङेन एः। 28काःला सीनु एःपा, ओःलारा गीद्धक्याङ जोम्गुए।#२४:२८ गीद्धक्या काःन्डुले सीनु एःसाला थोङ्गुबा, ओःन्डुलेरा मीःइ पुः ओःङ्क्योक मीःक्याइ थोङेन एः।
मीःइ पुः ओःङेन ङीःमाक्या
(मर्कुस १३:२४-२७; लुका २१:२५-२८)
29ओः तुःक्पुइ ङीःमाक्या सीःङ्मीःजीक आमा ङीःमा नाक्जुक ओःङेन एः ओःले दागार्मु मेस्यार्केन एः, कार्माक्या नाम्सार्गालाःम्ले ताःप्केन एः ओःले नाम्सार्गाला एःक्योक ल्हेक्याङ योःङेन एः।
30ओः तीङ्ला नाम्सार्गाला ङाः मीःइ पुः ओःङेन चुःन्डुल थोङेन एः। ङाः मीःइ पुःला मुक्पाला ल्हे ओःले छ्योम्बो महीमाला ओःङ्देरा पेःक्योक मीःक्याइ थोङ्दी जाम्बुलीङगीइ थाम्जेर क्युःपाइ मीःक्या ङुःगेन एः। 31ओःले क्याःलीङ फुगेन एः, ओःले ङाः ङाःइ स्वर्गदुतक्याला जाम्बुलीङगीइ थाम्जेरछ्योले ताङ्तेर्केन एः, ओःले खुङक्याइ कोन्ज्योइ दाम्क्योक मीःक्याला रुःप चीःगेन एः।
नेभाराइ तोःङ्बोलाःम्ले सेकोःन ताम
(मर्कुस १३:२८-३१; लुका २१:२९-३३)
32नेभाराइ तोःङ्बोलाःम्ले चीङ ताम लोप्तो। दीखोइ याःल्गाक्याइ टुसा बुगाला स्युःमीःजीक ओःले लाःप्ती लुगाला स्युःमीःजीक, छेपाइ दावाक्या ओःङ्जे छोल्दु लाःती ख्योक्याइ छोर्कुए। 33एःन्डुलेरा ङाःइ लाःक्योक दी तामक्या ओःङ्देरा पेःक्योक थोङ्गासुना ख्योक्याइ ङाः ओःङेन तीःनाम ओःङ्जे छोल्दु लाःती सेगेन एः। 34तेःन्दामरा ङाः ख्योक्याला लाःके, दी थाम्जेर तामक्या माःकालथुप दी तीःनामगीइ मीःक्या मीसीगेन एः। 35नाम्सार्गा ओःले जाम्बुलीङ तोर्ती डोगेन एः, इःनाङ ङाःइ लाःक्योक ताम नाःमाङ मेतोर्केन एः।
च्यागाताःक्पु पेःदी तेः
(मर्कुस १३:३२-३७; लुका १७:२६-३०,३४-३६)
36ओः ङीःमा रा तीःजी नाःम ओःङेन इःम्बा, ओःखो सुइयाङ छोर्ती म्याः, नाः नाःम्खालीङगीइ स्वर्गदुतक्याइ नाः कोन्ज्योइ पुःइ छोर्ती एःपा, ओःखो नी आबा कोन्ज्योइ चीग्रा छोर्ती एः। 37ङाः मीःइ पुः ओःङ्जे छोल्क्योक ङीःमाक्याला नोआइ तीःनामला काःल्क्योक च्योःङ्रारा ओःङेन एः। 38चीलेलाःना बाढी ओःङ्जे तोःङ्गीइ ङीःमाक्यामीःजीक नोआ टुःला स्युःगेन ङीःमाथुपाङ मीःक्याइ साःदेरा एःके, थुङ्देरा एःके ओःले याःर्का क्याःप्तेरा एःके। 39ओःले बाढी ओःङ्दी थाम्जेरला छ्यामदाक जोदी माःखेरथुप खुङक्या काँःदीइयाङ माःछोर। ङाः मीःइ पुः ओःङ्गासुनाङ ओःन्डुबारा ओःङेन एः। 40ओः तेःकासु मेःराङ ङी सीःङला लेःगा पेःदेरा पेःगासुना कोन्ज्योइ मेःराङ चीगला खेर्केन एः ओःले राःङ्सादीला पोःर्केन एः। 41लाःगोर थादी तेःक्योक मेःराङ ङी पेःन्पीःजाक्या नाःङ्ला कोन्ज्योइ मेःन्दा चीगला खेर्केन एः ओःले राःङ्सादीला पोःर्केन एः।
42ओः सोङ्गारा, च्यागाताःक्पु पेःदी तेः चीलेलाःना ख्योक्याइ प्रभु काँःदी ङीःमु ओःङेन इःम्बा, ओःखो ख्योक्याइ छोर्ती म्याः। 43इःनाङ दी ताम टेःम्बा साल्दी तेः, कुःङ्मु कुमेन ओःङेन तीःजी खीमगीइ ताःक्पुइ छोर्क्योक एःना नी खुङ माःङ्याल्बा पेःदी तेःचे एःके ओःले कुमेनला खीमला स्युःजे तेर्चे म्याःके। 44ओः सोङ्गारा, ख्योक्याङ च्यागाताःक्पु पेःदी तेः, चीलेलाःना ङाः मीःइ पुः ख्योक्याइ टेःम्बा माःसल्क्योक तीःजीला ओःङेन एः।
याःबु ओःले माःइबा लाबुक्या
(लुका १२:४१-४८)
45काःखो लाबुइदी सेम साङा ओःले नावा साल्बु एःपा, ओःखोला खोइ ताःक्पुइ राःङ्सा लाबुक्याला डीक्पु डीक्पु तीःजीला साःजे थुङ्जे तेर्केन लेःगा जीम्मा तेर्कुए। 46ओः खीमगीइ तोःप्ता लोःदी ओःङ्गासुना ओः लाबुइ ओःन्डुरा पेःदी तेःक्योक फ्रेसी लाःना खुङला काःजे मोलाम तेर्केन एः। 47तेःन्दामरा ङाः ख्योक्याला लाःके, तोःप्ताइ ओःखो लाबुला थाम्जेर नोःर क्युःक्याइ जीम्मा तेर्केन एः। 48इःनाङ ओःखो लाबु माःरीक्पा एः लाःना ओःखोइ राःङलारा एःन्डु लाःकेन एः, ‘ङाःइ तोःप्ता गेबुरा लोःदी मेःयोःङेन एः’ 49ओःले खुङगीइ राःङ ङीमुरा लेःगा पेःगेन राःङ्सा लाबुक्याला रोप्केन एः ओःले छ्याङ्सेरेक्या ङीमु साःजे थुङ्जे पेःगेन एः। 50ओःले ओःखोइ तोःप्तादी खोइ टेःम्बा मासल्क्योक ङीःमाला की तीःजीला लेप्केन एः। 51ओःखोला खोइ तोःप्पाइ चोक्पो दण्ड तेर्केन एः ओःले खोक्नाकक्या एःक्योक ङ्याल्वा च्योःङ्रा ठाउँला खुङला क्युर्तेर्केन एः। ओःला खोइ सो मुर्तेरा ङुःगेन एः।”
Currently Selected:
मत्ती 24: SYW
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
